Vazirlar Mahkamasi qaror qiladi:

Oʻzbekiston Respublikasi mehnat jamgʻarmalari va aholiga kredit berish davlat-tijorat banki (“Oʻzjamgʻarmabank”) ning Ustavi ilovaga muvofiq tasdiqlansin.

1. Oʻzbekiston jamgʻarma banki (“Oʻzjamgʻarmabank”) Oʻzbekiston Respublikasi mehnat jamgʻarmalari va aholiga kredit berish davlat-tijorat banki hisoblanadi hamda kredit-moliya muassasasi maqomiga egadir;

“Oʻzjamgʻarmabank” “Banklar va bank faoliyati toʻgʻrisida” Oʻzbekiston Respublikasi Qonuniga muvofiq tashkil etilgan va oʻz faoliyatida Oʻzbekiston Respublikasi Vazirlar Mahkamasiga boʻysunadi.

2. “Oʻzjamgʻarmabank” Oʻzbekiston Respublikasi banklarining yagona tizimiga kiradi.

3. “Oʻzjamgʻarmabank” yuridik shaxs hisoblanadi, oʻz nomi yozilgan va Oʻzbekiston Respublikasi Davlat gerbi tasviri tushirilgan muhrga, oʻzbek va rus tillarida shtamplar va blankalarga egadir, toʻla xoʻjalik hisobi hamda oʻzini oʻzi mablagʻ bilan taʼminlash asosida faoliyat koʻrsatadi, alohida mol-mulkka egalik qiladi.

“Oʻzjamgʻarmabank” oʻz nomidan huquqlarga ega boʻlishi hamda majburiyatlarni bajarishi, sudda, xoʻjalik va xolislik sudlarida daʼvogar va javobgar boʻlishi mumkin.

“Oʻzjamgʻarmabank” muassasalari tizimiga quyidagilar kiradi: Qoraqalpogʻiston Respublikasi, viloyatlar va Toshkent shahar boshqarmalari, “Oʻzjamgʻarmabank” ning tuman boʻlimlari, ularning filiallari va agentliklari bilan birgalikda.

“Oʻzjamgʻarmabank” iqtisodiy maqsadga muvofiqlikka bogʻliq ravishda taqiqlanmagan faoliyat turlarini amalga oshirish uchun belgilangan tartibda boshqa muassasalar tashkil etishi mumkin.

“Oʻzjamgʻarmabank” ning joylashgan manzili — Toshkent shahri, Xalqlar doʻstligi shoh koʻchasi, 6.

4. “Oʻzjamgʻarmabank” oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Kengashining boshqa qarorlariga, Prezidentning farmonlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Markaziy banki tomonidan respublikaning barcha tijorat banklari uchun belgilangan kredit, hisob-kitob va kassa operatsiyalari boʻyicha umumiy qoidalarga, shuningdek, mazkur Ustavga amal qiladi.

5. “Oʻzjamgʻarmabank”ning Oʻzbekiston Respublikasi Markaziy banki, fuqarolar va yuridik shaxslar bilan oʻzaro munosabatlarining huquqiy asosi boʻlib ular bilan tuziladigan hamda tomonlarning oʻzaro majburiyati va javobgarligini belgilovchi shartnomalar hisoblanadi. Umumiy qabul qilingan qoidalarga asosan omonatlar qoʻyish boʻyicha operatsiyalar shartnoma bilan rasmiylashtirilmaydi.

6. “Oʻzjamgʻarmabank” bank operatsiyalari oʻtkazish bilan bogʻliq qarorlar qabul qilishda oʻz faoliyatida davlat hokimiyati va boshqaruv organlaridan mustaqildir. Aholi bilan operatsiyalarni sodir etishda faqat “Oʻzjamgʻarmabank” muassasalari “Oʻzjamgʻarmabank” atributikasiga ega boʻlgan jamgʻarma daftarchalari va boshqa hujjatlardan foydalanish huquqiga ega boʻladi.

