Oʻzbekiston Respublikasi Vazirlar Mahkamasining 2007-yil 25-sentabrdagi 202-sonli “Davlat aktivlarini sotishdan tushgan, xoʻjalik boshqaruvi ayrim organlari ustav fondini shakllantirish uchun berilgan mablagʻlarni taqsimlash tartibi toʻgʻrisida”gi (Oʻzbekiston Respublikasi qonun hujjatlari toʻplami, 2007-y., 39-son, 403-modda) qaroriga muvofiq Oʻzbekiston Respublikasi Moliya vazirligi va Davlat mulkini boshqarish davlat qoʻmitasi qaror qiladi:

1. “Paxtasanoat” hududiy aksiyadorlik birlashmalari ustav fondlariga berilgan davlat aktivlarini sotishdan tushgan mablagʻlarni “Oʻzpaxtasanoat” uyushmasi tomonidan jamlanishi va ishlatilishi tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgach kuchga kiradi.

Mazkur Nizom Oʻzbekiston Respublikasi Vazirlar Mahkamasining 2007-yil 25-sentabrdagi 202-sonli “Davlat aktivlarini sotishdan tushgan, xoʻjalik boshqaruvi ayrim organlari ustav fondini shakllantirish uchun berilgan mablagʻlarni taqsimlash tartibi toʻgʻrisida”gi (Oʻzbekiston Respublikasi qonun hujjatlari toʻplami, 2007-y., 39-son, 403-modda) qaroriga muvofiq “Paxtasanoat” hududiy aksiyadorlik birlashmalari ustav fondlariga berilgan davlat aktivlari (keyingi oʻrinlarda — davlat aktivlari) sotilishidan “Oʻzpaxtasanoat” uyushmasi (keyingi oʻrinlarda — Uyushma) ixtiyoriga kelib tushadigan mablagʻlarni jamlash va ishlatish tartibini belgilaydi.

1. Oʻzbekiston Respublikasi Davlat mulkini boshqarish davlat qoʻmitasi (keyingi oʻrinlarda — Davlat mulki qoʻmitasi) davlat aktivlarini qonunchilikda belgilangan tartibda sotishni amalga oshiradi.

2. Davlat aktivlarini sotishdan tushadigan mablagʻlar Davlat mulki qoʻmitasining maxsus hisob raqamida jamlanadi va davlat aktivlarini oldi-sotdi shartnomasiga muvofiq sotib oluvchi tomonidan sotib olish toʻlovlari toʻliq amalga oshirilgandan keyin quyidagi tartibda taqsimlanadi:

“Paxtasanoat” XABning (keyingi oʻrinlarda — Birlashma) yozma murojaati, shuningdek Qimmatli qogʻozlarning Davlat Markaziy depozitariysi tasdiqlovchi maʼlumoti asosida Birlashmalar ustav fondlariga kiritilgan davlat aktivlarining qiymatiga teng boʻlgan mablagʻlar ularning hisob raqamiga oʻtkazib beriladi;

mablagʻlarning qolgan qismi 100 foiz deb qabul qilinadi va qonunchilikda belgilangan tartibda Davlat mulki qoʻmitasi ixtiyorida qoldiriladigan mablagʻlar chegirilgandan soʻng, Uyushmaning tijorat banklarida ochilgan “22626 — korxona va tashkilotlarning maqsadli mablagʻlari” maxsus hisob raqamiga oʻtkazib beriladi.

3. Uyushma Davlat mulki qoʻmitasidan tegishli shartnoma asosida kelib tushgan mablagʻlarni keyinchalik paxta tozalash korxonalarini modernizatsiyalash va rekonstruksiya qilish boʻyicha aniq loyihalarni amalga oshirish boʻyicha maqsadli ishlatilish uchun muddatli, qaytarish va toʻlash sharti bilan yoʻnaltiradi.

Davlat mulki qoʻmitasi va Uyushma oʻrtasida har bir sotilgan davlat aktivi boʻyicha alohida shartnoma tuziladi.

4. Mazkur Nizomga asosan mablagʻlarni jamlash va ishlatish boʻyicha alohida hisob yuritish maqsadida Uyushma va paxta tozalash korxonalari, xizmat koʻrsatuvchi bankda “22626-korxona va tashkilotlarning maqsadli mablagʻlari” maxsus hisob raqami ochadilar.

