Mamlakatning huquqni muhofaza qilish, moliya organlari tomonidan soliq sohasidagi qonunbuzarliklarni aniqlash va ularga barham berish, korrupsiya, soliqlar va boshqa majburiy toʻlovlarni toʻlashdan bosh tortish, naqd pul va xorijiy valyuta mablagʻlarining noqonuniy aylanishiga qarshi kurashish boʻyicha aniq maqsadga yoʻnaltirilgan ishlar olib borilmoqda.

Iqtisodiy va moliyaviy sohalarda qonuniylikni taʼminlashda Oʻzbekiston Respublikasi Bosh prokuraturasi huzuridagi Soliq va valyutaga oid jinoyatlarga qarshi kurashish departamenti muhim oʻrin egallamoqda. Oʻzining 5 yillik faoliyatida Departament tomonidan soliq va valyutaga oid 52 mingtadan ortiq qonun buzilishlari aniqlangan boʻlib, 13530 tasi boʻyicha jinoiy ishlar qoʻzgʻatildi, 38887 nafar shaxslar maʼmuriy javobgarlikka tortildilar.

Koʻrilgan choralar natijasida jami 142,9 mlrd. soʻm miqdoridagi moddiy zarar va budjetga qoʻshimcha hisoblangan soliqlar va boshqa majburiy toʻlovlar undirildi. Respublikaga noqonuniy olib kirilgan 22,4 mlrd. soʻmlik tovar-moddiy boyliklar olib qoʻyildi. Xorijiy valyutaning yashirib qolinishi, chetga chiqib ketishi, noqonuniy aylanishi bilan bogʻliq 2420 qonunbuzarliklar fosh etildi.

Shu bilan birga, soliq, valyuta, boshqa iqtisodiy jinoyatlarga qarshi kurashish ishlarini tashkil etishda jiddiy kamchiliklar va foydalanilmagan rezervlar mavjud.

Iqtisodiy, moliyaviy, soliq sohalarida sodir etilgan jinoyatlarning shart-sharoitlari va sabablarini, “xufyona biznes”ni shakllanish yoʻllarini, xorijiy valyutaning chetga chiqib ketish kanallari va koʻp miqdordagi pul mablagʻlarining bankdan tashqari noqonuniy aylanishi manbalarini aniqlash va bartaraf etish ishlarining samaradorligi past darajada qolmoqda. Jinoiy faoliyatdan olingan daromadlarni legallashtirish holatlarini chuqur tahlil qilish, aniqlash, oldini olish va ularga barham berishdagi axborot-tahliliy ishlarida zamonaviy tahlil usuli, uslublari va vositalari keng qoʻllanilmayotir.

Mazkur jinoyatlarning ijtimoiy xavfliligi tizimdagi barcha tezkor-tergov, bank, boshqaruv va nazorat qiluvchi tuzilmalarning iqtisodiy va moliyaviy sohalardagi huquq buzishlarini oʻz vaqtida aniqlash va zararsizlantirish boʻyicha kompleks va aniq muvofiqlashtirilgan tarzda faoliyat koʻrsatishlarini talab etadi.

Moliyaviy razvedka va monitoringning samarali tizimini yaratish, tezkor-qidiruv faoliyatida axborot-kommunikatsiya texnologiyalaridan keng foydalanishga asoslangan zamonaviy kurashish vositalarni joriy etish muhim vazifa hisoblanadi.

Tezkor xizmat va surishtiruv boʻlinmalarining faoliyati asosan yaqqol koʻrinib turgan qonun buzilishlarini aniqlash va oldini olishga yoʻnaltirilgan boʻlib, ularni keltirib chiqaradigan shart-sharoitlarini chuqur oʻrganish va sabablarini aniqlash taʼminlanmayotir.

Soliq va valyuta sohasidagi qonun buzilishlari va ularni sodir etgan shaxslar toʻgʻrisidagi maʼlumotlarning yagona markazlashtirilgan hisobini yuritish va maʼlumotlarning kompyuter bazasini yaratish ishlari tugallanmagan.

Iqtisodiy, moliyaviy jinoyatlarga qarshi kurashish ishlarini tashkil etish, kriminogen vaziyat monitoringini amalga oshirish, ushbu sohada profilaktika ishlarini olib borishda huquqni muhofaza qiluvchi organlar, davlat hokimiyati va boshqaruv organlari, moliya va bank muassasalarining oʻzaro hamkorlik darajasi zamon talablariga javob bermaydi.

Departament organlarida kadrlarni tanlash, tayyorlash, qayta tayyorlash ishlari, tahliliy, tezkor boʻlinmalarning maxsus texnika va kriminalistika vositalari bilan taʼminlanishi tubdan qayta koʻrib chiqishni talab etadi.

Iqtisodiy, valyuta-moliya va soliq sohasidagi jinoyatlarga qarshi kurashish faoliyatini takomillashtirish, shuningdek, Oʻzbekiston Respublikasining “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish toʻgʻrisida”gi Qonuni talablari ijrosini taʼminlash maqsadida:

1. Oʻzbekiston Respublikasi Bosh prokuraturasi huzuridagi Soliq va valyutaga oid jinoyatlarga qarshi kurashish departamenti Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamentiga (bundan buyon matnda Departament deb yuritiladi) aylantirilsin.

Departament tuzilmasida Jinoiy faoliyatdan olingan daromadlarni legallashtirishga qarshi kurashish boshqarmasi tashkil etilsin, Departament va uning hududiy boʻlinmalari boshqaruv xodimlarining cheklangan soni 20 nafarga koʻpaytirilsin.

Belgilab qoʻyilsinki, Departament Oʻzbekiston Respublikasi Bosh prokuraturasi huzuridagi mustaqil ixtisoslashtirilgan vakolatli huquqni muhofaza qilish organi hisoblanadi, soliq, valyutaga oid jinoyatlar va huquq buzilishlariga hamda jinoiy faoliyatdan olingan daromadlarni legallashtirishga qarshi kurashish sohasida tezkor-tahliliy, qidiruv ishlarini tashkil etish va amalga oshirish, shuningdek, sodir etilgan qonun buzilishlari oqibatida yetkazilgan iqtisodiy zararni undirib olish uning asosiy maqsadi hisoblanadi.

