Ўзбекистон Республикаси Президентининг «Ўзбекистон Республикаси Мудофаа ишлари вазирлигини тузиш тўғрисида» 1991 йил 6 сентябрдаги Фармонига мувофиқ Вазирлар Маҳкамаси қарор қилади:

1. Илова қилинаётган Ўзбекистон Республикаси Мудофаа ишлари вазирлиги тўғрисидаги низом тасдиқлансин.

2. Ўзбекистон Республикаси ҳарбий комиссарлиги, Фуқаро мудофааси штаби, ДОСААФ Марказий Қўмитаси (1991 йил 17 октябрда СССР Мудофаа вазирлиги билан келишилган), Ўзбекистон Республикаси Вазирлар Маҳкамаси ҳузуридаги Армия сафидан ташқари хизматлар бўйича махсус бошқармасининг мавжуд тузилмалари ва уларнинг қуйи бўлинмалари негизида Ўзбекистон Республикаси Мудофаа ишлари вазирлиги тузилиши муносабати билан кўрсатилган органларнинг штатдаги ходимлари сони, иш ҳақи фондлари ва моддий базаси Ўзбекистон Республикаси Мудофаа ишлари вазирлигига берилсин.

3. Ўзбекистон Республикаси Мудофаа ишлари вазирлиги марказий аппаратининг ташкилий-штат тузилиши иловага мувофиқ тасдиқлансин.

Вазирлик аппарати энг кўп ходимлари сони 268 нафар кишидан (Муқобил хизмат бошқармаси ва хизмат кўрсатувчи ходимлардан ташқари) иборат қилиб, шундан 156 нафари Ўзбекистон Республикаси Фуқаро мудофааси штабини, 80 нафари Ўзбекистон Республикаси ҳарбий комиссарлигини тугатиш ҳисобига белгилансин.

Кўрсатилган ходимларни сақлаш мақсадида 1991 йилнинг IV чораги учун меҳнатга ҳақ тўлаш фонди 708 минг сўм миқдорида белгилансин.

Вазирлик штатига вазирнинг бир нафар биринчи ўринбосари ва уч нафар ўринбосари киритилсин.

Ўзбекистон Республикаси Мудофаа ишлари вазирига белгиланган ходимлар сони ва ажратилган меҳнатга ҳақ тўлаш фондларидан келиб чиққан ҳолда ташкилий-штат тузилишига ўзгартишлар киритишга, штатларни ишлаб чиқишга, тасдиқлашга рухсат берилсин.

4. Маълумот учун қабул қилинсинки, СССР Мудофаа вазири томонидан Ўзбекистон Республикаси Мудофаа ишлари вазирлигининг кадрларда турувчи ҳарбий хизматчилари, шунингдек, ишчилари ва хизматчилари учун амалдаги қонунларга мувофиқ белгиланган барча ҳуқуқлар, имтиёзлар ва енгилликлар сақлаб қолинади.

5. Ўзбекистон Республикаси Мудофаа ишлари вазирлиги ва халқ депутатлари Тошкент шаҳар Кенгашининг вазирлик марказий аппаратини Намойишлар хиёбони, 5-уйдаги Ўзбекистон Республикаси Фуқаро мудофааси штаби биносига жойлаштириш ҳақидаги таклифи қабул қилинсин.

6. Ўзбекистон Республикаси Мудофаа ишлари вазирлиги Ўзбекистон Республикаси Адлия вазирлиги ва бошқа манфаатдор ташкилотлар билан биргаликда бир ой муддат ичида, ҳарбий комиссарликнинг қайта тузилганлиги ва вазирлик тузилганлиги муносабати билан қонун актларига киритиладиган тегишли ўзгартишлар ва қўшимчаларни белгиланган тартибда Ўзбекистон Республикаси Олий Кенгашининг кўриб чиқиши учун киритсин.

7. Мавжуд ҳарбий комиссарликлар, фуқаро мудофааси штаблари негизида Қорақалпоғистон Республикасида, вилоятларда, шаҳарлар ва ноҳияларда — мудофаа ишлари бошқармалари (бўлимлари) тузилсин, уларга тегишли ходимлар ва бюджет маблағлари берилсин.

