1998 йил пахта ҳосили ўз вақтида ва сифатли йиғиштириб олинишини таъминлаш, пахта маҳсулоти ҳажмларини кўпайтириш ва сифатини яхшилашда қишлоқ хўжалиги ходимларининг моддий манфаатдорлигини ошириш мақсадида Вазирлар Маҳкамаси қарор қилади:

1. Пахта йиғим-терими мавсумини уюшқоқлик билан ўтказишга доир масалаларни тезкорлик билан ҳал этиш учун 1-иловага мувофиқ таркибда Республика комиссияси тузилсин.

2. Қорақалпоғистон Республикаси Вазирлар Кенгаши, вилоятлар ва туманлар ҳокимликлари, «Ўзқишлоқхўжаликтаъминоттузатиш» давлат-кооператив қўмитаси, Қишлоқ ва сув хўжалиги вазирлиги, «Ўздавпахтасаноатсотиш» уюшмаси ва «Ўзқишлоқхўжаликмашхолдинг» компанияси хўжаликларнинг йиғим-теримга тайёрлигини пухта ўрганиб чиқсинлар ва моддий-техника базанинг йиғим-теримга ва пахта тайёрлашга 1 сентябргача тайёрлаб қўйилишини ва йиғим-терим мавсуми қисқа муддатларда ўтказилишини таъминловчи қўшимча чора-тадбирлар кўрсинлар.

3. Пахта етиштириш ва 1998 йил ҳосилидан пахта толаси давлат хариди ҳажми Вазирлар Маҳкамасининг «1998 йилда етиштириладиган пахта хом ашёси учун аванс бериш тўғрисида» 1998 йил 4 февралдаги 57-сон қарорига мувофиқ белгиланганлиги маълумот учун қабул қилинсин.

4. 1998 йил ҳосили пахта хом ашёсига ўртача харид нархлари харид бозорида пахта толасига нарх конъюнктурасидан келиб чиқиб пахтани қайта ишлаш ва толани транспортда ташиш харажатларини ҳисобга олиб 1 тоннаси учун 24 300 сўм миқдорида белгилансин.

Ўзбекистон Республикаси Молия вазирлиги 1998 йил ҳосили пахта хом ашёсининг ялпи харид нархлари прейскурантини бир ҳафта муддатда ишлаб чиқсин ҳамда манфаатдор вазирликлар ва идораларга етказсин.

«Ўздавпахтасаноатсотиш» уюшмаси топширилган пахта хом ашёси учун хўжаликлар билан унинг қийматининг 90 фоизи ҳисобидан келиб чиқиб ҳисоб-китоб қилсин, узил-кесил ҳисоб-китоблар қайта ишлаш якунлари бўйича қилинади.

5. Ҳосилни йиғиштириб олишда моддий рағбатлантиришни кучайтириш мақсадида хўжаликларга пахта терганлик учун қуйидаги чегараланган миқдорларда ҳақ тўлаш тавсия этилсин:

икки қаторли вертикал шпинделли пахта териш машинасида терилган кондицион оғирлиги 1 тонна бўлган пахта учун — камида 135 сўм, тўрт қаторли машинада терилганда — 85 сўм, икки қаторли горизонтал шпинделли машинада терилганда — камида 45 сўм;

қўлда терилган 1 килограмм ўрта толали пахта учун — камида 5 сўм, ингичка толали пахта учун камида 6,5 сўм.

Йиғим-терим ишларида банд бўлганлар билан пахта тайёрлаш тўғрисидаги статистика маълумотларига мувофиқ ҳар беш кунда ҳисоб-китоб қилинсин.

Хўжаликлар раҳбарларининг эътибори юқори навли пахта териб олиниши учун теримчиларни рағбатлантиришни назарда тутган ҳолда йиғим-терим мавсумининг дастлабки кунларидан бошлаб пахта терими учун энг юқори ҳақ белгиланиши зарурлигига қаратилсин.

Пул-кредит сиёсати бўйича республика комиссияси (Муллажонов) агросаноат комплексида меҳнатга ҳақ тўлашнинг базавий даражасини мазкур бандга мувофиқ қайта кўриб чиқсин.

6. Марказий банк, «Пахта-банк», «Ўзсаноатқурилишбанк», «Ўзтадбиркорбанк», «Мевасабзавотбанк» теримчилар ва пахта териш машиналарининг механик-ҳайдовчилари билан, шунингдек пахтани юклаш, тушириш, тайёрлаш, транспортда ташиш ва жойлаштириш ҳамда ишлов бериш, пахта териш техникасига техник хизмат кўрсатиш ва тузатиш билан банд бўлган ходимлар билан меҳнатга ҳақ тўлашнинг идора ички нормативлари бўйича ўз вақтида ҳисоб-китоб қилиш учун хўжаликларни, машина-трактор паркларини ва тайёрлов пунктларини, пахта тозалаш заводларини нақд пул билан таъминласинлар.

7. Ўзбекистон Республикаси Қишлоқ ва сув хўжалиги вазирлиги (Бобожонов), Қорақалпоғистон Республикаси Вазирлар Кенгаши, вилоятлар ва туманлар ҳокимликлари ғўза баргини тўкиш 2-иловага мувофиқ ҳажмларда ва муддатларда ўтказилишини таъминласинлар.

«Ўзбекистон ҳаво йўллари» миллий авиакомпанияси (Рўзметов) Ўзбекистон Республикаси Қишлоқ ва сув хўжалиги вазирлиги ҳамда «Ўзагрокимётаъминот» давлат-акциядорлик бирлашмасининг буюртманомалари бўйича ғўза баргини тўкиш учун зарур миқдорда самолётлар ва вертолётлар ажратсин.