7. “Oʻzjamgʻarmabank” tomonidan jalb etilgan pul mablagʻlari shartnoma asosida Oʻzbekiston Respublikasi Markaziy bankiga halq xoʻjaligining kredit resurslariga boʻlgan ehtiyojini qondirish uchun kamida 70 foiz miqdorida beriladi. Qolgan 30 foizi “Oʻzjamgʻarmabank” tomonidan aholiga, yuridik shaxslarga kredit berish uchun foydalaniladi hamda Oʻzbekiston Respublikasining qarz majburiyatlariga joylashtiriladi. Aholiga va yuridik shaxslarga kredit berish yagona davlat pul-kredit siyosatining asosiy yoʻnalishlariga muvofiq amalga oshiriladi.

8. “Oʻzjamgʻarmabank” aholining omonatlarini qabul qilishni va boshqa operatsiyalarni bajarishni agar Oʻzbekiston Respublikasi qonunchiligida boshqacha hol belgilanmagan boʻlsa, oʻzining yoʻriqnomalari va qoidalariga muvofiq amalga oshiradi.

9. Oʻzbekiston Respublikasining, boshqa davlatlarning fuqarolari, shuningdek, fuqaroligi boʻlmagan shaxslar “Oʻzjamgʻarmabank”ning omonatchilari boʻlishlari mumkin.

Pulni omonatga qabul qilish bank tomonidan omonatchiga bu operatsiyani tasdiqlovchi hujjat (jamgʻarma daftarchasi, kvitansiya, kredit kartochkasi va boshqalar) berilgan holda amalga oshiriladi.

10. “Oʻzjamgʻarmabank” kreditni oʻz vaqtida qaytarishni taʼminlash sifatida garov, kafolat, vakolat hamda bank amaliyotida qabul qilingan boshqa shakllardagi majburiyatlarni qabul qiladi.

11. “Oʻzjamgʻarmabank” davlatning majburiyatlari uchun javob bermaydi, davlat ham “Oʻzjamgʻarmabank”ning majburiyatlari boʻyicha javob bermaydi, fuqarolarning omonatlari boʻyicha majburiyatlar bundan mustasnodir.

12. “Oʻzjamgʻarmabank” ning asosiy vazifalari quyidagilar hisoblanadi:

Oʻzbekiston Respublikasida jamgʻarma ishi sohasida yagona davlat siyosatini oʻtkazish;

aholiga kompleks hisob-kitob-kassa xizmati koʻrsatishni, shuningdek, fuqarolarga va yuridik shaxslarga kredit berishni amalga oshirish;

oʻz mablagʻlaridan va jalb etilgan mablagʻlardan “Oʻzjamgʻarmabank”ning tijorat faoliyatida samarali foydalanish;

naqd pulsiz hisob-kitoblarni kengaytirish.

13. “Oʻzjamgʻarmabank” unga yuklatilgan vazifalarga muvofiq quyidagi funksiyalarni amalga oshiradi:

jamgʻarma ishini hamda aholiga va yuridik shaxslarga bank xizmati koʻrsatishni rivojlantirishning prinsipial asoslarini ishlab chiqish va joriy etish;

aholiga va yuridik shaxslarga bank xizmati koʻrsatish sohasida respublika dasturlari amalga oshirilishini tashkil etish, respublikaning butun hududida “Oʻzjamgʻarmabank” muassasalarining toʻlov va hisob-kitob hujjatlari puxta olib borilishini taʼminlash;

“Oʻzjamgʻarmabank” muassasalari tomonidan aholi va yuridik shaxslarga xizmat koʻrsatish boʻyicha operatsiyalarni sodir etishning umumiy uslubiy prinsiplariga rioya qilish;

toʻlov hujjatlari va boshqa qimmatli qogʻozlar (cheklar, akkreditivlar, veksellar, aksiyalar, obligatsiyalar va boshqalar) chiqarish;

