Ўзбекистон Республикаси Вазирлар Маҳкамасининг 2026 йил 5 августдаги 433-сон «Темир йўл орқали ички қатновларда юк ташиш буюртманомаларини расмийлаштириш бўйича давлат хизматини кўрсатишнинг маъмурий регламентини тасдиқлаш тўғрисида»ги қарорига мувофиқ буюраман:

1. Ўзбекистон Республикаси транспорт вазирининг 2023 йил 5 августдаги 22-сон буйруғи (рўйхат рақами 3457, 2023 йил 21 сентябрь) (Қонунчилик маълумотлари миллий базаси, 23.09.2023 й., 10/23/3457/0724-сон) билан тасдиқланган Ўзбекистон Республикаси темир йўл транспортида юк ташиш қоидаларига иловага мувофиқ ўзгартиришлар киритилсин.

2. Мазкур буйруқ расмий эълон қилинган кундан эътиборан кучга киради.

1. 6-банд ва 242-банднинг биринчи хатбошисидаги «буюртмалари» деган сўз «буюртманомалари» деган сўз билан алмаштирилсин.

2. 2-бобнинг номидаги «буюртмаларни қабул қилиш» деган сўзлар «буюртманомаларни расмийлаштириш» деган сўзлар билан алмаштирилсин.

3. 7-банднинг иккинчи хатбошиси қуйидаги таҳрирда баён этилсин:

«Темир йўл орқали ички қатновларда юк ташиш бўйича буюртманомалар юк жўнатувчилар томонидан мазкур Қоидаларнинг 3 ва 4-иловаларига мувофиқ юк ташишга буюртманома ҳамда декадалик буюртманома шаклида расмийлаштирилади. Бунда юк жўнатувчилар буюртманомаларни расмийлаштириш учун Давлат хизматлари марказларига ўзи келиб ёки Ягона интерактив давлат хизматлари портали (бундан буён матнда ЯИДХП деб юритилади) орқали электрон шаклда мурожаат қилади.».

4. 8-бандда:

биринчи хатбоши қуйидаги таҳрирда баён этилсин:

«8. Юк жўнатувчилар темир йўл орқали ички қатновларда юк ташиш амалга оширилиши мўлжалланаётган ой (бундан буён матнда прогноз ойи деб юритилади) бошланишидан камида 14 кун олдин буюртманомаларни расмийлаштиради.»;

иккинчи хатбошидаги «Буюртмалар» деган сўз «Буюртманомалар» деган сўз билан алмаштирилсин;

учинчи хатбошидаги «Буюртманинг» деган сўз «Буюртманоманинг» деган сўз билан алмаштирилсин.

5. 9-банд қуйидаги таҳрирда баён этилсин:

«9. Давлат хизматлари марказига юк жўнатувчи ўзи келиб мурожаат қилганда сўровнома Давлат хизматлари маркази ходими томонидан юк жўнатувчи номидан, ЯИДХП орқали электрон шаклда мурожаат қилинганда эса юк жўнатувчи томонидан мустақил равишда тўлдирилади.

Сўровнома тўлдирилганидан сўнг юк жўнатувчи маълумотлар тўғрилигини текширади ва уни электрон рақамли имзо, Мобил-ИД ёки идентификация қилиш воситалари орқали тасдиқлайди.

Юк жўнатувчи ЯИДХП орқали мурожаат қилганда сўровномани электрон рақамли имзо билан тасдиқлаш талаб этилмайди.

Учинчи шахслар манфаати учун ҳаракат қилаётганда, сўровномага вакилнинг ваколатини тасдиқловчи ишончнома илова қилинади.

Юк жўнатувчи вагон оператори билан тузилган амалдаги шартнома нусхасини электрон шаклда илова қилади.».

