Vazirlar Mahkamasi qaror qiladi:

Oʻzbekiston Respublikasi Vazirlar Mahkamasi huzuridagi Toshkent shahar yoʻlovchi transporti korxonalari davlat uyushmasi (“Toshshaharyoʻlovchitranskorxona”)ning ilova qilinayotgan Ustavi tasdiqlansin.

1. Toshkent shahar yoʻlovchi transporti korxonalari davlat uyushmasi (“Toshshaharyoʻlovchitranskorxona”), bundan keyin matnda uyushma deb ataladi, oʻz faoliyatini Toshkent shahar, shuningdek, oʻz tarkibiga kiruvchi Toshkent shahar yoʻlovchi tashish avtotransport ishlab chiqarish birlashmasi, Toshkent shahar tramvay-trolleybus ishlab chiqarish birlashmasi va Toshkent metropoliteni (bundan keyin matnda korxonalar deb ataladi) manfaatlari yoʻlida oʻz faoliyatini demokratik asosda amalga oshiruvchi ishlab chiqarish-xoʻjalik kompleksi hisoblanadi.

2. Uyushma tarkibiga shartnoma asosida, mulkchilik shaklidan qatʼi nazar, faoliyatlari uyushma maqsadlariga va vazifalariga zid kelmaydigan, oʻz kuchlari va vositalari bilan Toshkent shahrida yoʻlovchi transportini rivojlantirishga va takomillashtirishga yordam beruvchi boshqa vazirliklar va idoralarning korxonalari va tashkilotlari, kooperativlar, vositachilik firmalari kirishi mumkin.

3. Uyushma jamgʻarmasiga badallarni oʻz vaqtida va toʻliq miqdorda toʻlovchi korxonalar uyushmaning hal qiluvchi ovozga ega boʻlgan haqiqiy aʼzolari hisoblanadilar.

Kirish badallarini toʻlagan, Toshkent shahar yoʻlovchi transportini rivojlantirishda oʻz mol-mulki bilan qatnashuvchi va unga bir martalik vositalar, bepul ajratilgan moddiy-texnika resurslari va asbob-uskunalari bilan yordam beruvchi korxonalar uyushmaning maslahat ovozi huquqiga ega boʻlgan assotsiatsiyali aʼzolari hisoblanadilar.

4. Uyushma huquqiy shaxs maqomiga ega boʻlgan mustaqil xoʻjalik subyekti hisoblanadi, toʻla xoʻjalik hisobi qoidalari asosida ishlaydi, oʻz faoliyatida Oʻzbekiston Respublikasining “Oʻzbekiston Respublikasida korxonalar toʻgʻrisida”gi Qonuniga, Oʻzbekiston Respublikasining boshqa qonunlariga, Oʻzbekiston Respublikasi Oliy Kengashining qarorlariga, Oʻzbekiston Respublikasi Prezidenti farmonlariga, boshqa meʼyoriy hujjatlarga, shuningdek mazkur Ustavga amal qiladi. Uyushma oʻz nomidan mulkiy huquqlarni sotib olishi va javob berishi, sudda va hakamlik sudida daʼvogar va javobgar boʻlishi mumkin. Uyushma belgilangan tartibda davlat roʻyxatidan oʻtadi.

Uyushma oʻz majburiyatlari yuzasidan qonun boʻyicha undirib olishi mumkin boʻlgan, oʻziga tegishli mol-mulki bilan javob beradi.

5. Uyushmalarning butun faoliyati va uning davlat organlari, hokimliklar, kollektiv korxonalar, muassasalar, tashkilotlar, shuningdek fuqarolar bilan oʻzaro munosabatlari shartnoma asosida Oʻzbekiston Respublikasining qonun hujjatlari bilan belgilangan tartibda amalga oshiriladi.

Uyushmaga kiruvchi korxonalarning faoliyati hamda uyushma boshqaruvi va ularning oʻzaro munosabatlari Oʻzbekiston Respublikasining “Oʻzbekiston Respublikasida korxonalar toʻgʻrisida”gi Qonuni, mazkur Ustav, birgalikdagi faoliyat dasturlari, ularning huquqiy va xoʻjalik mustaqilligini toʻla saqlagan holda tuzilgan shartnomalar va bitimlar bilan tartibga solib boriladi. Uyushma qatnashchilari taʼsis shartnomasiga rioya qilishlari va uni bajarishlari, uyushma oldida oʻz zimmasiga olgan majburiyatlarni bajarish uchun javob berishlari, shuningdek moddiy javob berishlari, budjet va uyushma bilan hisob-kitoblarni oʻz vaqtida amalga oshirishlari shart.

