Аҳолининг ҳуқуқий маданиятини ошириш, юридик ва жисмоний шахсларнинг меъёрий-ҳуқуқий ҳужжатлардан кенг фойдаланишини таъминлаш, жамиятни ҳуқуқий ахборотлар билан таъминлаш тизимини такомиллаштириш ва амалдаги қонун ҳужжатларини босқичма-босқич туркумлашни ташкил этиш мақсадида Вазирлар Маҳкамаси қарор қилади:

1. 2000 йил 1 сентябрдан бошлаб Ўзбекистон Республикасининг барча меъёрий-ҳуқуқий ҳужжатлари давлат ҳисоби жорий этилсин.

Ўзбекистон Республикаси меъёрий-ҳуқуқий ҳужжатларининг давлат ҳисобини юритиш функцияси Ўзбекистон Республикаси Адлия вазирлигига юклансин.

Ўзбекистон Республикаси Адлия вазирлиги икки ой муддатда Ўзбекистон Республикаси меъёрий-ҳуқуқий ҳужжатларининг давлат ҳисоби тўғрисидаги Низомни ишлаб чиқсин ва тасдиқласин.

3. Меъёрий-ҳуқуқий ҳужжатларни тарқатиш тартиби тўғрисидаги Низом 2-иловага мувофиқ тасдиқлансин.

4. Ўзбекистон Республикаси Адлия вазирлиги:

Ўзбекистон матбуот ва ахборот агентлиги ва «Матбуот тарқатувчи» акциядорлик компанияси билан биргаликда Ўзбекистон Республикаси қонун ҳужжатлари тўпламининг ҳужжатлар тушишига қараб, даврий равишда, қоидага кўра, бир ҳафтада бир марта нашр этилишини, шунингдек, уларнинг очиқ обуна йўли билан тарқатилишини таъминласин.

Қонун ҳужжатлари маълумотлари миллий базаси (Ўзбекистон Республикаси қонун ҳужжатлари маълумотларининг туркумланган ягона электрон базаси)нинг шакллантирилиши ва ишлашини таъминлаш учун Ўзбекистон Республикаси Фан ва техника давлат қўмитаси, Ўзбекистон Почта ва телекоммуникациялар агентлиги ҳамда «UzPAK» маълумотларни узатиш давлат тармоғини ривожлантириш ва ундан фойдаланиш корхонаси билан биргаликда 2000 йил 1 ноябргача Адлия вазирлиги марказий аппаратининг маҳаллий компьютер тармоғини ишга туширсин;

Ўзбекистон Республикаси Фан ва техника давлат қўмитаси билан биргаликда 2000-2001 йиллар мобайнида Қонун ҳужжатлари маълумотлари миллий базасини шакллантиришга доир ишларни амалга оширсин, шунингдек тендер асосида тегишли ахборот-қидириш тизимини ишлаб чиқсин ва жорий этсин.

5. Ўзбекистон Почта ва телекоммуникациялар агентлиги ҳамда «UzPAK» маълумотларни узатиш давлат тармоғини ривожлантириш ва ундан фойдаланиш корхонаси:

Ўзбекистон Республикаси Адлия вазирлиги билан биргаликда вазирлик меъёрий-ҳуқуқий ҳужжатлар матнларини электрон почта тизими орқали тегишли органлардан олишини 2000 йил 1 сентябргача ташкил этсинлар;

яратилаётган маълумотлар электрон базасидан давлат ҳокимияти республика ва маҳаллий органлари, бошқа базадан фойдаланувчиларнинг тармоқ орқали фойдалана олишларини 2000 йил 1 ноябргача таъминлашда Ўзбекистон Республикаси Адлия вазирлигига ёрдам кўрсатсинлар.

6. Ўзбекистон Республикаси Адлия вазирлигининг:

Адлия вазирлигининг Меъёрий ҳужжатларни ҳисобга олиш ва туркумлаш бўлими негизида Вазирлик марказий аппарати ходимларининг мавжуд сони доирасида Қонун ҳужжатларини туркумлаш ва ҳуқуқий ахборот бошқармасини ташкил этиш тўғрисидаги;

Адлия вазирлигининг Ахборот-юридик марказини Адлия вазирлиги ҳузуридаги хўжалик ҳисобидаги Ҳуқуқий ахборот билан таъминлаш марказига айлантириш, мавжуд штатларни Қонун ҳужжатларини туркумлаш ва ҳуқуқий ахборот бошқармасига бериш тўғрисидаги таклифларига розилик берилсин.