8. «Ўзқишлоқхўжаликмаш-холдинг» холдинг компанияси (Матчонов), «Ўзқишлоқхўжаликтаъминоттузатиш» давлат-кооператив қўмитаси (Олимжонов), Ўзбекистон Республикаси Қишлоқ ва сув хўжалиги вазирлиги (Бобожонов), Қорақалпоғистон Республикаси Вазирлар Кенгаши, вилоятлар ҳокимликлари:

шу йил 10 сентябргача машиналарни тракторларга тиркаган ҳолда, пахта териш техникасини, юклаш-транспортда ташиш воситаларини тўлиқ тайёр ҳолга келтирсинлар, териш-транспорт отрядларини механизаторлар билан бутласинлар. Двигателлар, узеллар ва агрегатларни, бошқа зарур материалларни алмаштириш фондлари ташкил этсинлар. Пахтани машинада теришни ташкил этиш ва ўтказиш Ўзбекистон Республикаси Қишлоқ ва сув хўжалиги вазирлигининг тавсияларига мувофиқ амалга оширилсин;

пахта териш машиналарини пахта йиғим-теримига 3-иловага мувофиқ миқдорларда чиқарсинлар;

пахта териш машиналаридан унумли фойдаланиш мақсадида уларни терим-транспорт отрядлари таркибида жамласинлар ва ишлашини ташкил этсинлар.

9. «Ўзқишлоқхўжаликмаш-холдинг» холдинг компанияси (Матчонов) пахта йиғим-терими мавсуми бошланишига қадар 500 та вертикал шпинделли, 141 та горизонтал шпинделли пахта териш машинаси, шунингдек «Ўзқишлоқхўжаликтаъминоттузатиш» давлат-кооператив қўмитаси ташкилотлари билан тузилган шартномаларга мувофиқ тракторлар, прицеплар, кўрак териш машиналари, кўсак чувийдиган машиналар ва эҳтиёт қисмлар етказиб берилишини таъминласин.

«Ўзқишлоқхўжаликтаъминоттузатиш» давлат-кооператив қўмитаси «Кейс-2022» горизонтал шпинделли пахта териш машиналари қийматини «Ўз Кейсмаш» қўшма корхонасига тўласин.

10. Ўзбекистон Республикаси Қишлоқ ва сув хўжалиги вазирлиги, «Ўзқишлоқхўжаликтаъминоттузатиш» давлат-кооператив қўмитаси Жиззах ва Сирдарё вилоятлари ҳокимликлари билан биргаликда Фарғона водийси вилоятларидан ҳосилни йиғиб-териб олишга пахта териш техникаси ва меҳнат ресурсларини сафарбар қилиш юзасидан шартномалар тузилишини ташкил этсинлар.

12. «Ўзқишлоқхўжаликмаш-холдинг» холдинг компанияси ва «Ўзқишлоқхўжаликтаъминоттузатиш» давлат-кооператив қўмитаси пахта териш техникасини мавсумга тайёрлашни тугаллашда хўжаликларга ва машина-трактор паркларига техникавий ёрдам кўрсатиш ҳамда уларнинг узлуксиз ишлашини таъминлаш учун саноат корхоналарини вилоятларга 4-иловага мувофиқ бириктирсинлар.

13. «Ўздавнефтмаҳсулот» бирлашмаси (Тожиев) ёнилғи-мойлаш материаллари, «Ўзкимёсаноат» уюшмаси (Юсупбеков) эса дефолиантлар 1998 йил сентябрь — ноябрь ойларида хўжаликларга, машина-трактор паркларига ва пахта тозалаш корхоналарига йиғим-терим ишларини, тайёрлов пунктларида пахтага ишлов беришни, кузга шудгорлашни ва бошоқли дон экишни узлуксиз ўтказиш учун зарур бўлган ҳажмларда, улар қийматининг 15 фоизини олдиндан ундирмаган ҳолда, ҳисоб-китобларни пахта хом ашёсининг пахта тозалаш заводларига сотилишига қараб биринчи навбатда амалга ошириш шарти билан, етказиб берилишини таъминласин.

«Ўзбекистон темир йўллари» давлат-акциядорлик компанияси (Эрметов) нефть, газ конденсати ва нефть маҳсулотлари улар қийматининг 15 фоизи олдиндан ундирилмаган ҳолда етказиб берилишини таъминласин ҳамда 1998 йил сентябрь — декабрь ойлари даврида «Ўзбекнефтгаз» миллий копорацияси корхоналарига пеня ҳисобламасин.

14. Ўзбекбирлашув, «Ўзбексавдо» компанияси, «Ёғмойтамакисаноат» уюшмаси, «Ўздонмаҳсулот» корпорацияси қишлоқ аҳолисини ва пахта терими қатнашчиларини озиқ-овқат маҳсулотлари билан таъминлаш масалаларини ўз вақтида ҳал этсинлар, жойларда кўчма савдо ташкил этсинлар.

15. Ўзбекистон Республикаси Соғлиқни сақлаш вазирлиги пахта йиғим-теримида банд бўлган ходимларга тиббий хизмат кўрсатиш чора-тадбирларини белгиласин.

16. Ўзбекистон Республикаси Маданият ишлари вазирлиги ҳосилни йиғиштириб олиш даврида теримчиларга маданий хизмат кўрсатишни ташкил этсин, санъат ва адабиёт усталарининг хўжаликларга боришларини назарда тутсин.

17. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари И.Ҳ. Жўрабеков зиммасига юклансин.