“Oʻzjamgʻarmabank” muassasalari operatsiyalari boʻyicha hisob-kitoblarni tashkil etish;

“Oʻzjamgʻarmabank” muassasalari tarmoqlari uchun kadrlar tayyorlash va qayta tayyorlashni tashkil etish;

“Oʻzjamgʻarmabank” muassasalarining boshqaruv nomenklaturasiga kiruvchi rahbar xodimlarini tasdiqlash;

bank faoliyati sohasida belgilangan tartibda boshqa davlatlarning banklari bilan hamkorlik qilish, zarurat boʻlganda aksionerlik banklari taʼsis etish, Oʻzbekiston Respublikasi qonunchiligiga muvofiq boshqa tijorat faoliyatini amalga oshirish;

“Oʻzjamgʻarmabank” muassasalarini qimmatli qogʻozlar blankalari, maxsus texnika bilan taʼminlash, quyi muassasalarning markazlashtirilgan ishlarga buyurtmalarini bajarish.

14. “Oʻzjamgʻarmabank” aholining pul omonatlarini qabul qiladi va joylashtiradi, kreditlarni jalb qiladi va beradi, shu jumladan kichik korxonalar tashkil etish va ularni rivojlantirish, fuqarolar tomonidan davlat mulkining xususiylashtirilishi, turar joy binolari qurilishi va ularni tuzatish hamda aholining boshqa ehtiyojlarini qondirish bilan bogʻliq kreditlarni jalb qiladi va beradi, mijozlar va banklar korrespondentlarning topshirigʻi boʻyicha hisob-kitoblarni, mijozlarga kassa xizmati koʻrsatishni amalga oshiradi, shuningdek, quyidagi operatsiyalarni sodir etadi;

a) mijozlarning schyotlarini yuritish, fuqarolar va yuridik shaxslarning schyotlari hamda banklar-korrespondentlarning schyotlari ham shu jumlaga kiradi;

b) davlat toʻlov hujjatlarini, qimmatli qogʻozlarni sotib olish, sotish va saqlash hamda ular bilan boshqa operatsiyalari amalga oshirish;

v) uchinchi shaxslar uchun pul shaklida bajarilishini nazarda tutuvchi kafillik, kafolat va boshqa majburiyatlarni berish. Bu “Oʻzjamgʻarmabank” tomonidan jalb etilgan mablagʻlar doirasida amalga oshiriladi;

g) mijozlarning topshirigʻi boʻyicha ishonchli (trest) operatsiyalar (mablagʻlarni jalb etish va joylashtirish, qimmatli qogʻozlarni boshqarish va boshqalar);

d) bank faoliyati bilan bogʻliq boʻlgan maslahat xizmatlari koʻrsatish;

e) tovarlar yetkazib berish va xizmatlar koʻrsatishdan kelib chiquvchi talablar qoʻyish huquqiga ega boʻlish, bunday talablarni bajarishda tavakkalchilik qilish va bu talablarni inkassatsiya qilish, shuningdek, bu talablarni tovarlarning harakatini qoʻshimcha ravishda nazorat qilish orqali bajarish (faktoring);

j) lizing operatsiyalarini amalga oshirish;

z) Oʻzbekiston Respublikasi Markaziy bankining litsenziyasi asosida va u tomonidan belgilangan qoidalarga muvofiq respublikada va chet elda chet el valyutasida operatsiyalarni amalga oshirish.

15. Bank tomonidan yuridik shaxslar va boshqa tashkilotlarning operatsiyalari va schyotlari boʻyicha maʼlumotnomalar tashkilotlarning oʻziga, davlat soliq inspeksiyalariga, sudlarga, xoʻjalik sudlariga, tergov organlariga, auditorlik tashkilotlariga berilishi mumkin.

