Ўзбекистон Республикаси Президентининг 1998 йил 28 октябрдаги ПФ-2100-сон Фармони (Ўзбекистон Республикаси Олий Мажлиси Ахборотномаси, 1998 й., 10-11-сон, 203-модда) ижросини таъминлаш ҳамда туман ҳудудидаги тўй-ҳашамлар, оилавий тантаналар, маърака ва маросимларни ўтказишда ортиқча дабдабабозлик ва исрофгарчиликка йўл қўймаслик, фуқаролар соғлиғи ва хавфсизлигини таъминлаш мақсадида, Ўзбекистон Республикасининг «Маҳаллий давлат ҳокимияти тўғрисида»ги Қонунига (Ўзбекистон Республикаси Олий Кенгашининг Ахборотномаси, 1993 й., 9-сон, 320-модда) асосан халқ депутатлари Сурхондарё вилояти Кенгаши қарор қилади:

1. Халқ депутатлари вилоят Кенгашининг қонунийлик, ҳуқуқ-тартибот ва фуқаролар хавфсизлигини таъминлаш масалалари бўйича доимий комиссияси раиси А.Ч. Соатовнинг ахбороти маълумот учун қабул қилинсин.

2. «Маҳалла» хайрия жамоат фонди, «Нуроний» жамғармаси, Маънавият тарғибот маркази, Хотин-қизлар қўмитасининг бошқа нодавлат нотижорат ташкилотлар ва фуқароларнинг ўзини ўзи бошқариш органлари билан биргаликда барча туманларда тўй-ҳашам, маросим ва оилавий тадбирларни мувофиқлаштирувчи Жамоатчилик Кенгашларини тузиш таклифи маъқуллансин.

3. Вилоятда тўй-ҳашам, маросим ва оилавий тадбирлар ўтказилишини ўрганиб борувчи вилоят Жамоатчилик Кенгаши таркиби иловага мувофиқ тасдиқлансин.

4. Жамоатчилик Кенгашининг асосий вазифалари этиб:

кенг жамоатчилик вакилларини жалб қилган ҳолда, вилоят худудидаги тўй-ҳашамлар, оилавий тантаналар, маърака ва маросимлар, марҳумлар хотираларига бағишланган тадбирларни тартибга солиш ҳамда ихчам ва миллий қадриятлар асосида ўтказиш бўйича таклифларни ишлаб чиқиб, тарғибот орқали жамият ҳаётига татбиқ этиш;

тўй-ҳашамлар, оилавий тантаналар ва маросимларни ўтказиш бўйича жамоатчилик фикрини инобатга олмайдиганлар устидан жамоатчилик назоратини ўрнатиш, аниқланган салбий ҳолатлар бўйича тегишли давлат ва назорат қилувчи органларга маълумот киритиш;

мазкур ҳолатларда Жамоатчилик Кенгаши тушунтиришларига риоя қилмаган фуқаролар ҳақида вилоят ЙХХБнинг навбатчи телефонларига (221-27-51, 221-31-04) ахборот бериб бориш белгилансин.

5. Вилоят ҳудудидаги барча давлат бошқаруви органлари, корхона, ташкилот ва муассасаларда меҳнат унумдорлигини сақлаш мақсадида ресторан, ошхона, кафе ва тўйхоналарда иш кунлари тўй ва маросим муносабати билан соат 07.00 дан 09.00 гача ёки 12.00 дан 14.00 гача ош бериш ва аксинча иш вақтида соат 09.00 дан 12.00 гача, 14.00 дан 18.00 гача ош беришни таъқиқлаш, ҳамда соат 23.00 дан кейин тўй ва базмларни давом эттириш ҳолатларининг олдини олиш бўйича жамоатчиликнинг таклифлари қўллаб-қувватлансин.

