Мамлакатимизда ёқилғи-энергетика ресурслари нархларининг шаклланишида босқичма-босқич бозор тамойилларига ўтиш даврида аҳолини давлат томонидан қўллаб-қувватлаш мақсадида қарор қиламан:

1. 2026/2027 йилги иситиш мавсумида аҳолининг эҳтиёжманд қатламини қўшимча моддий жиҳатдан қўллаб-қувватлаш мақсадида 2026 йил ноябрь ойида қуйидагиларга 1 миллион сўмдан бир марталик моддий ёрдам ажратилсин:

(а) Ижтимоий реестрга (кейинги ўринларда — Реестр) киритилган оилаларга;

(б) «маҳалла еттилиги» хулосаси асосида Реестрга киритилмаган, бироқ ижтимоий-иқтисодий ҳолати бўйича вазирлик ва идораларнинг ахборот тизимларига электрон сўров юбориш орқали олинган маълумотларга асосан Реестрга киритиш мезонларига мос келадиган оилаларга, жумладан:

(i) оиладаги жон бошига даромади минимал истеъмол харажатларининг 2 баробаридан ошмайдиган оилаларга;

(ii) марказлаштирилган иситиш тизимига уланган кўп қаватли уйларда яшовчи оилаларга. Бунда мазкур оилаларнинг ҳар бир аъзосига тўғри келадиган ўртача ойлик даромади Қорақалпоғистон Республикаси ва вилоятларда минимал истеъмол харажатларининг 2 баробаридан ҳамда Тошкент шаҳрида 3 баробаридан ошмаслиги лозим;

(iii) барқарор иш ўринларини яратиш ва аҳоли даромадларини ошириш бўйича туман (шаҳар) штаблари қарорига мувофиқ ҳар бир оила аъзосига тўғри келадиган ўртача ойлик даромади мазкур кичик банднинг «i» ва «ii» хатбошиларида назарда тутилган мезонлардан ошган айрим эҳтиёжманд оилаларга;

(в) Ўзгалар парваришига муҳтож бўлган ёлғиз яшовчи ҳамда ёлғиз кексалар ва ногиронлиги бўлган шахсларнинг реестридаги фуқароларга, шунингдек, етим ва ота-она қарамоғидан маҳрум бўлган болалар яшаётган оилаларга.

2. Белгилансинки, мазкур Фармоннинг 1 банди «б» кичик бандининг «i» хатбошисида назарда тутилган оилалар рўйхатини (кейинги ўринларда — қўшимча рўйхат) шакллантиришда «маҳалла еттилиги» томонидан:

(а) қўшимча рўйхатга киритилган оилалар сони тегишли туман (шаҳар) бўйича Реестрга киритилган оилалар сонининг 50 фоизидан ошмаслиги лозим;

(б) биринчи навбатда, боқувчисини йўқотган оилалар, аъзолари I ёки II гуруҳ ногиронлиги бўлган шахслардан иборат бўлган оилалар, ногиронлиги бўлган болаларни парваришлаётган оилалар, узоқ муддатли даволанишни талаб этадиган касалликлар билан касалланган шахслар, ўзгалар парваришига муҳтож бўлган шахслар яшовчи оилалар, оила аъзоси миграцияда бўлган оилалар, уч ва ундан ортиқ оила яшайдиган хонадонларда ҳамда газ таъминоти бўлмаган ва марказлаштирилган тартибда иситилмайдиган кўп қаватли уйларда яшовчи оилалар инобатга олинади.

3. Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари Ижтимоий ҳимоя миллий агентлиги ҳамда Ўзбекистон маҳаллалари уюшмаси билан биргаликда 2026 йил 15 ноябрга қадар «маҳалла еттилиги» томонидан республика бўйича ҳар бир маҳалла кесимида қўшимча рўйхатлар шакллантирилишини таъминласин.

4. Ёқилғи-энергетика соҳасида бозор тамойилларига босқичма-босқич ўтиш жараёнида:

(а) аҳолининг эҳтиёжманд қатламини давлат томонидан қўллаб-қувватлаш қамровини кенгайтириш мақсадида оилаларнинг эҳтиёжмандлигини аниқлашда оиладаги жон бошига тўғри келадиган ўртача ойлик даромад мезони қуйидагича оширилсин:

(i) электр энергияси ва табиий газ истеъмоли бўйича компенсация тайинлашда — минимал истеъмол харажатларининг 1,5 баробаридан 2 баробаригача;

(ii) кўмир сотиб олиш харажатларининг бир қисмини қоплаш учун моддий ёрдам ажратишда — минимал истеъмол харажатларининг 1 баробаридан 2 баробаригача;

