Oʻzbekiston Respublikasi Bojxona kodeksi va Oʻzbekiston Respublikasi Prezidentining 2017-yil 7-fevraldagi “Oʻzbekiston Respublikasini yanada rivojlantirish boʻyicha harakatlar strategiyasi toʻgʻrisida”gi PF-4947-son Farmoniga muvofiq, fuqarolarni bojxona rasmiylashtiruvidan oʻtkazish sharoitlarini jahon standartlariga muvofiqligini taʼminlash, bojxona rasmiyatchiligini soddalashtirish, nazoratning samarali usullarini qoʻllash, shuningdek, turizmni rivojlantirish uchun yanada qulay sharoitlarni yaratish maqsadida Vazirlar Mahkamasi qaror qiladi:

1. Oʻzbekiston Respublikasi bojxona chegarasi orqali oʻtkazish punktlarida ikki yoʻlakli va masofaviy bojxona nazorati tizimlarini qoʻllash tartibi toʻgʻrisidagi nizom 1-ilovaga muvofiq tasdiqlansin.

2. Belgilansinki:

a) ikki yoʻlakli tizim:

Oʻzbekiston Respublikasi xalqaro aeroportlarining uchib kelish yoʻnalishida;

xalqaro temir yoʻl qatnovlari boshlanish yoki soʻnggi nuqtasida bojxona nazorati amalga oshiriladigan temir yoʻl vokzallarida;

Oʻzbekiston Respublikasi bojxona chegarasi orqali avtotransport vositalari hamda fuqarolar harakatining intensivligi yuqori boʻlgan (bir yil davomida oʻrtacha bir sutkada ikki ming nafar yoki undan ortiq fuqarolar harakatlanganda) va infratuzilmasi ikki yoʻlakli tizim joriy etish talablariga javob beradigan avtomobil oʻtkazish punktlarida joriy etiladi;

b) masofaviy bojxona nazorati tizimi Oʻzbekiston Respublikasi xalqaro aeroportlarining uchib ketish yoʻnalishida tatbiq etiladi.

3. Oʻzbekiston Respublikasi Davlat bojxona qoʻmitasi mutasaddi vazirlik va idoralar bilan birgalikda xalqaro aeroportlarda ikki yoʻlakli tizimni ishlashini taʼminlash uchun kerakli infrastruktura ishlari bir oy muddatda oʻtkazilsin.

4. Oʻzbekiston Respublikasi Davlat statistika qoʻmitasi va Oʻzbekiston Respublikasi Vazirlar Mahkamasi huzuridagi Davlat personallashtirish markazi bir oy muddatda Oʻzbekiston Respublikasidan chiqib ketayotgan hamda Oʻzbekiston Respublikasiga kirib kelayotgan shaxslarning safar maqsadi, mamlakati, yoshi va regioni boʻyicha shakllanishini taʼminlaydigan davlat statistika hisoboti shaklini ishlab chiqilsin va amaliyotga kiritilsin.

5. Vazirlar Mahkamasining 2007-yil 15-maydagi 97-sonli “Mehnat faoliyatini amalga oshirish uchun chet ellarga ketayotgan Oʻzbekiston Respublikasi fuqarolarini hisobga olishni takomillashtirish toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2007-y., 19-20-son, 197-modda) 2-ilovaga muvofiq oʻzgartirishlar kiritilsin.

6. Vazirlik va idoralar oʻzlari qabul qilgan normativ-huquqiy hujjatlarini bir oy muddatda ushbu qarorga muvofiqlashtirsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” aksiyadorlik jamiyati boshqaruvi raisi A.J. Ramatov va Oʻzbekiston Respublikasi Davlat bojxona qoʻmitasi raisi M.V. Toxiriy zimmasiga yuklansin.