16. Fuqarolarning schyotlari va omonatlari boʻyicha maʼlumotnomalar mijozlar va ularning vakillaridan tashqari tergovda boʻlgan ishlar boʻyicha mijozlarning schyotlarda va omonatlarda boʻlgan pul mablagʻlari va boshqa boyliklari xatlanishi, band solinishi yoki mol-mulk musodara qilinishi mumkin boʻlgan hollarda sudlarga va tergov organlariga ham berilishi mumkin.

Schyotlar va omonatlarning egasi vafot etgan taqdirda ular boʻyicha maʼlumotnomalar schyot yoki omonatning egasi tomonidan oʻlim hodisasi nazarda tutilgan holda bankka berilgan topshiriqda koʻrsatilgan shaxslarga, vafot etgan omonatchilarning omonatlari boʻyicha merosxoʻrlik ishlarini olib borayotgan davlat notarial idoralariga, shuningdek, xorijiy konsullik muassasalariga berilishi mumkin.

Sudlar, dastlabki tergov, surishtiruv organlari notarial organlarida omonatlar boʻyicha schyotlar yoki boshqa koʻrinishdagi jamgʻarmalarining joylashgan joyi toʻgʻrisida maʼlumotlar boʻlmagan taqdirda “Oʻzjamgʻarmabank” tomonidan ularni qidirish amalga oshirilmaydi.

17. Yuridik shaxslarning “Oʻzjamgʻarmabank” dagi pul mablagʻlari va boshqa boyliklari sudlar, xoʻjalik sudlari, tergov organlarining qarori bilan xatlanishi mumkin, undirish esa sudlar tomonidan berilgan ijro varaqalari, xoʻjalik sudlarining buyruqlari hamda boshqa ijro hujjatlari boʻyicha, shuningdek, davlat soliq inspeksiyalarining talabi boʻyicha amalga oshirilishi mumkin.

18. Fuqarolarning “Oʻzjamgʻarmabank” dagi pul mablagʻlari va boshqa boyliklari faqat qonuniy kuchga kirgan hukm yoki sudning qarori asosida xatlanishi va undirib olinishi mumkin.

Fuqarolarning pul mablagʻlari va boshqa boyliklari qonuniy kuchga kirgan hukm yoki qonunga muvofiq chiqarilgan mol-mulkni musodara qilish toʻgʻrisidagi qaror asosida musodara qilinishi mumkin.

19. “Oʻzjamgʻarmabank” muassasalari tomonidan operatsiyalar sodir etish shartlari texnologiyasi, foiz stavkalari, bank muassasalari tomonidan aholiga koʻrsatiladigan xizmatlar uchun komission mukofot miqdori “Oʻzjamgʻarmabank” Boshqaruvi tomonidan belgilanadi, korxonalar, muassasalar va tashkilotlarga koʻrsatiladigan xizmatlar uchun banklar tomonidan undirib olinadigan komission mukofot miqdori esa “Oʻzjamgʻarmabank” boʻlimi tomonidan shartnoma asosida belgilanadi.

20. Agar bank hujjatlarini saqlash muddati tamom boʻlgan boʻlsa, “Oʻzjamgʻarmabank” mijozlarning sodir etilgan operatsiyalar boʻyicha eʼtirozlarini qabul qilmaydi.

21. Bank:

mulkchilikning barcha shakllaridagi korxonalar, tashkilotlar va muassasalardan toʻlov topshiriqlarini, agar bu topshiriqlar belgilangan tartibga xilof ravishda berilgan boʻlsa, fuqarolarning omonatlariga mablagʻ oʻtkazish uchun qabul qilmaslikka; kredit beriladigan yuridik va jismoniy shaxslardan hisobotlar, balanslar hamda ularning toʻlovga layoqatliklarini va berilgan kreditlarning taʼminlanganligini tasdiqlovchi hujjatlarni olishga;

kredit resurslaridan jismoniy va yuridik shaxslarga kredit berishda foydalanishga, shuningdek, kredit resurslarini banklararo pul bozorida kimoshdi savdosi orqali sotishga;