5. Sotib olish toʻlovlarining toʻliq miqdori Davlat mulki qoʻmitasining maxsus hisob raqamiga kelib tushgan sanadan keyingi oyning 15-sanasigacha Davlat mulki qoʻmitasi va Uyushma oʻrtasida tegishli shartnoma tuziladi va shartnomada koʻrsatilgan mablagʻlar ushbu shartnoma kuchga kirgan kundan boshlab 3 (uch) bank kunidan koʻp boʻlmagan muddatda Uyushmaning maxsus hisob raqamiga oʻtkazilishi lozim.

6. Davlat mulki qoʻmitasi tomonidan Uyushmaga berilgan mablagʻlarga Uyushma maxsus hisob raqamiga kelib tushgan kundan boshlab Davlat mulki qoʻmitasiga qaytarilish kuniga qadar Oʻzbekiston Respublikasi Markaziy bankining qayta moliyalashtirish yillik stavkasining 50 foizi miqdorida kunlik foizlar hisoblanadi.

7. Uyushma unga berilgan mablagʻlarni (asosiy qarzni) va ularga hisoblangan foizlarni alohida tarzda 2012-yilning 1-yanvaridan boshlab 3 yil davomida shartnomaga ilova qilinadigan jadval asosida teng yillik ulushlarda Davlat mulki qoʻmitasiga qaytaradi.

8. Paxta tozalash korxonalaridan mablagʻlarga buyurtma boʻlmaganda, ularni koʻrib chiqish davrida va Uyushma maxsus hisob raqamidagi mablagʻlar qoldigʻi, buyurtmalarda koʻrsatilgan mablagʻlar miqdoridan koʻp boʻlgan hollarda, Uyushma maxsus hisob raqamidagi vaqtinchalik boʻsh mablagʻlar Oʻzbekiston Respublikasining tijorat banklaridagi depozitlarga joylashtirilishi mumkin. Ulardan olingan daromadlar mablagʻlarning Uyushma maxsus hisob raqamida turgan davriga hisoblangan foizlarni toʻlash uchun maqsadli yoʻnaltiriladi.

Davlat mulki qoʻmitasi tomonidan mablagʻlarning Uyushma maxsus hisob raqamida boʻlgan davri uchun hisoblangan foizlar, toʻlovlar kechiktirilganligi uchun hisoblangan ustamalar va jarimalar (hisoblangan taqdirda), asosiy qarz, bank xizmatlari uchun toʻlovlar va berilgan mablagʻlarni boshqarish xarajatlarini toʻlash uchun mablagʻlarning yetmagan qismini Uyushma oʻz mablagʻlari hisobidan toʻlab beradi.

9. Modernizatsiyalash va rekonstruksiya qilish uchun mablagʻlarga ehtiyoji bor paxta tozalash korxonalari, korxona tegishli boshqaruv organining qarz mablagʻlarni jalb qilish toʻgʻrisidagi qaroriga asosan unga tegishli hujjatlar va hisob-kitoblarni (paxta tozalash korxonalari tomonidan ishlab chiqilgan va oʻrnatilgan tartibda tasdiqlangan rekonstruksiya va modernizatsiya loyiha-smeta hujjatlarini va texnik-iqtisodiy hisob-kitoblarni hamda Uyushma tomonidan belgilangan boshqa hujjatlarni) ilova qilgan holda Uyushmaga yozma murojaat yuboradilar.

10. Uyushma tushgan murojaatlarning alohida hisobini yuritadi, paxta tozalash korxonalari tomonidan taqdim etilgan hujjatlarni malakali mutaxassislarni jalb qilgan holda koʻrib chiqadi va ularni koʻrib chiqish natijalari boʻyicha murojaat etuvchiga murojaatni olgan kundan boshlab 20 ish kuni ichida mablagʻ ajratish yoki ajratmaslik (rad etishni asoslovchi dalillarni koʻrsatgan holda) toʻgʻrisida qabul qilingan qaror yuzasidan yozma bildirishnoma yuboradi.

11. Paxta tozalash korxonalarini modernizatsiyalash va rekonstruksiya qilish boʻyicha barcha loyihalarni Uyushma tomonidan tuzilgan Komissiya tomonidan ekspertiza qilinishi, soʻngra loyihalar Oʻzbekiston Respublikasi Iqtisodiyot vazirligi va Moliya vazirligida ekspertizadan oʻtkazilishi lozim. Komissiyani tuzish va uning ishini tashkil qilish tartibi Uyushma tomonidan belgilanadi.