1. Ushbu Nizom Oʻzbekiston Respublikasi Bojxona kodeksiga muvofiq Oʻzbekiston Respublikasining bojxona chegarasi orqali oʻtkazish punktlarida ikki yoʻlakli va masofaviy bojxona nazorati tizimlarini qoʻllash talablari va tartibini, shuningdek bojxona chegarasi orqali oʻtadigan jismoniy shaxsning bojxona operatsiyalarini amalga oshirish maqsadida notijorat maqsadlar uchun moʻljallangan tovarlarni deklaratsiyalash shakli sifatida “yashil” yoki “qizil” yoʻlakni tanlash qoidalarini belgilaydi.

2. Ushbu Nizomda quyidagi tushunchalardan foydalaniladi:

masofaviy bojxona nazorati — xalqaro aeroportlar orqali uchib ketayotgan yoʻlovchilarni maxsus ajratilgan joylarda xavfni boshqarish tizimidan foydalangan holda tanlab olish tamoyili asosida hamda masofaviy vizual kuzatuvni amalga oshirish orqali bojxona nazorati va rasmiylashtiruvidan oʻtkazishni taʼminlaydigan tizim;

“yashil” yoʻlak — kirib kelish va chiqib ketish joylarida maxsus belgilangan, jismoniy shaxslarning koʻl yuki va kuzatib borilayotgan bagajdagi tovarlarni bojxona chegarasidan olib oʻtishi uchun moʻljallangan joy;

“qizil” yoʻlak — kirib kelish va chiqib ketish joylarida maxsus belgilangan, jismoniy shaxslarning yozma shaklda deklaratsiyalanishi lozim boʻlgan qoʻl yuki va kuzatib borilayotgan bagajdagi tovarlarni, shuningdek deklaratsiyalanishi jismoniy shaxsning ixtiyoriga koʻra amalga oshiriladigan tovarlarni bojxona chegarasidan olib oʻtishi uchun moʻljallangan joy.

bojxona hududiga kirib kelish yoki ushbu hududdan chiqib ketish joyi — chegara yonidagi bojxona komplekslari va postlari, xalqaro havo yoʻllari (parvozlar) uchun ochiq aeroportlar, Oʻzbekiston Respublikasining chegara va bojxona nazorati amalga oshiriladigan, shuningdek fuqarolar, transport vositalari va tovarlar oʻtkaziladigan Davlat (bojxona) chegarasi orqali oʻtkazish punktlarida joylashgan temir yoʻl stansiyalari (vokzallar).

3. Bojxona hududiga kirib kelish yoki ushbu hududdan chiqib ketish joylarida ikki yoʻlak tizimini qoʻllash uchun kamida bitta “yashil” va “qizil” yoʻlak ajratiladi. Yoʻlaklar umumiy soni bojxona organi tomonidan yoʻlovchilar oqimi va mavjud imkoniyatlardan kelib chiqqan holda belgilanadi.

4. Har bir yoʻlak tomonga harakatlanish va har bir yoʻlakka kirish yoʻnalishi aniq belgilanishi hamda farqlanishi zarur.

“Yashil” yoʻlakka kirish oq fonda yashil rangli sakkiz burchak shaklidagi, shuningdek yashil rangda davlat tili. rus va ingliz tilida “Yashil yo'lak”, “Zelyoniy koridor” va “Green channel”, “Yozma deklaratsiyalanmaydigan tovarlar”, “Tovari, ne podlejashiye pismennomu deklarirovaniyu” va “Nothing to declare” yozuvlari boʻlgan maxsus grafik belgi bilan belgilanadi.

“Qizil” yoʻlakka kirish oq fonda qizil rangli toʻrtburchak shaklidagi, shuningdek davlat tili, rus va ingliz tilida “Qizil yo'lak”, “Krasniy koridor” va “Red channel”, “Yozma deklaratsiyalanadigan tovarlar”, “Tovari podlejashiye pismennomu deklarirovaniyu” va “Goods to declare” yozuvlari boʻlgan maxsus grafik belgi bilan belgilanadi.

