Oʻzbekiston Respublikasi bilan Xalqaro qayta qurish va taraqqiyot banki oʻrtasidagi kredit (institutsional qurilish hamda texnik yordam koʻrsatish bilan bogʻliq loyiha — keyingi oʻrinlarda institutsional kredit deb yuritiladi) berish toʻgʻrisidagi Bitimga muvofiq Xalqaro qayta qurish va taraqqiyot banki (XQTB) tomonidan berilayotgan institutsional kreditdan, shuningdek, Yaponiya Hukumatining granti (keyingi oʻrinlarda “grant” deb yuritiladi)dan samarali foydalanish hamda institutsional kredit oʻz vaqtida qaytarilishini taʼminlash maqsadida Vazirlar Mahkamasi qaror qiladi:

1. Quyidagilar maʼlumot uchun qabul qilinsin:

20 yil muddatga, besh yillik imtiyozli davr ham shunga kiradi, 21 mln. AQSH dollari miqdorida berilayotgan institutsional kredit XQTB tomonidan Oʻzbekistonda bozor infrastrukturasini shakllantirishga texnik yordam koʻrsatishga, xususiylashtirish sohasida konsultatsiya xizmatlari koʻrsatish va kadrlarni oʻqitishga, iqtisodiy islohotlarning huquqiy negizini mustahkamlashga, moliya tizimini shakllantirishga, iqtisodiyotning bazaviy tarmoqlarida tadqiqot ishlarini olib borishga, shuningdek, institutsional kreditdan foydalanish uchun masʼul boʻlgan vazirliklar va idoralarni kompyuter va axborot bilan taʼminlashga yoʻnaltiriladi;

1 mln. AQSH dollari miqdoridagi grant Oʻzbekistonda telekommunikatsiyalar tizimini takommillashtirishga yoʻnaltiriladi.

2. Tashqi iqtisodiy faoliyat milliy banki oʻn kun muddatda institutsional kredit va grant mablagʻlaridan foydalanish uchun maxsus avans schyotlari ochilishini taʼminlasin.

3. Markaziy bankka quyidagilar tavsiya etilsin hamda Davlat mulk qoʻmitasiga, “Oʻzdavjamgʻarma”ga, Mehnat vazirligiga, Aloqa vazirligiga, “Oʻzbekneftgaz” korporatsiyasiga, Davlat geologiya va mineral resurslar qoʻmitasiga, shuningdek “Oʻzistiqbolstat” davlat qoʻmitasiga quyidagi vazifalar topshirilsin:

bir hafta muddatda institutsional kreditdan foydalanish boʻyicha (Aloqa vazirligi — grant mablagʻlari uchun ham) vazirlik yoki idora rahbari boshchiligida ishchi guruhi tuzsinlar;

bir hafta muddatda ajratilayotgan mablagʻlardan samarali foydalanish hamda institutsional kredit doirasidagi loyihalarni amalga oshirish boʻyicha ilovaga* muvofiq zarur chora-tadbirlarni ishlab chiqsinlar (Aloqa vazirligi — grant mablagʻlari uchun ham);

yilning har choragida Vazirlar Mahkamasining tashqi iqtisodiy faoliyatini muvofiqlashtirish boʻlimiga ajratilayotgan mablagʻlardan foydalanish, shuningdek rejalashtirilayotgan chora-tadbirlarning kalendar jadvali toʻgʻrisida hisobot taqdim etib tursinlar.

4. Moliya vazirligi Tashqi iqtisodiy faoliyat milliy banki hamda Tashqi iqtisodiy aloqalar vazirligi bilan birgalikda:

ikki hafta muddatda Institutsional kredit va grant doirasida konsultantlarni tanlash va asbob-uskunalarni sotib olish boʻyicha tenderlar oʻtkazish toʻgʻrisida nizomni ishlab chiqsin;

kredit va u boʻyicha foizlar institutsional kredit boʻyicha Bitimda nazarda tutilgan muddatlarda oʻz vaqtida qaytarilishini taʼminlovchi kreditga xizmat koʻrsatish tartibini ishlab chiqsin.

5. “Oʻzistiqbolstat” davlat qoʻmitasi manfaatdor tashkilotlar bilan birgalikda Oʻzbekiston Respublikasining eksport-import rejasini tuzayotganda Tashqi iqtisodiy aloqalar vazirligining buyurtmanomasiga binoan har yili institutsional kreditni va u boʻyicha foizlar qoplanishini taʼminlovchi zarur miqdordagi eksport resurslarini nazarda tutsin.

6. Davlat soliq qoʻmitasi boj hujjatlarining tezkorlik bilan rasmiylashtirilishini hamda institutsional kredit va grant hisobiga sotib olinayotgan asbob-uskunalarning boj yigʻimlari va poshlinalarsiz oʻtkazilishini taʼminlasin.

7. “Oʻzbekiston havo yoʻllari” milliy aviakompaniyasi, Oʻrta Osiyo Temir yoʻl boshqarmasi institutsional kredit va grant hisobiga sotib olinadigan asbob-uskunalar manzillarga betoʻxtov yetkazib berilishini taʼminlasinlar.

8. Institutsional kredit va grantdan foydalanish va ularga xizmat koʻrsatilishi ustidan umumiy nazorat qilish Bosh vazirning oʻrinbosari Oʻ.T. Sultonovga hamda Vazirlar Mahkamasining Tashqi iqtisodiy faoliyatni muvofiqlashtirish boʻlimiga yuklatilsin.