Oʻzbekiston Respublikasi Prezidentining “Oʻzbekiston Respublikasi Adliya vazirligi huzuridagi Intellektual mulk agentligi faoliyatini tashkil etish chora-tadbirlari toʻgʻrisida” 2019-yil 1-iyuldagi PQ-4380-son qaroriga muvofiq Vazirlar Mahkamasi qaror qiladi:

1. Quyidagilarni nazarda tutuvchi Oʻzbekiston Respublikasi Adliya vazirligi huzuridagi Intellektual mulk agentligining budjetdan tashqari jamgʻarmasi mablagʻlaridan foydalanish tartibi toʻgʻrisidagi nizom ilovaga muvofiq tasdiqlansin:

jamgʻarma mablagʻlarini shakllantirishning asosiy manbalari;

jamgʻarma mablagʻlaridan foydalanishning asosiy yoʻnalishlari;

xodimlarni moddiy ragʻbatlantirish va ijtimoiy himoyalashga doir choralar.

2. Oʻzbekiston Respublikasi Moliya vazirligi Adliya vazirligi huzuridagi Intellektual mulk agentligiga ilgari belgilangan limitga qoʻshimcha ravishda 2 ta biriktirilgan xizmat avtotransporti saqlash uchun limit ajratsin.

3. Vazirlar Mahkamasining “Oʻzbekiston Respublikasi Adliya vazirligi huzuridagi Intellektual mulk agentligi toʻgʻrisidagi nizomni tasdiqlash haqida” 2019-yil 20-iyuldagi 609-son qaroriga 1-ilovaning 42-bandi quyidagi tahrirda bayon qilinsin:

“42. Agentlik xodimlarini moddiy jihatdan qoʻllab-quvvatlash maqsadida direktor tomonidan Agentlikning budjetdan tashqari jamgʻarmasi mablagʻlari hisobidan xodimning lavozim maoshining 200 foizigacha miqdorda har oylik shahsiy ustamalar qoʻllanilishi mumkin. Bunda, har oylik shaxsiy ustamalarning yillik miqdori Agentlikning budjet mablagʻlari boʻyicha yillik mehnatga haq toʻlash fondining 1,4 baravaridan oshmasligi lozim”.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov va Oʻzbekiston Respublikasi adliya vaziri R.K. Davletov zimmasiga yuklansin.

1. Mazkur Nizom Oʻzbekiston Respublikasi Adliya vazirligi huzuridagi Intellektual mulk agentligining (keyingi oʻrinlarda Agentlik deb ataladi) budjetdan tashqari jamgʻarmasi mablagʻlarini shakllantirish va ulardan foydalanish tartibini belgilaydi.

2. Agentlik quyidagi hisob raqamlarini ochadi:

a) banklarda xorijiy valyutadagi hisob raqamlari, shu jumladan blok-hisob raqamlari (xorijiy valyutaning har bir turi boʻyicha);

b) gʻaznachilik boʻlinmalarida milliy valyutadagi tegishli gʻaznachilik shaxsiy hisob raqamlari.

3. Agentlikning milliy va xorijiy valyutadagi mablagʻlarini hisobga olish alohida-alohida yuritiladi.

4. Agentlikning budjetdan tashqari jamgʻarmasi (keyingi oʻrinlarda Jamgʻarma deb ataladi) mablagʻlari Oʻzbekiston Respublikasi Moliya vazirligi Gʻaznachiligida ochilgan Agentlikning shaxsiy gʻazna hisobvaragʻida yigʻiladi.

5. Quyidagilar Jamgʻarma daromadlarini shakllantirish manbalari hisoblanadi:

Oʻzbekiston Respublikasining norezidentlari — jismoniy va yuridik shaxslardan tushgan patent bojlari va toʻlovlarning 20 foizi miqdoridagi mablagʻlar;

Oʻzbekiston Respublikasining rezidentlari — jismoniy va yuridik shaxslardan tushgan patent bojlari va toʻlovlarning 80 foizi miqdoridagi mablagʻlar;

elektron hisoblash mashinalari uchun dasturlar va maʼlumotlar bazalarini roʻyxatdan oʻtkazish uchun amalga oshirilgan toʻlovlar;

intellektual mulk sohasidagi maʼmuriy huquqbuzarlik uchun qoʻllaniladigan maʼmuriy jarima summalari;

qonun hujjatlariga muvofiq pullik xizmatlar koʻrsatishdan tushadigan mablagʻlar;

adliya organlari va muassasalarining budjetdan tashqari mablagʻlari;

vaqtincha boʻsh turgan mablagʻlarni tijorat banklarining depozitlariga joylashtirishdan tushadigan daromadlar;

jismoniy va yuridik shaxslarning homiylik hayriyalari;

xalqaro moliya institutlari va xorijiy tashkilotlarning grantlari;

qonun hujjatlarida taqiqlanmagan boshqa manbalar.

6. Hisob raqamlaridagi, shu jumladan blok-hisob raqamlaridagi (har bir xorijiy valyuta boʻyicha) Agentlikning tasarrufida qolgan xorijiy valyutadagi mablagʻlar soʻm ekvivalentiga (Oʻzbekiston Respublikasi Markaziy bankining sotish kunidagi kursi boʻyicha) hisoblagan holda Agentlikning gʻaznachilik hisob raqamiga oʻtkazilishi mumkin.

Bunda milliy valyutaga konvertatsiya qilingan mablagʻlar Agentlikning milliy valyutadagi gʻaznachilik hisob raqamiga oʻtkaziladi.

7. Agentlik Jamgʻarmaga mablagʻlar kelib tushishining toʻliqligini nazorat qiladi.

8. Patent bojlarini, yigʻimlarni va soliq boʻlmagan boshqa toʻlovlarni toʻlash boʻyicha milliy valyutada tushgan mablagʻlar umumiy hajmining:

20 foizi — Oʻzbekiston Respublikasi Davlat budjetining tegishli hisob raqamiga;

80 foizi — Agentlikning gʻaznachilik shaxsiy hisob raqamiga oʻtkaziladi.

9. Hisobot davrida yuridik ahamiyatga ega boʻlgan harakatlarni amalga oshirganlik uchun tushgan valyuta mablagʻlari hisobot davridan keyingi oyning 10-kuniga qadar valyuta blok-hisob raqamlaridan (xorijiy valyutaning har bir turi boʻyicha) xorijiy valyutada tushgan mablagʻlar umumiy hajmining:

78 foizi — Innovatsion rivojlanish va novatorlik gʻoyalarini qoʻllab-quvvatlash jamgʻarmasi hisob raqamiga;

2 foizi — belgilangan tartibda konvertatsiya qilingandan keyin Oʻzbekiston Respublikasi Davlat budjetining tegishli hisob raqamiga;

20 foizi — Agentlikning xorijiy valyutaning har bir turi boʻyicha ochilgan xorijiy valyutadagi hisob raqamlariga oʻtkaziladi.

10. Jamgʻarma mablagʻlaridan:

Agentlikni moddiy-texnik taʼminlash;

Agentlikning bino va inshootlarini qurish, kapital va joriy taʼmirlash hamda ularni inventarlar, mebel, kompyuter texnikasi va boshqa uskunalar bilan jihozlash;

Agentlik xodimlarini moddiy ragʻbatlantirish va ijtimoiy himoya qilish (xodimlar uchun mukofotlar toʻlash, ularning maoshlariga ustamalar va qoʻshimchalar belgilash, moddiy yordam koʻrsatish, xodimlar uchun uy-joy qurish, sanatoriy-kurortda davolash va tibbiy xizmat koʻrsatish va boshqalar);

Agentlik rahbarlari va boshqa xodimlarining xizmat safarlari, shu jumladan xorijiy mamlakatlarga xizmat safarlari xarajatlari;

lavozim maoshlarini aniqlashda Yagona tarif setkasi boʻyicha bir yarim barobar miqdorida koeffitsiyent qoʻllanilgan xarajatlari;

belgilangan tartibda Oʻzbekiston Respublikasi adliya organlari va muassasalarining martaba darajalariga ega boʻlgan Agentlikning xodimlariga martaba darajalari uchun qoʻshimchalar hamda koʻp yillik xizmati uchun ustamalar toʻlash;

Agentlikning xodimlariga uy-joylarni ijaraga olganlik (ijarada turganlik) uchun toʻlovlarni kompensatsiya qilish;

Agentlik xodimlarini oʻqitish, malakasini oshirish hamda stajirovka oʻtashi, shu jumladan ularning xorijiy mamlakatlarga tashriflarini, xorijiy mamlakatlarda oʻtkaziladigan konferensiya, seminarlar va boshqa tadbirlarda ishtirok etishini tashkil etish;

Agentlik faoliyati bilan bogʻliq masalalar boʻyicha Oʻzbekiston Respublikasiga tashrif buyuradigan xorijiy davlatlar, xalqaro tashkilotlar delegatsiyalarining tashriflarini tashkil etish;

Agentlikning kommunal-foydalanish hamda boshqa joriy xarajatlari;

Agentlikning qoʻshimcha shtat birliklarini saqlab turish;

Oʻzbekiston Respublikasining intellektual mulk obyektlariga boʻlgan huquqlarni huquqiy muhofaza va himoya qilish masalalari boʻyicha xalqaro tashkilotlarda qatnashishi bilan bogʻliq xarajatlarni, shu jumladan aʼzolik badallarini qoplash;

Agentlikning arxiv ishlarini yuritish va kutubxona fondini taʼminlash;

intellektual mulk obyektlariga boʻlgan huquqlarni huquqiy muhofaza va himoya qilish bilan bogʻliq masalalarni hal etish uchun shartnoma asosida jalb etilgan mahalliy va xorijiy mutaxassislar xizmatiga haq toʻlash;

intellektual mulk sohasida faoliyatni rivojlantirish va takomillashtirish muammolari boʻyicha ilmiy-tadqiqot ishlarini tashkil qilish va ularda qatnashish;

Agentlikka yuklatilgan barcha vazifalarni va funksiyalarni, huquq va majburiyatlarni bajarish hamda Agentlik faoliyatini yaxshilashga qaratilgan boshqa tadbirlar uchun foydalaniladi.

11. Jamgʻarma mablagʻlarini sarflash Agentlik direktori (keyingi oʻrinlarda direktor deb ataladi) tomonidan tasdiqlangan hamda oʻrnatilgan tartibda roʻyxatdan oʻtkazilgan daromadlar va xarajatlar smetasiga muvofiq tegishli gʻazna hisob raqamlaridan amalga oshiriladi.

12. Jamgʻarmaning joriy yilda foydalanilmagan mablagʻlari Oʻzbekiston Respublikasi Davlat budjetiga olib qoʻyilmaydi va ulardan keyingi yilda foydalaniladi.

13. Jamgʻarma mablagʻlarini boshqarish va taqsimlash direktor tomonidan amalga oshiriladi.

14. Jamgʻarma mablagʻlari hisobidan Agentlik xodimlarini moddiy ragʻbatlantirish va ijtimoiy muhofaza qilish quyidagi shakllarda amalga oshiriladi:

lavozim maoshlariga har oylik shaxsiy ustama belgilash;

hisobot davridagi ish yakunlari boʻyicha va bayram kunlari bilan bogʻliq mukofotlar;

uzoq muddatli xizmati uchun ustamalar toʻlash;

belgilangan tartibda Oʻzbekiston Respublikasi adliya organlari va muassasalarining martaba darajalariga ega boʻlgan Agentlikning xodimlariga martaba darajalari uchun qoʻshimchalar hamda koʻp yillik xizmati uchun ustamalar toʻlash;

ovqat puli uchun toʻlov;

yoʻlkira xarajatlari uchun toʻlov;

moddiy yordam koʻrsatish va kompensatsiyalar toʻlash;

xodimlarning uy-joylarni ijaraga olganlik (ijarada turganlik) uchun toʻlovlarini kompensatsiya qilish.

15. Agentlikning xodimlarini moddiy jihatdan koʻllab-quvvatlash maqsadida direktor tomonidan Agentlikning budjetdan tashqari jamgʻarmasi mablagʻlari hisobidan xodimning lavozim maoshining 200 foizigacha miqdorda har oylik shaxsiy ustamalar qoʻllanilishi mumkin. Bunda, har oylik shaxsiy ustamalarning yillik miqdori Agentlikning budjet mablagʻlari boʻyicha yillik mehnatga haq toʻlash fondining 1,4 baravaridan oshmasligi lozim.

16. Hisobot davridagi ish yakunlari boʻyicha mukofotlar topshiriqlar oshirib bajarilganda, Agentlik xodimlariga yuklangan lavozim vazifalari zarur darajada bajarilganda, amalda ishlangan vaqt (qonun hujjatlariga muvofiq uning uchun ish haqi yoziladigan vaqt) uchun toʻlanadi.

Bunda, hisobot davridagi ish yakunlari boʻyicha va bayram kunlari munosabati bilan har bir xodim mukofotining aniq miqdori bir yilda xodim lavozim maoshining sakkiz baravari miqdoridan oshmasligi lozim.

Hisobot davridagi ish yakunlari boʻyicha xodimlarga ragʻbatlantirish toʻlovlari va mukofotlarni belgilash va toʻlash toʻgʻrisidagi qaror direktor tomonidan qabul qilinadi.

17. Oʻzbekiston Respublikasi adliya organlari va muassasalarining martaba darajalariga ega boʻlmagan Agentlik xodimlariga uzoq muddatli xizmati (Agentlik tizimi hamda adliya organlari va muassasalarida ishlagan davri) uchun har oyda ustama toʻlanadi.

Uzoq muddatli xizmati (Agentlik tizimi hamda adliya organlari va muassasalarida ishlagan davri) uchun har oylik ustama faqat asosiy ish joyi boʻyicha har oyda va xodimning ish haqi fondiga nisbatan quyidagi foizlarda hisoblanadi:

18. Vazirlar Mahkamasinig “Oʻzbekiston Respublikasi sudyalarini, adliya organlari xodimlarini ijtimoiy himoya qilishni kuchaytirish toʻgʻrisida”gi 1993-yil 9-iyuldagi 343-son hamda “Oʻzbekiston Respublikasi adliya organlari va muassasalari xodimlarining martaba darajalari toʻgʻrisidagi nizomni tasdiqlash haqida”gi 2011-yil 29-martdagi 93-son qarorlarida belgilangan tartibda Oʻzbekiston Respublikasi adliya organlari va muassasalarining martaba darajalariga ega boʻlgan Agentlik xodimlariga martaba darajalari hamda koʻp yillik xizmati uchun qoʻshimchalar va ustamalar toʻlanadi.

19. Agentlik xodimlarini ijtimoiy muhofaza qilish maqsadida, ularga har oyda har bir shtat birligi uchun bazaviy hisoblash miqdorining bir baravari miqdorida ovqat puli hamda yoʻlkira xarajatlarini qoplash uchun bazaviy hisoblash miqdorining bir baravari miqdorda yoʻlkira puli beriladi.

20. Agentlik xodimlariga moliya yilida bir marta (sogʻligʻini tiklash maqsadida mehnat taʼtiliga chiqish vaqtida yoki mehnat taʼtiliga chiqmagan xodimlarga yilning dekabr oyida) bir lavozim maoshi miqdorida moddiy yordam koʻrsatiladi.

21. Xodim vafot etgan hollarda, bazaviy hisoblash miqdorining yigirma baravarigacha boʻlgan miqdorda moddiy yordam koʻrsatiladi.

Moddiy yordam xodimning turmush oʻrtogʻiga, turmush oʻrtogʻi yoʻqligida — u bilan birga yashovchi voyaga yetgan farzandlariga yoki qonuniy vakillariga (vasiylar va homiylarga) yoxud voyaga yetmagan bolalarni (bolalikdan nogironligi boʻlgan shaxs — yoshidan qatʼi nazar) farzandlikka olganlarga, shuningdek agar xodimlar nikohda turmagan va farzandlari boʻlmagan hollarda, xodimning qaramogʻidagi shaxslarga yoki ota-onalariga teng ulushda toʻlab beriladi.

22. Xodim oila qurganda va farzand tugʻilganda unga bazaviy hisoblash miqdorining 10 baravarigacha boʻlgan miqdorda moddiy yordam koʻrsatilishi mumkin.

23. Istisno tariqasida, xodimning asoslantirilgan arizasiga asosan mehnatga haq toʻlash fondiga ajratilgan mablagʻlar doirasida, quyidagi hollarda qoʻshimcha tarzda bazaviy hisoblash miqdorining 10 baravarigacha boʻlgan miqdorda moddiy yordam koʻrsatilishi mumkin:

yaqin qarindoshlari vafot etganda — oʻlim toʻgʻrisidagi guvohnoma nusxasiga asosan;

alohida ehtiyoj tugʻilganda (baxtsiz hodisa, avariya, uzoq muddatli kasallik sababli maxsus davolanish va sogʻliqni qayta tiklashga, shuningdek oiladagi ogʻir moddiy ahvol va boshqa holatlar).

24. Moddiy ragʻbatlantirish va ijtimoiy muhofaza qilishning aniq miqdorlari va ular tadbiq etiladigan xodimlar mazkur Nizomda belgilangan doirada, Jamgʻarma tushumlari hajmidan kelib chiqib, direktor tomonidan belgilanadi.

25. Uy-joylarni ijaraga olganlik (ijarada turganlik) uchun toʻlovlar boʻyicha kompensatsiya (keyingi oʻrinlarda kompensatsiya deb ataladi) uy-joylar bilan taʼminlanmagan Agentlik xodimlariga uy-joyni ijaraga olganlik (ijarada turganlik) uchun qilingan sarf-xarajatlar doirasida (kommunal xizmatlar haqi bundan mustasno), lekin:

Toshkent shahrida — bazaviy hisoblash miqdorining toʻrt baravaridan koʻp boʻlmagan miqdorda;

Toshkent viloyatida — bazaviy hisoblash miqdorining uch baravaridan koʻp boʻlmagan miqdorda toʻlanadi.

Oila aʼzolari uch kishi va undan ortiq boʻlgan taqdirda (xodimning oʻzini hisoblamagan holda) ushbu kompensatsiya miqdori 50 foizga oshiriladi. Bunda xodimning ishga tayinlangan joyiga kelgan oila aʼzolari — xotini (eri), ularning bolalari va ota-onalari, shuningdek qonun hujjatlariga muvofiq ijaraga oluvchining oila aʼzolari deb eʼtirof etilgan boshqa shaxslar hisobga olinadi.

26. Xodimga kompensatsiya toʻlash uy-joy ijaraga olingan (ijarada turgan) kundan boshlab, uy-joyni ijaraga olish (ijarada turish) shartnomasiga muvofiq amalga oshiriladi.

Xodimga xizmat uy-joy maydoni berilgan taqdirda yoki u uy-joy sotib olganda, u boshqa joyga ishga tayinlanganda, uy-joyni ijaraga olish (ijarada turish) shartnomasi muddati tugaganda yoxud u bilan mehnat shartnomasi bekor qilinganda kompensatsiyani toʻlash toʻxtatiladi.

27. Xodimga xizmat uy-joy maydoni berilgan taqdirda yoki u uy-joy sotib olganda yoxud uy-joyni ijaraga olish (ijarada turish) shartnomasi muddati tugaganda u bir hafta muddatda tegishli ravishda Agentlik buxgalteriyasiga kompensatsiya toʻlashni toʻxtatish toʻgʻrisida ariza berishi shart.

28. Ota-onalari yoki eri (xotini)ning ota-onalari oʻz uy-joylarida birga yashayotgan xodimlarga kompensatsiya toʻlanmaydi.

29. Xodim kompensatsiyani olish uchun vaqtincha yashash joyini va uy-joyni ijaraga olganlik (ijarada turganlik) uchun amaldagi xarajatlar summasini (kommunal xizmatlar qiymatisiz) koʻrsatgan holda Agentlik rahbariga kompensatsiya berish toʻgʻrisidagi ariza bilan murojaat qiladi.

Kompensatsiya berish toʻgʻrisidagi arizaga quyidagi hujjatlar ilova qilinadi:

xodimni lavozimga tayinlash toʻgʻrisidagi buyruqning nusxasi;

nikoh toʻgʻrisidagi guvohnomaning nusxasi (oilali xodimlar uchun);

qonun hujjatlariga muvofiq oila aʼzolari deb eʼtirof etilgan shaxslarning shaxsini tasdiqlovchi hujjatlarning nusxasi;

uy-joyni ijaraga olish (ijarada turish) shartnomasining nusxasi.

30. Direktor taqdim etilgan hujjatlar asosida uy-joyni ijaraga olish (ijarada turish) uchun kompensatsiya miqdorini koʻrsatgan holda kompensatsiya tayinlash toʻgʻrisida buyruq chiqaradi.

Agentlik xodimlarning ijaraga olingan uy-joyda yashashlarini va ularning yashash joylari oʻzgarishini doimiy nazorat qiladilar.

31. Xodimga bola ikki yoshga toʻlgunga qadar bolani parvarishlash uchun taʼtil berilgan taqdirda, kompensatsiya taʼtilning butun davriga, biroq xodimning ushbu uy-joyda yashashi sharti bilan beriladi.

32. Kompensatsiya Agentlik buxgalteriyasi tomonidan, ushbu Nizomning 30-bandiga muvofiq chiqarilgan buyruq asosida, ish haqi toʻlash bilan birgalikda oʻtgan oy uchun toʻlov vedomosti boʻyicha toʻlanadi.

33. Kompensatsiyani olish uchun hujjatlar tegishlicha Agentlikda qonun hujjatlarida belgilangan muddat tamom boʻlgunga qadar saqlanadi.

34. Kompensatsiya miqdorini aniqlashda hisobga olinadigan oila tarkibi oʻzgargan taqdirda xodimning oila tarkibi oʻzgarganligini tasdiqlovchi hujjatlar nusxalari ilova qilingan kompensatsiya miqdorini qayta koʻrib chiqish toʻgʻrisidagi arizasi asosida yangi miqdorlardagi kompensatsiya belgilangan tartibda ushbu oʻzgarishlar boshlangan kundan boshlab toʻlanadi.

35. Xodimga ortiqcha toʻlangan kompensatsiya summasi qonun hujjatlarida belgilangan tartibda ish haqidan ushlab qolish yoʻli bilan toʻliq miqdorda undan undirib olinadi.

36. Kompensatsiya toʻlash uchun ajratiladigan mablagʻlar miqdori mazkur Nizomda belgilangan doirada, Jamgʻarma tushumlari hajmidan kelib chiqib, direktor tomonidan belgilanadi.

37. Ushbu Nizom talablari buzilishida aybdor boʻlgan shaxslar qonun hujjatlariga muvofiq javob beradilar.

38. Ushbu Nizomni amalga oshirishda yuzaga keladigan nizolar qonun hujjatlarida belgilangan tartibda hal qilinadi.