Yozuvlar uchun davlat tili, rus va ingliz tilidan tashqari faoliyat koʻrsatadigan hududida bojxona hududiga kirib kelish yoki ushbu hududdan chiqib ketish joyi joylashgan bojxona organlari qoʻllanilishini maqsadga muvofiq deb biladigan boshqa har qanday tildan foydalanishga yoʻl qoʻyiladi.

5. “Yashil” va “qizil” yoʻlaklarga kirish va ulardan chiqish joylari eni 50 santimetr boʻlgan tegishli rangdagi liniyalar bilan belgilanadi.

Kirish va chiqish joylarini anglatadigan liniyalar oʻrtasidagi masofa kamida 2 metr boʻlishi zarur.

6. “Yashil” va “qizil” yoʻlaklar:

a) avtomobil yoʻllari (piyodalar) va temir yoʻl vokzallarida joylashgan oʻtkazish punktlarida:

bojxona hududiga kirib kelish joylarida — chegara nazoratidan oʻtgandan soʻng;

bojxona hududidan chiqish joylarida — chegara nazoratidan oʻtishdan oldin;

b) xalqaro havo yoʻllari (parvozlar) uchun ochiq aeroportlarda kirib kelishda jismoniy shaxs yoʻlakni tanlashda kuzatib boriladigan bagajga ega boʻlishi uchun bagaj beriladigan joydan soʻng joylashtirilishi zarur.

7. Xalqaro havo yoʻllari (parvozlar) uchun ochiq aeroportlarning bojxona hududidan chiqib ketishda maxsus ajratilgan joylarda vizual kuzatuvni amalga oshirish orqali bojxona nazorati va rasmiylashtiruvini oʻtkazish imkonini beruvchi masofaviy bojxona nazorati tizimidan foydalanishga ruxsat etiladi.

8. “Yashil” va “qizil” yoʻlaklar boshqa yoʻlak orqali oʻtadigan shaxslarni kuzatishni istisno etadigan uslubda ajratilishi lozim.

9. Bojxona organi bojxona hududiga kirib kelish yoki ushbu hududdan chiqib ketish joylarida bevosita ikki yoʻlak tizimi oldida jismoniy shaxslarga bojxona chegarasi orqali olib oʻtiladigan tovarlarni deklaratsiyalash uchun tegishli yoʻlakni ongli ravishda tanlash imkonini beradigan axborot hududini tashkil etishi lozim.

10. Axborot hududida jismoniy shaxslarning bojxona chegarasi orqali shaxsiy foydalanishi uchun moʻljallangan tovarlarni olib oʻtish masalasi boʻyicha bojxona qonunchiligi va bajarilishini nazorat qilish bojxona organlariga yuklangan boshqa qonunchilikning asosiy qoidalari, ikki yoʻlak tizimini qoʻllash tartibi haqida qisqacha maʼlumotnomalar, shuningdek bojxona qonunchiligini buzganlik uchun javobgarlik toʻgʻrisida ogohlantirish joylashtirilishi kerak.

11. Axborot hududi davlat tili, rus va ingliz tilidagi, shuningdek faoliyat koʻrsatadigan hududida bojxona hududiga kirib kelish yoki ushbu hududdan chiqib ketish joyi joylashgan bojxona organlari qoʻllanilishini maqsadga muvofiq deb biladigan boshqa har qanday tildagi axborot materiallarini oʻz ichiga olgan stendlar, shchitlar, tablo va boshqa qurilmalar bilan jihozlanishi darkor.

Axborot hududida yoʻlovchi bojxona deklaratsiyalari blanklarini toʻldirish joylari, toza blankalar va davlat tili, rus hamda ingliz tilida toʻldirish namunalari boʻlishi lozim.

