Ўзбекистон Республикасининг «Шахсга доир маълумотлар тўғрисида»ги Қонунига мувофиқ буюраман:

1. Шахсга доир маълумотларга ишлов беришнинг намунавий тартиби иловага мувофиқ тасдиқлансин.

2. Мазкур буйруқ расмий эълон қилинган кундан эътиборан кучга киради.

Ушбу Намунавий тартиб шахсга доир маълумотларга ишлов бериш ва ҳимоя қилиш тартибини, шахсга доир маълумотларга ишлов бериш принциплари, мақсадлари ҳамда шартларини, шахсга доир маълумотлар базасининг мулкдори ва (ёки) операторининг ҳуқуқ ва мажбуриятларини белгилайди.

1. Мазкур Намунавий тартибда қуйидаги асосий тушунчалар қўлланилади:

шахсга доир маълумотлар — муайян жисмоний шахсга тааллуқли бўлган ёки уни идентификация қилиш имконини берадиган, электрон тарзда, қоғозда ва (ёки) бошқа моддий жисмда қайд этилган ахборот;

шахсга доир маълумотлар субъекти (субъект) — шахсга доир маълумотлар ўзига тааллуқли бўлган жисмоний шахс;

шахсга доир маълумотлар базаси — таркибида шахсга доир маълумотлар мавжуд бўлган ахборот тизими тарзидаги маълумотлар базаси;

шахсга доир маълумотларга ишлов бериш — шахсга доир маълумотларни йиғиш, тизимлаштириш, сақлаш, ўзгартириш, тўлдириш, улардан фойдаланиш, уларни бериш, тарқатиш, узатиш, эгасизлантириш ва йўқ қилиш бўйича бир ҳаракатни ёки ҳаракатлар мажмуини амалга ошириш;

шахсга доир маълумотлар базасининг оператори (оператор) — шахсга доир маълумотларга ишлов беришни амалга оширувчи давлат органи, жисмоний ва (ёки) юридик шахс;

шахсга доир маълумотлар базасининг мулкдори (мулкдор) — шахсга доир маълумотлар базасига эгалик қилиш, ундан фойдаланиш ва уни тасарруф этиш ҳуқуқига эга бўлган давлат органи, жисмоний ва (ёки) юридик шахс;

учинчи шахс — субъект, мулкдор ва (ёки) оператор бўлмаган, аммо шахсга доир маълумотларга ишлов бериш бўйича ҳолатлар ёки муносабатлар орқали улар билан боғлиқ бўлган ҳар қандай шахс;

шахсга доир маълумотларни йиғиш — шахсга доир маълумотларни олиш билан боғлиқ ҳаракатлар;

шахсга доир маълумотларни тизимлаштириш — шахсга доир маълумотларни маълум бир тизимга бирлаштиришга қаратилган ҳаракат;

шахсга доир маълумотларни сақлаш — шахсга доир маълумотларнинг яхлитлиги, махфийлиги ва фойдаланиш имкониятини таъминлаш бўйича ҳаракатлар;

шахсга доир маълумотларни тарқатиш — шахсга доир маълумотларни номуайян доирадаги шахсларга ошкор этишга, шу жумладан шахсга доир маълумотларни оммавий ахборот воситаларида ҳаммага маълум қилишга, Интернет жаҳон ахборот тармоғига жойлаштиришга ёки шахсга доир маълумотлардан бирор-бир бошқа усул билан фойдаланиш имконини беришга қаратилган ҳаракатлар;

шахсга доир маълумотларни бериш — шахсга доир маълумотларни муайян шахсга ошкор этишга қаратилган ҳаракатлар;

шахсга доир маълумотларни блоклаш (чеклаш) — шахсга доир маълумотларга ишлов беришни вақтинча тўхтатиш (шахсга доир маълумотларни аниқлаштириш учун ишлов бериш зарур бўлган ҳоллар бундан мустасно);

шахсга доир маълумотлардан фойдаланиш — мулкдорнинг, операторнинг ва учинчи шахснинг фаолияти мақсадларини амалга оширишга қаратилган шахсга доир маълумотлар билан ҳаракатлар;

шахсга доир маълумотларни ўзгартириш ва (ёки) тўлдириш — шахсга доир маълумотлар базасида мавжуд бўлган шахсга доир маълумотлар қийматларини ўзгартириш ва (ёки) тўлдириш;

