Ижтимоий таъминот тизимида давлат кафолатларини амалга ошириш ҳамда ижтимоий суғурта маблағларининг тўғри ва самарали сарфланиши устидан назоратни кучайтириш мақсадида Вазирлар Маҳкамаси ва Ўзбекистон Касаба уюшмалари федерацияси Кенгаши қарор қиладилар:

1. Собиқ СССР Пенсия фондининг Ўзбекистон Республика бўлими негизида Вазирлар Маҳкамаси ҳузуридаги Ижтимоий суғурта жамғармаси ташкил этилсин. Унга Ўзбекистон Касаба уюшмалари федерацияси Кенгаши тизимидан вақтинча меҳнатга қобилиятсизлик, ҳомиладорлик ва туғиш бўйича, фарзанд туғилганда, дафн этишга бериладиган нафақаларни тўлашга йўналтириладиган давлат ижтимоий суғурта маблағлари берилсин.

Қайд этилган мақсадлардаги ижтимоий суғурта маблағларини қабул қилиш-топшириш 1994 йилнинг 1 январдаги ҳолатига кўра амалга оширилсин.

2. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:

Пенсия жамғармаси Ўзбекистон республика бўлимининг ҳудудий филиаллари негизида Ижтимоий суғурта жамғармаси вакиллигининг Қорақалпоғистон республика, вилоятлар ва Тошкент шаҳар бўлинмаларини, республика шаҳарлари ва туманларида эса жамғарма вакиллигининг бўлимларини ташкил этсинлар.

Жамғарма вакиллиги Қорақалпоғистон республика, вилоятлар ва Тошкент шаҳар бўлинмаларининг намунавий тузилмаси 1-иловага* мувофиқ тасдиқлансин.

Белгилаб қўйилсинки, Жамғарма ҳудудий бўлинмалари вакиллари Қорақалпоғистон Республикаси Вазирлар Кенгашининг, вилоятлар ва Тошкент шаҳар ҳокимларининг тавсияномасига биноан, Жамғарманинг шаҳарлар ва туманлар бўйича вакиллари эса ҳудудий бўлинма вакилининг тавсияномасига биноан Жамғарма бошқаруви томонидан тайинланадилар.

3. Белгилаб қўйилсинки, Вазирлар Маҳкамаси ҳузуридаги Ижтимоий суғурта жамғармаси мустақил давлат молия-кредит муассасаси ҳисобланади. Жамғарманинг пул маблағлари давлат бюджети, бошқа жамғармалар таркибига кирмайди ва мусодара қилиниши мумкин эмас.

4 Қуйидагилар Жамғарманинг асосий вазифалари ҳисобланади:

фуқароларнинг давлат томонидан белгиланган ижтимоий суғурта ҳуқуқларини тўла ҳажмда рўёбга чиқариш;

ижтимоий суғурта бўйича пенсия ва нафақаларнинг кафолатли ва ўз вақтида тўланишини таъминловчи шарт-шароитлар яратиш;

халқаро алоқаларни амалга ошириш, давлат ижтимоий суғуртаси соҳасидаги чет эл тажрибасини ўрганиш ва ундан фойдаланиш.

Бу вазифаларнинг бажарилишига қуйидаги йўллар билан эришилади:

давлат ижтимоий суғуртасига мўлжалланган маблағларни йиғиш ва жамлаш;

пенсияларни, вақтинча меҳнатга қобилиятсизлик, ҳомиладорлик ва туғиш бўйича, фарзанд туғилганда, дафн этишга бериладиган нафақаларни тўлаш ва давлат ижтимоий суғуртасининг бошқа мақсадлардаги харажатларини маблағ билан таъминлаш;

ўз-ўзини маблағ билан таъминлаш принциплари асосида Жамғарма маблағларини кўпайтиришни ташкил этиш.

5. Белгилаб қўйилсинки, Ижтимоий суғурта жамғармасини шакллантириш манбалари қуйидагилар ҳисобланади:

корхоналар, муассасалар, ташкилотлар ва ширкатларнинг, идоравий қарашлилигидан ва мулкчилик шаклидан қатъи назар, белгиланган меъёрлар бўйича иш ҳақи фондига нисбатан фоизларда тўланадиган, зарурият туғилганда давлат бюджети маблағларидан тўлдириладиган суғурта бадаллари;

якка тартибда меҳнат фаолияти билан, шу жумладан, якка (жамоа) ижара шартларида ёки шахсий деҳқон хўжалигида шуғулланаётган шахсларнинг суғурта бадаллари.