12. “Yashil” yoʻlakda tovarlar quyidagi tovarlardan tashqari ogʻzaki deklaratsiyalashtiriladi:

olib kirish yoki olib chiqish qonunchilikka muvofiq taqiqlangan yoki cheklangan tovarlar;

qiymati va (yoki) miqdori respublikaga jismoniy shaxs tomonidan bojxona toʻlovlari solinmaydigan tovarlarni olib kirishning cheklangan normalaridan va respublikadan jismoniy shaxs tomonidan qonunchilikda belgilangan bojxona deklaratsiyasini taqdim etmasdan tovarlarni olib chiqishning cheklangan normalaridan oshib ketgan tovarlar;

yozma deklaratsiyalashtiriladigan Oʻzbekiston Respublikasining naqd milliy valyutasi va xorijiy valyutadagi olib kirish va olib chiqishga ruxsat etilgan mablagʻlar cheklangan normalari.

13. Oʻn olti yoshga toʻlmagan shaxslar qoʻl yuki va kuzatib boriladigan bagajda olib oʻtadigan tovarlar unga hamrohlik qiluvchi shaxs tomonidan deklaratsiyalashtiriladi.

14. Jismoniy shaxsning “yashil” yoʻlakdan oʻtishi bojxona maqsadlari uchun bojxona organiga mazkur shaxsning yozma deklaratsiyalashtiriladigan tovarlari yoʻqligi haqida maʼlum qilish sifatida koʻrib chiqiladi.

Bunda jismoniy shaxslar bojxona qonunchiligi talablariga rioya etish majburiyatidan ozod etilmaydi.

15. Jismoniy shaxs “yashil” yoʻlak boʻyicha bojxona chegarasi orqali olib kirish/olib chiqish taqiqlangan yoki cheklangan yoxud qiymati va (yoki) miqdori bojsiz olib kirish normasidan, shuningdek yozma deklaratsiyalashtiriladigan Oʻzbekiston Respublikasining naqd milliy valyutasi va xorijiy valyutadagi olib kirish va olib chiqishga ruxsat etilgan mablagʻlarning cheklangan normasidan ortadigan tovarlarni olib oʻtayotgani gumon qilinganda yoxud bu haqida axborot mavjud boʻlsa, bojxona organining mansabdor shaxsi bunday shaxsga nisbatan bojxona qonunchiligiga rioya etilishini taʼminlaydigan bojxona nazorati shaklini qoʻllash huquqiga ega.

16. “Yashil” yoʻlak orqali oʻtadigan yoki joʻnab ketadigan shaxsda olib kirish yoki olib chiqish taqiqlangan yoki cheklangan, qiymati va (yoki) miqdori bojsiz olib kirish normasidan, shuningdek yozma deklaratsiyalashtiriladigan Oʻzbekiston Respublikasining naqd milliy valyutasi va xorijiy valyutadagi olib kirish va olib chiqishga ruxsat etilgan mablagʻlarning cheklangan normasidan ortadigan tovarlar borligi aniqlangan holatlarda, bunday shaxs Oʻzbekiston Respublikasining amaldagi qonunchiligiga muvofiq javobgarlikka tortiladi.

17. “Qizil” yoʻlak orqali oʻtadigan jismoniy shaxslar belgilangan tartibda yoʻlovchi bojxona deklaratsiyasini toʻldiradi.

18. Oʻn olti yoshga toʻlmagan shaxslar qoʻl yuki va kuzatib boriladigan bagajda olib oʻtadigan tovarlar unga hamrohlik qiluvchi shaxs tomonidan deklaratsiyalashtiriladi.

19. Bojxona organlari “qizil” yoʻlakda bojxona nazorati shakllarini qoʻllashda tanlash prinsipiga asoslanadi va bojxona qonunchiligiga rioya etilishini taʼminlaydigan bojxona nazorati shakllari bilan cheklanadi. Bojxona nazorati shaklini tanlash bojxona organi mansabdor shaxsi tomonidan belgilanadi.