6. Davlat yoki boshqa organlarning yohud ularning mansabdor shaxslarning uyushma huquqlarini buzuvchi koʻrsatmalarini bajarish natijasida, shuningdek shunday organlar yoki ularning mansabdor shaxslari tomonidan uyushmaga nisbatan qonunlarda nazarda tutilgan majburiyatlarini yetarlicha bajarilmaslik oqibatida uyushmaga yetkazilgan zarar shu organlar tomonidan toʻlanadi.

7. Uyushma oʻz tarkibiga kirgan korxonalarning davlat mulkiga egalik qiladi, ulardan foydalanadi va ularni boshqaradi, belgilangan tartibda, mulkchilik shaklidan qatʼi nazar, korxonalar va tashkilotlarga shaharda yoʻlovchi tashishga ruxsatnoma beradi, Oʻzbekiston Respublikasining davlat mulkini boshqarish va xususiylashtirish qoʻmitasi bilan kelishuvga koʻra korxonalarni davlat tasarrufidan chiqarishni va xususiylashtirishni amalga oshiradi.

8. Uyushma oʻz tarkibiga kirgan korxonalar faoliyatini muvofiqlashtirishni amalga oshiradi, bunda ularning amaldagi qonunlarga muvofiq berilgan huquqlariga qatʼiy rioya qiladi.

9. Uyushma oʻz tarkibiga kirgan korxonalarning majburiyatlari boʻyicha javob bermaydi, korxonalar esa uyushma majburiyatlari boʻyicha javob bermaydilar.

10. Uyushma hisob-kitob, valyuta schyotlariga va boshqa schyotlarga ega boʻladi, alohida mulkka egalik qiladi, mustaqil va yigʻma balanslarga, Oʻzbekiston Respublikasining Davlat gerbi aks ettirilgan, oʻz nomi oʻzbek va rus tillarida yozilgan muhrga ega boʻladi.

11. Uyushmaga kiruvchi korxonalar uning tarkibidan tuzilgan shartnomalarga muvofiq va mazkur Ustav bilan belgilangan tartibda majburiyatlarini saqlagan holda chiqish huquqiga egadirlar.

12. Uyushma quyidagi manzilda joylashgan: Toshkent shahri, Shirokaya koʻchasi, 6.

13. Uyushma yoʻlovchilarni tashish sifatini va xizmat koʻrsatish madaniyatini doimiy yaxshilay borib, barcha turdagi yoʻlovchilar tashishning aniq va uzluksiz ishlashini taʼminlash maqsadida Toshkent shahar yoʻlovchi transporti ishiga rahbarlikni va uni muvofiqlashtirishni amalga oshiradi hamda Oʻzbekiston Respublikasi Prezidenti huzuridagi Vazirlar Mahkamasi oldida oʻziga Ustavda yuklatilgan vazifalarning bajarilishi uchun javob beradi.

14. Uyushma oʻz faoliyatida quyidagilarni taʼminlaydi:

shartnoma majburiyatlarining bajarilishini;

mehnat jamoalarida tashabbuskorlik va tadbirkorlikni namoyon qilish, korxonalarning xoʻjalik mustaqilligini rivojlantirish, xoʻjalik hisobi va oʻzini-oʻzi mablagʻ bilan taʼminlash qoidalaridan har tomonlama foydalanish uchun sharoitlar yaratishni;

mulkchilikning turli shakllariga asoslanadigan ishlab chiqarish — xoʻjalik faoliyatining ilgʻor shakllarini rivojlantirishni;

sarmoyalar kelishiga yordam beruvchi tashqi iqtisodiy aloqalarni rivojlantirishni;

asosiy ishlab chiqarish jamgʻarmalaridan va aylanma mablagʻlardan samarali foydalanish, shuningdek, ishlab chiqarishni, mehnat va boshqaruvni, ish haqini tashkil etishning shakl va usullarini takomillashtirishni, xoʻjalik hisobining asosiy elementlaridan biri sifatida ragʻbatlantirishning samarali tizimini;