шахсга доир маълумотларни трансчегаравий узатиш — шахсга доир маълумотларни мулкдор ва (ёки) оператор томонидан Ўзбекистон Республикаси ҳудудидан ташқарига узатиш;

шахсга доир маълумотларни эгасизлантириш — амалга оширилиши натижасида шахсга доир маълумотларнинг муайян субъектга тегишлилигини аниқлаш имкони бўлмай қоладиган ҳаракатлар;

шахсга доир маълумотларни йўқ қилиш — амалга оширилиши натижасида шахсга доир маълумотларни тиклаш имкони бўлмай қоладиган ҳаракатлар;

биографик маълумотлар — субъектнинг фамилияси, исми, отасининг исми, жисмоний шахснинг шахсий идентификация рақами, туғилган йили ва жойи, манзили, касби тўғрисидаги, шунингдек биометрик, генетик ва махсус маълумотлар таркибига кирмайдиган шахсга доир бошқа маълумотлар;

биометрик маълумотлар — субъектнинг анатомик ва физиологик ўзига хос хусусиятларини тавсифловчи шахсга доир маълумотлар (бармоқ излари, юз кўриниши, кўз гавҳари, овоз хусусиятлари ва бошқалар);

генетик маълумотлар — субъектнинг наслдан-наслга ўтган ёки орттирилган хусусиятларига тааллуқли бўлган, субъектнинг биологик қиёфасини таҳлил қилиш ёки муқобил ахборот олиш имконини берадиган бошқа элементни таҳлил қилиш натижаси бўлган шахсга доир маълумотлар;

махсус маълумотлар — ирқий ёки ижтимоий келиб чиқишга оид маълумотлар, сиёсий, диний ёки дунёқарашга оид эътиқодлар, сиёсий партиялар ва касаба уюшмаларига аъзолик тўғрисидаги маълумотлар, шунингдек жисмоний ёки руҳий (психик) саломатликка тааллуқли маълумотлар, шахсий ҳаёт ва судланганлик тўғрисидаги шахсга доир маълумотлар.

2. Мазкур Намунавий тартиб шахсга доир маълумотларга ишлов бериш жараёнида мулкдорлар, операторлар, субъектлар ва учинчи шахслар ўртасида юзага келадиган муносабатларга нисбатан қўлланилади.

3. Шахсга доир маълумотларга ишлов беришнинг принциплари қуйидагилардан иборат:

инсон ва фуқаронинг конституциявий ҳуқуқ ва эркинликларига риоя этиш;

шахсга доир маълумотларга ишлов бериш мақсадлари ва усулларининг қонунийлиги;

шахсга доир маълумотларнинг аниқлиги ва ишончлилиги;

шахсга доир маълумотларнинг махфийлиги ва ҳимоя қилинганлиги;

субъектлар, мулкдорлар ва операторлар ҳуқуқларининг тенглиги;

шахс, жамият ва давлатнинг хавфсизлиги.

4. Шахсга доир маълумотларга ишлов бериш қуйидаги ҳолларда амалга оширилади:

субъект бу маълумотларга ишлов беришга розилик берганда;

субъект тараф бўлган шартномани бажариш учун бу маълумотларга ишлов бериш ёки шундай шартнома тузилгунига қадар субъектнинг сўровига биноан чоралар кўриш зарур бўлганда;

мулкдор ва (ёки) операторнинг қонунчиликда белгиланган мажбуриятларини бажариш учун бу маълумотларга ишлов бериш зарур бўлганда;

субъектнинг ёки бошқа шахснинг қонуний манфаатларини ҳимоя қилиш учун бу маълумотларга ишлов бериш зарур бўлганда;

мулкдор ва (ёки) операторнинг ёки учинчи шахснинг ҳуқуқлари ва қонуний манфаатларини амалга ошириш учун ёхуд шахсга доир маълумотлар субъектларининг ҳуқуқлари ва қонуний манфаатлари бузилмаслиги шарти билан ижтимоий аҳамиятга молик мақсадларга эришиш учун бу маълумотларга ишлов бериш зарур бўлганда;

шахсга доир маълумотларга уларни мажбурий равишда эгасизлантириш шарти билан статистик ёки бошқа тадқиқот мақсадларида ишлов берилганда;

агар бу маълумотлар ҳамма фойдаланиши мумкин бўлган манбалардан олинган бўлса.