aholining omonatlari boʻyicha eng kam foiz stavkalarini yuqori chegara bilan cheklanmasdan mustaqil koʻpaytirishga;

kredit shartnomalarida nazarda tutilgan majburiyatlar buzilgan taqdirda bundan keyin kredit berishni toʻxtatishga, berilgan kredit summalarini muddatidan ilgari undirib olishga;

shartnomalar asosida oʻtkazilgan operatsiyalar uchun foiz stavkalarini hamda koʻrsatilgan xizmatlar uchun komission mukofotlar miqdorini belgilashga haqlidir.

22. Omonatchi “Oʻzjamgʻarmabank” ka istalgan miqdorda omonat qoʻyishga haqlidir. “Oʻzjamgʻarmabank” ka qoʻyiladigan jamgʻarma omonat dastlabki badalining eng oz summasi “Oʻzjamgʻarmabank” Boshqaruvi tomonidan tasdiqlangan tegishlicha Nizom bilan belgilanadi.

23. Omonatchi oʻz omonatlarini tasarruf qilishi, ular boʻyicha “Oʻzjamgʻarmabank” taklif qiladigan foizlarda va boshqa shakllarda daromad olishi, omonatlar boʻyicha schyotlardan naqd pulsiz toʻlovlar sodir etishi mumkin.

24. Omonatchi birovning nomiga yozilgan omonatni qoʻyishga yoki oluvchiga beriladigan omonatni qoʻyishga haqlidir. “Oʻzjamgʻarmabank” muassasasi tomonidan nomiga omonat qabul qilingan hujjat berilgan shaxs omonatchi hisoblanadi. Omonatga badallar faqat omonat egasi tomonidan emas, balki har qanday shaxs tomonidan qoʻyilishi mumkin. Oluvchi uchun schyotlarning ochilishi va omonatni berish boʻyicha keyingi operatsiyalarni sodir etish omonatni qoʻyuvchi yoki pul oluvchi shaxsning shaxsini tasdiqlovchi hujjat taqdim etilgach beriladi.

25. Voyaga yetmagan shaxs ham omonatchi boʻlishi mumkin. Oʻz nomiga oʻzi omonat qoʻygan voyaga yetmagan shaxs bu omonatni mustaqil tasarruf etadi.

Biror kishi tomonidan voyaga yetmaganning nomiga qoʻyilgan omonatlarni quyidagilar tasarruf etadilar:

a) voyaga yetmaganlar 15 yoshga toʻlgunlariga qadar — ota-onalar yoki voyaga yetmaganlarning boshqa qonuniy vakillari;

b) 15 yoshga toʻlgandan keyin voyaga yetganning oʻzi, lekin oʻz ota- onasining yoki boshqa qonuniy vakillarning roziligi bilan.

26. Omonatchi omonatni shaxsan, shuningdek, vakil orqali ham tasarruf etishi mumkin, bunda omonatchi vakilning nomiga tegishli ishonchnomani rasmiylashtirishi kerak.

Omonatchi “Oʻzjamgʻarmabank”ka agar oʻzi vafot etgan taqdirda istalgan shaxsga, korxonaga, muassasaga, tashkilotga yoki davlatga omonatni berish toʻgʻrisida topshiriq berish huquqiga egadir. Omonat egasi vafot etgan taqdirda topshiriq berilmagan omonatni bank merosxoʻrlarga Oʻzbekiston Respublikasi qonunchiligida belgilangan tartibda beradi.

Oʻlim hodisasi sababli topshiriqni va omonatlarni tasarruf etishga ishonchnomalarni rasmiylashtirish tartibi “Oʻzjamgʻarmabank” Boshqaruvi tomonidan belgilanadi

27. Omonatlar boʻyicha va jamgʻarmalarning boshqa turlari boʻyicha daromadlarga soliq solinmaydi.

28. Aholining “Oʻzjamgʻarmabank”ka qoʻyilgan omonatlarining saqlanishi va oʻz vaqtida qaytarilishi Oʻzbekiston Respublikasi tomonidan kafolatlanadi.