Toshkent shahar hokimligi, birlashmalar, korxonalar va tashkilotlar bilan birgalikda barcha turdagi yoʻlovchi transportini yanada rivojlantirish hamda yoʻlovchilarga xizmat koʻrsatish tizimini takomillashtirish, xizmatlar hajmlarini va turlarini kengaytirish boʻyicha keng koʻlamli choralarni ishlab chiqishni va amalga oshirishni;

yagona texnik siyosatni oʻtkazishni, korxonalarga yoʻlovchi transport korxonalarini qayta qurishni va texnik jihatdan qayta qurollantirishni amalga oshirishda yordam berishni, yoʻlovchilarni tashish va ularga xizmat koʻrsatishni tashkil etish borasida boshqa davlatlarning tajribasini oʻrganish va tatbiq etishni;

yoʻlovchi transportining yirik ustuvor muammolarini hal qilishni taʼminlaydigan ilgʻor, ilmiy asoslangan investitsiya siyosatini oʻtkazishni;

yoʻlovchi transporti xodimlarining mehnat va turmush sharoitini yaxshilash, moddiy va maʼnaviy ehtiyojlarini toʻlaroq qondirish masalalarini batafsil hal qilishni;

mehnatning xavfsiz va sogʻlom sharoitlarini taʼminlashning sifat jihatidan yangi bosqichiga oʻtish va ishlab chiqarishda baxtsiz hodisalarni eng oz darajaga keltirishni;

yoʻlovchi transportida yoʻl harakati xavfsizligining yuqori darajada boʻlishini saqlab qolishni;

korxonalar uchun kadrlar malakasini oshirish, tayyorlash va qayta tayyorlashning samarali tizimini qoʻllanishni;

tabiat resurslarini tejamkorlik bilan sarflash, tabiatga omilkorlik bilan munosabatda boʻlish, resurslarni tejash yuzasidan keng ish olib borish va ikkilamchi resurslardan samarali foydalanishni.

15. Uyushma oʻz zimmasiga yuklatilgan vazifalarga va oʻziga berilgan huquqlarga muvofiq:

respublikaning iqtisodiyot organlari bilan bevosita hamkorlik qiladi, shahar yoʻlovchi tashish transportini rivojlantirishning uzoq muddatli istiqbollarini, uni rivojlantirish va oqilona joylashtirish sxemalarini ishlab chiqadi, shuningdek, boshqa turdagi transportlar bilan ishlarini muvofiqlashtiradi;

xorijiy mamlakatlar bilan tashqi iqtisodiy munosabatlarning yangi ilgʻor shakllarini rivojlantiradi, boshqa mamlakatlarning korxonalari va tashkilotlari bilan korxonalarning bevosita ishlab chiqarish, ilmiy-texnikaviy aloqalarini oʻrnatishlariga faol yordam beradi, qoʻshma korxonalarni tuzadi va ularning faoliyatini taʼminlaydi, uyushma mutaxassislarini chet ellarga yuboradi;

korxonalar, firmalar, tashkilotlar tuzadi, ularni qayta tashkil etadi va tugatadi, ular toʻgʻrisidagi ustavlarni tasdiqlaydi;

shahar yoʻlovchi transportida ilmiy-texnika va investitsiya siyosatini belgilaydi, fan-texnika taraqqiyoti yutuqlarini va ilgʻor tajribani umumlashtirish va joriy qilish jarayonlarini boshqarishni tashkiliy jihatdan taʼminlaydi;

Toshkent shahar hokimligi bilan birgalikda tezkor tartibda shaharning marshrut shoxobchalarini muvofiqlashtirish masalalarini koʻrib chiqadi va hal qiladi, shartnomada hokimlik tomonidan belgilangan minimal transport ishlari darajasini bajaradi, yoʻlovchi transportidan foydalanish qoidalarini, qatnov uchun haq toʻlash tartibini, marshrut shoxobchalarini rivojlantirish istiqbollarini, avariya va alohida hollarda transport vositalaridan foydalanish tartibini belgilaydi;

tabiat resurslaridan oqilona foydalanish, atrof muhitni muhofaza qilish, moddiy va mehnat resurslarini sarflashning ilgʻor normalarini va meʼyorlarini qoʻllanish boʻyicha ishlanmalarni tashkil etadi;

boshqa vazirliklar va idoralarga nisbatan uyushma qatnashchilarini jahon standartlariga muvofiq keluvchi zamonaviy texnika bilan taʼminlash masalasida ularning manfaatlarini koʻzlovchi vakil sifatida ish koʻradi;

tegishli davlat organlarida va boshqa organlarda korxonalarning manfaatlarini himoya qiladi;