(iii) «Саховат ва кўмак» жамғармаси маблағлари ҳисобидан коммунал харажатларни қоплаш ёки коммунал тўловлар бўйича мавжуд қарздорликни бартараф этишда ҳамда кўмир ёки бошқа ёқилғи маҳсулотлари билан таъминлаш харажатларини қоплашда — минимал истеъмол харажатларининг 1 баробаридан 2 баробаригача;

(б) аҳолига электр энергияси ва табиий газ истеъмоли бўйича базавий меъёр доирасидаги тарифлар билан базавий меъёрдан ортиқ истеъмол учун белгиланган тарифлар ўртасидаги фарқни компенсация қилиш муддати 2028 йил 1 апрелга қадар, кўмир сотиб олиш харажатларининг бир қисмини қоплаш учун моддий ёрдам тўлаш муддати эса 2029 йил 1 январга қадар узайтирилсин.

5. Вазирлар Маҳкамаси бир ҳафта муддатда суюлтирилган газ нархлари ўзгаришини инобатга олиб, табиий газ билан таъминланмаган ҳамда табиий газ етиб бориши қийин бўлган ҳудудларда яшовчи истеъмолчилар учун иситиш мавсумида электр энергияси истеъмолининг базавий меъёрини 200 кВт соатдан 350 кВт соатгача оширишни назарда тутувчи Ҳукумат қарорини қабул қилсин.

6. Белгилансинки, мазкур Фармонда назарда тутилган тадбирларни молиялаштириш 2026 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Ижтимоий ҳимоя миллий агентлигига ажратилган маблағлар доирасида амалга оширилади, 2027 йилдан бошлаб эса Давлат бюджети параметрларида назарда тутилади.

7. Энергия самарадорлиги миллий агентлиги, Ижтимоий ҳимоя миллий агентлиги аҳолининг энергия харажатларини камайтириш ва энергия самарадорлигини ошириш ҳамда қайта тикланувчи энергия манбаларидан фойдаланиш улушини ошириш мақсадида оғир тоифадаги маҳаллаларда яшовчи «давлат таъминотидаги оила» тоифасига мансуб 3 мингта оила хонадонларининг девор ва томларини изоляция қилиш, энергия тежамкор дераза ва эшик ҳамда қуёш панеллари ёки гелиоколлектор ўрнатиш ишларини давом эттириш бўйича Вазирлар Маҳкамасига таклиф киритсин.

8. Ижтимоий ҳимоя миллий агентлиги:

(а) электр энергияси ва табиий газ бўйича компенсация тўловлари ўз вақтида тўланишини;

(б) АТ «Халқ банки» ва АТ «Алоқабанк» билан биргаликда 2026 йил 30 ноябрга қадар бир марталик моддий ёрдам фуқароларнинг ижтимоий карталари ёки банк карталарига тўлиқ ва ўз вақтида тўланишини;

(в) Иқтисодиёт ва молия вазирлиги, Ўзбекистон миллий ахборот агентлиги, Ўзбекистон миллий телерадиокомпанияси ҳамда Оммавий ахборот воситалари учун контент тайёрлаш маркази билан биргаликда мазкур Фармоннинг мақсади, вазифалари ва ундан кутилаётган натижалар оммавий ахборот воситалари, интернет ва ижтимоий тармоқларда кенг ёритилишини ташкил қилсин.

9. Ўзбекистон маҳаллалари уюшмаси (Ғ. Мирзаев), Ижтимоий ҳимоя миллий агентлиги (М. Оллоёров), Оммавий ахборот воситалари учун контент тайёрлаш маркази (Қ. Ахмедов), Ўзбекистон миллий телерадиокомпанияси (А. Джурабаев)нинг:

(а) камбағал оилалар ва аҳолининг эҳтиёжманд қатламини қўшимча қўллаб-қувватлаш чоралари билан тўлиқ қамраб олиш мақсадида маҳаллаларда манзилли тарғибот ишларини кучайтириш;

(б) аҳолига моддий ёрдам ажратишда маҳалла раислари томонидан шаффофлик ва адолатлилик таъминланишини кафолатлаш бўйича жавобгарлиги белгилансин.

10. Қуйидагилар:

(а) Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимлари — бир марталик моддий ёрдамни тўлаш бўйича қўшимча рўйхатларнинг тўғри шакллантирилишига шахсан жавобгар этиб белгилансин;

(б) Бош прокурор ўринбосари И. Адхамов — мазкур Фармонга мувофиқ ажратиладиган маблағларнинг мақсадли ишлатилиши устидан доимий назорат ўрнатсин.

11. Ўзбекистон Республикаси Президентининг айрим ҳужжатларига иловага мувофиқ ўзгартириш ва қўшимчалар киритилсин.

