Qorakoʻlchilikda iqtisodiy islohotlarni chuqurlashtirish, boshqarishni takomillashtirish, ishlab chiqarish samaradorligini oshirish va tarmoqning eksport imkoniyatlarini kengaytirish maqsadida Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi, Qishloq va suv xoʻjaligi vazirligi, Oʻzbekiston Qishloq xoʻjaligi ilmiy-ishlab chiqarish markazi, Qoraqalpogʻiston Respublikasi Vazirlar Kengashi, Buxoro, Jizzax, Qashqadaryo, Navoiy, Samarqand va Surxondaryo viloyatlari hokimliklari, shuningdek, qorakoʻlchilik xoʻjalik yurituvchi subyektlarining:

Oʻzbekiston Respublikasi Qishloq va suv xoʻjaligi vazirligi huzuridagi “Qorakoʻl” uyushmasini va Navoiy viloyat qorakoʻlchilik aksiyadorlik jamiyatlari va kooperativlari uyushmasini tugatish toʻgʻrisidagi;

qorakoʻlchilik xoʻjaliklarini mulkiy pay va oilaviy pudrat asosida qishloq xoʻjaligi kooperativlari (shirkat xoʻjaliklari)ga aylantirish toʻgʻrisidagi;

tarkibiga tegishli hududlarning qorakoʻl naslchiligi, tovar va boʻrdoqiga boqish xoʻjaliklari, shuningdek tuzatish-qurilish tashkilotlari kiruvchi hududiy “Qorakoʻl” aksiyadorlik birlashmalarini tashkil etish toʻgʻrisidagi;

hududiy aksiyadorlik birlashmalari, “Buxoro-Qorakoʻl” ochiq turdagi aksiyadorlik jamiyati, “Keles-jun” ochiq turdagi aksiyadorlik jamiyati tomonidan Oʻzbekiston Respublikasi Qishloq va suv xoʻjaligi vazirligi tizimida “Oʻzbek qorakoʻli” kompaniyasini tashkil etish toʻgʻrisidagi takliflari qabul qilinsin.

2. Quyidagilar “Oʻzbek qorakoʻli” kompaniyasining asosiy vazifalari etib belgilansin:

qorakoʻl qoʻylarining yuqori mahsuldor zotlarini yaratish va joriy etish boʻyicha qorakoʻlchilik korxonalari va tashkilotlarining faoliyatini muvofiqlashtirish, shuningdek, respublikada qorakoʻl qoʻylarining elita genofondining saqlab qolinishi ustidan nazoratni taʼminlash;

uzoq yaylovlarning holatini yaxshilash, qorakoʻlchilik mahsulotlari yetishtirish, ularni tayyorlash, qayta ishlash va tayyor mahsulot chiqarishning ilgʻor texnologiyalarini joriy etish sohasida yagona texnologiya va investitsiya siyosati olib borish;

qorakoʻlchilik mahsulotlarini sotish va eksportga yetkazib berish hajmlarini koʻpaytirish boʻyicha marketing tadqiqotlari olib borish, qorakoʻlchilik xoʻjaliklarini uslubiy va axborot bilan taʼminlash;

shartnoma munosabatlari tizimini takomillashtirish yoʻli bilan xomashyo yetishtiruvchilar bilan tayyorlovchi, qayta ishlovchi korxonalar oʻrtasida iqtisodiy va texnologiya aloqalarini mustahkamlash;

qorakoʻlchilikda iqtisodiy islohotlar jarayonlarini chuqurlashtirish, choʻponlar va ularning oila aʼzolarining mehnat va turmush shart-sharoitlarini yaxshilash masalalarini hal qilish.

3. “Oʻzbek qorakoʻli” kompaniyasi tarkibiga kiruvchi xoʻjalik yurituvchi subyektlar roʻyxatiga, kompaniya boshqaruv apparati tuzilmasiga (xodimlarning cheklangan soni 16 nafar, xizmat koʻrsatuvchi xodimlardan tashqari) va uning hududiy boʻlinmalari ijro etuvchi apparatining namunaviy tuzilmasiga 1*, 1a, 2, 3-ilovalarga muvofiq rozilik berilsin.

