“Kichik biznes va xususiy tadbirkorlik yili” Davlat dasturiga muvofiq va kichik korxonalarni tashkil etish hamda ularni va tadbirkorlarni roʻyxatga olish tartib-qoidalarini yanada soddalashtirish, kichik biznesni rivojlantirishga xorijiy investitsiyalarni keng jalb etish uchun qulay shart-sharoitlarni yaratish maqsadida:

1. Oʻzbekiston Respublikasi Prezidentining “Tadbirkorlik subyektlarini davlat roʻyxatiga olish va hisobga qoʻyishning xabardor qilish tartibini joriy etish toʻgʻrisida” 2006-yil 24-maydagi PQ-357-son qarori bilan tasdiqlangan tadbirkorlik subyektlarini davlat roʻyxatiga olish va hisobga qoʻyishning xabardor qilish tartibi toʻgʻrisidagi nizomga ilovaga muvofiq oʻzgartish va qoʻshimchalar kiritilsin.

2. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

1. 11-band “b” kichik bandining ikkinchi xatboshi quyidagi tahrirda bayon etilsin:

“xorijiy muassis toʻgʻrisida yuridik shaxs roʻyxatdan oʻtkazilgan joydagi yoki mazkur yuridik shaxsning faoliyatini tasdiqlovchi boshqa hujjat savdo reyestridan olingan, agar Oʻzbekiston Respublikasining xalqaro shartnomalarida boshqacha qoida nazarda tutilgan boʻlmasa, Oʻzbekiston Respublikasining konsullik muassasasi tomonidan belgilangan tartibda legalizatsiya qilingan, bular mavjud boʻlmagan taqdirda, muassis roʻyxatdan oʻtkazilgan davlat Tashqi ishlar vazirligida, mazkur mamlakatning Oʻzbekiston Respublikasidagi konsullik muassasasida yoki diplomatik vakolatxonasida legalizatsiya qilinib, keyinchalik Oʻzbekiston Respublikasi Tashqi ishlar vazirligining Konsullik boshqarmasida tasdiqlangan koʻchirma taqdim etiladi. Xorijiy muassis toʻgʻrisidagi savdo reyestridan koʻchirmada yoki mazkur xorijiy yuridik shaxsning faoliyatini tasdiqlovchi boshqa hujjatda xorijiy yuridik shaxsning nomi, uning joylashgan manzili, xorijiy yuridik shaxs nomidan imzo qoʻyish huquqiga ega boʻlgan shaxs haqidagi maʼlumotlar koʻrsatilishi kerak. Ushbu koʻchirma berilgan paytdan boshlab 1 yil muddat ichida haqiqiy hisoblanadi. Jismoniy shaxs — Oʻzbekiston Respublikasi norezidenti oʻz pasportining nusxasini taqdim etadi. Ushbu hujjatlar davlat tiliga tarjima qilingan, belgilangan tartibda notarial tasdiqlangan holda taqdim etilishi kerak. Agar xorijiy muassisning korxona (tashkilot) ustav fondiga ulushi intellektual mulk boʻlsa, u holda ariza beruvchi qonun hujjatlarida belgilangan tartibda baholovchi tashkilot tomonidan tayyorlangan baholash toʻgʻrisidagi hisobotni taqdim etishi kerak”.

2. 33-bandda:

a) birinchi xatboshidagi “7 ish kuni” soʻzlari “bir oy” soʻzlari bilan almashtirilsin;

b) toʻrtinchi xatboshidagi “matnining” soʻzidan keyin “vakolatli shaxs tomonidan imzolangan va” soʻzlari bilan toʻldirilsin;

v) quyidagi mazmundagi toʻqqizinchi xatboshi bilan toʻldirilsin:

“qism (ulush) yoki aksiya boshqa birovga oʻtgan taqdirda — mazkur qism (ulush) yoki aksiyaning boshqaga oʻtganini tasdiqlaydigan hujjat (shartnoma, xat va boshqalar)”;

toʻqqizinchi — oʻn ikkinchi xatboshilar tegishli ravishda oʻninchi — oʻn uchinchi xatboshilar deb hisoblansin.

3. 36-bandning birinchi xatboshidan “yoki yuridik manzili” soʻzlari chiqarib tashlansin.

4. Quyidagi mazmundagi 38¹-band bilan toʻldirilsin:

“38¹. Davlat roʻyxatidan oʻtganlik toʻgʻrisidagi yoʻqolgan yoki yaroqsiz holga kelgan guvohnoma oʻrniga tadbirkorlik subyektining arizasiga koʻra uning dublikati berilishi mumkin.

Davlat roʻyxatidan oʻtganlik toʻgʻrisidagi guvohnomaning dublikati berilganida bitta eng kam ish haqi miqdorida toʻlov undiriladi.

Bunda tadbirkorlik subyekti davlat roʻyxatidan oʻtganlik toʻgʻrisidagi yoʻqolgan guvohnomaning bekor qilinganligi toʻgʻrisida ommaviy axborot vositalarida xabar chop etishi, shuningdek roʻyxatga oluvchi organga chop etilgan xabarni va dublikatni olish uchun belgilangan toʻlov miqdori toʻlanganligi toʻgʻrisidagi bank toʻlov hujjatini taqdim etishi shart.

Toʻlov summasi roʻyxatga oluvchi organning alohida shaxsiy gʻaznachilik hisob raqamiga tushiriladi hamda dublikatni tayyorlash va berish boʻyicha roʻyxatga oluvchi organ xarajatlarini qoplashga yoʻnaltiriladi. Ushbu mablagʻlarning 31-dekabr holatigacha boʻlgan qoldiqlari:

Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi va viloyatlar adliya boshqarmalarining shaxsiy gʻaznachilik hisob raqamlaridan — respublika budjeti daromadiga;

Inspeksiyalarning shaxsiy gʻaznachilik hisob raqamlaridan — tegishli mahalliy budjetlar daromadlariga oʻtkaziladi.

Davlat roʻyxatidan oʻtganlik toʻgʻrisidagi yaroqsiz holga kelgan guvohnoma roʻyxatga oluvchi organga qaytarilishi va yoʻq qilinishi lozim.

Dublikatni berish muddati 3 ish kunidan oshmasligi kerak”.