Субъектнинг ҳуқуқларини ва қонуний манфаатларини ҳимоя қилиш мақсадида шахсга доир маълумотларга ишлов бериш зарур бўлган тақдирда, бу маълумотларга ишлов беришга розилик олиш мумкин бўлган пайтга қадар субъектнинг розилигисиз йўл қўйилади.

5. Мулкдор ва (ёки) оператор ёхуд учинчи шахс томонидан шахсга доир маълумотларга ишлов беришда қуйидаги талабларга риоя қилиниши лозим:

шахсга доир маълумотларга ишлов беришни аниқ ва олдиндан белгиланган мақсадларда амалга ошириш;

шахсга доир маълумотларга ишлов беришда мақсадлари бир-бирига мос келмайдиган шахсга доир маълумотлар базаларини бирлаштиришга йўл қўйилмаслик;

шахсга доир маълумотларнинг аниқлиги, ишончлилиги, яхлитлиги ва бутлигини таъминлаш;

агар шахсга доир маълумотларни сақлаш муддати қонунчиликда ёки субъект билан тузилган шартномада белгиланмаган бўлса, шахсга доир маълумотларни уларга ишлов бериш мақсадларига эришиш муддатидан ортиқ бўлмаган муддатга сақлаш;

агар қонунчилик ҳужжатларида бошқача қоида назарда тутилган бўлмаса, ишлов берилаётган шахсга доир маълумотлар ишлов бериш мақсадларига эришилгандан сўнг ёки ушбу мақсадларга эришиш зарурати йўқолган тақдирда йўқ қилиниши ёки эгасизлантирилишини таъминлаш.

6. Шахсга доир маълумотларга ишлов беришнинг мақсадлари мулкдор ва (ёки) операторнинг фаолиятини тартибга солувчи норматив-ҳуқуқий ҳужжатлар, низомлар, таъсис ҳужжатлари ёки бошқа ҳужжатлар билан белгиланади ҳамда Ўзбекистон Республикасининг «Шахсга доир маълумотлар тўғрисида»ги Қонунига мувофиқ бўлиши керак.

7. Шахсга доир маълумотлар ҳамма фойдаланиши мумкин бўлган ва ҳамма фойдаланиши мумкин бўлмаган маълумотларга бўлинади.

Субъектнинг розилиги билан эркин фойдаланилиши мумкин бўлган ёки махфийликка риоя этишга доир талаблар татбиқ этилмайдиган шахсга доир маълумотлар ҳамма фойдаланиши мумкин бўлган шахсга доир маълумотлардир. Улар таркибига шахсга доир маълумотларнинг ҳамма фойдаланиши мумкин бўлган манбаларда, жумладан электрон ахборот ресурсларида, оммавий ахборот воситаларида ва бошқа манбаларда жойлаштирилган шахсга доир маълумотлар киради.

Ҳамма фойдаланиши мумкин бўлмаган шахсга доир маълумотлар эркин фойдаланилиши учун субъектнинг розилиги берилмаган ҳамда қонунчилик ҳужжатлари билан фойдаланилиши чекланган шахсга доир маълумотлардир. Улар таркибига субъектга тегишли бўлган биографик, биометрик, генетик, махсус ва бошқа маълумотлар кириши мумкин.

8. Шахсга доир маълумотларга ишлов бериш мулкдор ва (ёки) оператор, шунингдек учинчи шахс томонидан субъект ёки унинг қонуний вакилининг розилиги билан амалга оширилади, ушбу Намунавий тартибнинг 4-банди учинчи — саккизинчи хатбошларида назарда тутилган ҳоллар бундан мустасно.

9. Шахсга доир махсус маълумотларга ишлов бериш учун субъектнинг розилиги ёзма шаклда ёки электрон ҳужжат тарзида олиниши лозим.

Офертада (оммавий шартномада) шахсга доир маълумотларга ишлов беришнинг мақсадлари аниқ кўрсатилган тақдирда, офертани (оммавий шартномани) қабул қилиш (тасдиқлаш) субъектнинг шахсга доир маълумотларга ишлов беришга розилиги деб ҳисобланади.