6. Ўзбекистон мусулмонлари идораси вилоят вакиллиги (Э. Рустамов), халқ депутатлари маҳаллий Кенгашлари депутатлари, вилоятдаги нодавлат нотижорат ташкилотларига:

никоҳ тўйларида фуқароларнинг турли спиртли ичимлик истеъмол қилиши оқибатида миллий урф-одатлардан бири бўлган зиёрат қилиш одобига ҳурматсизлик бўлаётгани сабабли «Ал Ҳаким ат-Термизий» ёдгорлик мажмуаси ва бошқа зиёратгоҳларнинг кириш қисмида фуқароларга тушунтириш ишларини олиб бориш;

тўй-ҳашамлар, оилавий тантаналар, маърака ва маросимлар, марҳумлар хотираларига бағишланган тадбирларни миллий қадриятларимизга мос равишда ихчам ва дабдабасиз ўтказишни аҳоли ўртасида кенг тарғиб қилиш;

имом-хатиблар тўйлар ва маросимлардаги маърузаларида аҳолини эътиборини ёшлар тарбияси, ота-онанинг масъулияти, жамият ҳаётига хавф солаётган таҳдидларни олдини олиш, тинчлик ва мустақиллик неъматини асраш каби масалаларга қаратиши тавсия этилсин.

7. Йўл ҳаракати хавфсизлиги қоидаларига риоя қилишни кучайтириш мақсадида келин-куёв ва уларнинг яқинларига фуқаролик ҳолати далолатномаларини ёзиш бўлимлари ёки диққатга сазовор жойларга сайр қилиш жараёнида 4 тадан ортиқ автоуловлардан фойдаланмаслик бўйича жамоатчиликнинг таклифлари қўллаб-қувватлансин.

8. Вилоят ички ишлар бошқармаси (Ж. Атаев), вилоят йўл харакати хавфсизлиги бошқармаси (Р. Жўрабеков)ларга:

жойларда йўл ҳаракати хавфсизлигини таъминлаш ҳамда фуқаролар хавфсизлигига жиддий хавф солиши мумкин бўлган кўнгилсиз ҳолатларнинг олдини олиш мақсадида, никоҳ тўйларида келин-куёв ва уларнинг яқинларини транспорт воситаларида тартибсиз ҳаракатланишларини бартараф этиш чораларини кўриш;

Термиз шаҳридаги «Ал Ҳаким ат-Термизий» ёдгорлик мажмуаси ва туманлардаги бошқа зиёратгоҳларга кириш қисмида никоҳ тўйлари муносабати билан ҳайдовчиларнинг гуруҳ бўлиб ҳаракатланиш тартибларини назоратга олиш ва тегишли чоралар кўриш;

вилоят Давлат солиқ бошқармаси (Ш. Рахимов) билан биргаликда тўй-ҳашамларда автотранспорт хизматларини кўрсатувчи юридик ва жисмоний шахслар фаолияти қонунийлигини назорат қилиш ҳамда вилоят ҳокимлигига ҳар чоракда ахборот ва таклифлар киритиш топширилсин.

9. Вилоят телерадиокомпанияси (З. Тўраев), Матбуот ва ахборот агентлиги ҳудудий бошқармаси (Ў. Олтибоев)га доимий равишда тўй-ҳашамларда мавжуд муаммоларни муҳокама этиш ва аҳоли орасида зарур тушунтириш ишларини олиб боришга қаратилган очиқ теле ва радио мулоқотлар ташкил этиб бориш тавсия этилсин.

10. Мулкчилик шаклидан қатъи назар, вилоят ҳудудида жойлашган барча корхона, ташкилот, муассаса ва фуқаролар йиғинига ушбу қарорнинг мазмун-моҳиятини аҳоли ва меҳнат жамоасига етказиш ҳамда жойларда қарорнинг ижросини таъминлаш вазифалари топширилсин.

11. Мазкур қарорнинг ижросини назорат қилиш халқ депутатлари вилоят Кенгашининг Қонунийлик, ҳуқуқ-тартибот ва фуқаролар хавфсизлигини таъминлаш масалалари бўйича доимий комиссияси (А. Соатов), Ижтимоий-маданий ривожланиш, ёшлар сиёсати ва соғлом авлодни тарбиялаш масалалари бўйича доимий комиссияси (М. Хайдаров) зиммасига юклатилсин.

12. Ушбу қарор расман эълон қилинган кундан кучга киради.