Ўзбекистон Республикаси Адлия вазирлиги бир ой муддатда Ҳуқуқий ахборот билан таъминлаш маркази уставини ишлаб чиқсин ва тасдиқласин, унинг фаолиятига доир ташкилий масалаларни ҳал этсин.

7. Вазирлар Маҳкамасининг Ташқи иқтисодий фаолиятни мувофиқлаштириш департаменти меъёрий-ҳуқуқий ҳужжатларни нашр этиш, Қонун ҳужжатлари миллий базасини шакллантириш ва маҳаллий ҳисоблаш тармоғини барпо этиш учун зарур материаллар ва асбоб-анжомлар сотиб олиш, Ўзбекистон Республикаси Адлия вазирлиги ҳузуридаги Ҳуқуқий ахборот билан таъминлаш маркази фаолиятини ташкил этиш учун грант маблағларини жалб қилиш тўғрисидаги масалани халқаро ташкилотлар ва хорижий давлатлар билан ишлаб чиқсин.

8. Ўзбекистон Республикаси Адлия вазирлиги ҳузуридаги Ҳуқуқий ахборот билан таъминлаш маркази олиб келинаётган асбоб-ускуналар ва материаллардан даромад (фойда) солиғи, мол-мулк солиғи ва божхона тўловлари (божхонада расмийлаштирилганлиги учун олинадиган тўловлар бундан мустасно) тўлашдан, бўшаб қолган маблағлар Марказнинг моддий-техника базасини ривожлантиришга, маҳаллий ҳисоблаш тармоғи ва Қонун ҳужжатлари миллий базасини барпо этишга йўналтирган ҳолда, истисно тариқасида уч йил муддатга озод қилинсин.

9. Мазкур қарорнинг бажарилишини назорат қилиш Ўзбекистон Республикасининг Бош вазири Ў.Т. Султонов зиммасига юклансин.

1. Мазкур Низом Ўзбекистон Республикасининг меъёрий-ҳуқуқий ҳужжатларини тарқатишнинг асосий шартларини белгилайди.

Норматив-ҳуқуқий ҳужжатлар расмий ва норасмий нашрларда, шу жумладан маълумотларнинг электрон базалари орқали, шунингдек давлат ва хўжалик бошқаруви органлари, маҳаллий давлат ҳокимияти органларининг расмий веб-сайтларида уларни эълон қилиш йўли билан тарқатилади, махфий тусга эга бўлган ёки эълон қилинмайдиган ҳужжатлар матнлари бундан мустасно.

Давлат ҳокимияти ва бошқаруви органлари томонидан қонун ҳужжатларида белгиланадиган расмий матбуот нашрларида Ўзбекистон Республикаси қонун ҳужжатларининг нашр этилиши Ўзбекистон Республикаси қонун ҳужжатларининг расмий нашрлари ҳисобланади.

2. «Норматив-ҳуқуқий ҳужжатлар тўғрисида»ги Ўзбекистон Республикаси Қонунининг 29-моддасига мувофиқ «Ўзбекистон Республикаси Олий Мажлиси палаталарининг ахборотномаси», «Ўзбекистон Республикасининг қонун ҳужжатлари тўплами», «Халқ сўзи» ва «Народное слово» газеталари Ўзбекистон Республикаси Конституцияси ва қонунлари, Ўзбекистон Республикаси Олий Мажлисининг палаталари қарорларини, Ўзбекистон Республикаси Президентининг фармонлари, қарорлари ва фармойишлари эълон қилинадиган расмий манбалар ҳисобланади.

«Ўзбекистон Республикаси Ҳукуматининг қарорлари тўплами», «Ўзбекистон Республикасининг қонун ҳужжатлари тўплами», «Халқ сўзи» ва «Народное слово» газеталари Ўзбекистон Республикаси Вазирлар Маҳкамаси қарорлари эълон қилинадиган расмий манбалар ҳисобланади;

«Ўзбекистон Республикасининг қонун ҳужжатлари тўплами», шунингдек вазирликлар, давлат қўмиталари ва идораларнинг расмий нашрлари вазирликлар, давлат қўмиталари ва идоралари томонидан қабул қилинган норматив-ҳуқуқий ҳужжатлар эълон қилинадиган расмий манбалар ҳисобланади.

Маҳаллий давлат ҳокимияти органларининг расмий нашрлари ушбу органларнинг қарорлари эълон қилинадиган расмий манбалар ҳисобланади.