Субъектнинг мулкдор ва (ёки) операторнинг хизматларидан фойдаланиш учун белгиланган талаб ва шартларга розилик бериши мулкдор ва (ёки) оператор томонидан субъектнинг шахсга доир маълумотларига ишловга беришга розилиги ҳисобланади.

10. Субъект ёки унинг қонуний вакили шахсга доир маълумотларга ишлов бериш тўғрисидаги розилигини исталган вақтда қайтариб олиш ҳуқуқига эга.

Бунда, шахсга доир маълумотларга ишлов беришни тўхтатиш ҳақида ариза (хабарнома) келиб тушган кундан кейинги иш кунидан кечикмай мулкдор ва (ёки) оператор томонидан субъектнинг шахсга доир маълумотлари йўқ қилиниши лозим.

11. Шахсга доир маълумотларга ишлов бериш учун субъектнинг розилигида қуйидаги маълумотлар кўрсатилиши лозим:

1) операторнинг номи, СТИРи (жисмоний шахснинг фамилияси, исми ва отасининг исми, ЖШШИР);

2) субъектнинг фамилияси, исми ва отасининг исми, шахсини тасдиқловчи ҳужжат маълумотлари;

3) шахсга доир маълумотларга ишлов бериш мақсадлари;

4) субъектнинг ишлов беришга розилик берилаётган шахсга доир маълумотлари рўйхати;

5) шахсга доир маълумотларга ишлов беришга розилик амал қиладиган муддат ёки давр;

6) шахсга доир маълумотларни учинчи шахсларга бериш ва (ёки) ушбу маълумотларни трансчегаравий узатишга розилиги;

7) шахсга доир маълумотларни ҳамма фойдаланиши мумкин бўлган манбаларда тарқатишга розилиги;

8) бошқа маълумотлар.

12. Ҳамма фойдаланиши мумкин бўлган шахсга доир маълумотларни йиғиш учун субъект ёки унинг қонуний вакилининг розилигини олиш талаб этилмайди.

Шахсий ҳаёт дахлсизлиги ёки эҳтиёт чоралари сифатида ўрнатилган видеотасвирга олувчи воситалар ёрдамида йиғилган маълумотлар уларга аниқ мақсадларда ишлов бериш назарда тутилмаган тақдирда шахсга доир маълумотларни йиғиш ҳисобланмайди. Бунда, ушбу видеотасвирга олувчи воситалар ёрдамида йиғилган маълумотларни тарқатишга йўл қўйилмайди.

13. Шахсга доир маълумотларни тизимлаштириш тартиби ва принциплари мулкдор ва (ёки) оператор томонидан мустақил равишда белгиланади.

14. Шахсга доир маълумотларни сақлаш шахсга доир маълумотларни йиғиш чоғида илгари билдирилган мақсадлар талаб этадиган даражада субъектни идентификация қилиш имконини берадиган шаклда амалга оширилади.

15. Шахсга доир маълумотларни ўзгартириш ҳамда тўлдириш мулкдор ва (ёки) оператор томонидан субъектнинг ёки унинг қонуний вакилининг аризаси (сўрови) асосида ҳамда қонунчилик ҳужжатларида назарда тутилган бошқа ҳолларда амалга оширилади.

Шахсга доир маълумотларни ўзгартириш ва тўлдириш субъектнинг аризаси (сўров) берилган пайтдан эътиборан уч кунлик муддатдан кечиктирмай мулкдор ва (ёки) оператор томонидан амалга оширилади ҳамда бу ҳақда субъект хабардор қилинади.

Ҳақиқатга тўғри келмайдиган шахсга доир маълумотларни ўзгартириш ва тўлдириш бундай номувофиқлик аниқланган пайтдан эътиборан дарҳол амалга оширилади.

16. Шахсга доир маълумотлардан фойдаланиш мулкдор ва (ёки) оператор, шунингдек учинчи шахс томонидан фақатгина уларни йиғишнинг илгари кўрсатилган мақсадлари учун амалга оширилиши керак.

Мулкдор ва (ёки) операторнинг, шунингдек учинчи шахснинг шахсга доир маълумотларга ишлов бериш билан боғлиқ бўлган ходимлари томонидан шахсга доир маълумотлардан фойдаланиш фақат уларнинг ўз касбий, хизмат ёки меҳнат мажбуриятларига мувофиқ амалга оширилиши керак.