фуқароларнинг мажбурий суғурта бадаллари;

Ўзбекистон Республикаси фуқароларининг, корхоналар ва жамоат ташкилотлари, уларнинг тижорат фаолиятидан олинган даромадларини ҳам қўшганда бадаллари, шунингдек, бошқа тушумлар.

6. Белгилансинки, 1994 йил муассасалар, ташкилотлар ва ширкатлар, идоравий қарашлилигидан, мулкчилик ва хўжалик юритиш шаклидан қатъи назар, шартнома асосида ёллайдиган тартибда фаолияти билан, шу жумладан, якка (жамоа) ижара шартларида ёки шахсий деҳқон хўжалигида шуғулланаётган шахслар мазкур қарорнинг 1-бандида кўрсатилган нафақаларни тўлаш учун Ижтимоий суғурта жамғармасига суғурта бадаллари йўналтирадилар, меҳнаткашларни, уларнинг оила аъзоларини санатория-курортларда даволаш, болаларни соғломлаштириш учун Вазирлар Маҳкамаси томонидан белгиланадиган тартибда ва миқдорларда Ўзбекистон Касаба уюшмалари федерацияси Кенгашига ўтказиладиган бошқа маблағлар бундан мустасно,

Ходимлари ёши бўйича имтиёзли пенсия ҳуқуқига эга бўлган корхоналар ва ташкилотлар суғурта бадаллари билан бир қаторда меҳнатга ҳақ тўлашга мўлжалланган маблағлардан амалдаги қонун ҳужжатларида белгиланмаган миқдорда Вазирлар Маҳкамаси ҳузуридаги Ижтимоий суғурта жамғармасига қўшимча маблағлар ўтказадилар.

7. Вазирлар Маҳкамаси ҳузуридаги Ижтимоий суғурта жамғармасига раҳбарлик бошқарув ва унинг доимий ишловчи органи ижро этувчи дирекция томонидан амалга оширилади. Жамғарма бошқаруви тартибига доимий асосда Ижтимоий таъминот вазирлиги, Меҳнат вазирлиги, Молия вазирлиги, Марказий банк, Ўзбекистон касаба уюшмалари федерацияси Кенгаши, Қорақалпоғистон Республикаси Вазирлар Кенгашининг раҳбарлари ва Жамғарма ижро этувчи директори кирадилар.

Жамғарма бошқарувининг раиси ва ижро этувчи директор Жамғарма бошқарувининг тавсиясига биноан Вазирлар Маҳкамаси томонидан тайинланадилар.

Вазирлар Маҳкамаси ҳузуридаги Ижтимоий суғурта жамғармаси бошқарувининг раиси моддий-маиший таъминот, тиббиёт хизмати кўрсатиш шарт-шароитлари бўйича Ўзбекистон Республикаси давлат қўмиталари раисларига, лавозим бўйича Жамғарма бошқаруви раисининг ўринбосари ҳисобланадиган ижро этувчи директор эса Ўзбекистон Республикаси давлат қўмиталари раисларининг ўринбосарларига тенглаштирилсин.

Шахсий таркиби Вазирлар Маҳкамаси томонидан тасдиқланадиган Жамғарма бошқарувининг сони 9 кишидан иборат қилиб белгилансин.

8. Ўзбекистон Республикаси Вазирлар Маҳкамаси ҳузуридаги Ижтимоий суғурта жамғармаси марказий аппаратининг тузилмаси 2-иловага* мувофиқ тасдиқлансин.

Вазирлар Маҳкамаси ҳузуридаги Ижтимоий суғурта жамғармаси барча органларининг чекланган сони 3-иловага* мувофиқ 1237 нафардан, шу жумладан, Жамғарма ижро этувчи дирекцияси 45 нафардан иборат қилиб тасдиқлансин

Жамғармани, унинг ижро этувчи дирекциясини ва Жамғарманинг ҳудудий ижро этувчи органларини сақлаш харажатларини ижтимоий суғурта маблағлари ҳисобига амалга оширилади.

9. Ўзбекистон Республикаси Вазирлар Маҳкамаси ҳузуридаги Ижтимоий суғурта жамғармаси тўғрисидаги Низом 4-иловага мувофиқ тасдиқлансин.

10. Вазирлар Маҳкамаси ҳузуридаги Ижтимоий суғурта жамғармаси 3 ой муддатда Ижтимоий таъминот вазирлиги, Молия вазирлиги ва бошқа манфаатдор вазирликлар ва идоралар билан биргаликда суғурта бадалларини ўтказиш нормативларини ва давлат ижтимоий суғуртаси бўйича нафақалар тўлаш тартибини тартибга солувчи меъёрий-ҳуқуқий ҳужжатларни ишлаб чиқсин ҳамда белгиланган тартибда тасдиқласин.

