«Маҳаллий саноат» давлат корпорациясини ташкил этиш тўғрисида» 1992 йил 3 сентябрдаги 469-сон Фармонга мувофиқ ва бозор иқтисодиёти муносабатларига ўтиш шароитида маҳаллий саноат корхоналари ва ташкилотлари иш самарадорлигини ошириш мақсадида Вазирлар Маҳкамаси қарор қилади:

1. «Маҳаллий саноат» давлат корпорациясининг тузилиши 1-иловага мувофиқ концернлар, муассасалар ва ташкилотлардан иборат таркибда тасдиқлансин.

2. Белгилаб қўйилсинки, «Маҳаллий саноат» давлат корпорацияси:

Ўзбекистон Республикаси Президенти ҳузуридаги Вазирлар Маҳкамасига ҳисоб бериб туради;

ўз фаолиятини Ўзбекистон Республикаси қонунларига ва Ўзбекистон Республикаси Олий Кенгашининг бошқа қарорларига, Ўзбекистон Республикаси Президентининг фармонларига, Вазирлар Маҳкамасининг қарорлари ва фармойишларига амал қилган ҳолда, шунингдек, корпорациянинг Вазирлар Маҳкамаси билан келишилган Устави асосида амалга оширади;

муассасалар томонидан берилган ҳуқуқларни ҳисобга олган ҳолда ўз молиявий-иқтисодий, хўжалик ва ижтимоий фаолияти масалаларини мустақил равишда ҳал этади, корпорация Кенгаши қарори асосида марказлаштирилган эҳтиёт, захира ва бошқа хил жамғармаларни ташкил этади;

Ўзбекистон Республикаси Маҳаллий саноат вазирлиги илгари тузган барча шартномалар ва улар юзасидан қабул қилинган мажбуриятлар бўйича жавобгар бўлади;

корпорация таркибига кирган бирлашмалар, корхоналар ва ташкилотларнинг давлат мулкини амалдаги қонунчиликка мувофиқ бошқаради, корпорацияга тегишли мол-мулкка эгалик қилиш, фойдаланиш ва тасарруф этиш ҳуқуқини, агар бу ҳуқуқга Ўзбекистон Давлат жамғармаси ваколат берган бўлса, амалга оширади;

иқтисодий жиҳатдан мақсадга қанчалик мувофиқ эканлигини ҳамда маҳаллий саноат давлат корхоналари ва ташкилотлари меҳнат жамоаларининг манфаатларини ҳисобга олиб уларни мулкчиликнинг бошқа шаклларига айлантириш тўғрисида белгиланган тартибда таклифлар киритади;

давлат эҳтиёжлари учун буюртмаларни бажариш мақсадида корпорацияга марказлаштирилган тартибда ажратиладиган капитал маблағлар ва моддий-техника ресурслари лимитларининг фонд эгаси ҳисобланади;

марказлаштирилган тартибда ажратиладиган валюта маблағларини тақсимлайди.

3. «Маҳаллий саноат» корпорацияси марказий аппарати таркиби 2-иловага мувофиқ тасдиқлансин. Корпорация бошқарувининг юқори органи Кенгаш бўлиб, у бошқарувни сайлайди, унинг ходимлари меҳнатига ҳақ тўлаш шартлари ва тизимини белгилайди.

Бошқарув раиси ва унинг ўринбосарлари корпорация Кенгаши томонидан сайланади ва Вазирлар Маҳкамаси томонидан тасдиқланади. Корпорацияга раиснинг тўртта ўринбосари, шу жумладан, битта биринчи ўринбосари, аъзолари 11 кишидан иборат бўлган бошқарувга ва 105 кишидан иборат бошқарув аппаратига эга бўлиш тавсия қилинсин.

Корпорация бошқарувининг раиси маиший таъминот, тиббий ва транспорт хизмати кўрсатиш шароитлари бўйича вазирга, раиснинг биринчи ўринбосари ва раис ўринбосарлари тегишли равишда вазирнинг биринчи ўринбосари ва вазир ўринбосарларига тенглаштирилсин.

4. Ҳудудий саноат-савдо концернларининг намунавий тузилиши 3-иловага* мувофиқ ҳамда улардаги бошқарув аппарати ходимларининг чекланган сони 302 нафардан иборат қилиб тасдиқлансин.