2. Quyidagilar Departamentning asosiy vazifalari etib belgilansin:

soliq, valyutaga oid jinoyatlar va huquq buzilishlarini oʻz vaqtida aniqlash, ularning oldini olish va bartaraf etish, jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish toʻgʻrisidagi qonun hujjatlari bajarilishini nazorat qilish;

davlat soliq siyosati amalga oshirilishini taʼminlash, soliqqa tortish bazasini kengaytirish, soliq toʻlovchilarni qamrab olinishi va hisobining toʻliqligini taʼminlash, soliqlarni toʻlashdan boʻyin tovlash, qochishning mumkin boʻlgan kanallari va mexanizmlarini, “xufyona” iqtisodiyotning shakllanish yoʻllarini, korrupsiya hollarini oʻz vaqtida aniqlash va bartaraf etish;

valyuta operatsiyalari boʻyicha hisob va hisobotlarning toʻliqligi va obyektivligini nazorat qilish; xorijiy valyuta mablagʻlarining qonunga xilof ravishda chetga chiqib ketishi, olib kelinishi va olib chiqilishi, noqonuniy muomalada boʻlishi va valyuta-ayirboshlash operatsiyalari bilan bogʻliq boshqa qonun buzilishlarini oldini olish va bartaraf etish;

moliyaviy razvedkaning zamonaviy tizimini yaratish; jinoiy yoʻl bilan olingan daromadlarni legallashtirish va terrorizmni moliyalashtirishning mumkin boʻlgan kanallari va mexanizmlarini aniqlashga yoʻnaltirilgan moliyaviy, mulkiy operatsiyalar monitoringini tashkil etish va amalga oshirish; aniqlangan huquq buzilishlari toʻgʻrisida tegishli huquqni muhofaza qilish organlari boʻlinmalariga jinoiy taʼqibni tashkil etish, maʼmuriy taʼsir choralarini koʻrishlik uchun oʻz vaqtida axborot taqdim etish;

ijtimoiy ahamiyatga ega oziq-ovqat tovarlari uchun narx-navolarni asossiz va sunʼiy oshirishga qarshi kurashish;

soliq va valyuta-moliya sohasida aniqlangan jinoyatlar va huquq buzilishlari hamda qonun hujjatlariga muvofiq nazorat qilinadigan pul mablagʻlari yoki boshqa mol-mulk bilan bogʻliq operatsiyalar toʻgʻrisidagi maʼlumotlarning yagona kompyuter bazasini yaratish va yuritish;

Oʻzbekiston Respublikasining xalqaro majburiyatlari va shartnomalariga muvofiq valyutani tartibga solish sohasida, shuningdek, jinoiy yoʻl bilan olingan daromadlarni legallashtirish va terrorizmni moliyalashtirishga qarshi kurashish masalalari boʻyicha xorijiy davlatlarning vakolatli organlari hamda xalqaro-ixtisoslashgan va boshqa tashkilotlar bilan oʻzaro hamkorlik qilish va axborotlar ayirboshlash;

soliq siyosati va valyuta muomalasini tartibga solish, shuningdek, jinoiy faoliyatdan olingan daromadlarni legallashtirishga qarshi kurashish sohasidagi qonun hujjatlari buzilishlarining oldini olish masalalari boʻyicha keng tushuntirish, profilaktika ishlarini amalga oshirish.

3. Quyidagilar:

Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti toʻgʻrisidagi nizom 1-ilovaga muvofiq;

Oʻzbekiston Respublikasi Bosh prokuroriga Departament va uning hududiy boʻlinmalari tuzilmasiga xodimlarning belgilangan cheklangan soni doirasida oʻzgartirishlar kiritish huquqi berilsin.

4. Oʻzbekiston Respublikasi Bosh prokurori (R.H. Qodirov), Soliq, valyutaga oid jinoyatlarga va jinoiy daromadlarni legallashtirishga qarshi kurashish departamentiga:

Departamentning jinoiy faoliyatdan olingan daromadlarni legallashtirishga qarshi kurashish boshqarmasini huquqni muhofaza qiluvchi, boshqaruv va nazorat organlari, moliyaviy tashkilotlar tizimida amaliy ish tajribasiga ega boʻlgan, moliyaviy razvedka sohasida ishlash uchun zarur boʻlgan tahliliy fikrlash qobiliyatiga, axborot toʻplash va tahlil qilish koʻnikmalariga, yuksak axloq-irodaga, boshqa kasbiy va shaxsiy sifatlarga ega boʻlgan mutaxassislar (iqtisodchilar, yuristlar, axborot texnologiyalari sohasi mutaxassislari) bilan ikki oy muddatda butlanishini taʼminlasinlar;

ikki oy muddatda Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamentining yangi tashkil etilgan boshqarmasi ishini tashkil etish uchun zarur moddiy-texnika vositalari bilan taʼminlash chora-tadbirlarini koʻrsinlar;

Oʻzbekiston aloqa va axborotlashtirish agentligi (A.N. Aripov) bilan birgalikda Departamentda soliq, valyutaga oid jinoyatlarga qarshi kurashish, gʻayriqonuniy yoʻllar bilan topilgan pul mablagʻlarini qonuniylashtirishning oldini olish va terrorizmni moliyalashtirishga qarshi kurashish masalalari boʻyicha maʼlumotlar bazasini tashkil etish va yuritish uchun moʻljallangan yagona axborot-kompyuter tarmogʻini tashkil etish yuzasidan ikki oy muddatda Vazirlar Mahkamasiga takliflar kiritsinlar, Departamentning yangidan tashkil etilgan boʻlinmalarini zarur aloqa va telekommunikatsiya vositalari, shu jumladan, hukumat aloqa vositalari bilan, shuningdek, Internet tarmogʻiga ulanishini taʼminlasinlar;

Oliy va oʻrta maxsus taʼlim vazirligi (R.S. Qosimov), Ichki ishlar vazirligi (B.A. Matlyubov), Milliy xavfsizlik xizmati (R.R. Inoyatov) Davlat soliq qoʻmitasi (B.R. Parpiyev) bilan birgalikda Davlat soliq qoʻmitasining Soliq akademiyasi bazasida moliyaviy razvedka masalalari bilan shugʻullanuvchi xodimlarni tayyorlash, qayta tayyorlash va ularning malakasini oshirish uchun moʻljallangan “Moliyaviy-iqtisodiy xavfsizlik” maxsus kursini tashkil etish toʻgʻrisida uch oy muddatda takliflar kiritsinlar;

Adliya vazirligi (B. Mustafoyev) bilan birgalikda gʻayriqonuniy yoʻllar bilan topilgan pul mablagʻlarini qonuniylashtirishning oldini olish va terrorizmni moliyalashtirishga qarshi kurashish masalalarida aholining, birinchi navbatda tadbirkorlar, oʻrta va kichik biznes vakillarining, moliya, bank tuzilmalari xodimlarining huquqiy savodxonligini oshirish boʻyicha 2006-yilda turkum axborot-tashviqot tadbirlarini ishlab chiqsinlar va amalga oshirsinlar.

5. Bosh prokuratura (R.H. Qodirov) Markaziy bank, Milliy xavfsizlik xizmati, Ichki ishlar vazirligi, Adliya vazirligi, Moliya vazirligi, Davlat soliq qoʻmitasi, boshqa manfaatdor vazirliklar va idoralar bilan birgalikda:

bir oy muddatda — Jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish bilan bogʻliq maʼlumotlarni Departamentga taqdim etish tartibi toʻgʻrisidagi nizomni;

ikki oy muddatda — jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish masalalari boʻyicha huquqni muhofaza qiluvchi, boshqaruv va nazorat qiluvchi, roʻyxatdan oʻtkazuvchi va litsenziyalovchi organlar boʻlinmalarining oʻzaro hamkorligini tashkil etish chora-tadbirlari kompleks dasturini ishlab chiqsin va tasdiqlash uchun Vazirlar Mahkamasiga kiritsin.

6. Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti Markaziy bank bilan birgalikda pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlarda jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish yuzasidan zamonaviy talab va meʼyorlarga muvofiq keluvchi ichki nazoratni amalga oshirish qoidalarini ikki oy muddatda ishlab chiqsin va tasdiqlasin.

7. Iqtisodiyot vazirligi (B.A. Xoʻjayev), Moliya vazirligi (R.S. Azimov) Bosh prokuratura bilan birgalikda Departamentda soliq, valyutaga oid jinoyatlarga, jinoiy daromadlarni legallashtirish va terrorizmni moliyalashtirishga qarshi kurashish masalalari boʻyicha yagona axborot-kompyuter tarmogʻini va maʼlumotlar kompyuter bazasini yaratish tadbirlarini 2007-yil investitsiya dasturiga kiritilishini taʼminlasinlar.

8. Oʻzbekiston Respublikasi Moliya vazirligi (R.S. Azimov):

Departamentning qayta tashkil etilishi munosabati bilan Oʻzbekiston Respublikasi Bosh prokuraturasining shtat jadvaliga va xarajatlar smetasiga tegishli oʻzgartirishlar kiritsin;

Bosh prokuratura, Mehnat va aholini ijtimoiy muhofaza qilish vazirligi bilan birgalikda Departament xodimlari mehnatiga haq toʻlash tizimini takomillashtirish yuzasidan bir oy muddatda takliflar kiritsin.

9. Departament Oʻzbekiston Respublikasi Davlat statistika qoʻmitasi, Moliya vazirligi, Markaziy bank, Bandlik va mehnat munosabatlari vazirligi, Tashqi iqtisodiy aloqalar, investitsiyalar va savdo vazirligi, Davlat raqobat qoʻmitasi, Davlat soliq qoʻmitasi va Davlat bojxona qoʻmitasining byulletenlari va statistika maʼlumotlari majburiy tartibda yuboriladigan reyestrga kiritilsin.

10. Oʻzbekiston Respublikasi Adliya vazirligi (B. Mustafoyev):

Bosh prokuratura hamda boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirishlar va qoʻshimchalar yuzasidan Vazirlar Mahkamasiga takliflar kiritsin;

vazirliklar va idoralar tomonidan oʻz normativ hujjatlarining mazkur qarorga muvofiqlashtirilishini taʼminlasin;

Vazirlar Mahkamasining “Oʻzbekiston Respublikasi Bosh prokuraturasi huzuridagi Soliqqa oid jinoyatlarga qarshi kurashish departamenti faoliyatini takomillashtirish chora-tadbirlari toʻgʻrisida” 2002-yil 28-noyabrdagi 415-son qaroriga 1, 2, 2a, 3, 3a, 4-ilovalar oʻz kuchini yoʻqotgan deb hisoblansin.

11. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev va Oʻzbekiston Respublikasi Prezidenti Davlat maslahatchisining oʻrinbosari A.E. Nabiyev zimmasiga yuklansin.

1. Ushbu Nizom Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti faoliyatining huquqiy asoslarini, vazifalari va funksiyalarini, tizimi va tuzilmasini, vakolatlari va javobgarligini belgilaydi.

2. Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti (bundan keyin matnda Departament deb yuritiladi):

Oʻzbekiston Respublikasi Bosh prokuraturasi huzuridagi mustaqil ixtisoslashtirilgan huquqni muhofaza qilish organi hisoblanib, soliq, valyutaga oid jinoyatlar va huquq buzilishlari hamda jinoiy faoliyatdan olingan daromadlarni legallashtirish, terroristik faoliyatni moliyalashtirishga qarshi kurashish sohasida tezkor-tahliliy, qidiruv ishlarini tashkil etish va amalga oshirish, shuningdek, davlatga yetkazilgan iqtisodiy zararni undirib olish uning asosiy maqsadi hisoblanadi.

jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish masalalari boʻyicha maxsus vakolatli davlat organi hisoblanadi. Departamentning qonun hujjatlarida belgilangan vakolati doirasida qabul qilingan qarorlari vazirliklar, davlat qoʻmitalari, davlat boshqaruv, mahalliy hokimiyat organlari, korxonalar, muassasalar va tashkilotlar, shuningdek, mansabdor shaxslar va fuqarolar tomonidan bajarilishi majburiydir.

3. Departament oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Oliy Majlisi palatalari qarorlariga, shuningdek, ushbu Nizomga amal qiladi.

4. Soliq va valyutaga oid jinoyatlarni aniqlash va oldini olish boʻyicha jinoiy ish qoʻzgʻashdan boshlab uni sudda koʻrib chiqishgacha boʻlgan protsessual harakatlarning uzviyligi va izchilligi Departament va uning hududiy boʻlinmalarining iqtisodiyot, soliq va valyutaga oid, shuningdek, jinoiy faoliyatdan olingan daromadlarni legallashtirishga hamda terrorizmni moliyalashtirish bilan bogʻliq jinoiy ishlarni koʻrib chiquvchi, sudda ular boʻyicha davlat aybnomasini quvvatlovchi barcha darajadagi prokuratura organlari bilan oʻzaro uzviy hamkorligi va harakatlarining muvofiqlashtirilishi natijasida taʼminlanadi.

5. Departament boʻlinmalari huquqni muhofaza qiluvchi, boshqaruv va nazorat organlari, moliya tashkilotlari tizimida amaliy ish tajribasiga ega boʻlgan, tahliliy fikrlay oladigan va axborot-tahliliy ishlar koʻnikmalariga, yuksak maʼnaviy irodaga, moliyaviy razvedka sohasida ishlash uchun zarur boʻlgan boshqa kasbiy va shaxsiy sifatlarga ega boʻlgan mutaxassislar (iqtisodchilar, yuristlar, axborot texnologiyalari sohasidagi mutaxassislar) orasidan yuqori malakali kadrlardan butlanadi.

6. Departament mustaqil yuridik shaxs hisoblanadi, bank muassasalarida hisob-kitob, joriy va boshqa hisob raqamlariga, Oʻzbekiston Respublikasi gerbi tasviri tushirilgan va Departamentning toʻliq nomi yozilgan muhrga ega boʻladi.

