Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Sudlar toʻgʻrisida”gi Oʻzbekiston Respublikasi Qonuniga, “Oʻzbekiston Respublikasining Fuqarolik protsessual va Xoʻjalik protsessual kodekslariga oʻzgartish va qoʻshimchalar kiritish haqida”gi qonunlariga hamda Oʻzbekiston Respublikasi Vazirlar Mahkamasining 2017-yil 9-fevraldagi 66-son “Oʻzbekiston Respublikasi Prezidentining “Tadbirkorlik subyektlarini davlat roʻyxatidan oʻtkazish va hisobga qoʻyish tizimini takomillashtirish toʻgʻrisida” 2016-yil 28-oktabrdagi PQ–2646-son qarorini amalga oshirish chora-tadbirlari toʻgʻrisida”gi qaroriga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki Boshqaruvining 2008-yil 23-avgustdagi 18/6-son qarori (roʻyxat raqami 1863, 2008-yil 27-sentabr) (Oʻzbekiston Respublikasi qonun hujjatlari toʻplami, 2008-y., 40-41-son, 414-modda) bilan tasdiqlangan Oʻzbekiston Respublikasi bank depozitorlarining Milliy axborotlar bazasi va unda mijozlarga xos raqam berish hamda bank hisobvaraqlari roʻyxatini yuritish tartibi toʻgʻrisidagi nizomga ilovaga muvofiq oʻzgartirishlar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 61-bandning birinchi xatboshisi quyidagi tahrirda bayon etilsin:

“61. 9-soʻrov turi — bank tomonidan yuridik shaxslar faoliyatini tugatish vaqtida shakllantiriladi. Bunday hollarda, banklar tadbirkorlik subyekti boʻlmagan mijozlardan olingan davlat reyestridan/roʻyxatidan chiqarilganligi haqidagi qaror nusxasiga hamda tadbirkorlik subyektlari boʻyicha esa davlat reyestridan/roʻyxatidan chiqarilganligi haqidagi “Tadbirkorlik subyektlarini davlat roʻyxatidan oʻtkazish va hisobga qoʻyishning avtomatlashtirilgan tizimi”dagi maʼlumotlarga asosan mijozning xos raqami faolligini toʻxtatadi va ushbu holat BDMABda qayd etiladi.”.

2. 1-ilovada:

oltinchi va oʻn oltinchi xatboshilardagi “Xoʻjalik sudining” degan soʻzlar “Sudning” degan soʻz bilan almashtirilsin;

toʻqqizinchi, oʻn uchinchi va oʻn toʻqqizinchi xatboshilardagi “xoʻjalik sudining” degan soʻzlar “sudning” degan soʻz bilan almashtirilsin;

yigirma uchinchi va yigirma toʻrtinchi xatboshilar quyidagi tahrirda bayon etilsin:

“21” belgi — Oʻzbekiston Respublikasining Soliq kodeksi 96-moddasida belgilangan asoslarda davlat soliq xizmati organining arizasiga koʻra sud qaroriga muvofiq ushbu soliq toʻlovchining banklardagi hisobvaraqlari boʻyicha operatsiyalar toʻxtatib turilgan hollarda asosiy depozit hisobvaraqqa xizmat koʻrsatuvchi bank tomonidan BDMAB orqali Davlat soliq qoʻmitasiga va barcha ikkilamchi hisobvaraq ochgan banklarga uzatiladi.

“22” belgi — Oʻzbekiston Respublikasining Soliq kodeksi 96-moddasida belgilangan asoslarda davlat soliq xizmati organining arizasiga koʻra sud qaroriga muvofiq ushbu soliq toʻlovchining banklardagi hisobvaraqlari boʻyicha operatsiyalar toʻxtatib turilgan hisobvaraqlari sud qarori asosida qayta harakatga keltirilgan hollarda asosiy depozit hisobvaraqqa xizmat koʻrsatuvchi bank tomonidan BDMAB orqali Davlat soliq qoʻmitasiga va barcha ikkilamchi hisobvaraq ochgan banklarga uzatiladi.”.