11. Вазирлар Маҳкамасининг «ССЖИ Пенсия фондининг Ўзбекистон жумҳурият бўлимини ташкил этиш тўғрисида» 1991 йил 14 январдаги 9-сон қарори ўз кучини йўқотган деб ҳисоблансин.

12. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари М.Қ. Қорабоев зиммасига юклатилсин.

Қарорнинг қандай бажарилаётганлиги 1993 йил сентябрь ойида кўриб чиқилсин.

1. Вазирлар Маҳкамаси ҳузуридаги Ижтимоий суғурта жамғармаси давлат ижтимоий суғуртаси пул маблағларини бошқариш давлат органи ҳисобланади, меҳнаткашлар, уларнинг оила аъзоларини санатория-курортларда даволаш, болаларни соғломлаштириш учун Ўзбекистон касаба уюшмалари федерацияси Кенгашига ўтказиладиган маблағлар бундан мустасно.

Ташкилий-ҳуқуқий томондан Жамғарма мустақил молия кредит тизими ҳисобланади ва ўз фаолиятида Ўзбекистон Республикаси қонунларига, Ўзбекистон Республикаси Президентининг фармонларига, шунингдек, мазкур Низомга амал қилади.

2. Вазирлар Маҳкамаси ҳузуридаги Ижтимоий суғурта жамғармасининг маблағлари давлат бюджети таркибига кирмайди ҳамда мусодара қилинмайди.

Қуйидагилар Ижтимоий суғурта жамғармасининг асосий вазифалари ҳисобланади:

Фуқароларнинг давлат томонидан белгиланган Ижтимоий таъминот ҳамда давлат ижтимоий суғурта ҳуқуқларини тўла ҳажмда рўёбга чиқариш;

ижтимоий суғурта бўйича пенсия ва нафақаларнинг кафолатлари ҳамда ўз вақтида тўланишини таъминловчи шарт-шароитлар яратиш;

асосий йўналишларни шакллантириш ва ижтимоий суғурта маблағларининг фойдаланилиши устидан назоратни амалга ошириш;

халқаро алоқаларни амалга ошириш, давлат ижтимоий суғуртаси соҳасидаги чет эл тажрибасини ўрганиш ва ундан фойдаланиш.

Қайд этилган вазифаларни бажариш учун Вазирлар Маҳкамаси ҳузуридаги Ижтимоий суғурта жамғармаси:

пенсия таъминотига, вақтинча меҳнатга қобилиятсизлик, ҳомиладорлик ва туғиш бўйича, фарзанд туғилганда, дафн этишга бериладиган нафақаларни тўлашга йўналтириладиган суғурта бадалларини йиғиш ва жамлашни;

Жамғарма маблағлари ҳисобидан тўланадиган давлат пенсиялари ва нафақаларини маблағ билан таъминлашни;

ўз-ўзини маблағ билан таъминлаш принциплари асосида жамғарма маблағларини кўпайтиришни;

Ижтимоий таъминот вазирлиги, Молия вазирлиги билан биргаликда давлат ижтимоий суғуртасига, пенсия таъминотига ажратиладиган суғурта бадаллари миқдорлари, шунингдек, Ижтимоий суғурта жамғармаси маблағларини шакллантириш тўғрисида таклифлар ишлаб чиқишни амалга оширади ва кўриб чиқиш учун уларни Вазирлар Маҳкамасига киритади;

Жамғарма маблағларининг тўғри сарфланиши устидан молиявий назоратни, шунингдек, солиқ органлари билан биргаликда суғурта бадалларининг жамғармага ўз вақтида ва тўлиқ тушиши устидан назоратни;

Жамғарма ишида ошкораликни, шу жумладан, Жамғарма бюджетининг ижросини ҳар йили эълон қилиш йўли билан молиявий ошкораликни амалга оширади.

Жамғармага суғурта бадаллари йиғиш ва уни ҳисобга олиш, шунингдек, Жамғарма маблағларини сарфлаш тартиби алоҳида йўриқнома билан белгиланади.

1. Жамғарма бюджети:

корхоналар, муассасалар, жамоа ва давлат хўжаликлари, ширкатлар ва республика ҳудудида жойлашган, уларнинг идоравий қарашлигидан, мулкчилик ва хўжалик юритиш шаклидан қатъи назар, бошқа ташкилотларнинг, шунингдек, якка тартибдаги меҳнат фаолияти билан, якка (жамоа) ижара шартларида шахсий деҳқон хўжалигида шуғулланаётган фуқаролар ва айрим фуқароларни шартнома асосида ёллайдиган шахсларнинг суғурта бадаллари;

фуқароларнинг мажбурий бадаллари ва Жамғарманинг тижорат, хўжалик фаолиятидан тушадиган даромадлари, шунингдек, бошқа тушумлар ҳисобига шаклланади.