17. Шахсга доир маълумотларни йиғишнинг илгари билдирилган мақсадларидан четга чиқилган ҳолларда, ушбу маълумотларни тарқатиш субъектнинг розилиги билан амалга оширилади.

18. Давлат органлари томонидан шахсга доир маълумотлар сўраб олинганда шахсга доир маълумотлар субъектига бу ҳақида хабарнома юборилади (бундан давлат сири ва қонунчиликка мувофиқ фойдаланиш чекланган маълумотларни ўз ичига олган ҳолатлар мустасно).

Хўжалик бирлашмалари, давлат ташкилотлари ва муассасалари, нодавлат ташкилотларга шахсга доир маълумотлар унинг субъекти розилиги билан тақдим этилади.

19. Субъектни хабардор қилиш ва унинг розилигини қуйидаги ҳолларда амалга оширилмайди:

давлат органлари ўз ваколатларини амалга ошираётганда;

шахсга доир маълумотлар тарихий, статистик, социологик ёки илмий мақсадларда ишлов бериш учун берилганда;

шахсга доир маълумотлар ҳамма фойдаланиши мумкин бўлган манбалардан йиғилганда.

20. Шахсга доир маълумотларни трансчегаравий узатиш шахсга доир маълумотлар субъектларининг ҳуқуқлари бир хилда ҳимоя қилинишини таъминловчи чет давлатлар ҳудудига амалга оширилади.

21. Шахсга доир маълумотларнинг бир хилда ҳимоя қилинишини таъминламайдиган хорижий давлатлар ҳудудига трансчегаравий узатиш қуйидаги ҳолларда амалга оширилиши мумкин:

1) субъектнинг ўз шахсга доир маълумотларини трансчегаравий узатиш бўйича розилиги мавжуд бўлганда;

2) Ўзбекистон Республикасининг конституциявий тузумини ҳимоя қилиш, жамоат тартибини сақлаш, фуқароларнинг ҳуқуқлари ва эркинликларини, аҳолининг соғлиғи ва маънавиятини муҳофаза қилиш зарур бўлганда;

3) Ўзбекистон Республикасининг халқаро шартномаларида назарда тутилган ҳолларда.

22. Тарихий, статистик, социологик, илмий тадқиқотлар ўтказиш учун шахсга доир маълумотларга ишлов берилаётганда мулкдор ва оператор, шунингдек учинчи шахс бу маълумотларни эгасизлантириши шарт.

Шахсга доир маълумотларни эгасизлантириш учун субъектнинг розилигини олиш талаб этилмайди.

Шахсга доир маълумотларни эгасизлантириш шахсга доир маълумотларни тиклаш имкониятини истисно қилади.

23. Шахсга доир маълумотлар мулкдор ва (ёки) оператор, шунингдек учинчи шахс томонидан қуйидаги ҳолларда уч кун ичида йўқ қилиниши лозим:

1) шахсга доир маълумотларга ишлов бериш мақсадига эришилганда;

2) субъектнинг шахсга доир маълумотларга ишлов бериш учун берилган розилиги чақириб олинганда;

3) шахсга доир маълумотларга ишлов беришнинг субъект берган розилик билан белгиланган муддати ўтганда;

4) суднинг қарори қонуний кучга кирганда.

24. Субъект ҳақидаги шахсга доир маълумотларга ишлов бериш қонунчиликни бузган ҳолда амалга оширилганда, субъект ёки унинг қонуний вакилининг талабига, суд қарори ёки бошқа ваколатли давлат органининг талабига асосан бир иш куни ичида у сақланаётган манбадан йўқ қилиниши лозим.