20. “Qizil” yoʻlak orqali oʻtadigan jismoniy shaxsda yoʻlovchi bojxona deklaratsiyasida qayd etilmagan, yozma ravishda deklaratsiyalashtirishi shart boʻlgan tovarlar borligi aniqlangan holatlarda, bunday shaxs Oʻzbekiston Respublikasining amaldagi qonunchiligiga muvofiq javobgarlikka tortiladi.

21. Jismoniy shaxslar tomonidan bojxona toʻlovlari solinmaydigan tovarlarni respublikaga olib kirishning cheklangan normalaridan yoki bojxona deklaratsiyasini taqdim etmasdan tovarlarni respublikadan olib chiqib ketishning cheklangan normalaridan oshadigan tovarlarni bojxona chegarasi orqali olib oʻtishda qonunchilikda belgilangan bojxona rasmiylashtiruvining umumiy qoidalari qoʻllaniladi.

22. Xalqaro aeroportlarining uchib ketish yoʻnalishida jismoniy shaxslarning bojxona deklaratsiyasini rasmiylashtirish va ularga bojxona qonunchiligi boʻyicha tushuntirishlar berish uchun yoʻlovchilar harakatiga taʼsir qilmaydigan alohida bojxona rasmiylashtiruvi joyi tashkil etiladi.

Bojxona rasmiylashtiruvi joyi davlat tilida, rus va ingliz tillarida “Bojxona”, “Tamojnya” va “Customs” yozuvlari boʻlgan maxsus grafik belgi bilan belgilanadi.

23. Bojxona rasmiylashtiruvi joyi xalqaro aeroportlarning uchib ketish yoʻnalishida yoʻlovchilarni roʻyxatdan oʻtkazish va bagajni topshirish hamda chegara nazoratidan oʻtish joylari oraligʻidagi hududida joylashtiriladi.

24. Bojxona nazorati zonasiga kirish va undan chiqish joylari eni 50 santimetr boʻlgan liniyalar bilan belgilanadi.

25. Bojxona nazorati zonasiga kirish joylariga davlat tilida, rus va ingliz tillarida “Bojxona nazorati zonasi”, “Zona tamojennogo kontrolya” va “Customs control zone” yozuvlari boʻlgan maxsus belgilar oʻrnatiladi.

26. Bojxona nazorati zonasiga kirib kelish joylarida bojxona qonunchiligi toʻgʻrisida bevosita jismoniy shaxslar uchun bojxona chegarasi orqali harakatlanganda deklaratsiyalanishi lozim boʻlgan tovarlar toʻgʻrisida zamonaviy axborot hududlari tashkil etiladi.

27. Axborot hududida masofaviy bojxona nazorati tizimiga oid bojxona qonunchiligi va bajarilishini nazorat qilish bojxona organlariga yuklangan boshqa qonunchilikning asosiy qoidalari, shuningdek, bojxona qonunchiligini buzganlik uchun javobgarlik toʻgʻrisida ogohlantirish joylashtirilishi kerak.

28. Axborot hududi davlat tili, rus va ingliz tillaridagi, shuningdek, faoliyat koʻrsatadigan hududida bojxona hududidan chiqib ketish joyi joylashgan bojxona organlari qoʻllanilishini maqsadga muvofiq deb biladigan boshqa har qanday tildagi axborot materiallarini oʻz ichiga olgan stendlar, shchitlar, tablo va boshqa qurilmalar bilan jihozlanishi darkor.

Axborot hududida yoʻlovchi bojxona deklaratsiyalari blanklarini toʻldirish joylari, toza blankalar va davlat tili, rus hamda ingliz tillarida.

29. Jismoniy shaxslar va ularning qoʻl yuklari Oʻzbekiston Respublikasi Davlat xavfsizlik xizmatining aviatsiya xavfsizligi boʻlinmalari (keyingi oʻrinlarda — aviatsiya xavfsizligi boʻlinmalari) xodimlari tomonidan tekshirish orqali nazorat qilinadi.