12. Loyihalarni ekspertizadan oʻtkazishda ishlab chiqarishning texnik darajasini oshirishga, birinchi navbatda, korxonalarning texnik paxta chigiti tejalishini, sifatli, raqobatga bardoshli paxta mahsulotlari ishlab chiqarilishini taʼminlaydigan zamonaviy asbob-uskunalar bilan jihozlanishiga alohida eʼtibor qaratiladi.

Paxta tozalash korxonalarini modernizatsiyalash va rekonstruksiya qilish dasturini amalga oshirishda qatnashuvchi pudrat tashkilotlari belgilangan tartibda tanlov (tender) asosida aniqlanadi.

13. Agarda Uyushma tomonidan mablagʻ ajratish toʻgʻrisida rad etish qarori qabul qilingan taqdirda, rad etish sabablarini toʻgʻrilash imkoniyati mavjud boʻlsa, paxta tozalash korxonasi ularni bartaraf etgandan soʻng, takroran Uyushmaga murojaat qilishga haqli. Takroran taqdim etilgan hujjatlar Uyushma tomonidan mazkur Nizomning 10-bandida qayd etilgan muddatda koʻrib chiqiladi.

14. Mablagʻ ajratish toʻgʻrisida qaror qabul qilingan taqdirda, Uyushma ushbu qaror qabul qilingan kundan boshlab 10 ish kuni ichida paxta tozalash korxonasi bilan mazkur Nizomda belgilangan shartlar asosida tegishli shartnoma tuzadi.

Uyushma maxsus hisob raqamida jamlangan mablagʻlar hisobidan moliyalashtirish korxonalarga modernizatsiyalash va rekonstruksiya qilish uchun bosqichma-bosqich avans berish bilan, keyingi hisob-kitoblar esa oʻrnatilgan tartibda haqiqatda bajarilgan ish hajmlari uchun paxta tozalash korxonalari tegishli hujjatlarni taqdim etgan kundan boshlab 3 bank kuni ichida amalga oshiriladi.

Shu bilan birga, avans toʻlovlari tegishli shartnoma tuzilgan kundan keyin 3 bank kuni ichida amalga oshiriladi.

15. Uyushma tomonidan ajratilgan mablagʻlarga ushbu mablagʻlar paxta tozalash korxonasining maxsus hisob raqamiga kelib tushgan kundan boshlab va Uyushmaning maxsus hisob raqamiga qaytariladigan kunga qadar Oʻzbekiston Respublikasi Markaziy bankining qayta moliyalashtirish yillik stavkasining 50 foizi miqdorida kunlik foizlar hisoblanadi.

16. Paxta tozalash korxonasi Uyushma tomonidan berilgan mablagʻlarni va ularga hisoblangan foizlarni 2012-yil 1-yanvardan boshlab 3 yil davomida shartnomaga ilova qilinadigan jadval asosida teng yillik ulushlarda Uyushmaga qaytaradi.

17. Mablagʻ olgan paxta tozalash korxonalari ushbu mablagʻlarni Uyushmaga oʻrnatilgan tartibda muddatidan oldin qaytarishga haqlidirlar.

18. Uyushmadan Davlat mulki qoʻmitasiga kelib tushgan asosiy qarz, foizlar, ustamalar va jarimalar (hisoblangan taqdirda) qaytarilgan vaqtda amal qiladigan qonunchilikda belgilangan tartibda taqsimlanadi.

Bunda asosiy qarz, foizlar, ustamalar va jarimalar (hisoblangan taqdirda) 100 foiz deb qabul qilinadi va Davlat mulki qoʻmitasiga tegishli qismi hisoblanmaydi.

Birlashmalar ustav fondiga berilgan davlat aktivlarini sotishdan tushadigan mablagʻlar va Uyushma tomonidan Davlat mulki qoʻmitasiga oʻtkazilgan asosiy qarz, foizlar, ustamalar va jarimalar (hisoblangan taqdirda) taqsimoti mazkur Nizomning ilovasidagi misolda keltirilgan.

19. Ushbu Nizomga asosan Davlat mulki qoʻmitasi oʻzining maxsus hisob raqamiga kelib tushayotgan mablagʻlarni oʻz vaqtida va toʻgʻri taqsimlanishiga javob beradi.