25. Мулкдор ва (ёки) оператор:

шахсга доир маълумотлар тўғрисидаги қонунчиликка риоя этиши;

субъектнинг мурожаатига кўра унинг шахсга доир маълумотларига ишлов беришга тааллуқли ахборотни тақдим этиши;

ўзи вазифаларини бажариш учун зарур ва етарли бўлган шахсга доир маълумотлар таркибини тасдиқлаши;

шахсга доир маълумотларга ишлов беришдан кўзланган мақсадга эришилган тақдирда, шунингдек қонунчилик ҳужжатларида белгиланган бошқа ҳолларда уларни йўқ қилиш чораларини кўриши;

қонунчиликда назарда тутилган ҳолларда субъектнинг ўз шахсга доир маълумотларига ишлов бериш учун розилиги олинганлиги далилини тақдим этиши;

башарти янги маълумотларнинг ишончлилиги ҳужжатлар билан тасдиқланса, шахсга доир маълумотларни ўзгартириши ва (ёки) тўлдириши ёхуд бундай ўзгартириш ва (ёки) тўлдиришни киритиш имкони бўлмаган тақдирда бу маълумотларни йўқ қилиши;

шахсга доир маълумотларга ишлов бериш шартлари бузилганлиги тўғрисида ахборот мавжуд бўлган тақдирда, уларга ишлов беришни вақтинча тўхтатиши ёки уларни йўқ қилиши;

субъектнинг шахсга доир маълумотларига ишлов беришни вақтинча тўхтатиш ва (ёки) уларни йўқ қилиш учун субъект томонидан ҳужжатларни электрон тарзда бериш имкониятини таъминлаши;

шахсга доир маълумотлар ўзгартирилган, йўқ қилинган ва улардан фойдаланиш чекланган ҳолларда субъектни, шунингдек шахсга доир маълумотларга ишлов беришнинг бошқа иштирокчиларини ёзма шаклда хабардор қилиши;

давлат органлари томонидан шахсга доир маълумотлар сўраб олинганда, шахсга доир маълумотлар субъектига бу ҳақида хабарнома юбориши (бундан давлат сири ва қонунчиликка мувофиқ фойдаланиш чекланган маълумотларни ўз ичига олган ҳолатлар мустасно);

хўжалик бирлашмалари, давлат ташкилотлари ва муассасалари, нодавлат ташкилотларга шахсга доир маълумотлар унинг субъекти розилиги билан тақдим этиши;

ўз мулки бўлган ва (ёки) ишлов берилаётган шахсга доир маълумотлар базаларини рўйхатдан ўтказиши;

шахсга доир маълумотларни ҳимоя қилиш бўйича зарур ҳуқуқий, ташкилий ва техник чораларни кўриши шарт.

Мулкдор ва (ёки) оператор шахсга доир маълумотларга ишлов беришни қуйидаги ҳолларда учинчи шахсга топширишга ҳақли:

субъектнинг ёзма шаклдаги, шу жумладан электрон ҳужжат тарзидаги розилиги мавжуд бўлган тақдирда;

агар қарор мулкдор ва субъект ўртасидаги шартномани ижро этиш ёки илгари тузилган шартнома шартларини бажариш учун қабул қилинаётган бўлса;

қонунчиликда назарда тутилган ҳолларда.

26. Мулкдорнинг ва (ёки) операторнинг, шунингдек учинчи шахснинг шахсга доир маълумотларни ҳимоя қилиш бўйича мажбуриятлари шахсга доир маълумотларни йиғиш пайтидан эътиборан вужудга келади ва улар йўқ қилиб ташланган ёки эгасизлантирилган пайтга қадар амал қилади.

27. Мулкдор ва (ёки) оператор шахсга доир маълумотларга ишлов бериш ва уларни ҳимоя қилиш билан боғлиқ ишлар учун масъул бўлган таркибий бўлинмани ёки мансабдор шахсни белгилайди ҳамда унинг фаолиятини Шахсга доир маълумотларга ишлов беришнинг намунавий тартибига мувофиқ таъминлайди.

28. Шахсга доир маълумотлар хавфсизлигига бўлган таҳдид шахсга доир маълумотларга ишлов бериш жараёнида рухсатсиз, шу жумладан тасодифий кириш натижасида йўқ қилиш, ўзгартириш, блоклаш, нусха олиш, учинчи шахсларга рухсатсиз тақдим этиш, рухсатсиз тарқатиш ва бошқа ноқонуний хатти-ҳаракатларни амалга ошириш имкониятини яратадиган шартлар ва омиллар мажмуидир.