«Ўзбекистон Республикаси Олий Мажлиси палаталарининг ахборотномаси», «Ўзбекистон Республикаси Ҳукуматининг қарорлари тўплами», «Ўзбекистон Республикаси қонун ҳужжатлари тўплами» Ўзбекистон Республикаси қонун ҳужжатларининг расмий даврий нашрлари ҳисобланади.

Ушбу бандда назарда тутилмаган норматив-ҳуқуқий ҳужжатларнинг нашрлари норматив-ҳуқуқий ҳужжатларнинг норасмий нашрлари ҳисобланади.

2¹. Вазирликлар, давлат қўмиталари, идоралар ва маҳаллий давлат ҳокимияти органлари томонидан таъсис этилган таъсис ҳужжатларида уларда кўрсатиб ўтилган органлар томонидан қабул қилинган норматив-ҳуқуқий ҳужжатларни расман эълон қилиш назарда тутилган оммавий ахборот воситалари уларнинг расмий нашрлари ҳисобланади.

Вазирликлар, давлат қўмиталари ва идоралар норматив-ҳуқуқий ҳужжатни «Ўзбекистон Республикасининг қонун ҳужжатлари тўплами»да расман эълон қилингунга қадар ўзларининг расмий нашрларида эълон қилган тақдирда бу ҳақда эълон қилинган кундан кечикмай, расмий нашр реквизитларини кўрсатган ҳолда Ўзбекистон Республикаси Адлия вазирлигига маълум қиладилар.

3. Ўзбекистон Республикаси Олий Мажлиси палаталарининг ахборотномаларида Ўзбекистон Республикаси қонунлари, Ўзбекистон Республикаси Олий Мажлиси ва унинг Кенгашларининг қарорлари, Ўзбекистон Республикаси Президентининг фармонлари, қарорлари ва фармойишлари эълон қилинади.

Ўзбекистон Республикаси Ҳукуматининг қарорлари тўпламида Ўзбекистон Республикаси Вазирлар Маҳкамасининг қарорлари эълон қилинади.

Ўзбекистон Республикасининг қонун ҳужжатлари тўплами беш бўлимдан иборат бўлиб, уларда қуйидагилар эълон қилинади:

биринчи бўлимда — Ўзбекистон Республикаси қонунлари ва Ўзбекистон Республикаси Олий Мажлиси палаталарининг қарорлари;

иккинчи бўлимда — Ўзбекистон Республикаси Президентининг фармонлари, қарорлари ва фармойишлари;

учинчи бўлимда — Ўзбекистон Республикаси Вазирлар Маҳкамасининг қарорлари;

тўртинчи бўлимда — Ўзбекистон Республикаси Конституциявий судининг қарорлари;

бешинчи бўлимда — идоравий норматив-ҳуқуқий ҳужжатлар.

Ўзбекистон Республикасининг қонун ҳужжатлари тўпламини нашр этишни ташкил этиш Ўзбекистон Республикаси Адлия вазирлиги томонидан амалга оширилади.

4. Ўзбекистон Республикаси қонун ҳужжатларининг расмий даврий нашрларида эълон қилинадиган норматив-ҳуқуқий ҳужжатлар изчил равишда хронологик тартибда жойлаштирилади ва тегишли тартиб рақамларига эга бўлган моддаларга жойлаштирилади.

Идоравий норматив-ҳуқуқий ҳужжатларнинг матнлари Ўзбекистон Республикаси қонун ҳужжатлари тўпламида уларнинг тартиб рақамларига ва Ўзбекистон Республикаси Адлия вазирлигида давлат рўйхатидан ўтказилган санага мувофиқ изчил равишда хронологик тартибда жойлаштирилади.

Норматив-ҳуқуқий ҳужжатларга иловалар ҳужжатларнинг ўзи жойлаштирилган моддаларга жойлаштирилади.

5. Расмий нашрларда эълон қилинадиган норматив-ҳуқуқий ҳужжатлар ушбу ҳужжатни қабул қилинган орган томонидан расман юборилган норматив-ҳуқуқий ҳужжат матнига мувофиқ бўлиши керак.

6. Ҳажми катта бўлган норматив-ҳуқуқий ҳужжатлар матнлари расмий даврий нашрларга киритилмаслиги мумкин. Бунда улар уларни қабул қилган органлар томонидан алоҳида нашр шаклида эълон қилиниши керак.

7. Ўзбекистон Республикаси Олий Мажлиси палаталарининг ахборотномаси ва Ўзбекистон Республикаси Ҳукуматининг қарорлари тўплами ҳар ойда нашр этилади.

