LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Birjalar faoliyatini takrorlashga barham berish, unga bir tomonlama yondashuvga yo‘l qo‘ymaslik va ularning faoliyatini muvofiqlashtirishni ta’minlash, shuningdek bozor tarmoqlari majmuini rivojlantirishga, xo‘jalik aloqalarini yanada mustahkamlashga, respublikani iste’mol mollari va moddiy-texnika resurslari bilan to‘ldirishga birjalar qo‘shadigan hissani ko‘paytirish maqsadida:
1. Respublika hududida birja faoliyatini muvofiqlashtiruvchi organ sifatida Birjalar kengashi tuzilsin. Belgilab qo‘yilsinki, mazkur Kengash hozirgi vaqtda O‘zbekistonda faoliyat ko‘rsatayotgan birjalarning raislaridan tashkil topadi.
2. Birjalarni davlat ro‘yxatidan o‘tkazish O‘zbekiston Respublikasi Adliya vazirligi zimmasiga yuklansin. Shu narsa belgilansinki, respublika hududida yangidan tashkil etiladigan birjalar 1-bandda ko‘rsatilgan Birjalar kengashi bilan kelishib olinganidan keyingina ro‘yxatdan o‘tkaziladi.
3. Vazirlar Mahkamasi ushbu Farmonni ro‘yobga chiqarishga oid tashkiliy tadbirlarni amalga oshirsin va bir oy muddat ichida “O‘zbekiston Respublikasida birja faoliyati to‘g‘risida”gi Qonun loyihasini O‘zbekiston Respublikasi Oliy Kengashining muhokamasiga taqdim etsin.
LexUZ sharhi
Qarang: O‘zbekiston Respublikasi Prezidenti huzuridagi Vazirlar Mahkamasining 1992-yil 3-martdagi 95-son “O‘zbekiston Respublikasida birjalar faoliyatini muvofiqlashtirish to‘g‘risida”gi qarori.