Belgilab qoʻyilsinki, “Oʻzbek qorakoʻli” kompaniyasining rahbarlari belgilangan tartibda muassislar umumiy yigʻilishida saylanadilar va Oʻzbekiston Respublikasi Qishloq va suv xoʻjaligi vazirligi qarori bilan, Vazirlar Mahkamasi bilan kelishilgan holda, lavozimga tasdiqlanadilar. Hududiy aksiyadorlik birlashmalari rahbarlari ular muassislarining umumiy yigʻilishida saylanadilar va hokimiyat mahalliy organlari bilan kelishilgan holda kompaniya boshqaruvi qarori bilan tasdiqlanadilar.

4. Belgilab qoʻyilsinki:

“Oʻzbek qorakoʻli” kompaniyasining ustav jamgʻarmasi tugatilayotgan “Qorakoʻl” uyushmasining mol-mulki, uning trast boshqaruviga aksiyadorlik jamiyatlari aksiyalarining davlat paketini berish, hududiy aksiyadorlik birlashmalari va kompaniya boshqa qatnashchilarining taʼsis badallari hisobiga shakllantiriladi;

hududiy aksiyadorlik birlashmasining ustav jamgʻarmasi qorakoʻlchilik xoʻjaliklari va birlashma boshqa qatnashchilarining taʼsis badallari hisobiga hosil boʻladi;

“Oʻzbek qorakoʻli” kompaniyasi va uning hududiy aksiyadorlik birlashmalarining xoʻjalik faoliyatini mablagʻ bilan taʼminlash, shu jumladan ularning boshqaruv apparati xarajatlari oʻz xoʻjalik faoliyati va xizmatlar koʻrsatish hisobiga amalga oshiriladi;

“Oʻzbek qorakoʻli” kompaniyasi shartnomalar va qabul qilingan majburiyatlar boʻyicha “Qorakoʻl” uyushmasining huquqiy vorisi hisoblanadi.

5. Oʻzbekiston Respublikasi Davlat mulki qoʻmitasi, Qishloq va suv xoʻjaligi vazirligi, “Oʻzbek qorakoʻli” kompaniyasi:

Adliya vazirligi va boshqa manfaatdor vazirliklar va idoralar bilan birgalikda mollarni pudrat shartnomasi asosida oilalarga berish tartibini va qorakoʻlchilikda oila pudrati namunaviy shartnomasini ikki hafta muddatda ishlab chiqsinlar va tasdiqlasinlar;

qorakoʻl qoʻylari bosh sonini ikki oy muddatda xatlovdan oʻtkazsinlar va ilgari davlat tasarrufidan chiqarilgan qorakoʻlchilik xoʻjalik yurituvchi subyektlarining mol-mulkini qayta baholasinlar;

qorakoʻlchilik xoʻjaliklarini mulkiy payga asoslangan qishloq xoʻjaligi kooperativlari (shirkat xoʻjaliklari)ga aylantirish yuzasidan tashkiliy chora-tadbirlar koʻrsinlar;

“Buxoro-Qorakoʻl” ochiq turdagi aksiyadorlik jamiyati va “Keles-jun” ochiq turdagi aksiyadorlik jamiyatining erkin sotish uchun moʻljallangan aksiyalarining bir qismini qorakoʻlchilik qishloq xoʻjaligi korxonalariga sotishni nazarda tutsinlar.

6. “Oʻzbek qorakoʻli” kompaniyasi, Oʻzbekiston Respublikasi Qishloq va suv xoʻjaligi vazirligi bir oy muddatda kompaniyaning va uning hududiy aksiyadorlik birlashmalarining ustavini ishlab chiqsinlar, taʼsis yigʻilishlarini oʻtkazsinlar, ustavlarni tasdiqlasinlar.