Ўзбекистон Республикаси қонун ҳужжатлари тўплами, қоидага кўра, ҳафтада бир марта, ўзбек ва рус тилларида нашр этилади ва очиқ обуна бўлиш йўли билан тарқатилади.

8. Қонун ҳужжатлари маълумотлари миллий базасига:

Ўзбекистон Республикаси Конституцияси ва қонунлари;

Ўзбекистон Республикасининг халқаро шартномалари;

Ўзбекистон Республикаси Олий Мажлиси палаталарининг қарорлари;

Ўзбекистон Республикаси Конституциявий судининг қарорлари;

Ўзбекистон Республикаси Президентининг фармонлари, қарорлари ва фармойишлари;

Ўзбекистон Республикаси Вазирлар Маҳкамасининг қарорлари;

идоравий норматив-ҳуқуқий ҳужжатлар;

маҳаллий давлат ҳокимияти органлари қарорлари матнлари киритилади.

Қонун ҳужжатлари маълумотлари миллий базасига судларнинг қарорлари ва техник жиҳатдан тартибга солиш соҳасидаги норматив ҳужжатлар матнлари ҳам киритилиши мумкин.

9. Қонун ҳужжатлари маълумотлари миллий базаси ҳужжатнинг тушишига ва ишланишига қараб, бироқ у расман эълон қилингандан кейин бир ҳафтадан кечикмай янгиланади.

10. Қонун ҳужжатлари маълумотлари миллий базасидан фойдаланиш Интернет тармоғи орқали текин амалга оширилади.

11. Ўзбекистон Республикаси Қонун ҳужжатлари маълумотлари миллий базасининг излаш тизими Ўзбекистон Республикаси Адлия вазирлиги томонидан тасдиқланган Қонунчилик тармоқлари умумҳуқуқий классификатори асосида, қонунчиликнинг мавзули маълумотномаси ва алифбо-предметли кўрсаткич, шунингдек норматив-ҳуқуқий ҳужжатлар реквизитлари бўйича шакллантирилади.

12. Қонун ҳужжатлари маълумотлари миллий базасида қўлланган қонунчилик классификацияси Ўзбекистон Республикаси давлат ва хўжалик бошқаруви органларида қонун ҳужжатларини туркумлашда, шунингдек Ўзбекистон Республикаси Қонунчилик тармоқлари умумҳуқуқий классификаторини тижорат мақсадлари учун маълумотларнинг туркумланган базасида қўллашда эталон ҳисобланади.

13. Расмий даврий нашрларнинг ўз вақтида нашр этилишини таъминлаш ва Қонун ҳужжатлари маълумотлари миллий базасини тўлдириш учун Ўзбекистон Республикаси Олий Мажлисининг Қонунчилик палатаси ва Сенати аппаратлари, Ўзбекистон Республикаси Президенти Девони ва Ўзбекистон Республикаси Вазирлар Маҳкамаси Аппарати тегишли норматив-ҳуқуқий ҳужжатлар қабул қилинган кундан бошлаб бир кун мобайнида уларнинг матнларини қоғоз ва электрон матнларда Ўзбекистон Республикаси Адлия вазирлигига жўнатадилар. Бунда норматив-ҳуқуқий ҳужжатларнинг электрон матнлари электрон почта орқали жўнатилиши мумкин.

Норматив-ҳуқуқий ҳужжатларнинг келиб тушган матнларидан уларнинг давлат ҳисобини юритиш учун ҳам фойдаланилади.

14. Ўзбекистон Республикаси қонун ҳужжатлари тўпламининг ўз вақтида нашр этилишини таъминлаш, шунингдек, Қонун ҳужжатлари маълумотлари миллий базасини тўлдириш учун тегишли органлар ўз норматив-ҳуқуқий ҳужжатларини Адлия вазирлигида давлат рўйхатидан ўтказишда вазирликка ушбу ҳужжатларнинг электрон матнларини электрон матнларда ёки электрон почта тизими орқали тақдим этадилар.

15. Ўзбекистон Республикаси қонун ҳужжатлари тўплами, кодекслар, норматив-ҳуқуқий ҳужжатлар тўпламларини нашр этишни ташкил этиш, Ўзбекистон Республикаси Қонун ҳужжатлари маълумотлари миллий базасини ташкил этиш ва унинг ишлашига умумий раҳбарлик Ўзбекистон Республикаси Адлия вазирлигининг Қонун ҳужжатларини туркумлаш ва ҳуқуқий ахборот бошқармаси томонидан амалга оширилади.