29. “Oʻzjamgʻarmabank”ning barcha xizmatchilari operatsiyalar, oʻz mijozlari va korrespondentlarining schyotlari va omonatlari boʻyicha sirni saqlashga majburdirlar.

30. “Oʻzjamgʻarmabank” muassasalari tomonidan mijozlarga pul mablagʻlari notoʻgʻri berilgan yoki schyotlarga summalar notoʻgʻri oʻtkazilgan taqdirda mijozlarga yetkazilgan zarar fuqaro qonunchiligiga muvofiq undiriladi.

31. Asosiy va oborot mablagʻlar fondlari, shuningdek, balansda aks ettiriladigan boshqa boyliklar “Oʻzjamgʻarmabank” ning mulkini tashkil etadi.

“Oʻzjamgʻarmabank” da bankning oʻz mablagʻlari hamda “SSSR jamgʻarmalar bankining respublikalar va davlatlar jamgʻarma banklari bilan oʻzaro munosabatlari va hisob-kitoblarining umumiy asoslari toʻgʻrisida” 1991-yil 30-oktabrda imzolangan bitimga muvofiq SSR Jamgʻarmalar banki balansidan “Oʻzjamgʻarmabank” balansiga oʻtkazilgan aktivlar va passivlar summasi boʻladigan ustav fondi tashkil etiladi.

32. “Oʻzjamgʻarmabank” ning ustav fondi Boshqaruv tomonidan 150 mln soʻm miqdorida belgilangan hamda “Oʻzjamgʻarmabank” ning majburiyatlarini taʼminlash uchun xizmat qiladi.

33. “Banklar va bank faoliyati toʻgʻrisida” Oʻzbekiston Respublikasi Qonuniga muvofiq bank faoliyatidan olingan daromadlap hamda respublika qonunchiligi bilan taqiqlanmagan boshqa daromadlar “Oʻzjamgʻarmabank” mulki shakllanishining manbalari hisoblanadi.

34. “Oʻzjamgʻarmabank” da quyidagi jamgʻarmalar tashkil etiladi:

ustav va zaxira jamgʻarmalari;

asosiy mablagʻlar jamgʻarmasi;

isteʼmol jamgʻarmasi;

ishlab chiqarish va ijtimoiy rivojlantirish jamgʻarmasi;

moddiy ragʻbatlantirish jamgʻarmasi;

ishlab chiqarish-xoʻjalik faoliyati uchun tashkil etiladigan boshqa jamgʻarmalar.

Bu jamgʻarmalarni tashkil etish va ulardan foydalanish tartibi Oʻzbekiston Respublikasi qonun hujjatlari bilan belgilanadi.

35. “Oʻzjamgʻarmabank” ning daromadlariga amaldagi qonun hujjatlariga muvofiq soliq solinadi.

36. Daromad resurslarni jalb etish va joylashtirish, xizmatlar koʻrsatish boʻyicha operatsiyalarni oʻtkazishdagi faoliyat, shuningdek, boshqa operatsiyalarni, shu jumladan Oʻzbekiston Respublikasi qonuni va mazkur Ustavda nazarda tutilgan tijorat operatsiyalarini bajarish natijasida hosil boʻladi.

Oʻzbekiston Respublikasining amaldagi qonun hujjatlariga muvofiq budjetga soliq toʻlangandan, jamgʻarmalar tashkil etilgandan keyin daromaddan Boshqaruv tomonidan belgilanadigan tartibda foydalaniladi.