Tekshirish davomida qonunchilik hujjatlariga muvofiq olib chiqilishi taqiqlangan, cheklangan yoki olib chiqishning cheklangan normalaridan oshib ketadigan tovarlar hamda Oʻzbekiston Respublikasining naqd milliy va xorijiy valyuta boyliklari aniqlanganda, tovarlar qonunchilik talablari asosida olib oʻtilayotganligiga aniqlik kiritish maqsadida aviatsiya xavfsizligi boʻlinmalari tomonidan tekshirish jarayoniga bojxona organlari xodimlari taklif etiladi.

Aniqlik kiritish maqsadida oʻtkazilgan bojxona nazoratida noqonuniy tarzda olib chiqib ketilayotgan tovarlarga nisbatan bojxona organlari tomonidan dastlabki protsessual hujjatlar rasmiylashtiriladi.

30. Jismoniy shaxslarning bagajlarini nazorat qilish texnologik sxemalarga muvofiq bojxona organlari va aviatsiya xavfsizligi boʻlinmalari tomonidan alohida yoki hamkorlikda amalga oshiriladi.

31. Masofaviy bojxona nazorati tizimi joriy etilgan xalqaro aeroportlarda jismoniy shaxslar va ularning qoʻl yuklari bojxona organlari tomonidan bojxona nazoratidan oʻtkazilmaydi.

Jismoniy shaxslar, ularning qoʻl yuklari va bagajlari quyidagi hollarda bojxona nazoratidan oʻtkaziladi:

bojxona nazoratini oʻtkazish “Xavfni boshqarish” avtomatlashtirilgan axborot tizimi tomonidan buyurilganda;

bojxona organlarida davlat organlari, shuningdek, xorijiy davlatlar bojxona, boshqa davlat organlari va xalqaro tashkilotlardan olingan maʼlumotlar mavjud boʻlganida;

bojxona organlariga fuqarolarning bojxona toʻgʻrisidagi qonunchilik hujjatlari buzilishiga oid tezkor xabarlari kelib tushganda;

bojxona nazoratining tegishli shakllarini qoʻllash natijasida jismoniy shaxsning oʻzini tutish harakatlarida qonunchilik hujjatlari talablari buzilishining yetarlicha alomatlari aniqlanganda.

32. Masofaviy bojxona nazoratidan oʻtishda quyidagi holatlarda tovarlar ogʻzaki deklaratsiyalanadi:

qonunchilik hujjatlariga muvofiq olib chiqilishi taqiqlanmagan va (yoki) cheklovlar belgilanmagan tovarlar olib oʻtilganda;

qiymati va (yoki) miqdori respublikadan jismoniy shaxs tomonidan qonunchilik hujjatlarida belgilangan bojxona deklaratsiyasini taqdim etmasdan olib chiqish normalari doirasidagi tovarlar olib oʻtilganda;

yozma deklaratsiyalanmasdan olib chiqishga ruxsat etilgan naqd valyuta mablagʻlari cheklangan normalardan oshmaganda.

33. Jismoniy shaxslarning belgilangan bojxona nazorati zonasi orqali yozma deklaratsiyasiz oʻtishi, bojxona maqsadlari uchun bojxona organiga mazkur shaxsning yozma deklaratsiyalanadigan tovarlari yoʻqligi haqida maʼlum qilish sifatida koʻrib chiqiladi.

Bunda jismoniy shaxslar bojxona qonunchiligi talablariga rioya etish majburiyatidan ozod etilmaydi.

Yoʻlovchi bojxona deklaratsiyasini toʻldirish tartibi bojxona organlari tomonidan belgilanadi.

34. Jismoniy shaxslar yonida, qoʻl yuki va kuzatib borilayotgan bagajlarida yozma deklaratsiyalanishi lozim boʻlgan tovarlar mavjud boʻlgan taqdirda, ushbu tovarlar haqida yozma deklaratsiyalash orqali bojxona organi xodimiga bojxona deklaratsiyasini taqdim etishi shart.