7. Qorakoʻlchilik tarmogʻini va respublikaning choʻl mintaqalari aholisini davlat tomonidan qoʻllab-quvvatlash maqsadida:

“Oʻzbek qorakoʻli” kompaniyasiga va uning xoʻjalik yurituvchi subyektlariga, istisno tariqasida, dagʻal qorakoʻl juni eksport qilish yuzasidan Vazirlar Mahkamasining 1995-yil 28-avgustdagi 343-son va 1996-yil 13-avgustdagi 280-son qarorlarida belgilangan tartibda barter kontraktlari tuzishga ruxsat etilsin;

Oʻzbekiston Respublikasi Moliya vazirligi Oʻzbekiston Respublikasi Vazirlar Mahkamasining 1996-yil 12-apreldagi 146-son qarorini bajarish yuzasidan berilgan 150 mln. soʻm miqdoridagi kreditni qaytarish muddatini, mazkur kreditni 1999-yildan boshlab uch yil davomida teng ulushlarda qaytarishni nazarda tutgan holda, uzaytirsin;

1999-yil 1-yanvardan boshlab qorakoʻl naslchiligi, tovar va boʻrdoqiga boqish xoʻjaliklari yer soligʻi va suv resurslaridan foydalanganlik uchun soliq, ekologiya soligʻi toʻlashdan 3 yil muddatga ozod qilinsin.

8. Tashqi iqtisodiy faoliyat milliy banki, “Agrobank” ATB va boshqa tijorat banklari “Oʻzbek qorakoʻli” kompaniyasi tomonidan tasdiqlangan kreditning qaytarilishini tasdiqlovchi texnik-iqtisodiy asoslash va biznes-reja asosida qorakoʻl terilari tayyorlash uchun belgilangan tartibda kredit ajratishni nazarda tutsinlar.

9. Qoraqalpogʻiston Respublikasi Vazirlar Kengashi, Buxoro, Jizzax, Qashqadaryo, Navoiy, Samarqand va Surxondaryo viloyatlari hokimliklari tegishli hududiy “Qorakoʻl” aksiyadorlik birlashmalarini shakllantirishda, shu jumladan binolar ajratishda har tomonlama yordam koʻrsatsinlar.

10. Vazirlar Mahkamasining quyidagi qarorlariga oʻzgartirishlar va qoʻshimchalar kiritilsin:

Oʻzbekiston Respublikasi Vazirlar Mahkamasining “Navoiy viloyatining Tomdi va Uchquduq tumanlari qorakoʻlchilik fermalarini xususiylashtirishni chuqurlashtirish chora-tadbirlari toʻgʻrisida” 1996-yil 11-iyuldagi 246-son qarorining 1, 2 va 3-bandlari oʻz kuchini yoʻqotgan deb hisoblansin;

Oʻzbekiston Respublikasi Vazirlar Mahkamasining “Oʻzbekiston Respublikasi Qishloq va suv xoʻjaligi vazirligi faoliyatini tashkil etish masalalari toʻgʻrisida” 1996-yil 26-noyabrdagi 419-son qaroriga 4-ilovaning 1-bandi chiqarib tashlansin hamda ushbu qarorga 5-ilovaning II boʻlimidagi “Oʻzqorakoʻl” uyushmasi” soʻzlari “Oʻzbek qorakoʻli” kompaniyasi” soʻzlari bilan almashtirilsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. H. Joʻrabekov zimmasiga yuklansin.

Eslatma: Hududiy “Qorakoʻl” aksiyadorlik birlashmalarida ijro etuvchi apparat xodimlari soni quyidagicha belgilanadi:

a) Qoraqalpogʻiston Respublikasi, Buxoro va Jizzax viloyatlari — 5 kishi;

b) Samarqand, Qashqadaryo viloyatlari — 7 kishi;

v) Navoiy viloyati — 12 kishi;

g) Surxondaryo viloyati — 4 kishi.