7. Quyidagilar Departamentning asosiy vazifalari hisoblanadi:

soliq, valyutaga oid jinoyatlar va huquq buzilishlarini oʻz vaqtida aniqlash, ularning oldini olish, jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish toʻgʻrisidagi qonun hujjatlari bajarilishini nazorat qilish;

davlat soliq siyosati amalga oshirilishini taʼminlash, soliqqa tortish bazasini kengaytirish, soliq toʻlovchilarni qamrab olinishi va hisobini toʻliqligini taʼminlash, soliqlarni toʻlashdan boʻyin tovlash, qochish mumkin boʻlgan kanallari va mexanizmlarini, “xufyona” iqtisodiyotning shakllanishi yoʻllarini, korrupsiya holatlarini oʻz vaqtida aniqlash va bartaraf etish;

valyuta operatsiyalari boʻyicha hisobga olish va hisobotlarning toʻliqligi va obyektivligini nazorat qilish; xorijiy valyuta mablagʻlarining qonunga xilof ravishda chetga chiqib ketishi, olib kirilishi va olib chiqilishi, ularning noqonuniy muomalada boʻlishi, valyuta-ayirboshlash operatsiyalari bilan bogʻliq boshqa qonun buzilishlarini oldini olish va bartaraf etish;

moliyaviy razvedkaning zamonaviy tizimini yaratish; jinoiy yoʻl bilan olingan daromadlarni legallashtirish va terrorizmni moliyalashtirishning mumkin boʻlgan kanallari va mexanizmlarini aniqlashga yoʻnaltirilgan moliyaviy, mulkiy operatsiyalar monitoringini tashkil etish va olib borish; aniqlangan huquq buzilishlari toʻgʻrisida tegishli huquqni muhofaza qilish organlari boʻlinmalariga jinoiy taʼqibni tashkil etish, maʼmuriy taʼsir koʻrsatish choralarini koʻrish uchun oʻz vaqtida axborot taqdim etish;

ijtimoiy ahamiyatga ega oziq-ovqat tovarlari uchun narx-navolarni asossiz va sunʼiy oshirishga qarshi kurashish;

soliq va valyuta-moliya sohasida aniqlangan jinoyatlar va huquq buzilishlari, hamda qonun hujjatlariga muvofiq nazorat qilinadigan pul mablagʻlari yoki boshqa mol-mulk bilan bogʻliq operatsiyalar toʻgʻrisidagi maʼlumotlarning yagona kompyuter bazasini yaratish va yuritish;

Oʻzbekiston Respublikasining xalqaro majburiyatlari va shartnomalariga muvofiq valyutani tartibga solish sohasida, shuningdek jinoiy yoʻl bilan olingan daromadlarni legallashtirish va terrorizmni moliyalashtirishga qarshi kurashish masalalari boʻyicha xorijiy davlatlarning vakolatli organlari hamda boshqa xalqaro ixtisoslashgan tashkilotlar bilan oʻzaro hamkorlik qilish va axborotlar ayirboshlash;

soliq siyosati va valyuta muomalasini tartibga solish, shuningdek jinoiy faoliyatdan olingan daromadlarni legallashtirishga qarshi kurashish sohasidagi qonun hujjatlari buzilishlarining oldini olish masalalari boʻyicha keng tushuntirish, profilaktika ishlarini amalga oshirish.

8. Departament oʻziga yuklangan vazifalarga muvofiq quyidagi funksiyalarni bajaradi:

ishlab chiqarish, foyda (daromad) hajmlarini yashirish, sotilgan mahsulot, tovarlar (ishlar, xizmatlar) hajmlarini pasaytirish mexanizmlarini oʻrganish va aniqlash, xoʻjalik yurituvchi subyektlar tomonidan hisobga olinmagan (tasdiqlovchi hujjatlarga ega boʻlmagan) mahsulotlar (tovarlar) sotilishi, tadbirkorlik faoliyatini amalga oshiruvchi yuridik va jismoniy shaxslarning davlat soliq inspeksiyalarida hisobga turishdan boʻyin tovlashi mexanizmlarini oʻrganish va aniqlash;

xoʻjalik yurituvchi subyektlar tomonidan budjetga soliqlar va toʻlovlarning toʻgʻri hisoblanishi, toʻliq va oʻz vaqtida toʻlanishini tekshirish.

xorijiy valyutada operatsiyalarni amalga oshirishda qonun buzilishlarini aniqlash, oldini olish, bartaraf etish va profilaktik chora-tadbirlarni koʻrish;

xorijiy valyuta mablagʻlarining noqonuniy aylanishi, yashirib qolinishi, chetga chiqib ketish kanallarini, hamda xorijiy valyutani sotish boʻyicha majburiyatlardan boʻyin tovlash yoʻllarini oʻrganish va aniqlash;

respublika hududida rezidentlar va norezidentlar tomonidan xorijiy valyutada ish haqi toʻlash va hisob-kitob qilish hollarini aniqlash va ularning oldini olish;

pul mablagʻlari yoki boshqa mol-mulk bilan bogʻliq operatsiyalar (bitimlar) ustidan qonun hujjatlarida nazarda tutilgan majburiy nazoratni amalga oshirish;

pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlar hamda jinoiy faoliyatdan olingan daromadlarni legallashtirishga va terroristik faoliyatni moliyalashtirishga qarshi kurashishda qatnashuvchi organlar faoliyatini muvofiqlashtirish;

kredit va boshqa moliya tashkilotlaridan yuridik va jismoniy shaxslarning pul mablagʻlari yoki boshqa mol-mulklari bilan bogʻliq operatsiyalar (bitimlar) toʻgʻrisida olingan axborotlarni ularni noqonuniy daromadlarni legallashtirishga va terrorizm (ekstremizm)ni moliyalashtirishga ehtimoliy daxldorligini aniqlash maqsadida tahlil qilish va qayta ishlashni tashkil etish va amalga oshirish;

jinoiy faoliyatdan olingan daromadlarni legallashtirishda, shuningdek terroristik tashkilotlarga moliyaviy va boshqa yordam koʻrsatish uchun foydalaniladigan shakl va usullarni, hamda terroristik faoliyatga daxldorligi toʻgʻrisida maʼlumotlar mavjud boʻlgan jismoniy va yuridik shaxslar toʻgʻrisidagi hujjatlarni tahlil qilish;

jinoiy faoliyatdan olingan daromadlarni legallashtirishga qarshi kurashish toʻgʻrisidagi qonun hujjatlari talablarining yuridik va jismoniy shaxslar tomonidan bajarilishi ustidan nazoratni taʼminlash;

Oʻzbekiston Respublikasining xalqaro shartnomalariga muvofiq jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish sohasida xorijiy davlatlarning vakolatli organlari bilan oʻzaro hamkorlik qilish va axborotlar ayirboshlash;

8.3¹. Ijtimoiy ahamiyatga ega oziq-ovqat tovarlari uchun narx-navolarni asossiz va sunʼiy oshirishga qarshi kurashish sohasida

ijtimoiy ahamiyatga ega oziq-ovqat tovarlariga (yurtimizda ishlab chiqarilgan oʻsimlik yogʻi va un, goʻsht, shakar), shuningdek, sheluxa va shrotga boʻlgan narx-navoni asossiz va sunʼiy oshirishga, ularga boʻlgan tanqislik va ajiotaj talabning vujudga kelishiga yoʻnaltirilgan qonunga xilof harakatlarni aniqlash va chek qoʻyish;

markazlashtirilgan resurslar hisobidan oziq-ovqat tovarlari, paxta shroti va sheluxasini xarid qilish, yetkazib berish va sotishda suiisteʼmol qilinishlar va korrupsiyaga qarshi kurashish;

ijtimoiy ahamiyatga ega oziq-ovqat tovarlariga, shuningdek, sheluxa va shrotni sotishda narx-navoni shakllantirishning belgilangan mexanizmlariga rioya etilishini tizimli oʻrganish, aniqlangan qonunchilik buzilishlari boʻyicha materiallarni qonun hujjatlariga muvofiq chora koʻrish uchun vakolatli organlarga yoʻnaltirishi;

nazorat qiluvchi organlar va bozorlar maʼmuriyati xodimlari tomonidan yoʻl qoʻyilgan korrupsiya, ular tomonidan bozorlar faoliyatini tashkil etishning belgilangan tartiblari va qonun hujjatlari talablariga rioya etmaslik, shu jumladan, narxlarni asossiz va sunʼiy koʻtarish, ularning hududlarida oʻz faoliyatini norasmiy olib borayotgan shaxslarga nisbatan choralar koʻrmaslik holatlarini aniqlash;