uyushma tarkibiga kiruvchi korxonalarning rahbarlarini ishga yollash va boʻshatish shartlari toʻgʻrisida bitimlar tuzadi;

uyushma manfaatlari va uning ayrim aʼzolari manfaatlari yoʻlida foydalanish uchun markazlashgan jamgʻarmalarni, moliyaviy mablagʻlar zaxiralarini, shu jumladan, valyuta zaxiralarini barpo etadi;

aholiga pulli xizmatlar koʻrsatish va tadbirkorlik faoliyati bilan shugʻullanadi, mehnat jamoalarida ularni rivojlantirishga yordam beradi;

zarur nomenklatura boʻyicha ishlab chiqaruvchilarning isteʼmolchilar bilan xoʻjalik aloqalarini tashkil etishda, shu jumladan. Oʻzbekiston Respublikasi va boshqa davlatlarning hududida uyushma tarkibiga kiruvchi korxonalar uchun xomashyo va materiallar sotib olishda mustaqil ravishda hamda respublika taʼminotchi tashkilotlari ishtirokida taʼminot-sotish va vositachilik faoliyatini amalga oshiradi. Jamgʻarma egasi hisoblanadi hamda markazlashgan tartibda olinadigan jamgʻarmalarni, moddiy-texnika resurslarini va pul mablagʻlarini uyushma aʼzolari oʻrtasida taqsimlaydi;

uyushma aʼzolarining roziligiga koʻra ayrim funksiyalarni bajarishni va huquqlarni amalga oshirishni markazlashtiradi;

haqiqiy aʼzolarning roziligiga koʻra bozor munosabatlari sharoitida shahar yoʻlovchi transporti ishini tartibga solib boruvchi meʼyoriy hujjatlarni tayyorlaydi.

16. Kengash va boshqaruv uyushmaning boshqaruv organlari hisoblanadilar.

17. Uyushma Kengashi uyushmani boshqarishning yuqori organi hisoblanadi, u shahar yoʻlovchi transporti ishining asosiy masalalarini koʻrib chiqadi, strategik vazifalar va muammolar boʻyicha yuqori davlat boshqaruv organlariga takliflar kiritadi shahar yoʻlovchi transportining samaradorligini yanada oshirish yuzasidan tavsiyalar ishlab chiqadi, uni rivojlantirishning uzoq muddatli istiqbolini belgilaydi, markazlashgan jamgʻarmalardan foydalanish yoʻnalishlari toʻgʻrisida qaror qabul qiladi, ularni sarflash smetalarini tasdiqlaydi, ularning amalda bajarilishi toʻgʻrisidagi hisobotlarni eshitadi va ish natijalariga baho beradi.

Uyushma Kengashi uyushma faoliyatining barcha masalalari boʻyicha qarorlar qabul qilish huquqiga ega.

Uyushma Kengashi tarkibiga uyushmaga aʼzo boʻlgan birlashmalar, korxonalar va tashkilotlarning rahbarlari, yuqori malakali mutaxassislari va xizmatchilari, ilgʻor ishchilari, Toshkent shahar hokimligining vakillari kiradilar.Uyushma Kengashi uyushma konferensiyasi tomonidan saylanadi.

Uyushma Kengashi majlislari odatda yiliga bir marta oʻtkaziladi. Boshqaruv yoki uyushma boshqaruvi raisi qaroriga koʻra shahar yoʻlovchi transportining faoliyatiga daxldor oʻta muhim qarorlar qabul qilish zarurati boʻlganda Kengash navbatdan tashqari chaqiriladi.

Uyushma Kengashi faoliyati kengashga boshchilik qiluvchi uyushma boshqaruv raisi tasdiqlaydigan uyushma Kengashi toʻgʻrisidagi Nizom bilan boshqarib boriladi.

Uyushma Kengashi boshqaruvni saylaydi, tuzilmani, uning xodimlariga haq toʻlash va mehnatini ragʻbatlantirish tizimini belgilaydi.

18. Boshqaruv tarkibiga uyushma qatnashchilari boʻlgan korxonalarning birinchi rahbarlari, boshqaruv raisi va uning oʻrinbosarlari kiradilar. Boshqaruv tarkibiga, shuningdek Toshkent shahar hokimligining va assotsiatsiya qatnashchisi boʻlgan korxonalarning boshqa rahbar xodimlari hal qiluvchi yoki maslahat ovozi huquqi bilan kirishlari mumkin.