2. Корхоналар, жамоа ва давлат хўжаликлари, ширкатлар ва республика ҳудудида жойлашган, уларнинг идоравий қарашлилигидан, мулкчилик ва хўжалик юритиш шаклидан қатъи назар, бошқа ташкилотлар, якка тартибдаги меҳнат фаолияти билан ижара ёки шахсий деҳқон хўжалигида шуғулланадиган фуқаролар, шунингдек, айрим фуқароларни шартнома асосида ёллайдиган шахслар Ижтимоий суғурта жамғармасига суғурта бадаллари йўналтирадилар, меҳнаткашларни, уларнинг оила аъзоларини санатория курортларда даволаш, болаларни соғломлаштириш учун Ўзбекистон касаба уюшмалари федерацияси Кенгашига ўтказиладиган маблағлар бундан мустасно.

3. Ижтимоий суғуртага суғурта бадалларини тўлаш, бошқа тўловларни ўтказиш, жамғарма маблағларини тегишли счётларга ўтказиб қўйиш, уларни ҳисоблаш ва улардан фойдаланиш жамғарма бошқаруви, Молия вазирлиги ва Марказий банк томонидан тасдиқланган тартибда амалга оширилади.

4. Жамғарманинг маблағлари қуйидаги тадбирларни маблағ билан таъминлашга йўналтирилади:

фуқароларга давлат пенсиялари, вақтинча меҳнатга қобилиятсизлик, ҳомиладорлик ва туғиш бўйича, фарзанд туғилганда, дафн этишга бериладиган нафақаларни тўлашга, Ўзбекистон Республикасининг амалдаги қонунларига, давлатлараро ва халқаро шартномаларга биноан давлат ижтимоий суғуртасининг бошқа мақсадларига;

жамғарма жорий фаолиятини, моддий-техника таъминотини маблағ билан таъминлашга ва бошқарув органларини сақлашга, Жамғарма мулкини яратишга;

Жамғарма вазифаларига жавоб берувчи республика, минтақавий ва мақсадли дастурларни амалга оширишга;

Жамғарманинг махсус мукофотларини таъсис этишга.

1. Ижтимоий суғурта жамғармаси бюджетининг лойиҳаси Жамғарма ижро этувчи дирекцияси томонидан ишлаб чиқилади, Жамғарма бошқаруви томонидан тасдиқлаш учун Вазирлар Маҳкамасига киритилади.

2. Ижтимоий суғурта Жамғармаси ҳудудий бўлинмалари ва вакиллик бўлимлари бюджетлари лойиҳалари шаклланиш манбалари ва харажатлари бўйича Вазирлар Маҳкамаси ҳузуридаги Ижтимоий суғурта жамғармаси бошқаруви томонидан тасдиқланади.

3. Вазирлар Маҳкамаси ҳузуридаги Ижтимоий суғурта жамғармаси маблағларининг харажатлари жамғарма бошқаруви томонидан тасдиқланади.

4. Бюджетларнинг тасдиқланган кўрсаткичларини бажариш Жамғарманинг ижро этувчи дирекцияси, Қорақалпоғистон Республикасида, вилоятлар ва Тошкент шаҳрида Жамғарма вакиллигининг тегишли бўлинмалари, шаҳарлар ва туманларда жамғарма вакиллигининг бўлимлари томонидан таъминланади.

5. Қорақалпоғистон Республикаси, вилоятлар ва Тошкент шаҳрида Жамғарма вакиллиги бўлинмалари маблағларининг тақчиллиги белгиланган тартибда Жамғарма бошқарувининг қарорига биноан қопланади.

Жамғарманинг ҳисобот йилида ишлатилмай қолган маблағлари олиб қўйилмайди.

1. Жамғарма бошқаруви ва унинг ижро этувчи дирекцияси Жамғарма бошқарув органлари ҳисобланади. Улар Жамғарма вакиллигининг Қорақалпоғистон Республикаси, вилоятлар ва Тошкент шаҳар бўлинмалари, шаҳарлар ва туманлардаги вакиллик бўлимлари фаолиятига раҳбарлик қиладилар.

2. Ижтимоий суғурта жамғармаси ўз фаолиятида бевосита Вазирлар Маҳкамасига ҳисоб беради, Жамғарманинг Қорақалпоғистон Республикасидаги, вилоятлар ва Тошкент шаҳридаги вакилликлар бўлинмалари эса Жамғарма бошқарувига ҳисоб берадилар.

