Oʻzbekiston Respublikasi Qurolli Kuchlari harbiylari va xodimlarini hamda ularning oila aʼzolarini ijtimoiy himoyasini yanada qoʻllab-quvvatlash va maʼnaviy-ruhiy holatini mustahkamlash maqsadida:

1. Oʻzbekiston Respublikasi Prezidentining 2018-yil 14-maydagi “Oʻzbekiston Respublikasi Qurolli Kuchlari harbiylari va ularning oila aʼzolarini ijtimoiy qoʻllab-quvvatlashga oid qoʻshimcha chora-tadbirlar toʻgʻrisida”gi PQ-3726-son qaroriga ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Milliy gvardiyasi manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

3. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti huzuridagi Xavfsizlik kengashi kotibi V.V. Mahmudov zimmasiga yuklansin.

1. Nomlanishi “harbiylari” soʻzidan keyin “va uning tarkibiga kiruvchi vazirlik hamda idoralarning xodimlari” soʻzlari bilan toʻldirilsin.

2. 1-band quyidagi tahrirda bayon etilsin:

“Shunday tartib oʻrnatilsinki, unga muvofiq quyidagi oliy taʼlim muassasalari bakalavriatiga (ikkinchi va undan keyingi oliy taʼlimdan tashqari) qabul qilish uchun 2018/2019 oʻquv yilidan boshlab Oʻzbekiston Respublikasi Qurolli Kuchlari tarkibiga kiruvchi vazirlik va idoralarning (keyingi oʻrinlarda — vazirlik va idoralar) xizmatdagi ofitserlari, shartnoma boʻyicha xizmat qilayotgan serjantlar va oddiy askarlar tarkibi farzandlari uchun besh foizli kvota, 2020/2021 oʻquv yilidan boshlab Oʻzbekiston Respublikasi Milliy gvardiyasining amaldagi shartnoma boʻyicha xizmat qilayotgan ofitserlar, serjantlar va oddiy askarlar tarkibi xamda xodimlari (keyingi oʻrinlarda — Milliy gvardiya harbiylari va xodimlari) farzandlari uchun ikki foizli kvota ajratiladi:

respublika oliy taʼlim muassasalariga — davlat granti asosida oliy taʼlim muassasalariga umumiy belgilangan qabul koʻrsatkichlari kvotasidan tashqari;

respublika harbiy oliy taʼlim muassasalariga — kursantlarning umumiy qabul sonidan”.

3. 2-bandda:

“a” kichik bandi “(keyingi oʻrinlarda — harbiy xizmatchilar)” soʻzlaridan keyin “shuningdek, Milliy gvardiya xodimlarining” soʻzlari bilan toʻldirilsin;

“b” kichik bandi quyidagi tahrirda bayon etilsin:

“b) ajratilgan besh foizli kvota chegarasida harbiy xizmatchilarning farzandlarini, shuningdek, ajratilgan ikki foizli kvota chegarasida Milliy gvardiyaning xizmatdagi harbiylari va xodimlarining farzandlarini qabul qilish tanlov asosida amalga oshiriladi hamda joylar Oʻzbekiston Respublikasi Vazirlar Mahkamasi huzuridagi Davlat test markazi tomonidan oʻtkaziladigan test sinovlari natijalari boʻyicha toʻplangan ballardan kelib chiqqan holda, navbatdagi ketma-ketlik tartibiga muvofiq taqsimlanadi”;

“v” kichik bandi “harbiy xizmatchilarga” soʻzlaridan keyin “(Milliy gvardiya xodimlariga)” soʻzlari bilan, “harbiy xizmatchilarning” soʻzlaridan keyin “(Milliy gvardiya xodimlarining)” soʻzlari bilan toʻldirilsin.

4. 3-band quyidagi tahrirda bayon etilsin:

“3. Oʻzbekiston Respublikasi Qurolli Kuchlari tarkibiga kiruvchi vazirliklar va idoralar oʻrtasida oliy taʼlim muassasalariga besh foizli qabul kvotasining umumiy har yili taqsimlanadigan joylari quyidagi nisbatda taqsimlansin:

Mudofaa vazirligi — 45 foiz;

Ichki ishlar vazirligi — 10 foiz;

Favqulodda vaziyatlar vazirligi — 13 foiz;

Davlat xavfsizlik xizmati — 28 foiz;

Oʻzbekiston Respublikasi Prezidentining davlat xavfsizlik xizmati — 2 foiz;

Oʻzbekiston Respublikasi Elektron texnologiyalarni rivojlantirish markazi — 2 foiz”.

5. 4-band quyidagi tahrirda bayon etilsin:

“4. Belgilansinki, 2018/2019 oʻquv yilidan boshlab harbiy xizmat majburiyatini (xizmat majburiyatini) bajarishda halok boʻlgan, shuningdek, harbiy xizmat majburiyatini (xizmat majburiyatini) bajarishda yarador boʻlishi natijasida nogiron boʻlib qolgan, kontuziya, shikast olgan yoki kasalliklarga duchor boʻlgan Qurolli Kuchlar tarkibiga kiruvchi vazirlik va idoralarning ofitserlari, shartnoma boʻyicha xizmat qilayotgan serjantlar va oddiy askarlar tarkibidagi harbiy xizmatchilar va Milliy gvardiya xodimlarining farzandlari vazirliklar yoki idoralarning tegishli tavsiyanomalari asosida belgilangan qabul kvotalaridan tashqari davlat granti asosida oliy taʼlim muassasalarining bakalavriatiga (ikkinchi va undan keyingi oliy taʼlimdan tashqari) tanlovsiz qabul qilinadilar”.