Departamentning tezkor-qidiruv faoliyatini axborot-tahliliy jihatdan taʼminlash va muvofiqlashtirishni tashkil etish;

uning hududiy boʻlinmalarida tezkor-qidiruv ishlari tashkil etilishini nazorat qilish;

8.5. Tergovga kadar tekshiruv va surishtiruv olib borish sohasida

jinoiy ishlar qoʻzgʻatish, moliya-iqtisodiyot, soliq sohasida jinoyatlar va huquq buzilishlarini sodir etish hollari, shuningdek jinoiy faoliyatdan olingan daromadlarni legallashtirish holatlari boʻyicha tergovga kadar tekshiruv va surishtiruv ishlarini tashkil qilish va olib borish;

Departamentning hududiy boʻlinmalarida tergovga kadar tekshiruv va surishtiruv olib borilishi ustidan nazoratni amalga oshirish.

soliq va iqtisodiyot sohasidagi, shu jumladan, xorijiy valyutadagi operatsiyalarni amalga oshirishdagi huquq buzilishlarining, shuningdek, jinoiy faoliyatdan olingan daromadlarni legallashtirish holatlarini aniqlash, oldini olish va payini qirqishga yoʻnaltirilgan rejali, rejadan tashqari va boshqa tadbirlarni ishlab chiqish va amalga oshirilishiga doir tashkiliy chora-tadbirlarni bajarish;

Departament hududiy boʻlinmalari faoliyatini ular tomonidan oʻz funksional vazifalarining bajarilishi hamda ijro va xizmat intizomiga rioya etilishi yuzasidan muvofiqlashtirish va nazoratni amalga oshirish (shu jumladan, idoraviy tekshirishlar oʻtkazish);

Departament va uning hududiy boʻlinmalari faoliyatini takomillashtirish boʻyicha metodik rahbarlik qilish, tegishli uslubiy yoʻriqnomalar va takliflar ishlab chiqish;

Oʻzbekiston Respublikasining iqtisodiy xavfsizligini taʼminlash boʻyicha qonun hujjatlarining qoʻllanish amaliyotini umumlashtirish, Oʻzbekiston Respublikasi qonunlari va boshqa normativ-huquqiy hujjatlarini takomillashtirish yuzasidan takliflar ishlab chiqish va Bosh prokurorga kiritish;

Departament va uning hududiy boʻlinmalari faoliyatiga oid statistika hisobi va hisobotlarni yuritish;

tezkor-xizmat faoliyatini axborot-tahliliy jihatdan taʼminlashni amalga oshirish;

soliq, valyuta qonun hujjatlari, shuningdek, jinoiy faoliyatdan olingan daromadlarni legallashtirish bilan bogʻliq qonun hujjatlari buzilishi hollarini toʻplash, har tomonlama tahlil qilish va baholash, moliya-iqtisodiyot, soliq sohalaridagi normativ-huquqiy bazani takomillashtirish, iqtisodiy, soliq va valyutaga oid jinoyatlarning sodir etilishiga imkon yaratuvchi sabab va shart-sharoitlarni bartaraf etish boʻyicha tegishli organlarga takliflar kiritish;

prokuratura rahbariyatiga iqtisodiyot sohasidagi jinoyatlarga qarshi kurashish natijalari va muammolari hamda jinoiy faoliyatdan olingan daromadlarni legallashtirishga qarshi kurashish masalalari boʻyicha axborot berish.

kadrlarni tanlash va joy-joyiga qoʻyish, Departament va uning joylardagi boʻlinmalarida kadrlar zaxirasini shakllantirishga doir tadbirlarni ishlab chiqish va amalga oshirish. Departament va uning hududiy boʻlinmalari xodimlarining xizmat faoliyatini, ularning oʻz funksional vazifalarini bajarishini, xizmat intizomiga, amaldagi qonun hujjatlariga rioya etishini nazorat qilish;

Departament va uning hududiy boʻlinmalari jamoasida sogʻlom maʼnaviy-psixologik muhit yaratishga doir tashkiliy chora-tadbirlarni amalga oshirish, xodimlarning kasbiy tayyorgarligi, qayta tayyorgarligi va ijtimoiy muhofazasi tashkil etilishini taʼminlash;

xodimlarni oʻqitishni, shu jumladan ish jarayonida zamonaviy fan yutuqlaridan va yangi texnologiyalaridan foydalanishni tashkil etish va amalga oshirish.

Jinoiy faoliyatdan olingan daromadlarni legallashtirish, soliq va valyuta sohasida qonun buzilishi hollari va ularni sodir etgan shaxslar boʻyicha yagona markazlashtirilgan kompyuter hisobini yuritish.

aholining huquqiy savodxonligini oshirish, fuqarolarning huquqiy ongini mustahkamlash, ularda moliya-iqtisodiy faoliyat sohasidagi konstitutsiyaviy normalarni va amaldagi qonun hujjatlarini bajarishning zarurligi tushunchasini shakllantirish boʻyicha muntazam profilaktik ishlarni amalga oshirish.

9. Departament va uning hududiy boʻlinmalari oʻzlariga yuklangan vazifalar va bajaradigan funksiyalariga muvofiq quyidagi huquqlarga ega:

vazirliklar, davlat qoʻmitalari, idoralar, mahalliy hokimiyat organlaridan, mulkchilik shakllaridan va idoraviy mansubligidan qatʼi nazar, korxonalar, muassasalar va tashkilotlardan, mansabdor shaxslar va fuqarolardan, shuningdek, Oʻzbekiston Respublikasi hududida joylashgan tashqi iqtisodiy aloqalar ishtirokchilaridan Departamentga yuklangan vazifalarning bajarilishi uchun zarur boʻlgan axborot, maʼlumotlar, materiallar va hujjatlarni belgilangan tartibda soʻrab olish, bunday axborot olishning qonun tomonidan maxsus tartibi belgilangan hollar bundan mustasno. Departament tomonidan olingan axborotdan faqat xizmat maqsadlarida foydalaniladi va u oshkora qilinishi mumkin emas;

