O‘zbekiston Respublikasi Prezidentining “O‘zbekiston Respublikasi davlat mulkini boshqarish va xususiylashtirish qo‘mitasini tuzish to‘g‘risida”gi Farmoniga muvofiq va bozor munosabatlarini shakllantirish shakli sifatida davlat mulkini davlat tasarrufidan chiqarish va xususiylashtirish chora-tadbirlarini amalga oshirish maqsadida Vazirlar Mahkamasi qaror qiladi:

1. O‘zbekiston Respublikasi Davlat mulkini boshqarish va xususiylashtirish qo‘mitasiga yuklatilgan vazifalarga muvofiq unga quyidagi huquqlar berilsin:

davlat tasarrufidan chiqarilishi va xususiylashtirilishi lozim bo‘lgan davlat korxonalari va tashkilotlarining mulkiy egalik qilish vakolatlarini amalga oshirish, davlat organlari va xo‘jalik yurituvchi subyektlarga respublika hududida va uning tashqarisida O‘zbekiston Respublikasi mulkiga egalik qilish, foydalanish va uni boshqarish vakolati huquqini berish;

O‘zbekiston Respublikasining davlat mulki bo‘lgan mulkdan foydalanishning samaradorligi va uning saqlanishi ustidan nazorat qilinishini ta’minlash;

davlat tasarrufidan chiqarish va xususiylashtirish ishlarini olib borish uchun komissiyalar tuzish;

davlat mulki obyektlari xususiylashtirilayotganda sotuvchi vazifasini bajarish;

mehnat jamoalari, nodavlat yuridik shaxslar va fuqarolarning davlat tasarrufidan chiqarish va xususiylashtirish jarayonida qatnashish haqidagi buyurtmalarini ro‘yxatga olish;

davlat mulkini xususiylashtirish yuzasidan kimoshdi savdosi va tanlovlar tashkil etish, unda xaridorlarning qatnashishi shartlarini, hisob-kitob tartiblarini belgilash, mulkiy huquqlarni rasmiylashtirish ishlarini olib borishni tashkil etish;

aksionerlik jamiyatlarini, davlat korxonalari bazasida tashkil etiladigan boshqa xo‘jalik jamiyatlari yoki shirkatlarini tuzish;

davlat mulki obyektlarini davlat tasarrufidan chiqarish va xususiylashtirish jarayonlarini tartibga soluvchi normativ va metodik hujjatlarni o‘z vakolatlari doirasida tasdiqlash;

agar mulk amaldagi qonunchilikka xilof ravishda davlat organlari tomonidan egallangan bo‘lsa davlat mulkiga egalik qilish huquqlarini o‘zgartirish aktlarini bekor qilish to‘g‘risida belgilangan tartibda taqdimnomalar kiritish;

investitsiya fondlarini, xo‘jalik hisobidagi maslahat-tadqiqot va ekspert xizmatlarini tuzish, noshirlik faoliyatini amalga oshirish.

2. Belgilab qo‘yilsinki, davlat mulkini boshqarish va xususiylashtirish qo‘mitasining o‘z vakolatlari doirasida qabul qilgan qarorlari, mulkchilik shakllaridan qat’i nazar, vazirliklar, idoralar, konsernlar, uyushmalar, birlashmalar, korxonalar, tashkilotlar, mahalliy boshqaruv organlari va fuqarolar tomonidan bajarilishi majburiydir.

3. O‘zbekiston Respublikasi Davlat mulkini boshqarish va xususiylashtirish qo‘mitasi markaziy apparatining va uning hududiy organlarining tuzilmasi ilovaga muvofiq tasdiqlansin.

Belgilab qo‘yilsinki, davlat mulkini boshqarish va xususiylashtirish hududiy organlari bevosita O‘zbekiston Respublikasi Davlat mulkini boshqarish va xususiylashtirish qo‘mitasiga bo‘ysunadi va o‘z amaliy faoliyatida tegishli xalq deputatlari mahalliy Kengashlari va ularning hokimliklari bilan mustahkam o‘zaro hamkorlik qiladi.

4. Qoraqalpog‘iston Respublikasi Vazirlar Kengashiga mazkur qarorga muvofiq davlat mulkini boshqarish va xususiylashtirish Respublika qo‘mitasini tuzish tavsiya etilsin.

5. O‘zbekiston Respublikasi Davlat mulkini boshqarish va xususiylashtirish qo‘mitasining chegaraviy soni uning hududiy bo‘linmalarini qo‘shganda 210 nafar miqdorida, shu jumladan, markaziy apparat xodimlarining miqdori — 70 nafar etib belgilansin (xizmat ko‘rsatuvchi xodimlar miqdorini hisobga olmaganda). Bu ishlar O‘zbekiston Respublikasi Iqtisodiyot qo‘mitasi va Davlat statistika qo‘mitasi shtatidagi xodimlarni shu qo‘mitalarga ajratilgan mablag‘lar doirasida qisqartirish hisobiga amalga oshirilsin.