20. Uyushma:

Davlat mulki qoʻmitasiga mablagʻlarni oʻz vaqtida va toʻliq qaytarilishi uchun;

paxta tozalash korxonalari tomonidan mablagʻlarni maqsadli ishlatilishi, oʻz vaqtida va toʻliq qaytarilishi uchun javob beradi.

21. Shartnoma asosida Davlat mulki qoʻmitasi tomonidan Uyushmaga berilgan pul mablagʻlarining maqsadli va samarali ishlatilishi ustidan nazorat qonunchilik va shartnomalarga muvofiq Oʻzbekiston Respublikasi Moliya vazirligi tomonidan Davlat mulki qoʻmitasi bilan birgalikda amalga oshiriladi.

22. Shartnoma asosida Uyushma tomonidan paxta tozalash korxonalariga berilgan pul mablagʻlarining maqsadli va samarali ishlatilishi ustidan nazorat qonunchilik va shartnomalarga muvofiq Uyushma tomonidan hamda oʻrnatilgan tartibda Oʻzbekiston Respublikasi Moliya vazirligi tomonidan amalga oshiriladi.

23. Paxta tozalash korxonasi Uyushma tomonidan shartnomaga muvofiq berilgan pul mablagʻlarni maqsadsiz ishlatgan taqdirda, paxta tozalash korxonasi maqsadsiz ishlatilgan mablagʻlar qiymatining 10 foizi miqdorida Uyushmaga jarima toʻlaydi.

Paxta tozalash korxonalari tomonidan maqsadsiz ishlatilgan pul mablagʻlari Uyushma tomonidan undiriladi va keyinchalik ularni ishlatish uchun Uyushmaning maxsus hisob raqamiga oʻtkaziladi yoki Davlat mulki qoʻmitasiga oʻrnatilgan tartibda qaytariladi.

24. Uyushma Davlat mulki qoʻmitasi tomonidan shartnomaga muvofiq berilgan pul mablagʻlarni maqsadsiz ishlatgan taqdirda, Uyushma maqsadsiz ishlatilgan mablagʻlar qiymatining 10 foizi miqdorida Davlat mulki qoʻmitasiga jarima toʻlaydi.

Uyushma tomonidan maqsadsiz ishlatilgan pul mablagʻlari Davlat mulki qoʻmitasi tomonidan undiriladi va amaldagi qonunchilikka asosan taqsimlash uchun Davlat mulki qoʻmitasining maxsus hisob raqamiga oʻtkaziladi.

25. Shartnomalar asosida berilgan pul mablagʻlari asosiy qarzi va foizlari oʻz vaqtida qaytarilmagan taqdirda, Uyushma Davlat mulki qoʻmitasiga, paxta tozalash korxonalari esa Uyushmaga toʻlov muddati kechiktirilgan har bir kun uchun mablagʻlar qiymatining 0,4 foiz miqdorida ustama toʻlaydilar, lekin bu ustama miqdori kechiktirilgan toʻlovlar qiymatining 50 foizidan oshmasligi kerak.

26. Ushbu Nizomga asosan Davlat mulki qoʻmitasiga qaytarilishi lozim boʻlgan barcha mablagʻlar, shu jumladan foizlar, hisoblangan ustamalar va jarimalar davlat tasarrufidan chiqarish va xususiylashtirish mablagʻlarining qismi hisoblanadi.

27. Uyushma va paxta tozalash korxonalarini ustama va jarima toʻlashi, shartnoma boʻyicha toʻlanadigan asosiy qarz va foiz toʻlovi majburiyatlaridan ozod etmaydi.

28. Sotib oluvchi oʻz zimmasiga olgan investitsion majburiyatlarni bajarmasligi va/yoki shartnoma bekor qilinishiga olib keladigan shartnomani boshqa shartlari bajarilmagan taqdirda, sotib oluvchi tomonidan toʻlangan mablagʻlarni qaytarish Davlat mulki qoʻmitasi tomonidan qonunchilik bilan belgilangan tartibda amalga oshiriladi.

29. Mazkur Nizom Oʻzbekiston Respublikasi Iqtisodiyot vazirligi, Markaziy banki Boshqaruvi va “Oʻzpaxtasanoat” uyushmasi bilan kelishilgan.