3. Жамғарма бошқаруви таркибига ҳал қилувчи овоз ҳуқуқи билан Қорақалпоғистон Республикаси Вазирлар Кенгашидан, Ўзбекистон касаба уюшмалари федерацияси Кенгашидан, Ижтимоий таъминот вазирлигидан, Молия вазирлигидан, Марказий банкдан раис (вазир) ёки унинг ўринбосари даражасидаги биттадан ваколатли вакил киритилади.

Бошқарувга Вазирлар Маҳкамаси ҳузуридаги Ижтимоий суғурта жамғармаси бошқаруви раиси бошчилик қилади.

4. Ижтимоий суғурта жамғармаси:

жамғарма бюджетида назарда тутилган харажатларни маблағ билан таъминлаш учун тўлиқ жавоб беради;

жамғарманинг истиқболдаги ва жорий вазифаларини белгилайди;

тегишли республика органлари билан биргаликда ижтимоий суғуртага ажратиладиган бадаллар миқдорлари тўғрисида белгиланган тартибда таклифлар киритади;

жамғарма маблағларидан фойдаланиш, шу жумладан, Ижтимоий суғурта жамғармаси ходимларини сақлаш меъёрларини ва тартибини белгилайди;

жамғарма маблағларининг тўғри сарфланиши устидан назоратни таъминлайди.

Жамғарма бюджети лойиҳасини ва харажатлар сметасини, бюджетнинг ижро этилиши тўғрисидаги ҳисоботни тайёрлайди ва кўриб чиқиш учун Вазирлар Маҳкамасига киритади;

тузилмани, ходимлар сонини ва харажатлар сметасини, шу жумладан, ижро этувчи дирекция ва Жамғарма бўлинмаларининг меҳнат ҳақи фондини тасдиқлайди;

Жамғарма ижро этувчи директорининг ўринбосарларини, Қорақалпоғистон Республикаси Вазирлар Кенгашининг, вилоятлар ва Тошкент шаҳар ҳокимликларининг тавсияномасига биноан Ижтимоий суғурта жамғармаси бўлинмаларининг вакилларини тайинлайди;

ўз ваколатлари доирасида Жамғарма фаолияти масалалари бўйича зарур низомлар ва йўриқномаларни тасдиқлайди;

давлат ва жамоат ташкилотлари билан, шунингдек, чет эл ва халқаро ташкилотлар билан ўзаро муносабатларда жамғарма номидан вакиллик қилади;

назорат-иқтисодий ишларни (жарима, пеня) амалга оширишдан олинган маблағлар ҳисобига Вазирлар Маҳкамаси ҳузуридаги Ижтимоий суғурта жамғармаси ходимларининг ижтимоий-маданий-маиший фондини ташкил этади.

5. Жамғарма бошқарувининг ижро этиш – бошқариш ва назорат вазифаларини ҳамда тезкор раҳбарликни таъминлаш учун Жамғарма бошқаруви қарори билан жамғарманинг доимий ишловчи дирекцияси тузилади.

6. Ижтимоий суғурта жамғармаси бошқаруви йиғилиши бир йилда камида икки марта чақирилади. У бошқарув аъзоларининг учдан икки қисми қатнашганда қарор қабул қилишга ҳақлидир. Қарорлар қатнашаётган бошқарув аъзоларининг кўпчилик овози билан қабул қилинади.

7. Корхоналар, жамоа ва давлат хўжаликлари, ширкатлар, идоравий қарашлилигидан, мулкчилик ва хўжалик юритиш шаклидан қатъи назар, бошқа ташкилотлар, шунингдек, фуқароларни шартнома асосида ёллайдиган, якка тартибдаги меҳнат фаолияти билан, шу жумладан, якка (жамоа) ижара шартларида ёки шахсий деҳқон хўжалигида шуғулланаётган шахслар жамғарма вакилларига жамғарманинг фаолиятига тааллуқли ҳужжатларни ва маълумотларни тақдим этишга мажбурдирлар.

1. Ижтимоий суғурта жамғармаси тўғрисидаги Низом Ўзбекистон Республикаси Вазирлар Маҳкамаси томонидан тасдиқланади.

2. Ижтимоий суғурта жамғармаси, вакилликнинг Қорақалпоғистон Республикасидаги, вилоятлар ва Тошкент шаҳридаги бўлинмалари юридик шахс ҳисобланадилар, ўз муҳрига эга бўладилар.

3. Вазирлар Маҳкамаси ҳузуридаги Ижтимоий суғурта жамғармаси Тошкент шаҳрида жойлашган.