Ўзбекистон Республикаси Қонун ҳужжатлари маълумотлари миллий базасини шакллантириш ва доимий равишда янгилаб бориш, маълумотлар базасини қўллаб-қувватлаш, маълумотлар электрон базасидан фойдаланишни таъминлаш Ўзбекистон Республикаси Адлия вазирлиги ҳузуридаги Ҳуқуқий ахборот билан таъминлаш маркази томонидан амалга оширилади.

16. Меъёрий-ҳуқуқий ҳужжатларни эълон қилишнинг расмий манбаларидан давлат ва хўжалик бошқаруви органлари ўзларига юкланган вазифаларни бажариш мақсадида уларни қўллашда мажбурий равишда фойдаланадилар. Бунда давлат ва хўжалик бошқаруви органлари меъёрий-ҳуқуқий ҳужжатларнинг ўз марказий аппаратларига, таркибий ва ҳудудий бўлинмаларига ўз вақтида келиб тушишини, шунингдек меъёрий-ҳуқуқий ҳужжатларнинг туркумлаштирилган ҳисоби юритилишини таъминлашга мажбурдирлар.

16¹. Вазирликлар, давлат қўмиталари, идоралар ва маҳаллий давлат ҳокимияти органларининг норматив-ҳуқуқий ҳужжатлари норматив-ҳуқуқий ҳужжат расмий эълон қилинган кундан сўнг икки кундан кечикмай уларнинг расмий веб-сайтларида эълон қилиниши шарт.

17. Норматив-ҳуқуқий ҳужжатларни норасмий нашр этиш, шунингдек, яратилаётган қонун ҳужжатлари маълумотлари электрон базаси давлат ва хўжалик бошқаруви барча органлари, юридик ва жисмоний шахслар томонидан амалга оширилиши мумкин.

Норматив-ҳуқуқий ҳужжатларни норасмий нашрларда эълон қилишга, шунингдек уларни қонунчилик маълумотлари электрон базалари орқали тарқатишга улар эълон қилинган барча реквизитлар, расмий нашрлар ва уларнинг кучга кириш санаси мажбурий кўрсатилган ҳолда норматив-ҳуқуқий ҳужжат расмий манбаларда эълон қилинганидан кейин йўл қўйилади. Бунда расмий нашрларда эълон қилинган норматив-ҳуқуқий ҳужжат матнининг аниқ такрорланиши таъминланиши керак.

18. Норасмий нашрларда, шунингдек қонунчилик маълумотлари электрон базаларида норматив-ҳуқуқий ҳужжатларнинг бошқа тилларга норасмий таржималари эълон қилиниши мумкин. Ушбу таржималарга норасмий таржима тўғрисидаги белги қўйилиши керак.

19. Агар норматив-ҳуқуқий ҳужжатни расмий нашрларда эълон қилишда унинг матнида норматив-ҳуқуқий ҳужжат расмий тарқатилишига таққослаганда хатоларга, матбаа хатосига, бошқа ноаниқларга йўл қўйилган тақдирда, улар аниқлангандан кейин нашрнинг энг яқиндаги сонида тегишли тузатишлар эълон қилинади.

Агар кодекслар ва қонун ҳужжатлари тўпламларининг расмий нашрларида норматив-ҳуқуқий ҳужжатлар эълон қилинишининг расмий манбаи билан таққослаганда хатоларга, матбаа хатоларига, бошқа ноаниқликларга йўл қўйилган тақдирда ношир улар аниқланган кундан бошлаб 30 календарь кундан ортиқ бўлмаган муддатда республика даврий нашрларида (газеталар, журналлар ва шу кабиларда) тегишли тузатишлар эълон қилинади.

20. Агар норасмий нашрларда (газеталар, журналлар ва шу кабиларда) норматив-ҳуқуқий ҳужжатлар эълон қилинишининг расмий манбаи билан таққослаганда хатоларга, матбаа хатоларига, бошқа ноаниқликларга йўл қўйилган бўлса, ношир улар аниқланган кундан бошлаб 30 календарь кундан ортиқ бўлмаган муддатда республика даврий нашрларида (газеталар, журналлар ва шу кабиларда) ёки норасмий нашрнинг навбатдаги сонини эълон қилишда (чиқаришда) тегишли тузатишлар эълон қилинади.

21. Агар қонунчилик маълумотлари электрон базаларида норматив-ҳуқуқий ҳужжатлар эълон қилинишининг расмий манбаи билан таққослаганда хатоларга, матбаа хатоларига, бошқа ноаниқликларга йўл қўйилган тақдирда, улар дарҳол бартараф этилиши керак.