Oʻzbekiston Respublikasi fuqarolarini, xorijiy fuqarolarni va fuqaroligi boʻlmagan shaxslarni Departament boʻlinmalari vakolatiga kiruvchi masalalar boʻyicha tushuntirishlar, maʼlumotnomalar, maʼlumotlar olish uchun taklif qilish;

agar soliq va valyuta sohalarida, shuningdek, jinoiy faoliyatdan olingan daromadlarni legallashtirish va terrorizmni moliyalashtirish bilan bogʻliq jinoyat sodir etishda shubha qilish uchun yetarlicha asoslar mavjud boʻlsa, fuqarolar va mansabdor shaxslarning zarur hujjatlarini belgilangan tartibda tekshirish;

soliqlar, yigʻimlar va budjetga boshqa majburiy toʻlovlar boʻyicha hisob va hisobotlarning buzilishi, yoxud ularning jinoiy faoliyatdan olingan daromadlarni legallashtirilish va terrorizmni moliyalashtirish bilan bogʻliq jinoyatlarga aloqadorligi aniqlangan hollarda pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlarning telekommunikatsiya vositalari va kompyuter maʼlumotlar bazalari, shuningdek, soliq toʻlovchilarning hujjatlari bilan qonunda belgilangan tartibda tanishish;

Oʻzbekiston Respublikasining jinoiy faoliyatdan olingan daromadlar legallashtirilishiga va terrorizmning moliyalashtirilishiga qarshi kurashish toʻgʻrisidagi qonun hujjatlarining yuridik va jismoniy shaxslar tomonidan bajarilishi masalasi boʻyicha tekshirish tadbirlarini amalga oshirish;

jinoiy daromadlarni legallashtirish va terrorizmni moliyalashtirishga aloqador boʻlishi mumkin boʻlgan tadbirkorlik subyektlarining moliya-xoʻjalik faoliyatini jismoniy va yuridik shaxslarning qonunchilik buzilganligi holatlari toʻgʻrisidagi murojaatlari asosida, qonun hujjatlarida belgilangan tartibda, nazorat organlari faoliyatini muvofiqlashtiruvchi Respublika kengashi qaroriga muvofiq, qisqa muddatli tekshiruvlar oʻtkazish.

soliq va valyuta sohalaridagi jinoyatlar toʻgʻrisida ishonchli maʼlumotlar boʻlgan taqdirda davlat soliq xizmati organlari bilan birgalikda Nazorat organlari faoliyatini muvofiqlashtiruvchi Respublika kengashi rejasiga kiritilgan xoʻjalik yurituvchi subyektlarning moliyaviy-xoʻjalik faoliyatini tekshirishda qatnashish;

xoʻjalik yurituvchi subyektlar (soliq toʻlovchilar)ning daromad (foyda) olish uchun foydalaniladigan yoxud soliq solish obyektlarini saqlash bilan bogʻliq ishlab chiqarish, ombor, savdo binolarini hamda boshqa bino va joylarini ularning joylashgan joyidan va mulkchilik shakllaridan qatʼi nazar tekshirish, bajarilgan ishlar va koʻrsatilgan xizmatlarni nazorat tartibida oʻlchash, tovar-moddiy boyliklarni inventarizatsiyadan oʻtkazish;

tekshirish, tadqiq etish va ekspertiza oʻtkazish uchun tovarlar, buyumlar, xomashyo, materiallar va yarim tayyor mahsulotlar namunalarini, shuningdek hujjatlarni olib qoʻyish;

qonun hujjatlariga muvofiq valyuta nazorati organlari va agentlariga berilgan funksiyalarni bajarish;

qonun hujjatlarida belgilangan muddat va tartibda pul mablagʻlari yoki boshqa mol-mulk bilan bogʻliq operatsiyalarni toʻxtatib qoʻyish toʻgʻrisida qaror qabul qilish;

yetarli asoslar mavjud boʻlgan taqdirda jinoiy faoliyatdan olingan daromadlarni legallashtirish va terrorizmni moliyalashtirish bilan bogʻliq pul mablagʻlari yoki boshqa mol-mulk bilan bogʻliq operatsiyalar toʻgʻrisidagi hujjatlarni jinoiy daromadlarni legallashtirish va terrorizmni moliyalashtirishga qarshi kurashishda qatnashuvchi tegishli organlarga, shu jumladan, jinoiy taʼqib qilish, maʼmuriy taʼsir koʻrsatish choralari koʻrish uchun yuborish;

mulkchilik shaklidan qatʼi nazar, yuridik shaxslardan va fuqarolardan ijtimoiy ahamiyatga ega oziq-ovqat tovarlari, sheluxa va shrotga boʻlgan narxlarning asossiz va sunʼiy oshirilishi, narx-navoni manipulatsiya qilish, tanqislik va ularga ajiotaj talabni sunʼiy vujudga keltirish, ularni xarid qilish, yetkazib berish va sotishda suiisteʼmol qilinishlar va korrupsiyaga qarshi kurashish holatlarini oʻrganish uchun zarur boʻlgan maʼlumotlar va tushuntirishlarni talab qilib olish;

ijtimoiy ahamiyatga ega oziq-ovqat tovarlari, paxta shroti va sheluxasiga boʻlgan narxlarni asossiz va sunʼiy oshirish, ularni xarid qilish, yetkazib berish va sotishda suiisteʼmol qilinishlar va korrupsiya holatlarini aniqlash boʻyicha tezkor-qidiruv chora-tadbirlarini olib borish, bu moliya-xoʻjalik faoliyatni tekshirish hisoblanmaydi hamda Nazorat organlari faoliyatini muvofiqlashtirish respublika kengashining maxsus ruxsati talab etilmaydi;

tergovoldi tekshirishlarni amalga oshirish va jinoiy ishlar qoʻzgʻatish;

maʼmuriy huquqbuzarlik toʻgʻrisidagi ishlarni qonun hujjatlarida belgilangan tartibda koʻrib chiqish va maʼmuriy jazo qoʻllash;

vazirliklar, davlat qoʻmitalari, idoralar, mahalliy davlat hokimiyati organlari, korxonalar, muassasalar va tashkilotlarga aniqlangan qonun buzilishlari boʻyicha ularni sodir etishga imkon yaratgan sabab va shart-sharoitlarni bartaraf etish boʻyicha taqdimnoma kiritish;

valyuta va moliyaviy-iqtisodiy sohada huquq buzilishiga qarshi kurashish masalalari boʻyicha, shu jumladan Oʻzbekiston Respublikasining xalqaro shartnomalariga muvofiq jinoiy faoliyatdan olingan daromadlarni legallashtirishga qarshi kurashish masalalari boʻyicha xorijiy tashkilotlar bilan oʻzaro hamkorlik qilish va axborot ayirboshlash;

zarurat boʻlganda, jinoiy yoʻllar bilan olingan daromadlarni legallashtirish va terrorizmni moliyalashtirishga qarshi kurashish masalalari boʻyicha ixtisoslashgan ekspertlardan iborat doimiy yoki vaqtinchalik idoralararo guruhlar tashkil etish toʻgʻrisida Bosh prokurorga takliflar kiritish;

davlat siri va qonun bilan qoʻriqlanadigan boshqa sirga rioya qilish sharti bilan tegishli ekspertizalar oʻtkazish, oʻqitish dasturlari, metodik hujjatlar ishlab chiqish, dasturiy va axborot taʼminoti, moliyaviy monitoring sohasida axborot tizimlarini yaratish uchun ilmiy-tadqiqot va boshqa tashkilotlarni, shu jumladan, shartnoma asosida alohida mutaxassislarni ishga jalb etish;

Departament xodimlariga Oʻzbekiston Respublikasi qonun hujjatlarida belgilangan boshqa huquqlar ham beriladi.