Boshqaruv ishlab chiqarishning asosiy yoʻnalishlarini, strategiyasini va istiqbollarini ishlab chiqish, tarmoq va respublikalararo aloqalarda korxonalarning faoliyatini muvofiqlashtirish, shahar yoʻlovchi transportida fan-texnika va investitsiya siyosatini belgilash, fan-texnika yutuqlarini va ilgʻor tajribani umumlashtirish va joriy qilish jarayonlarini tashkiliy boshqarish, tashqi iqtisodiy faoliyatni rivojlantirish, kadrlarni tayyorlash va qayta tayyorlashni tashkil qilish, bozor munosabatlari sharoitlarida korxonalarning faoliyatlarini boshqarib boruvchi huquqiy meʼyoriy hujjatlarni ishlab chiqish funksiyalarini, shuningdek uyushma Ustavida nazarda tutilgan boshqa funksiyalarni bajarishni oʻz zimmasiga olishi mumkin.

Boshqaruv majlislari zaruratga qarab odatda oyiga bir marta oʻtkaziladi.

Boshqaruv faoliyati uyushma boshqaruvi raisi tasdiqlaydigan Nizom boʻyicha tartibga solib boriladi.

Uyushma boshqaruvi raisi va uning oʻrinbosarlari uyushma Kengashi va Toshkent shahar hokimligining taqdimnomasiga koʻra Oʻzbekiston Respublikasi Prezidenti huzuridagi Vazirlar Mahkamasi tomonidan tayinlanadi.

Uyushma boshqaruvi raisi va uning oʻrinbosarlari maqomiga, maishiy taʼminot, tibbiy va transport xizmati koʻrsatish shartlariga koʻra tegishli ravishda Oʻzbekiston Respublikasi vaziriga, vazirning birinchi oʻrinbosariga va oʻrinbosarlariga tenglashtiriladi.

19. Uyushma boshqaruvi raisi uyushma zimmasiga yuklatilgan vazifalarning bajarilishi uchun shaxsan javob beradi, uyushma tarkibiga kiruvchi korxonalar faoliyati uchun oʻz oʻrinbosarlarining javobgarlik darajasini belgilaydi.

Boshqaruv raisi Oʻzbekiston Respublikasining amaldagi qonunlari, Oʻzbekiston Respublikasi Oliy Kengashining boshqa qarorlari, Oʻzbekiston Respublikasi Prezidentining farmonlari, Oʻzbekiston Respublikasi Prezidenti huzuridagi Vazirlar Mahkamasining qarorlari va farmoyishlari asosida va ularni bajarish uchun oʻz vakolatlari doirasida:

shahar yoʻlovchi transporti vazifalarini bajarish bilan bogʻliq masalalar boʻyicha davlat organlarida va boshqa organlarda, xalqaro tashkilotlarda, komissiyalar va ittifoqlarda uyushma nomidan vakillik qiladi;

uyushma Kengashi va boshqaruvi qarorlarining bajarilishi ustidan nazoratni taʼminlaydi;

oʻz oʻrinbosarlaridan tashqari ijroiya direksiya xodimlarini mustaqil holda lavozimga tayinlaydi va lavozimdan ozod qiladi;

ijroiya direksiya hokimlarini mukofotlash va mansab maoshlariga ustamalar belgilash toʻgʻrisida mustaqil qarorlar qabul qiladi, ijroiya direksiya xodimlarini ishga yollash va boʻshatish toʻgʻrisida bitimlar tuzadi, ularni ragʻbatlantiradi va ularga jazo beradi;

uyushma qatnashchilari boʻlgan korxonalar uchun bajarish majburiy boʻlgan buyruqlar, yoʻriqnomalar chiqaradi va koʻrsatmalar beradi, ularning bajarilishini tekshiradi.

Uyushma boshqaruvi rangi zarur hollarda Oʻzbekiston Respublikasining boshqa vazirliklari va idoralari rahbarlari bilan birgalikda qoʻshma buyruqlar va yoʻriqnomalar chiqaradi.

20. Joriy ishlarni bajarish uchun boshqaruv huzurida eng koʻp soni 40 kishidan iborat boʻlgan ijroiya direksiyasi tuziladi.

Ijroiya direksiyasi faoliyati boshqaruv raisi tasdiqlaydigan Nizom bilan boshqarib boriladi.