6. 10-банд қуйидаги таҳрирда баён этилсин:

«10. Темир йўл транспорти (ташувчи) сўровнома келиб тушган кундан бошлаб етти иш куни ичида, камчиликларни бартараф этиш учун берилган муддатни ҳисобга олмаган ҳолда, уни кўриб чиқади ҳамда буюртманомани ҚР-код (матрик штрихли код) билан расмийлаштиради ва уни ўз электрон рақамли имзоси билан тасдиқлаб, Давлат хизматлари марказига (ўзи келиб мурожаат этганда) ёки юк жўнатувчига ЯИДХП орқали (электрон тарзда мурожаат этганда) юборади.».

7. 11-банд қуйидаги таҳрирда баён этилсин:

«11. Темир йўл транспорти (ташувчи) юк ташиш учун буюртманомаларни қуйидаги ҳолларда рад этиш ҳуқуқига эга:

Темир йўл уставига мувофиқ муайян йўналишларда юк ортишга таъқиқ жорий этилган бўлса;

вагоннинг мансублиги нотўғри кўрсатилган бўлса (хусусий ёки ижарага олинган ёки темир йўл инвентар вагони);

вагон оператори («Темирйўлкарго» АЖ, «Ўзтемирйўлконтейнер» АЖ, «Йўлрефтранс» АЖ ва бошқалар) билан шартнома тузилмаган бўлса;

юкни ташиш қонунчилик ҳужжатларига мувофиқ тақиқланган бўлса;

ностандарт, катта ўлчамли ёки оғир вазнли юкларни жойлаштириш ва маҳкамлаш схемаси ваколатли орган билан келишилмаган бўлса;

юк ташиш буюртманомасида кўзда тутилган юк ҳажми ёки бошқа кўрсаткичлар темир йўл участкасининг ўтказувчанлик қобилияти ёки темир йўл станцияларининг юкларга ишлов бериш қувватидан ортиқ бўлса;

ташишни амалга ошириш учун зарур бўлган ҳаракатдаги темир йўл таркиби ёки контейнерлар мавжуд бўлмаса;

темир йўл транспорти хизматлари учун юк жўнатувчининг қарздорлиги мавжуд бўлса;

техник имкониятлар мавжуд бўлмаса (юк қабул қилувчи шохобча йўлларининг бандлиги).

Давлат хизматини кўрсатишни бошқа асосларга, шу жумладан, мақсадга мувофиқ эмаслиги сабабларига кўра рад этишга йўл қўйилмайди.

Юк ташиш учун буюртманома рад этилган тақдирда, темир йўл транспорти (ташувчи) шу вақтнинг ўзида рад этиш сабабларини кўрсатган ҳолда буюртманомани расмийлаштиришни рад этиш тўғрисидаги қарорни юк жўнатувчига электрон шаклда юборади.».

8. 12-банд қуйидаги таҳрирда баён этилсин:

«12. Сўровномада ёки унга илова қилинган ҳужжатларда камчиликлар аниқланганда, темир йўл транспорти (ташувчи) юк жўнатувчига уларни беш иш куни ичида бартараф этиш зарурлиги тўғрисида хабар беради. Камчиликлар белгиланган муддатда бартараф этилмаганда, давлат хизматини кўрсатиш рад этилади.».

9. 13-банддаги «буюртмалари» деган сўз «буюртманомалари» деган сўзлар билан алмаштирилсин.

10. 20-банд қуйидаги таҳрирда баён этилсин:

«20. Юкларни прогноздан ортиқ ортиш (бўш хусусий (шахсий), ижарадаги вагонлар ва контейнерларни жўнатиш) учун юк жўнатувчи ортиш кунидан камида беш кун олдин мазкур Қоидаларнинг 7-бандига асосан қўшимча буюртманомани расмийлаштиради.».

11. 21-банд қуйидаги таҳрирда баён этилсин:

«21. Режадан ортиқ юк ортиш имкони бўлмаган тақдирда, буюртманомани расмийлаштиришни рад этиш ушбу Қоидаларнинг 11-бандига асосан амалга оширилади.».

12. 30-банднинг иккинчи хатбошиси ва 32-банддаги «буюртмада» деган сўз «буюртманомада» деган сўз билан алмаштирилсин.

13. 44-банднинг 1-кичик бандидаги «буюртмасининг» деган сўз «буюртманомасининг» деган сўз билан алмаштирилсин.