Белгилаб қўйилсинки, ҳудудий саноат-савдо концернлари:

юридик шахс ҳисобланади, йиғма балансга эга бўлади, «Ўзбекистон Республикаси корхоналари тўғрисида»ги Қонун ҳамда бошқа қонун ва меъёрий ҳужжатларга мувофиқ фаолият кўрсатади;

ўз фаолиятини таъсис шартномалари ва уставлар асосида амалга оширади, «Маҳаллий саноат» давлат корпорациясига нисбатан, унинг Уставига мувофиқ, муассислар сифатида ҳуқуқларини рўёбга чиқаради ва жавоб беради;

юклатилган вазифаларни бажариш юзасидан ўз муассислари олдида жавоб беради;

концерн аппарати тузилишини ва ходимлари сонини, иш ҳақи фондини ижро аппарати таъминотига ажратиладиган, концерн Кенгаши тасдиқлаган маблағлар доирасида мустақил равишда белгилайди.

Концернлар бошқарувларининг раислари уларнинг Кенгашлари томонидан Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимлари билан келишган ҳолда сайланади ва «Маҳаллий саноат» корпорацияси бошқаруви томонидан тасдиқланади.

5. «Маҳаллий саноат» корпорацияси икки ҳафта муддат ичида корпорациянинг Уставини ва саноат-савдо концернининг намунавий уставини ишлаб чиқсин ва уларни Вазирлар Маҳкамаси билан келишиб олсин.

Маҳаллий саноат бирлашмалари, корхоналари ва ташкилотлари саноат-савдо концернларининг таъсис ҳужжатларини ишлаб чиқишда, ҳокимлар эса уларни рўйхатдан ўтказишда ана шу намунавий тузилма ва намунавий уставга амал қилсинлар.

6. «Маҳаллий саноат» давлат корпорацияси Ўзбекистон Республикаси Давлат мулки қўмитаси билан биргаликда бир ҳафта муддат ичида маҳаллий саноат давлат бирлашмалари, корхоналари ва ташкилотларини давлат тасарруфидан чиқариш ва хусусийлаштириш юзасидан келишиб олинган таклифларни амалдаги қонунларга мувофиқ Вазирлар Маҳкамасига киритсин.

Ўзбекистон Республикаси давлат мулки қўмитаси маҳаллий саноат давлат корхоналари ва ташкилотларини акцияли корхона ва ташкилотларга айлантириш тўғрисида қарор қабул қилишда давлат мулкида бўлган акцияларга эгалик қилиш ҳудудини «Маҳаллий саноат» давлат корпорациясига бериш таомили қўллансин.

7. «Маҳаллий саноат» корпорацияси аппарати Тошкент шаҳар, Намойишлар хиёбони кўчаси, 5-уйдаги Ўзбекистон Республикаси Маҳаллий саноат вазирлиги эгаллаб келган биноларга жойлаштирилсин.

8. Ўзбекистон Республикаси Истиқболни белгилаш ва статистика давлат қўмитаси, Ўзбекистон Республикаси Молия вазирлиги, Автомобиль транспорти вазирлиги, Алоқа вазирлиги, Ўзбекистон Республикаси Маҳаллий саноат вазирлиги учун 1992 йилга белгиланган капитал маблағлар, молия ва транспорт воситалари лимитлари, алоқа ва телефон турларини «Маҳаллий саноат» корпорацияси учун сақлаб қолсинлар.

9. «Ўзшартномасавдо», «Ўздавенгилсаноатсавдо» 1992 йил ва ундан кейинги йиллар учун моддий-техника ресурсларига ажратмаларни кўриб чиқишда «Маҳаллий саноат» корпорациясига республика Ҳукумати бошқариб турадиган маҳсулотлар рўйхати бўйича материаллар, асбоб-ускуналар ва буюмлар ажратишни назарда тутсинлар.

10. Қорақалпоғистон Республикаси Вазирлар Кенгаши вилоятлар ва Тошкент шаҳар ҳокимлари, вазирликлар ва идоралар «Маҳаллий саноат» корпорацияси, саноат-савдо концернлари, маҳаллий саноат бирлашмалари, корхоналари ва ташкилотларини ривожлантириш ва улар фаолиятига боғлиқ масалаларни агар бу масалалар уларнинг ҳуқуқ доирасига кирса, ўз вақтида ҳал этишга кўмаклашсинлар.