8. Ўзбекистон Республикаси Иқтисодиёт қўмитаси, Моддий-техника таъминоти давлат-кооператив қўмитаси, Савдо вазирлиги белгиланган тартибда 1992 йилда Ўзбекистон Республикаси Мудофаа ишлари вазирлигига бириктирилган номенклатура бўйича моддий-техника ресурслари ажратишни назарда тутсинлар.

9. Ўзбекистон Республикаси Молия вазирлиги Ўзбекистон Республикаси Мудофаа ишлари вазирлиги ва унинг системасини тақдим қилинган ҳисоб-китобларга мувофиқ сақлаш харажатларини белгиласин, шунингдек, 5 та енгил автомобилни сақлаш лимитини ажратсин.

Ўзбекистон Республикаси Автомобиль транспорти вазирлиги Ўзбекистон Республикаси Мудофаа ишлари вазирлигига хизмат кўрсатиш учун енгил автомобиллар ажратсин.

10. Ўзбекистон ССР Вазирлар Маҳкамаси ҳузуридаги Армия сафидан ташқари хизматлар бўйича махсус бошқармаси Ўзбекистон Республикаси Мудофаа ишлари вазирлиги ҳузуридаги муқобил хизмат бошқармасига айлантирилсин.

11. Ўзбекистон Республикаси Нефть маҳсулотлари билан таъминлаш давлат қўмитаси Мудофаа ишлари вазирлигига белгиланган тартибда ёқилғи-мойлаш материаллари ажратишни таъминласин.

12. Ўзбекистон Республикаси Алоқа вазирлиги Ўзбекистон Республикаси Мудофаа ишлари вазирлиги бошқармалари, бўлимлари ва хизматларини телефонлаштиришни таъминласин, вазирга ва унинг ўринбосарларига ҳукумат АТСи аппаратларини ўрнатсин,

13. Ўзбекистон енгил саноат товарларини ишлаб чиқариш давлат уюшмаси Ўзбекистон Республикаси Мудофаа ишлари вазирлигининг талабномаларига кўра миллий гвардия ҳарбий хизматчилари ва муқобил хизмат шахсий таркиби учун кийим-бош формасини тайёрласин.

Ўзбекистон Республикаси Вазирлар Маҳкамаси ҳузуридаги хом ашё ва енгил саноат маҳсулотлари таъминоти ва савдоси бош бошқармаси Ўзбекистон енгил саноат товарларини ишлаб чиқариш давлат уюшмасининг талабномаларига кўра кўрсатилган кийим-бош формасини тикиш учун хом ашё билан таъминласин.

1. Ўзбекистон Республикаси Мудофаа ишлари вазирлиги «Ўзбекистон Республикаси давлат мустақиллиги асослари тўғрисида»ги Қонунга мувофиқ республиканинг давлат мустақиллигини ва ҳудудий яхлитлигини, фуқароларнинг конституциявий ҳуқуқлари ва эркинликларини ҳимоя қилиш мақсадида тузилган. Мудофаа ишлари вазирлиги Ўзбекистон Республикаси ҳарбий комиссарлиги, Ўзбекистон Республикаси Фуқаро мудофааси штаби, Ўзбекистон Республикаси ДОСААФ Марказий Қўмитаси ва Ўзбекистон Республикаси Вазирлар Маҳкамаси ҳузуридаги Армия сафидан ташқари хизматлар бўйича махсус бошқармаси негизида тузилган.

Мудофаа ишлари вазирлиги республика ҳудудида жойлашган СССР Мудофаа вазирлиги ва ички қўшинлар ҳарбий қисмларини, қўшилмаларини тузишда ва уларга раҳбарлик қилишда иштирок этади, коллектив хавфсизликни яратишда ва ССР Иттифоқининг стратегик қўшинларини сақлашда иштирок этишни таъминлайди.

Миллий гвардияни бутлаш, чақириладиган ёшларни тайёрлаш, Ўзбекистон Республикаси фуқароларини ҳарбий хизматга чақириш ва ўташ, уларнинг ижтимоий ва ҳуқуқий ҳимояланганлиги, захирадаги ҳарбий хизматга мажбур кишиларни ўқитиш, муқобил хизматни ташкил этиш, фуқаро мудофаасига раҳбарлик қилиш масалалари унинг ҳуқуқ доирасига киради.

2. Ўзбекистон Республикаси Мудофаа ишлари вазирлиги ўз фаолиятида Ўзбекистон Республикасининг Конституциясига, Ўзбекистон Республикасининг қонунларига, республика Олий Кенгашининг бошқа актларига, Ўзбекистон Республикаси Президентининг фармонлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига амал қилади.