35. Ikki yoʻlakli tizim joriy etilmagan chegara bojxona postlarida jismoniy shaxslar oʻtishi uchun bojxona nazorati va rasmiylashtiruvi joylari tashkil etiladi.

Mazkur joylar kirish va chiqish qismlari eni 50 santimetr boʻlgan liniyalar bilan belgilanadi.

Shuningdek, bojxona nazorati zonasiga ushbu joylarga kirishda davlat tilida, rus va ingliz tillarida “Bojxona”, “Tamojnya” va “Sustoms” yozuvlari boʻlgan maxsus belgilar oʻrnatiladi.

36. Jismoniy shaxslar yonida, qoʻl yuki va kuzatib borilayotgan bagajlarida yozma deklaratsiyalanishi lozim boʻlgan tovarlar mavjud boʻlgan taqdirda, bojxona deklaratsiyasi bojxona organi xodimiga taqdim etish yoʻli bilan deklaratsiyalashi shart.

37. Jismoniy shaxslar belgilangan bojxona nazorati va rasmiylashtiruvi joyi orqali yozma deklaratsiyasiz oʻtishi, bojxona maqsadlari uchun bojxona organiga mazkur shaxsning yozma deklaratsiyalanadigan tovarlari yoʻqligi haqida maʼlum qilish sifatida koʻrib chiqiladi.

Bunda jismoniy shaxslar bojxona qonunchiligi talablariga rioya etish majburiyatidan ozod etilmaydi.

Yoʻlovchi bojxona deklaratsiyasini toʻldirish tartibi bojxona organlari tomonidan belgilanadi.

38. Ushbu Nizomda belgilangan talablarning buzilishida aybdor boʻlgan shaxslar qonunchilik hujjatlariga muvofiq javob beradilar.

1. 2-band quyidagi tahrirda bayon qilinsin:

“2. Oʻzbekiston Respublikasi Davlat statistika qoʻmitasi Oʻzbekiston Respublikasi Vazirlar Mahkamasi huzuridagi Davlat personallashtirish markazi bilan birgalikda Oʻzbekiston Respublikasidan chiqib ketgan va Oʻzbekiston Respublikasiga kelgan shaxslar toʻgʻrisida ularning borish maqsadlari, mamlakatlar, yoshi va mintaqalar boʻyicha har choraklik statistika hisoboti yuritilishini taʼminlasin

Bunda Oʻzbekiston Respublikasi Vazirlar Mahkamasi huzuridagi Davlat personallashtirish markazining maʼlumotlari ketgan va kelgan shaxslar toʻgʻrisidagi axborot manbai hisoblanadi”.

2. 3-band oʻz kuchini yoʻqotgan deb hisoblansin.

3. Mehnat faoliyatini va tadbirkorlikni amalga oshirish uchun chet ellarga ketayotgan shaxslar sonini hisoblab chiqarish boʻyicha integratsiyalashgan axborotlarni tayyorlash va taqdim etish moduli sxemasida:

a) “Axborot taqdim etuvchi vazirlik, idora” ustunida 1 va 5-satrlardagi “Mehnat vazirligi” soʻzlari “Bandlik va mehnat munosabatlari vazirligi” soʻzlari bilan almashtirilsin.

b) “Qayerga taqdim etiladi” ustunining 2 va 4-satrlaridagi “Mehnat vazirligi” soʻzlari “Bandlik va mehnat munosabatlari vazirligi” soʻzlari bilan almashtirilsin.

v) “Axborot taqdim etuvchi vazirlik, idora” ustunida” 2-satrdagi “Mehnat vazirligining” soʻzlari “Bandlik va mehnat munosabatlari vazirligining” soʻzlari bilan almashtirilsin.

g) 3-satr quyidagi tahrirda bayon qilinsin: