O‘zbekiston Respublikasi Prezidentining “Maxsus turdagi tovarlar eksporti va importini litsenziyalash, shuningdek, eksport kontraktlarini ro‘yxatga olish va import kontraktlarini ekspertizadan o‘tkazishni tartibga solish chora-tadbirlari to‘g‘risida” 2017-yil 3-noyabrdagi PF-5215-son Farmoni ijrosini ta’minlash yuzasidan Vazirlar Mahkamasi qaror qiladi:

1. O‘zbekiston Respublikasi Prezidentining “Maxsus turdagi tovarlar eksporti va importini litsenziyalash, shuningdek, eksport kontraktlarini ro‘yxatga olish va import kontraktlarini ekspertizadan o‘tkazishni tartibga solish chora-tadbirlari to‘g‘risida” 2017-yil 3-noyabrdagi PF-5215-son Farmoni asosida O‘zbekiston Respublikasi Vazirlar Mahkamasining Tashqi savdo faoliyatini, iqtisodiyot tarmoqlari va respublika hududlarini rivojlantirish masalalari axborot-tahlil departamenti 2017-yilning 10-noyabridan boshlab O‘zbekiston Respublikasi Prezidentining mazkur Farmoniga 1-ilovaga kiritilgan maxsus turdagi tovarlar eksporti va importini litsenziyalash ishlarini amalga oshirayotgani ma’lumot uchun qabul qilinsin.

2. Maxsus turdagi tovarlarni eksport va import qilish uchun litsenziya berish tartibi to‘g‘risidagi nizom ilovaga muvofiq tasdiqlansin.

3. Belgilab qo‘yilsinki, O‘zbekiston Respublikasi Tashqi iqtisodiy aloqalar, investitsiyalar va savdo vazirligi tomonidan maxsus turdagi tovarlarni eksport va import qilish uchun ilgari berilgan litsenziyalar ularning muddati tugagungacha amal qiladi.

4. Vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — “O‘zagrotexsanoatxolding” AJ boshqaruvi raisi N.S. Otajonov zimmasiga va O‘zbekiston Respublikasi Vazirlar Mahkamasining Tashqi savdo faoliyatini, iqtisodiyot tarmoqlari va respublika hududlarining eksport salohiyatini rivojlantirish masalalari axborot-tahlil departamentiga yuklansin.

1. Ushbu Nizom O‘zbekiston Respublikasi hududida maxsus turdagi tovarlarni eksport va import qilish uchun litsenziya berish tartibini belgilaydi.

2. Maxsus turdagi tovarlarni eksport va import qilish uchun litsenziyalar ushbu Nizomga 1-ilovaga muvofiq sxema bo‘yicha beriladi.

3. O‘zbekiston Respublikasi Prezidentining “Maxsus turdagi tovarlar eksporti va importini litsenziyalash, shuningdek, eksport kontraktlarini ro‘yxatga olish va import kontraktlarini ekspertizadan o‘tkazishni tartibga solish chora-tadbirlari to‘g‘risida” 2017-yil 3-noyabrdagi PF-5215-son Farmoniga 1-ilovada ro‘yxati tasdiqlangan maxsus turdagi tovarlarni eksport va import qilish litsenziyalanadi.

4. Litsenziyalar O‘zbekiston Respublikasi Prezidentining yoki O‘zbekiston Respublikasi Vazirlar Mahkamasining maxsus turdagi tovarlarni eksport va import qilish uchun litsenziya berish nazarda tutilgan tegishli hujjatlari yoki qarorlari asosida maxsus turdagi tovarlarni yetkazib berish bo‘yicha tuzilgan shartnomalarni amalga oshirish uchun zarur bo‘lgan, ammo bir yildan oshmaydigan muddatga ushbu Nizomga 2-ilovaga muvofiq shaklda beriladi.

Litsenziya berish, uning amal qilishini to‘xtatib turish yoki to‘xtatish, shuningdek, litsenziyani bekor qilish va qayta rasmiylashtirish to‘g‘risidagi qarorlar O‘zbekiston Respublikasi Vazirlar Mahkamasining Investitsiyalar, eksportni qo‘llab-quvvatlash va tashqi iqtisodiy aloqalar masalalari kotibiyati (keyingi o‘rinlarda vakolatli organ deb ataladi) tomonidan qabul qilinadi.

5. O‘zbekiston Respublikasi Vazirlar Mahkamasining Investitsiyalar, eksportni qo‘llab-quvvatlash va tashqi iqtisodiy aloqalar masalalari kotibiyati (keyingi o‘rinlarda ishchi organ deb ataladi) litsenziyalarni rasmiylashtirish, qayta rasmiylashtirish va berish, litsenziyalar reyestrini yuritishni amalga oshiradi.

6. Litsenziyani va litsenziya bo‘yicha huquqlarni boshqa shaxslarga berish taqiqlanadi.

7. Maxsus turdagi tovarlarni eksport va import qilishda quyidagilar ruxsat berish talablari hamda shartlari hisoblanadi:

O‘zbekiston Respublikasi qonun hujjatlariga albatta rioya etish;

O‘zbekiston Respublikasi Prezidentining yoki O‘zbekiston Respublikasi Vazirlar Mahkamasining maxsus turdagi tovarlarni eksport va import qilish uchun litsenziya berish nazarda tutilgan tegishli hujjati yoki qarorining mavjud bo‘lishi.

8. Ariza beruvchi litsenziya olish uchun vakolatli organga quyidagi hujjatlarni taqdim etadi:

litsenziya berish to‘g‘risida quyidagilar ko‘rsatilgan ariza: ariza beruvchi — yuridik shaxsning nomi, joylashgan joyi (pochta manzili) va tashkiliy-huquqiy shakli; ariza beruvchi — jismoniy shaxsning familiyasi, ismi, otasining ismi, uning shaxsini tasdiqlovchi hujjat ma’lumotlari, ariza beruvchi amalga oshirishni mo‘ljallayotgan faoliyat turi;

O‘zbekiston Respublikasi Prezidentining yoki O‘zbekiston Respublikasi Vazirlar Mahkamasining maxsus turdagi tovarlarni eksport va import qilish uchun litsenziya berish nazarda tutilgan tegishli hujjati yoki qarorining nusxasi;

tuzilgan hamda xaridor va sotuvchi imzolagan shartnomaning nusxasi.

9. Litsenziya berish to‘g‘risidagi arizada ariza beruvchining elektron manzili ham ko‘rsatilishi mumkin. Litsenziya berish to‘g‘risidagi arizada ariza beruvchi elektron manzilining ko‘rsatilishi uning arizasi bo‘yicha qaror qabul qilingani haqidagi bildirish xatini elektron axborot tizimi orqali olishga rozi ekanini bildiradi.

10. Vakolatli organ litsenziya berish uchun boshqa vakolatli organlardagi zarur hujjatlar va axborotni, jumladan, elektron axborot almashinuvi tizimi orqali belgilangan tartibda mustaqil oladi. ushbu Nizomning 8-bandida nazarda tutilgan hujjatlar va axborot bundan mustasno.

11. Ariza beruvchidan ushbu Nizomning 8-bandida nazarda tutilmagan hujjatlarni talab qilishga yo‘l qo‘yilmaydi.

12. Ariza beruvchi litsenziya olish uchun zarur hujjatlarni ularning olingani to‘g‘risidagi bildirish xatini olish orqali vakolatli organga bevosita pochta aloqa vositalari yoki elektron shaklda taqdim etadi. Elektron shaklda taqdim etilgan hujjatlar ariza beruvchining elektron raqamli imzosi bilan tasdiqlanadi.

13. Litsenziya olish uchun vakolatli organga taqdim etilgan hujjatlar ro‘yxat bo‘yicha qabul qilinadi va ushbu ro‘yxat vakolatli organ hujjatlarni qabul qilgan sana belgisi qo‘yilgan holda zudlik bilan ariza beruvchiga taqdim etiladi (yuboriladi).

Vakolatli organ ariza beruvchi taqdim etgan hujjatlarni ko‘rib chiqish va litsenziya berish yoki litsenziya berishni rad etish to‘g‘risida tegishli xulosa tayyorlash uchun ish organga yuboradi.

14. Ariza beruvchi litsenziya olish uchun taqdim etgan zarur hujjatlar vakolatli organ ularning aksini tasdiqlamagunicha barcha holatlarda ishonchli hisoblanadi.

15. Litsenziya berish to‘g‘risidagi arizada ko‘rsatilgan ma’lumotlarning to‘g‘riligi uchun javobgarlik ariza beruvchining zimmasida bo‘ladi.

16. Ishchi organ ariza olingan kundan boshlab, besh ish kunidan oshmaydigan muddatda arizani ko‘rib chiqadi, litsenziya berish yoki litsenziya berishni rad etish haqida tegishli xulosa tayyorlaydi.

17. Vakolatli organ ishchi organ xulosasini ko‘rib chiqadi va O‘zbekiston Respublikasi Vazirlar Mahkamasining Tashqi savdo faoliyatini, eksport salohiyatini, mashinasozlik, avtomobil, elektrotexnika mudofaa, paxtani qayta ishlash sanoatini va yengil sanoatni rivojlantirish, mahsulotlarni standartlashtirish masalalari kompleksi rahbari, shuningdek zarur bo‘lganda, O‘zbekiston Respublikasining Bosh vaziri bilan kelishgan holda ishchi organdan xulosa olingan kundan boshlab, to‘rt ish kunidan oshmaydigan muddatda litsenziya berish yoki litsenziya berishni rad etish haqida qaror qabul qiladi.

18. Litsenziya berish to‘g‘risidagi arizani ko‘rib chiqish uchun yig‘im undirilmaydi.

19. Quyidagilar litsenziya berish haqida qaror qabul qilish uchun asos hisoblanadi:

ushbu Nizomning 8-bandida qayd etilgan zarur hujjatlar bo‘lishi;

taqdim etilgan hujjatlarning O‘zbekiston Respublikasi Prezidentining yoki O‘zbekiston Respublikasi Vazirlar Mahkamasining maxsus turdagi tovarlarni eksport va import qilish uchun litsenziya berish nazarda tutilgan tegishli hujjati yoki qarorida ko‘rsatilgan ma’lumotlarga mos kelishi.

20. Litsenziyalar maxsus blankalarda rasmiylashtiriladi va vakolatli organ mudiri tomonidan imzolanadi.

Litsenziya berish uchun yig‘im undirilmaydi.

21. Ishchi organ tegishli qaror qabul qilingan sanadan boshlab bir ish kunidan kechiktirmasdan, ariza beruvchiga litsenziya berishi (yuborishi) yoki uni litsenziya berish rad etilgani haqida jumladan, elektron axborot tizimi orqali yozma ravishda xabardor qilishi shart.

Agar ishchi organ arizani ko‘rib chiqish, litsenziya berish yoki litsenziya berishni rad etish muddati davomida ariza beruvchiga litsenziya bermasa yoxud uni litsenziya berish rad etilgani haqida xabardor qilmasa, ariza beruvchi ushbu Nizomda belgilangan muddatlar tugagandan so‘ng vakolatli organni yozma ravishda xabardor qilgan holda, O‘zbekiston Respublikasi Prezidentining tegishli hujjati yoki O‘zbekiston Respublikasi Vazirlar Mahkamasining qarorida nazarda tutilgan maxsus turdagi tovarlarni eksport va import qilish huquqiga ega.

Ishchi organ ariza beruvchining yozma bildirish xatini olingan sanadan boshlab besh ish kuni davomida unga litsenziya berishi lozim. Litsenziya olingunga qadar taqdim etilgan hujjatlarning ular qabul qilingan sana belgisi qo‘yilgan ro‘yxati va ariza beruvchi tomonidan vakolatli organga yuborilgan yozma bildirish xati litsenziyaga tenglashtiriladi va maxsus turdagi tovarlarni eksport hamda import qilish uchun asos hisoblanadi. Bunda ariza beruvchi O‘zbekiston Respublikasi Prezidentining tegishli hujjatida yoki O‘zbekiston Respublikasi Vazirlar Mahkamasining qarorida qayd etilgan maxsus turdagi tovarlarni eksport va import qilgani uchun javobgarlikka tortilmaydi.

22. Quyidagilar litsenziya berishni rad etish uchun asos hisoblanadi:

ariza beruvchi ushbu Nizomning 8-bandida ko‘rsatilgan hujjatlarni to‘liq hajmda taqdim etmasa;

ariza beruvchi ruxsat berish talablari va shartlariga mos kelmasa;

ariza beruvchi taqdim etgan hujjatlarda ishonchsiz yoki buzib ko‘rsatilgan ma’lumotlar bo‘lsa.

23. Ushbu Nizomning 22-bandida ko‘rsatilmagan boshqa sabablar, shu jumladan muvofiqsizlik sabablari tufayli litsenziya berishni rad etishga yo‘l qo‘yilmaydi.

24. Litsenziya berish rad etilgani haqidagi bildirish xati ariza beruvchiga yozma shaklda, shu jumladan elektron axborot tizimi orqali rad etish sabablari, qonun hujjatlarining aniq normalari va ariza beruvchi qayd etilgan sabablarni bartaraf etib, hujjatlarni qayta ko‘rib chiqish uchun taqdim etishi mumkin bo‘lgan muddat ko‘rsatilgan holda topshiriladi (yuboriladi).

Ariza beruvchi rad etish sabablarini bartaraf etib, hujjatlarni qayta ko‘rib chiqish uchun taqdim etish huquqiga ega bo‘ladigan muddat litsenziya berish rad etilgani haqida yozma yoki elektron bildirish xati olingan sanadan boshlab o‘n ish kunidan kam bo‘lmasligi kerak.

25. Litsenziya berishni rad etish uchun asos bo‘lgan sabablar ariza beruvchi tomonidan belgilangan muddatda bartaraf etilganda, vakolatli organ rad etish sabablari bartaraf etilgani haqidagi ariza va ular bartaraf etilganini tasdiqlovchi tegishli hujjatlarni olingan sanadan boshlab, besh ish kunidan oshmaydigan muddatda hujjatlarni qayta ko‘rib chiqadi, litsenziya beradi yoki litsenziya berishni rad etadi.

Arizani qayta ko‘rib chiqish uchun yig‘im undirilmaydi.

26. Arizani qayta ko‘rib chiqishda vakolatli organ tomonidan litsenziya berishni rad etish to‘g‘risidagi bildirish xatida avval qayd etilmagan sabablarni keltirishiga yo‘l qo‘yilmaydi, avval ko‘rsatilgan sabablar bartaraf etilganini tasdiqlovchi hujjatlar bilan bog‘liq rad etish sabablari bundan mustasno.

27. Ariza beruvchi tomonidan litsenziya berishni rad etish haqidagi bildirish xatida ko‘rsatilgan muddat tugagandan so‘ng taqdim etilgan ariza qayta taqdim etilgan deb hisoblanadi va vakolatli organ ushbu arizani umumiy asoslarda ko‘rib chiqadi.

28. Ariza beruvchi litsenziya berish rad etilgani, shuningdek, vakolatli organ mansabdor shaxsining harakati (harakatsizligi) yuzasidan belgilangan tartibda shikoyat qilish huquqiga ega.

29. Shartnomaning asosiy shartlari o‘zgartirilganda (xaridor va (yoki) sotuvchi, narxlar, yetkazib berish muddatlari, to‘lov turlari o‘zgartirilganda, yangi turdagi tovar qo‘shilganda), berilgan litsenziyalar tegishli hujjatlar ilova qilingan holda litsenziat arizasiga muvofiq qayta rasmiylashtiriladi.

30. Litsenziat — yuridik shaxs qayta tashkil etilganda, uning nomi yoki joylashgan joyi (pochta manzili) o‘zgarganda, litsenziat yoki uning huquqiy vorisi qayta rasmiylashtirishdan o‘tgandan so‘ng yetti ish kuni davomida vakolatli organga qayd etilgan ma’lumotlarni tasdiqlaydigan hujjatlarni ilova qilgan holda litsenziyani qayta rasmiylashtirish haqida ariza taqdim etishi shart.

Litsenziat — jismoniy shaxsning unga davlat ro‘yxatidan o‘tkazilgani haqida berilgan guvohnomada ko‘rsatilgan familiyasi, ismi, otasining ismi yoki faoliyat ko‘rsatish joyi o‘zgargan taqdirda, ariza beruvchi qayta rasmiylashtirishdan o‘tgandan so‘ng yetti ish kuni davomida vakolatli organga qayd etilgan ma’lumotlarni tasdiqlaydigan hujjatlarni ilova qilgan holda litsenziyani qayta rasmiylashtirish to‘g‘risida ariza taqdim etishi shart.

31. Yangi tashkil etilgan yuridik shaxs davlat ro‘yxatidan o‘tkazilgan sanada bir xil maxsus turdagi tovarlarni eksport yoki import qilish litsenziyasiga ega bo‘lgan litsenziatlar — yuridik shaxslar qo‘shilgan taqdirda, litsenziyani ushbu Nizomning 30-bandi birinchi xatboshida belgilangan tartibda qayta rasmiylashtirishga yo‘l qo‘yiladi.

32. Litsenziat hujjatlarni ularning olingani to‘g‘risidagi bildirish xatini olish orqali vakolatli organga bevosita pochta aloqasi vositalari yoki elektron shaklda taqdim etadi. Elektron shaklda taqdim etilgan hujjatlar litsenziatning elektron raqamli imzosi bilan tasdiqlanadi.

33. Litsenziyani qayta rasmiylashtirish to‘g‘risida ariza taqdim etgan litsenziat yoki uning huquqiy vorisi (merosxo‘ri) litsenziya qayta rasmiylashtirilgunicha, litsenziyani qayta rasmiylashtirish to‘g‘risida taqdim etilgan hamda vakolatli organning arizani qabul qilgan sanasi qayd etilgan ariza asosida maxsus turdagi tovarlarni eksport va import qiladi.

Ishchi organ litsenziyani qayta rasmiylashtirishda litsenziyalar reyestriga tegishli o‘zgartirishlar kiritadi. Litsenziya litsenziyani qayta rasmiylashtirish to‘g‘risida tegishli hujjatlar ilova qilingan ariza olingan sanadan boshlab uch ish kuni davomida qayta rasmiylashtiriladi va beriladi.

Litsenziyani qayta rasmiylashtirish uchun yig‘im undirilmaydi.

34. Litsenziyaning amal qilish muddati litsenziat arizasiga asosan uzaytiriladi.

Litsenziyaning amal qilish muddatini uzaytirish haqidagi ariza vakolatli organga ushbu hujjat amal qilish muddati tugagunicha taqdim etilishi zarur.

Litsenziyaning amal qilish muddati litsenziya berish uchun nazarda tutilgan tartibda uzaytiriladi.

Litsenziyaning amal qilish muddatini uzaytirish uchun yig‘im undirilmaydi.

35. Litsenziya yo‘qolganda yoki yaroqsiz holga kelganda, litsenziat arizasiga ko‘ra uning dublikati beriladi.

Ishchi organ litsenziya yaroqsiz holga kelgan taqdirda, litsenziyaning dublikati yoki asl nusxasini berish to‘g‘risidagi ariza olingan sanadan boshlab uch ish kunidan oshmaydigan muddatda uning dublikatini berishi (yuborishi) shart.

Litsenziya dublikatini berish uchun yig‘im undirilmaydi.

36. Litsenziyaning amal qilishini to‘xtatib turish, to‘xtatish va uni bekor qilish “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonunining 22, 23 va 25-moddalarida belgilangan tartibda amalga oshiriladi.

Amal qilishi to‘xtatib turilgan yoki to‘xtatilgan va bekor qilingan litsenziya to‘g‘risidagi ma’lumotlar ishchi organ tomonidan O‘zbekiston Respublikasi Davlat bojxona qo‘mitasiga zarur choralar ko‘rish uchun vakolatli organ tegishli qaror qabul qilgan sanadan boshlab bir ish kunidan kechiktirmasdan yuboriladi.

37. Litsenziyaning amal qilishini to‘xtatib turish, to‘xtatish va uni bekor qilish to‘g‘risidagi qaror yuzasidan sud tartibida murojaat qilish mumkin.

38. Ishchi organ berilgan litsenziyalar reyestrini yuritadi.

Berilgan litsenziyalar reyestrida quyidagilar ko‘rsatiladi:

ariza beruvchi — yuridik shaxsning nomi, tashkiliy-huquqiy shakli, joylashgan joyi (pochta manzili), telefon raqami;

ariza beruvchi — jismoniy shaxsning familiyasi, ismi, otasining ismi, pasport ma’lumotlari, pochta manzili, telefon raqami;

litsenziyani berish asoslari va sanasi, uning tartib raqami;

litsenziyaning amal qilish muddati;

litsenziya beriladigan eksport, import shartnomasining tafsilotlari — shartnoma raqami va sanasi, maxsus turdagi eksport, import tovarlar nomi, shartnoma qiymati, eksport qilinadigan mamlakat;

litsenziyani qayta rasmiylashtirishning asoslari va sanasi, uning amal qilish muddati uzaytirilishi va uning amal qilishining qayta tiklanishi;

litsenziyaning amal qilish muddatini to‘xtatish asoslari va sanasi;

litsenziyani bekor qilishning asoslari va sanasi;

litsenziya dublikatini berish asoslari va sanasi.

39. Maxsus turdagi tovarlar O‘zbekiston Respublikasining bojxona chegarasi orqali faqat belgilangan tartibda rasmiylashtirilgan litsenziya olingandan so‘ng olib o‘tiladi.

Ariza beruvchida litsenziya berish to‘g‘risidagi qaror qabul qilingunicha tuzilgan shartnomaning borligi litsenziya berish va tovarlarni O‘zbekiston Respublikasiga olib kirish yoki O‘zbekiston Respublikasidan olib chiqish uchun asos bo‘la olmaydi.

Olingan litsenziyaning nusxasi bojxona yuk deklaratsiyasiga ilova qilinadi va maxsus turdagi litsenziyalangan tovarlarni O‘zbekiston Respublikasi Davlat chegarasidan o‘tkazish uchun asos hisoblanadi.