11. Ўзбекистон ССР Министрлар Советининг «Ўзбекистон ССР Маҳаллий саноат вазирлиги тўғрисидаги низомни тасдиқлаш ҳақида» 1980 йил 2 июндаги 398-сон қарори, Ўзбекистон ССР Министрлар Советининг 1987 йил 31 декабрдаги 554-сон қарори билан тасдиқланган ўзгартишларнинг 3-банди ҳамда Ўзбекистон ССР Министрлар Советининг «Ўзбекистон ССР Маҳаллий саноат вазирлиги тизимида давлат-кооператив асосда район-шаҳар ҳунармандчилик комбинатларини барпо этиш ва уларнинг фаолиятига республиканинг ижтимоий меҳнат билан банд бўлмаган аҳолисини жалб этиш юзасидан шошилинч чоралар тўғрисида» 1990 йил 9 апрелдаги 167-сон қарорининг 3-бандидаги биринчи ва иккинчи хатбошилар ўз кучини йўқотган деб ҳисоблансин.

12. Мазкур қарорнинг бажарилишини назорат қилиш Бош вазир ўринбосари ўртоқ А. Н. Возненко зиммасига юклатилсин.

Қарорнинг қандай амалга оширилаётганлиги 1992 йил ноябрда Вазирлар Маҳкамаси мажмуининг мажлисида кўриб чиқилсин.

Тошкент «Фонон» илмий-ишлаб чиқариш бирлашмаси

Тошкент «Файз» мебель ва ёғочни қайта ишлаб чиқариш бирлашмаси

Товоқсой рўзғор кимёси ишлаб чиқариш бирлашмаси

Олмалиқ гилам фабрикаси

Тошкент механизация воситалари, жиҳозлар ва станоксозлик экспериментал тажриба-механика заводи

Тошкент «Полимер» ишлаб чиқариш бирлашмаси

Тошкент металлни қайта ишлаш ишлаб чиқариш бирлашмаси

Тошкент «Шарқ» чарм-пойабзал ишлаб чиқариш бирлашмаси

Тошкент электр рўзғор асбоблари хўжалик буюмлари ишлаб чиқариш бирлашмаси

Тошкент «Чевар» акционерлик жамияти

Тошкент тикувчилик-ишлаб чиқариш бирлашмаси

Тошкент матбаа ва қоплама буюмлар конструкторлик-бадиий бюроси

Тошкент хўжалик ҳисобидаги «Нур» корхона дўкони

Тошкент хўжалик ҳисобидаги «Чевар» корхона дўкони

«Ўзгипромаҳаллийсаноат» республика давлат лойиҳа институти

«Ўзмаҳаллийқурилиш» республика трести

«Шош» тижорат маркази

«Маҳаллийкооптаъминоткомплект» республика тижорат-кооператив бирлашмаси

«Шарқ» ташқи савдо бирлашмаси

Республика хўжалик ҳисобидаги ишлаб чиқариш-технологик бутлаш ва таъминот бошқармаси

Чет эл фирмалари билан қўшма корхоналар — 8

«Прогресс» илмий-ишлаб чиқариш бирлашмаси

Тошкент шаҳар ҳунармандчилик комбинати

Алимкент ишлаб чиқариш-трикотаж бирлашмаси

Республика халқ бадиий ҳунармандчилиги саноат-савдо концерни

Қорақалпоғистон Республикаси саноат-савдо концерни

Андижон саноат-савдо концерни

Бухоро саноат-савдо концерни

Жиззах саноат-савдо концерни

Навоий саноат-савдо концерни

Наманган саноат-савдо концерни

Самарқанд саноат-савдо концерни

Сирдарё саноат-савдо концерни

Сурхондарё саноат-савдо концерни

Тошкент вилоят саноат-савдо концерни

Фарғона саноат-савдо концерни

Хоразм саноат-савдо концерни

Қашқадарё саноат-савдо коницерни

Тошкент шаҳар саноат-савдо концерни

Корхоналар, шу жумладан, ижарачи, кичик корхоналар, кооперативлар, хусусий дўконлар, муассасалар ва ташкилотлар.

Раҳбарият

Молия, ҳисобга олиш ва ҳисобот бошқармаси

Ривожланиш ва тадбиркорлик бошқармаси

Режа-иқтисодиёт бошқармаси

Капитал қурилиш ва бутлаш бошқармаси

Моддий ресурслар, маҳсулотни сотиш ва маркетинг бошқармаси

Техника бошқармаси

Меҳнатни ва меҳнаткашларни ижтимоий ҳимоя қилишни ташкил этиш бўлими

Назорат-тафтиш бўлими

Биринчи бўлим

Ишлар бошқармаси

Кадрлар тайёрлаш бўлими