Вазирлик мудофаа масалалари бўйича амалдаги қонунларнинг тўғри қўлланилишини таъминлайди, уни такомиллаштиришга оид таклифларни ишлаб чиқади ҳамда белгиланган тартибда уларни Ўзбекистон Республикаси Олий Кенгаши ва Вазирлар Маҳкамасининг кўриб чиқиши учун киритади. Республика ҳудудида қўшинларнинг (кучларнинг) бўлиши тўғрисида келишувлар бўйича таклифлар ишлаб чиқади.

3. Мудофаа ишлари вазирлиги ўз асосий вазифаларини бажариш учун:

республика ҳудудида қўшин сафарбарлигини ўтказишга тайёргарликни, республика ва ССР Иттифоқи мудофааси манфаатлари йўлида киши ва халқ хўжалиги ресурсларини ҳисобга олишни, республика халқ хўжалиги учун кадрларни банд қилишни таъминлайди;

миллий гвардияни бутлайди, уни ўқитишни ва жанговар тайёргарликни таъминлашни ташкил этади;

тинчлик ва уруш даврида республикада фуқаро мудофааси бўйича прогнозлар лойиҳаларини ишлаб чиқади, фуқаро мудофааси моддий-техника базасининг кўпайиши ва ривожланишини, тинчлик ва уруш даврида фавқулодда ҳолатларда фуқаро мудофаасининг ҳаракатга тайёр ҳолда туришини таъминлайди;

ҳарбий билим юртларини бутлаш билан шуғулланади, олий ўқув юртлари ҳарбий кафедраларининг, ҳарбий тайёргарлик кучайтирилган мактабларнинг фаолиятини йўналтириб боради;

муқобил хизматни ташкил этиш масалаларини ҳал қилади;

уруш қатнашчиларига, Қуролли Кучлар фахрийларига, байналмилалчи жангчиларга имтиёзлар бериш устидан назорат олиб боради;

республикада турган ҳарбий қисмлар, ҳарбий идоралар ва муассасаларни жойлаштиришга, тартибга келтиришга ёрдам беради;

республикада жойлашадиган ҳарбий қисмлардаги шахсий составнинг хизмат ва жанговар тайёргарлигининг ҳамда интизомининг юксак даражада бўлишини таъминлашда иштирок этади;

фуқароларни ҳақиқий хизматга чақириш, СССР Мудофаа вазирлиги билан чақирилувчилар сони бўйича битимлар тузиш билан боғлиқ масалаларни ҳал қилади;

республика ҳудудида машқлар, манёврлар ўтказиш, ҳарбий қисмлар ва ҳарбий иншоотларни қайта жойлаштириш ва жойлаштириш масалаларини келишиб олади;

чақириқни режалаштиради ҳамда чақирилувчиларни қўшин турлари ва хиллари бўйича тақсимлайди;

Қуролли Кучлар сафларига фуқароларни чақиришни ташкил этишда чақирув комиссияларига ёрдам беради ва назоратни амалга оширади;

ҳарбий хизматчиларни ҳуқуқий ва ижтимоий ҳимоя қилишни, уларга ва уларнинг оила аъзоларига имтиёзлар бериш устидан назоратни таъминлайди;

Қуролли Кучлар учун махсус кишиларни тайёрлаш бўйича ишларни йўналтириб боради;

ҳарбий таълим олган ресурсларнинг тўпланишини, ҳарбий хизматга мажбур захирадагиларни ўқитишни ва қайта тайёрлашни ташкил этади;

республика ўқув юртларида ёшларни бошланғич ҳарбий тайёрлашга раҳбарлик қилади;

аҳолини, айниқса ёшларни ҳарбий-ватанпарварлик руҳида тарбиялаш бўйича ишларни ташкил этади;

ҳарбий қисмлардаги ҳодисалар тўғрисидаги хабарлар ва маълумотларни жойларда кўриб чиқишда бевосита қатнашади;

ҳарбий қисмлар билан оталиқ алоқаларини ташкил этади.

4. Ўзбекистон Республикаси Мудофаа ишлари вазирлигига Ўзбекистон Республикаси Конституциясига мувофиқ Ўзбекистон Республикаси Президенти тайинлайдиган, кейинчалик Ўзбекистон Республикаси Олий Кенгаши тасдиғига киритиладиган вазир бошчилик қилади.