37. Aholining, jamoat tashkilotlarining schyotlaridagi pul mablagʻlari qoldiqlari, jamgʻarmalarning oʻz mablagʻlari, boshqa banklarning depozitlari va kreditlari, boshqa jalb etilgan mablagʻlar, taqsimlanmagan daromad “Oʻzjamgʻarmabank” ning kredit resurslari hisoblanadi.

38. Rais, uning oʻrinbosarlari va Boshqaruv aʼzolaridan iborat tarkibdagi Oʻzbekiston Jamgʻarmalar bankining boshqaruvi “Oʻzjamgʻarmabank” boshqaruvining yuqori organi hisoblanadi. Boshqaruv raisi Markaziy bank Boshqaruvi raisining taqdimnomasi boʻyicha Oʻzbekiston Respublikasi Vazirlar Mahkamasi tomonidan tayinlanadi. Raisning oʻrinbosarlari, Boshqaruv aʼzolarining soni va shaxsiy tarkibi “Oʻzjamgʻarmabank” Boshqaruvi raisining taqdimnomasi boʻyicha Oʻzbekiston Respublikasi Vazirlar Mahkamasi tomonidan tasdiqlanadi.

39. “Oʻzjamgʻarmabank” Boshqaruviga boshqarmalar va unga qarashli muassasalar faoliyatining barcha muhim masalalarini hal etish yuklatiladi.

“Oʻzjamgʻarmabank” Boshqaruvi boshqaruvning yuqori organi sifatida:

a) jamgʻarma ishlarini, naqd pulsiz hisob-kitoblarni rivojlantirish va takomillashtirish hamda kredit resurslarini joylashtirish, kadrlar tayyorlash boʻyicha tadbirlarni belgilaydi;

b) xoʻjalik hisobini, hisob va hisobotni, bank ichki nazoratini, oʻziga qarashli muassasalarda boyliklarni saqlashni taʼminlashni, bank operatsiyalarini avtomatlashtirishni, mehnatni ilmiy tashkil etishni uyushtirishning asosiy qoidalarini ishlab chiqadi;

v) “Oʻzjamgʻarmabank” krediti va moliya yigʻma hisob-kitob rejalari loyihasini muhokama qiladi;

g) bankka boʻysunuvchi boshqarmalarning yillik hisobotlari va balanslarini tasdiqlaydi, “Oʻzjamgʻarmabank” ning yigʻma balansini koʻrib chiqadi;

d) belgilangan iqtisodiy normativlardan kelib chiqqan holda markaziy apparatning tuzilmasini, shtatlarini, sonini, mehnatga haq toʻlash shartlari va miqdorini, shuningdek, “Oʻzjamgʻarmabank” muassasalarida mehnatga haq toʻlashi va moddiy ragʻbatlantirish tizimini belgilaydi;

e) “Oʻzjamgʻarmabank” Boshqaruvining xarajatlari smetasini tasdiqlaydi;

j) oʻziga qarashli muassasalarni tekshirish tartibini belgilaydi;

z) “Oʻzjamgʻarmabank” va uning muassasalar xodimlari uchun sir saqlanishi kerak boʻlgan axborotlar roʻyxatini belgilaydi;

i) “Oʻzjamgʻarmabank” ka qarashli muassasalar faoliyatiga rahbarlikni amalga oshiradi;

k) uning koʻrib chiqishi uchun kiritilgan boshqa masalalarni hal etadi. “Oʻzjamgʻarmabank” Boshqaruvining muhim qarorlari, odatda, Raisning buyruqlari bilan hayotga joriy etildi.

40. “Oʻzjamgʻarmabank” Boshqaruvi oʻz ishini respublika “Oʻzjamgʻarmabank” muassasalari faoliyatiga rahbarlik qilish boʻyicha barcha masalalarni hal etishni muhokama qilishda kollegiallikni yakkaboshchilik bilan qoʻshib olib borish asosida tashkil etadi. Boshqaruv faoliyati ish tartibiga muvofiq amalga oshiriladi.