29. Мулкдор ва (ёки) оператор, шунингдек учинчи шахс шахсга доир маълумотларни ҳимоя қилиш бўйича қуйидагиларни таъминлайдиган ҳуқуқий, ташкилий ва техник чораларни кўради:

1) субъектнинг ўз шахсий ҳаётига аралашувдан ҳимоя қилиниш ҳуқуқи амалга оширилишини;

2) шахсга доир маълумотларнинг яхлитлигини ва бут сақланишини;

3) шахсга доир маълумотларнинг махфийлигига риоя этилишини;

4) шахсга доир маълумотларга қонунга хилоф равишда ишлов берилишининг олди олинишини.

30. Шахсга доир маълумотларни ҳимоя қилишни таъминлаш мақсадида мулкдор ва (ёки) оператор қуйидагиларни амалга ошириши керак:

1) шахсга доир маълумотларни ҳамма фойдаланиши мумкин бўлган ва ҳамма фойдаланиши мумкин бўлмаган маълумотларга ажратиши;

2) шахсга доир маълумотларга ишлов бериш ва улардан фойдаланиш тартибини белгилаши;

3) шахсга доир маълумотларга ишлов бериш ёки уларга кириш ҳуқуқига эга бўлган шахсларни белгилаши;

4) ахборот хавфсизлиги воситаларини ўрнатиш ҳамда ҳамма фойдаланиши мумкин бўлмаган шахсга доир маълумотларга ишлов берувчи техник воситаларнинг дастурий таъминотини янгилашни таъминлаши;

5) маълумотлар базасини бошқариш тизимларининг ҳодисалар журналини юритиши;

6) ҳамма фойдаланиши мумкин бўлмаган шахсга доир маълумотларга кириш ҳуқуқига эга бўлган фойдаланувчиларнинг ҳаракатларини қайд қилинишини таъминлаши;

7) ҳамма фойдаланиши мумкин бўлмаган шахсга доир маълумотлар яхлитлигини назорат қилиш воситаларини қўллаши;

8) субъектнинг розилиги мавжуд бўлганда ҳамма фойдаланиши мумкин бўлмаган шахсга доир маълумотларни хавфсиз алоқа каналлари ва (ёки) шифрлаш воситалари орқали бошқа шахсларга бериши, бундан қонунчилик ҳужжатлари билан назарда тутилган ҳоллар мустасно;

9) ҳамма фойдаланиши мумкин бўлмаган шахсга доир маълумотларни ишончли сақлаш учун криптографик ахборотни ҳимоя қилиш воситаларидан фойдаланишни таъминлаши;

10) ҳамма фойдаланиши мумкин бўлмаган шахсга доир маълумотлар билан ишлашда фойдаланувчиларни идентификация қилиш ва (ёки) аутентификация қилиш воситаларидан фойдаланиши;

11) агар мулкдор ва (ёки) оператор юридик шахс бўлса, шахсга доир маълумотларга ишлов беришни ташкил этувчи ваколатли шахсни тайинлаши ёки тузилмавий бўлинмани ташкил қилиши;

12) шахсга доир маълумотларга ишлов бериш ва уларни ҳимоя қилиш бўйича мулкдор ва (ёки) оператор сиёсатини белгилайдиган ички ҳужжатларни тасдиқлаши;

13) шахсга доир маълумотлар субъектининг мурожаатига асосан шахсга доир маълумотларни блоклаш ва йўқ қилиш тартибини белгилаши;

31. Шахсга доир маълумотларга ишлов бериш жараёнида ахборот хавфсизлигини ташкил этиш ва амалга ошириш Ўзбекистон Республикасининг ахборот хавфсизлиги соҳасидаги давлат стандартлари асосида амалга оширилади.

32. Мулкдор ва (ёки) операторлар шахсга доир маълумотларга маълумотлар базаларида ишлов беришда шахсга доир маълумотларнинг зарур ҳимоя қилинганлик даражасини белгилайди.

Шахсга доир маълумотларга маълумотлар базаларида ишлов беришда шахсга доир маълумотларнинг зарур ҳимоя қилинганлик даражасини белгилаш Ўзбекистон Республикаси Вазирлар Маҳкамасининг 2022 йил 5 октябрдаги 570-сон қарори билан тасдиқланган Шахсга доир маълумотларга ишлов беришда уларнинг ҳимоя қилинганлик даражасини белгилаш тўғрисидаги низомда белгиланган тартибда амалга оширилади.

33. Ушбу Намунавий тартиб талабларининг бузилишида айбдор бўлган шахслар қонунчиликда белгиланган тартибда жавобгар бўлади.