21. Uyushmaning moliyaviy va xoʻjalik faoliyatini nazorat qilish uyushma tarkibiga kiruvchi korxonalarning yuqori malakali mutaxassislaridan iborat boʻlgan uyushma Kengashi tomonidan 5 yil muddatga saylanadigan ijroiya direksiyasi tomonidan amalga oshiriladi.

Uyushma faoliyati taftish komissiyasi tomonidan yiliga kamida bir marta taftish qilinadi.

22. Uyushmaning mol-mulki uning ustav jamgʻarmasini tashkil qiluvchi asosiy va aylanma mablagʻlardan iborat boʻladi. Uyushma qatnashchilari bilan ahdlashuvga koʻra ijroiya direksiyasi mol-mulk ulushiga ega boʻlishi mumkin.

23. Uyushma tarkibiga kiruvchi qatnashchilarning har biri oʻzining mustaqil balansida aks etgan mol-mulkka egalik qiladi. Davlat mulki hisoblanuvchi mol-mulkdan uyushma qatnashchisi tomonidan toʻla xoʻjalik yuritish huquqida foydalaniladi.

24. Uyushma oldida turgan umumiy vazifalarni hal qilish uchun uyushma mablagʻlari, shu jumladan, valyuta mablagʻlari shakllantiriladi, ular quyidagilardan iboratdir:

ijroiya direksiyasining asosiy jamgʻarmalaridan va ulush badallaridan vujudga keladigan ustav jamgʻarmasi;

boshqa, shu jumladan, xorijiy korxonalar, tashkilotlar va birlashmalarning mablagʻlarini subsidiyalar va kreditlar tarzida jalb qilish;

qoʻshimcha pulli xizmatlar va ishlarni bajarganlik, shuningdek oʻz tijorat faoliyati uchun oladigan daromadlar (hisoblangan soliqlar va budjetga boshqa toʻlovlarni toʻlagandan keyin);

dotatsiyalar va budjetdan maqsadli ajratilgan mablagʻlar;

turli badallar va xayriyalar va hokazo.

25. Uyushma roʻyxatga olingandan keyin bir oy mobaynida muassislar ulush badalining toʻla miqdorini toʻlaydilar, uning miqdori uyushmaning har bir aʼzosida ishlovchi xodimlar soniga bogʻliq boʻladi. Ishlovchilar soni 5 ming kishigacha boʻlsa — 1 ulush, 5 dan 10 ming kishigacha boʻlsa — 2 ulush, 10 ming kishidan koʻp boʻlsa — 4 ulush.

26. Uyushmaning buxgalteriya va statistika hisobi Oʻzbekiston Respublikasi hududida amalda boʻlgan qoidalarga muvofiq olib boriladi. Uyushma qatnashchilari ijroiya direksiyasiga oldinda turgan vazifalarni hal qilish uchun zarur maʼlumotlarni taqdim qilishga, shuningdek davlat statistika organlari tomonidan nazarda tutilgan tegishli hisobotni taqdim qilishga majburdirlar.

27. Uyushma tijorat siri boʻlgan maʼlumotlarni bermaslik huquqiga ega. Tijorat sirini tashkil qiluvchi maʼlumotlar roʻyxati uyushma Kengashi tomonidan belgilanadi.

28. Uyushma tarkibiga kirish uchun ariza boshqaruv tomonidan uch oy muddat ichida koʻrib chiqiladi.

29. Uyushma tarkibidan chiqish toʻgʻrisidagi masala ham boshqaruv tomonidan uch oy muddat ichida koʻrib chiqiladi, keyinchalik qaror Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlanadi. Ulushlar, badallar, pay, hissa va qaytariladigan boshqa mol-mulk miqdori uyushma Kengashi tomonidan tasdiqlanadi.

30. Uyushma 3/4 qismdan koʻp ovoz bilan qabul qilinadigan uyushma haqiqiy aʼzolarining rasmiy iltimosnomasi yuzasidan Oʻzbekiston Respublikasi Prezidenti huzuridagi Vazirlar Mahkamasining qarori bilan, shuningdek qonunlarda nazarda tutilgan boshqa hollarda tugatiladi.

Ijroiya direksiyasining mol-mulkini sotish natijasida olingan pul mablagʻlari, kreditorlarning talablari qondirilgandan keyin, uning xodimlari oʻrtasida ular kiritgan ulushlarga mutanosib ravishda va ijroiya direksiyasi toʻgʻrisidagi Nizomda nazarda tutilgan boshqa shartlarga koʻra taqsimlanadi.