Вазир ўринбосарларини Ўзбекистон Республикаси Президенти ҳузуридаги Вазирлар Маҳкамаси тайинлайди.

Ўзбекистон Республикаси Мудофаа ишлари вазирлиги тизимида хизматни ўтовчи солдатлар, сержантлар, офицерлар, генераллар ва адмираллар СССР Қуролли Кучлари ҳарбий хизматчиларининг барча ҳуқуқлари ва имтиёзларидан фойдаланадилар.

5. Мудофаа ишлари вазири:

ўзига бўйсунадиган тузилма бўлинмаларининг барча фаолиятига раҳбарлик қилади;

Мудофаа ишлари вазири ўз ҳуқуқи доирасида амалдаги қонунлар асосида ва уларни бажариш учун буйруқлар, директивалар, фармойишлар ва кўрсатмалар чиқаради ва уларнинг бажарилишини назорат қилишни ташкил этади;

вазирлик таркибига кирувчи бошқармалар ва бўлимлар ҳақидаги низомларни тасдиқлайди, аппарат ходимларини белгиланган тартибда ишга тайинлайди ва ишдан бўшатади;

тузилма бўлинмалари раҳбар ходимларининг жавобгарлик даражасини белгилайди, белгиланган тартибда рағбатлантириш ва жазо чораларини қўллайди;

мазкур Низомда назарда тутилган ҳуқуқларни амалга оширади, барча давлат ва жамоат ташкилотларида вазирлик номидан иш кўради, Мудофаа ишлари вазирлигининг фаолият доирасига кирувчи барча ишларни бажаради.

6. Мудофаа ишлари вазирлигида вазир (раис), унинг ўринбосарлари, тузилма бўлинмаларининг раҳбар командир кадрларидан ва Туркистон ҳарбий округи қўмондонлиги вакилидан иборат таркибда ҳайъат тузилади.

Ҳайъат аъзоларини вазирнинг тақдимномасига кўра Ўзбекистон Республикаси Президенти ҳузуридаги Вазирлар Маҳкамаси тасдиқлайди.

Ҳайъат ўтказиладиган мажлисларда ҳарбий бошқарув органлари фаолиятини такомиллаштириш, буйруқлар ижросини назорат қилиш, кадрларни танлаш, вазирлик аппарати ишини яхшилаш масалаларини кўриб чиқади, раҳбар ходимларнинг ҳисоботларини эшитади.

Ҳайъат қарорлари вазирнинг буйруқлари билан ҳаётга татбиқ қилинади.

7. Мудофаа ишлари вазирлиги марказий аппаратининг тузилишини ва ходимлар сонини Ўзбекистон Республикаси Президенти ҳузуридаги Вазирлар Маҳкамаси тасдиқлайди, вазирликни молиявий таъминлаш республиканинг, СССР Мудофаа вазирлиги ва СССР Ички ишлар вазирлиги маблағлари ҳисобига амалга оширилади.

8. Мудофаа ишлари вазирлиги юридик шахс ҳисобланади, Ўзбекистон Республикаси Давлат герби акс эттирилган ҳамда ўз номи ўзбек ва рус тилларида ёзилган муҳрга эга бўлади.

1. Раҳбарият

2. Штаб

3. Тезкор бошқарма

4. Алоқа бўлими

5. Саккизинчи бўлим

6. Махфий қисм

7. Бирлашган команда пункти (алоқа тармоғи)

8. Чақириқ, сафарбарлик ресурсларини тайёрлаш ва ҳарбий хизматчиларни ижтимоий ҳимоя қилиш бошқармаси

9. Фуқаро мудофааси ва фавқулодда ҳолатлар бошқармаси

10. Олий ўқув юртлари ва чақириққача тайёргарлик бошқармаси

11. Муқобил хизмат бошқармаси

12. Кадрлар бошқармаси

13. Молия-режа бошқармаси

14. Моддий-техника ва махсус таъминот бошқармаси

15. Ишлар бошқармаси

Армия, Авиация ва Флотга ёрдам бериш кўнгилли жамияти (Ўзбекистон Республикаси ДОСААФи)

Қорақалпоғистон Республикасида, вилоятларда ва Тошкент шаҳрида — мудофаа ишлари бошқармалари

Шаҳарларда ва ноҳияларда—мудофаа ишлари бўлимлари