Departament tomonidan olib borilgan tezkor-qidiruv chora-tadbirlari natijalari, xususan, tahliliy materiallar, tekshiruv xaridlari yoki nazorat xaridlari natijalari boʻyicha olingan tovar yoki kassa cheklari, shuningdek, qonun buzilishini tasdiqlovchi cheklarni bermaslik holatlarini aniqlash, keyinchalik qonunbuzarlikning keng miqyosini, narxlarni asossiz va sunʼiy oshirish usullari va mexanizmlarini aniqlash uchun zarur hollarda Nazorat organlari faoliyatini muvofiqlashtirish respublika kengashining maxsus ruxsati talab etilmagan holda moliya-xoʻjalik faoliyatini tekshirish uchun asos hisoblanadi.

11. Departament xodimlari davlat, xizmat, tijorat sirini, jismoniy shaxslarning omonatlari toʻgʻrisidagi maʼlumotlar sirini va ular oʻz xizmat majburiyatlarini bajarish chogʻida olgan boshqa axborotni sir saqlashlari kerak. Sir oshkor qilingan taqdirda xodim qonunda belgilangan tartibda javob beradi.

12. Bosh prokuror va unga boʻysunuvchi prokurorlar Departament va uning hududiy boʻlinmalariga kelib tushgan xabarlar va arizalarni hisobga olinishi, roʻyxatdan oʻtkazilishi, tekshirilishi va koʻrib chiqilishining belgilangan tartibiga rioya qilinishi, tergovga kadar tekshiruv, surishtiruv olib borish va ular bilan bogʻliq protsessual harakatlarni amalga oshirilishi, soliq haqidagi qonun hujjatlari ijrosi yuzasidan oʻtkazilgan tekshirishlar hamda prokurorning vakolatiga tegishli boʻlgan boshqa masalalar boʻyicha qabul qilingan qarorlarning qonuniyligi ustidan nazoratni amalga oshirilishini taʼminlaydilar.

13. Departamentga maqomiga koʻra Bosh prokuror oʻrinbosariga tenglashtirilgan va Oʻzbekiston Respublikasi Prezidenti tomonidan tayinlanadigan Departament boshligʻi rahbarlik qiladi.

Departament boshligʻi uch nafar oʻrinbosarga, shu jumladan bir nafar birinchi oʻrinbosarga ega. Birinchi oʻrinbosar ayni vaqtda Yigʻma axborot-tahlil boshqarmasining boshligʻi hisoblanadi, uning asosiy funksiyalari qilib Departament faoliyatining asosiy yoʻnalishlari boʻyicha rejalar ishlab chiqish; ularning ijrosi ustidan tezkor nazoratni amalga oshirish; Departament rahbarlariga hisobot berish uchun yakuniy hujjatlarni umumlashtirish belgilanadi.

Departament boshligʻining oʻrinbosarlari oʻz lavozimlariga Departament boshligʻi taqdimnomasiga binoan va Oʻzbekiston Respublikasi Prezidenti bilan kelishgan holda Bosh prokuror tomonidan tayinlanadi.

Departamentning hududiy boshqarmalari boshliqlari va ularning oʻrinbosarlari, tuman (shahar) boʻlimlari boshliqlari tegishli lavozimlarga Departament boshligʻining taqdimnomasiga binoan Bosh prokuror tomonidan tayinlanadi.

14. Boshliq boshchiligidagi Departament yagona markazlashtirilgan tizimni tashkil etadi hamda quyi organlarning yuqori turuvchi organlarga va Oʻzbekiston Respublikasi Bosh prokuroriga toʻliq boʻysunishi va hisobot berishi asosida faoliyat koʻrsatadi.

Departament berilgan vakolatlarga muvofiq oʻz hududiy boʻlinmalarining barcha turdagi faoliyati ustidan tezkor nazoratni amalga oshiradi.

15. Oʻzbekiston Respublikasi Bosh prokuraturasiga va uning joylardagi organlariga quyidagilar yuklanadi:

iqtisodiyot, soliq va valyutaga oid jinoyatlar, shuningdek jinoiy faoliyatdan olingan daromadlarning legallashtirishi va terrorizmni moliyalashtirilishi bilan bogʻliq jinoyat ishlarini oʻz vaqtida tekshirish, ularni qoʻzgʻatish vaqtidan boshlab sud tomonidan qaror qabul qilingungacha boʻlgan davrda jinoyat ishini koʻrib chiqish muddatlarini mumkin qadar qisqartirishni nazarda tutgan holda ularni tezda sudga yuborish;

iqtisodiyot, soliq va valyutaga oid jinoyatlarga, jinoiy faoliyatdan olingan daromadlarni legallashtirishga qarshi kurashishda qonuniylikka hamda Jinoyat, Jinoyat-protsessual, Fuqarolik va Fuqarolik-protsessual kodekslari normalariga, boshqa normativ-huquqiy hujjatlarga rioya etilishi ustidan nazoratni amalga oshirish.

16. Departament Oʻzbekiston Respublikasining Bosh prokurori tomonidan belgilangan muddatlarda Departament va uning hududiy boʻlinmalarining faoliyati toʻgʻrisida, hamda soliq va valyuta muomalasi sohasida qonuniylikning holati haqida hisobot, axborot va hisob-tahliliy maʼlumotlar, shuningdek jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish bilan bogʻliq hujjatlarni taqdim etilishini taʼminlaydi.

17. Valyutani tartibga solish, soliqqa tortish va budjetga toʻlovlar sohasida qonuniylikning holati toʻgʻrisidagi maʼlumotlar, shuningdek, jinoiy daromadlarni legallashtirishga va terrorizmni moliyalashtirishga qarshi kurashish toʻgʻrisidagi qonun hujjatlariga muvofiq olinadigan maʼlumotlar asosida amalga oshiriladigan Departament tadbirlarini joriy va istiqbolli rejalashtirish Oʻzbekiston Respublikasi Bosh prokurori bilan kelishgan holda amalga oshiriladi.

18. Bosh prokurorning oʻz vakolatlari doirasida qabul qilgan buyruqlari va koʻrsatmalari, shuningdek, Oʻzbekiston Respublikasi Prokuraturasi hayʼatining Departament va uning hududiy boʻlinmalari faoliyatini tashkil etish masalalari boʻyicha qarorlari Departament va uning hududiy boʻlinmalarining barcha xodimlari tomonidan soʻzsiz bajarilishi lozim.