12. Иқтисодиёт ва молия вазирлиги, Ижтимоий ҳимоя миллий агентлиги манфаатдор вазирлик ва идоралар билан биргаликда бир ҳафта муддатда қонунчилик ҳужжатларига мазкур Фармондан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

13. Мазкур Фармон ижросини самарали ташкил қилишга масъул ва шахсан жавобгар этиб Бош вазир ўринбосари Ж.А. Қўчқоров ҳамда Ўзбекистон Республикаси Президентининг ижтимоий ҳимоя бўйича маслаҳатчиси — Ижтимоий ҳимоя миллий агентлиги директори М.П. Оллоёров белгилансин.

14. Фармон ижросини муҳокама қилиб бориш, ижро учун масъул ташкилотлар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов зиммасига юклансин.

1. Ўзбекистон Республикаси Президентининг 2025 йил 30 январдаги «Аҳолини ижтимоий ҳимоя қилиш тизимини молиялаштириш тартиб-таомилларини такомиллаштириш тўғрисида»ги ПФ-17 сон Фармонида:

(а) 1-банд «а» кичик бандининг биринчи хатбошиси қуйидаги таҳрирда баён этилсин:

«а) «Ижтимоий дафтарлар» жамғармалари орқали кўрсатиладиган ижтимоий ёрдамлар Ижтимоий реестрга киритилган оилалар, камбағал ва камбағалликка тушиш хавфи бор ҳамда бошқа эҳтиёжманд оилаларга туман (шаҳар) штаблари қарорлари асосида тақдим этилади»;

(б) 2-банд қуйидаги мазмундаги «г» кичик банд билан тўлдирилсин:

«г) «Ижтимоий дафтарлар» жамғармалари маблағлари ҳисобидан амалга ошириладиган ёрдам ва тадбирларнинг янги йўналишлари ҳамда уларнинг миқдорлари ва тартиблари, шу жумладан, амалдаги молиявий инструментларни тақдим этишнинг соддалаштирилган тартиби ва миқдорлари Бош вазир ўринбосари Ж.А. Қўчқоров томонидан тасдиқланади. Бунда тасдиқланган тартиб асосида «Ижтимоий дафтарлар» жамғармалари маблағлари ҳисобидан айрим ижтимоий ёрдам ва хизмат турлари туман (шаҳар) ҳокимликлари ҳузуридаги «Инфратузилма ва ижтимоий барқарорлик» жамғармалари орқали кўрсатилиши мумкин»;

(в) 4-банд ўз кучини йўқотган деб ҳисоблансин;

(г) 8-банднинг тўртинчи хатбошиси қуйидаги таҳрирда баён этилсин:

«Белгилансинки, мазкур бандга мувофиқ «Инфратузилма ва ижтимоий барқарорлик» жамғармаларига йўналтирилган маблағлардан фойдаланиш халқ депутатлари туман (шаҳар) кенгашлари қарорлари асосида амалга оширилади, бундан «Ижтимоий дафтарлар» жамғармалари маблағлари ҳисобидан «Инфратузилма ва ижтимоий барқарорлик» жамғармаларига ўтказиладиган мақсадли маблағлар ҳисобидан амалга ошириладиган харажатлар мустасно»;

(д) 1-илова «III. «Саховат ва кўмак» жамғармаси маблағлари ҳисобидан кўрсатиладиган ижтимоий ёрдамлар» бўлимининг 6 — 8 позициялари «Ижтимоий ёрдамни тақдим этишнинг талаб ва шартлари» устунининг 1 бандидаги «Ижтимоий реестрга киритилган оилаларга» сўзларидан кейин «ҳамда ойлик даромади оила аъзоларининг ҳар бирига минимал истеъмол харажатлари миқдорининг 2 бараваригача бўлган оилаларга***» сўзлари билан тўлдирилсин.

2. Ўзбекистон Республикаси Президентининг 2025 йил 2 апрелдаги «Ёқилғи-энергетика соҳасида бозор механизмларини жорий этишда эҳтиёжманд аҳолини давлат томонидан қўллаб-қувватлашнинг қўшимча чора-тадбирлари тўғрисида»ги ПҚ-134 сон қарори 1 бандининг биринчи хатбошиси қуйидаги таҳрирда баён этилсин:

«1. Белгилансинки, 2028 йил 1 апрелга қадар Ижтимоий реестрга (кейинги ўринларда — Реестр) киритилган, шунингдек, Реестрга киритилмаган, бироқ ижтимоий-иқтисодий ҳолати вазирлик ва идораларнинг ахборот тизимларига электрон сўров юбориш орқали олинган маълумотларга асосан Реестрга киритиш мезонларига тўғри келувчи, оиладаги жон бошига даромади минимал истеъмол харажатларининг 2 баробаригача бўлган оилаларга».