41. “Oʻzjamgʻarmabank” Boshqaruvining Raisi “Oʻzjamgʻarmabank” faoliyatiga unga Ustav tomonidan berilgan vakolatlarga muvofiq rahbarlik qiladi hamda “Oʻzjamgʻarmabank” yuklatilgan vazifalar bajarilishi uchun shaxsan javob beradi.

Rais:

“Oʻzjamgʻarmabank” myaccacalari faoliyatiga tegishli boʻlgan barcha masalalarni hal etadi, boshqaruv faoliyatiga tegishli deb topilgan masalalar bundan mustasnodir;

“Oʻzjamgʻarmabank” nomidan ishonchnomasiz harakat qiladi, “Oʻzjamgʻarmabank” ning faoliyati masalalari boʻyicha respublikaning barcha organlarida, korxonalarida, tashkilotlarida va boshqa davlatlarda uning nomidan ish koʻradi;

“Oʻzjamgʻarmabank” ning mol-mulkini tasarruf qiladi, shartnomalar, bitimlar, shu jumladan mehnat shartnomalari tuzadi, ishonchnomalar beradi;

xizmat safarlarining, vakillikning va boshqa xarajatlarning cheklangan miqdorini belgilaydi;

“Oʻzjamgʻarmabank” ning shtat jadvalini tasdiqlaydi, mehnatga haq toʻlashning hamda xodimlar boshqa daromadlarining shakli va miqdorlarini belgilaydi;

mukofotlash toʻgʻrisidagi nizomni, “Oʻzjamgʻarmabank” xodimlarining lavozim yoʻriqnomalarini tasdiqlaydi;

“Oʻzjamgʻarmabank” ning barcha xodimlari uchun majburiy boʻlgan buyruqlar va farmoyishlap chiqaradi;

“Oʻzjamgʻarmabank” faoliyatining boshqa masalalarini koʻrib chiqadi va hal etadi.

42. “Oʻzjamgʻarmabank” muassasalar buxgalteriya uchyotini yuritadilar va Oʻzbekiston Respublikasi Markaziy banki tomonidan belgilanadigan umumiy qoidalarga muvofiq hisobot taqdim etadilar.

“Oʻzjamgʻarmabank” da buxgalteriya uchyoti hisobot va operatsiyalar boʻyicha hujjatlar oborotining aniq tartibi “Oʻzjamgʻarmabank” Boshqaruvi tomonidan belgilanadi. “Oʻzjamgʻarmabank” yillik balansni hamda daromadlar va zararlar schyotini tuzadi, hisobot va boshqa materiallarning xarakteri va hajmi Oʻzbekiston Respublikasi Markaziy banki tomonidan belgilangan shakllarda va muddatlarda boʻladi.

43. “Oʻzjamgʻarmabank”ning operatsiya yili 1-yanvardan boshlanadi va 31-dekabrda tugaydi.

44 “Oʻzjamgʻarmabank” faoliyatini tekshirish “Banklar va bank faoliyati toʻgʻrisida” Oʻzbekiston Respublikasi Qonuniga muvofiq amalga oshiriladi.

45. Bank xodimlari sugʻurta tashkilotida sugʻurta qilinishlari mumkin.

46. “Oʻzjamgʻarmabank” ning asosiy mablagʻlari (asosiy vositalarga tegishli boʻlgan binolar, inshootlar, asbob-uskunalar va boshqa mol-mulk) ixtisoslashtirilgan sugʻurta tashkilotida sugʻurta qilinishi mumkin.

47. “Oʻzjamgʻarmabank”ning tugatilishi Oʻzbekiston Respublikasi Vazirlar Mahkamasining qarori bilan amalga oshiriladi.

48. “Oʻzjamgʻarmabank” tugatilgan taqdirda tugatish komissiyasi tuziladi, komissiyaning xulosasi tasdiqlash uchun Oʻzbekiston Respublikasi Vazirlar Mahkamasiga taqdim etiladi.