19. Soliq, budjet va valyuta nazorati sohalarida qonuniylikni mustahkamlash, shuningdek, jinoiy faoliyatdan olingan daromadlarni legallashtirish va terrorizmni moliyalashtirish bilan bogʻliq jinoyatlarni oldini olish, hamda ushbu sohalarda sodir etilgan jinoyat va huquqbuzarliklar uchun jazoning muqarrarligi tamoyilini taʼminlash boʻyicha qoʻshma tadbirlar amalga oshirilishida Departament va uning hududiy boʻlinmalarining prokuratura organlari bilan oʻzaro hamkorlik qilishi tartibi Oʻzbekiston Respublikasi Bosh prokurori tomonidan tasdiqlanadi.

20. Departament davlat soliq xizmati organlari, valyutani nazorat qilish organlari va agentlari bilan quyidagi yoʻnalishlar boʻyicha oʻzaro hamkorlik qiladi:

soliq va valyutaga oid huquq buzilishlarini aniqlash, oldini olish va bartaraf etish, oylik, chorak va yillik profilaktika tadbirlariga muvofiq tegishli taftishlar oʻtkazilishini tashkil etish;

davlat soliq inspeksiyalariga reja koʻrsatkichlarni bajarishda, soliqlar va budjetga boshqa majburiy toʻlovlar boʻyicha oʻz muddatida toʻlanmagan toʻlovlarni undirishda koʻmaklashish;

valyutani nazorat qilish organlari va agentlari tomonidan valyutaga oid huquq buzilishlari toʻgʻrisida maʼlumotlar taqdim etish;

soliq va valyutaga oid huquq buzilishlarini aniqlash, ularning oldini olish va bartaraf etish boʻyicha qoʻshma reydlar oʻtkazish;

soliq organlari tomonidan Departament boʻlinmalariga aniqlanayotgan huquqbuzarliklar va boshqa tezkor-ahamiyatli maʼlumotlar toʻgʻrisida axborot taqdim etish.

21. Departamentning vazifalari, funksiyalari va majburiyatlaridan kelib chiqqan holda belgilangan tartibda boshqa yoʻnalishlar boʻyicha ham oʻzaro hamkorlik amalga oshiriladi.

22. Departament Markaziy bank boʻlinmalari bilan quyidagi yoʻnalishlar boʻyicha oʻzaro hamkorlik qiladi:

jinoiy faoliyatdan olingan daromadlarni legallashtirish va terrorizmni moliyalashtirish bilan bogʻliq qonunbuzarliklarni aniqlash, ularning oldini olish va ularga barham berish, ularning profilaktikasi boʻyicha tegishli chora-tadbirlarni amalga oshirish;

kredit tashkilotlari va boshqa moliya tashkilotlaridan pul mablagʻlari yoki boshqa mol-mulk bilan bogʻliq operatsiyalar (bitimlar) toʻgʻrisida ularning terrorizmni (ekstremizmni) moliyalashtirishga aloqadorligi ehtimolini aniqlash maqsadida qonunchilikda oʻrnatilgan tartibda axborotlarni olish;

pul mablagʻlari yoki boshqa mol-mulk bilan bogʻliq operatsiyalarni amalga oshiradigan tashkilotlar va jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashda qatnashadigan organlarga jinoiy yoʻl bilan olingan daromadlarni legallashtirish va terrorizmni moliyalashtirish boʻyicha faoliyatda qatnashadigan yoki qatnashishda shubha qilinadigan yuridik yoki jismoniy shaxslar toʻgʻrisida oʻrnatilgan tartibda axborot taqdim etish;

jinoiy faoliyatdan olingan daromadlarni legallashtirish va terrorizmni moliyalashtirish holatlarini aniqlash, ularning oldini olish va ularga barham berish borasida qoʻshma tadbirlarni amalga oshirish;

tezkor-ahamiyatli axborotni ayirboshlash.

23. Departamentning vazifalari, funksiyalari va majburiyatlaridan kelib chiqqan holda boshqa yoʻnalishlar boʻyicha ham belgilangan tartibda oʻzaro hamkorlik amalga oshiriladi.

24. Departament boshligʻi Oʻzbekiston Respublikasi Bosh prokurori bilan kelishgan holda, prokuratura tomonidan amalga oshiriladigan huquqni muhofaza qilish organlarining qonuniylikni mustahkamlash va jinoyatchilikka qarshi kurashish boʻyicha huquqni muhofaza etuvchi organlarning faoliyatini muvofiqlashtirish doirasida:

boshqa huquqni muhofaza qilish organlarining tegishli xizmatlari bilan oʻzaro hamkorlik qiladi, soliq va valyutaga oid jinoyatlarga, shuningdek jinoiy faoliyatdan olingan daromadlarni legallashtirishga qarshi kurashishning uzoq muddatli va joriy dasturlarini ishlab chiqadi va amalga oshiradi;

soliq va valyutaga oid jinoyatlar boʻyicha qoʻzgʻatilgan jinoiy ishlarni, shuningdek jinoiy faoliyatdan olingan daromadlarni legallashtirish va terrorizmni moliyalashtirish bilan bogʻliq jinoyatlarni tergov qilishda protsessual koʻmaklashish uchun masalalarning butun doirasi yuzasidan prokuraturaning boshqa boʻlinmalari bilan oʻzaro hamkorlik qilinishini taʼminlaydi;

prokuratura organlari bilan oʻzaro hamkorlikda Departament va uning hududiy boʻlinmalari tomonidan qoʻzgʻatilgan jinoiy ishlar boʻyicha ular qoʻzgʻatilgan va tergov harakatlari oʻtkazilgan vaqtdan boshlab ishlar koʻrib chiqilishi va sud instansiyalarida qaror qabul qilingunga qadar nazoratni amalga oshiradi;

ichki ishlar organlari bilan birgalikda tezkor axborot almashish, soliq toʻlashdan boʻyin tovlagan hamda soliq va valyuta, shuningdek, jinoiy faoliyatdan olingan daromadlarni legallashtirish va terrorizmni moliyalashtirish bilan bogʻliq jinoyatlar sodir etgan shaxslarni qidirish va ushlash tadbirlarini amalga oshiradi;

huquqni muhofaza qilish organlari bilan birgalikda ushbu sohadagi huquq buzilishlari holatlari boʻyicha oʻzaro axborot ayirboshlaydi.

25. Departament xodimlari oʻz funksional vazifalarini bajarilmaganliklari yoxud zarur darajada bajarilmaganliklari uchun Oʻzbekiston Respublikasining qonun hujjatlarida nazarda tutilgan tartibda javob beradilar.

26. Xodimlarni intizomiy javobgarlikka tortish masalasi Oʻzbekiston Respublikasining qonun hujjatlari hamda Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamentida xizmatni oʻtash tartibi toʻgʻrisidagi nizom bilan tartibga solinadi.

27. Departament Oʻzbekiston Respublikasi Prezidenti tomonidan tashkil etiladi va tugatiladi.