O‘zbekiston Respublikasi Davlat mulkini boshqarish va xususiylashtirish qo‘mitasining Raisiga quyidagi huquqlar beriladi:

O‘zbekiston Respublikasi Davlat mulkini boshqarish va xususiylashtirish hududiy boshqarmalarining boshliqlarini tasdiqlash;

belgilangan xodimlar miqdori va ish haqi fondi doirasida Qo‘mitaning tasdiqlangan tuzilmasiga o‘zgartirishlar kiritish;

Qo‘mitaga Qo‘mita Raisining ikki o‘rinbosariga, shu jumladan, bitta birinchi o‘rinbosarga hamda shaxsiy tarkibi O‘zbekiston Respublikasi Prezidenti huzuridagi Vazirlar Mahkamasi tomonidan tasdiqlanadigan 7 kishidan iborat hay’atga ega bo‘lishga ruxsat berilsin.

6. O‘zbekiston Respublikasi Davlat mulki qo‘mitasi bir oy muddat ichida Vazirlar Mahkamasining ko‘rib chiqishi uchun quyidagilarni kiritsin:

Qo‘mita haqidagi Nizom loyihasi;

O‘zbekiston Respublikasi mulkini respublika mulkiga va ma’muriy-hududiy tuzilmalar mulkiga (Kommunal mulkka) bo‘lish tartibi haqidagi takliflar.

7. O‘zbekiston Respublikasi Davlat statistika qo‘mitasi, Iqtisodiyot qo‘mitasi, vazirliklar, idoralar, konsernlar va uyushmalar, mahalliy boshqaruv organlari O‘zbekiston Respublikasi Davlat mulkini boshqarish va xususiylashtirish qo‘mitasiga ular uchun belgilangan muddatlarda davlat mulki obyektlarining qanchaligi va ahvoli haqida zarur axborotni taqdim etsinlar.

8. O‘zbekiston Respublikasi Davlat mulkini boshqarish va xususiylashtirish qo‘mitasi quyidagi manzilga joylashtirilsin: Toshkent shahri, Namoyishlar xiyoboni, 6, ilgari O‘zbekiston Respublikasi Iqtisodiyot qo‘mitasining bo‘linmalari egallab turgan joyda.

O‘zbekiston Respublikasi Iqtisodiyot qo‘mitasi va Davlat statistika qo‘mitasi moddiy-texnika resurslarini, inventar, asbob-uskunalar va transport vositalarini belgilangan tartibda O‘zbekiston Respublikasi Davlat mulkini boshqarish va xususiylashtirish qo‘mitasiga topshirsin.

9. Viloyatlar va Toshkent shahar hokimlari O‘zbekiston Respublikasi Davlat mulkini boshqarish va xususiylashtirish qo‘mitasining hududiy organlariga zarur binolar va aloqa vositalari ajratilishini ta’minlasinlar.

Moddiy-texnika ta’minoti davlat-kooperativ qo‘mitasi, Moliya vazirligi O‘zbekiston Respublikasi Davlat mulkini boshqarish va xususiylashtirish qo‘mitasi bilan birgalikda uning hududiy organlarini inventarlar va asbob-uskunalar bilan jihozlash, shuningdek, transport xizmati ko‘rsatish uchun limitlar ajratish masalalarini ko‘rib chiqsinlar va bir oy muddat ichida hal etsinlar.

10. Mazkur qarorning bajarilishini nazorat qilish O‘zbekiston Respublikasi Prezidenti huzuridagi Vazirlar Mahkamasi Raisining o‘rinbosari B. S. Hamidov zimmasiga yuklansin. Qarorning bajarilishi qanday borayotganligi 1992-yil iyul oyida ko‘rib chiqilsin.

Rahbariyat.

Davlat tasarrufidan chiqarish va xususiylashtirishni tashkil etish va uning metodologiyasi yig‘ma bo‘limi.

Sanoatda davlat mulkini xususiylashtirish va boshqarish bo‘limi.

Qurilish kompleksida, transport va aloqada davlat mulkini xususiylashtirish va boshqarish bo‘limi.

Dehqonchilik sanoati kompleksi tarmoqlarida davlat mulkini xususiylashtirish va boshqarish bo‘limi.

Xizmat ko‘rsatish sohasi va ijtimoiy sohada davlat mulkini xususiylashtirish va boshqarish bo‘limi.

Xususiylashtirish va qimmatbaho qog‘ozlar maxsus fondlari bo‘limi.

Davlat mulkini xususiylashtirish, kimoshdi savdosi va tanlovlarini tashkil etish bo‘limi.

Davlat mulkini xususiylashtirish va boshqarish bo‘yicha hududiy organlar faoliyatini muvofiqlashtirish bo‘limi.

Ishlar boshqarmasi.

Davlat mulkini inventarizatsiyalash va qiymatini baholash bo‘yicha xo‘jalik hisobidagi markaz.

Davlat tasarrufidan chiqariladigan va xususiylashtiriladigan korxonalarning katalogini, normativ-ma’lumotnoma materiallarni nashr etish bo‘yicha xo‘jalik hisobidagi byuro.

Fond birjasi.

Qoraqalpog‘iston Respublikasi boshqarmasi

Andijon viloyati boshqarmasi

Buxoro viloyati boshqarmasi

Jizzax viloyati boshqarmasi

Qashqadaryo viloyati boshqarmasi

Navoiy viloyati boshqarmasi

Namangan viloyati boshqarmasi

Samarqand viloyati boshqarmasi

Surxondaryo viloyati boshqarmasi

Sirdaryo viloyati boshqarmasi

Toshkent viloyati boshqarmasi

Farg‘ona viloyati boshqarmasi

Xorazm viloyati boshqarmasi

Toshkent shahar boshqarmasi