Oʻzbekiston Respublikasi Prezidentining 2012-yil 24-iyuldagi PF–4456-son “Oliy malakali ilmiy va ilmiy-pedagog kadrlar tayyorlash va attestatsiyadan oʻtkazish tizimini yanada takomillashtirish toʻgʻrisida”gi Farmoniga (Oʻzbekiston Respublikasi qonun hujjatlari toʻplami, 2012-y., 30-son, 346-modda) va Oʻzbekiston Respublikasi Vazirlar Mahkamasining 2012-yil 28-dekabrdagi 365-son “Oliy oʻquv yurtidan keyingi taʼlim hamda oliy malakali ilmiy va ilmiy-pedagog kadrlarni attestatsiyadan oʻtkazish tizimini takomillashtirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2013-y., 1-son, 5-modda) muvofiq Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi Rayosati qaror qiladi:

1. Fan doktori ilmiy darajasini berish tartibi toʻgʻrisidagi nizom ilovaga muvofiq tasdiqlansin.

2. Quyidagilar oʻz kuchini yoʻqotgan deb hisoblansin:

Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi Rayosatining 1996-yil 25-yanvardagi 34/2-son qarori bilan tasdiqlangan Ilmiy darajalar berish tartibi toʻgʻrisida nizom (roʻyxat raqami 261, 1996-yil 10-iyul);

Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi Rayosatining 2003-yil 17-iyuldagi 96/4-son “Ilmiy darajalar berish tartibi toʻgʻrisida nizomga oʻzgartirish va qoʻshimchalar kiritish toʻgʻrisida”gi qarori (roʻyxat raqami 261-1, 2003-yil 12-avgust) (Oʻzbekiston Respublikasi vazirliklari, davlat qoʻmitalari va idoralarining meʼyoriy hujjatlari axborotnomasi, 2003-y., 15-son);

Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi Rayosatining 2003-yil 13-noyabrdagi 98/4-son “Ilmiy darajalar berish tartibi toʻgʻrisida nizomga oʻzgartirish va qoʻshimchalar kiritish toʻgʻrisida”gi qarori (roʻyxat raqami 261-2, 2004-yil 29-yanvar) (Oʻzbekiston Respublikasi qonun hujjatlari toʻplami, 2004-y., 4-son, 47-modda);

Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi Rayosatining 2009-yil 24-dekabrdagi 160/12-son “Ilmiy darajalar berish tartibi toʻgʻrisidagi nizomga oʻzgartirish va qoʻshimchalar kiritish haqida”gi qarori (roʻyxat raqami 261-3, 2010-yil 23-yanvar) (Oʻzbekiston Respublikasi qonun hujjatlari toʻplami, 2010-y., 3-4-son, 29-modda).

3. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasining “Taʼlim toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 9-son, 225-modda), “Kadrlar tayyorlash Milliy dasturi toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 11-12-son, 295-modda) qonunlariga, Oʻzbekiston Respublikasi Prezidentining 2010-yil 2-noyabrdagi PQ–1426-son “Oliy malakali ilmiy va ilmiy-pedagog kadrlarni tayyorlash tizimini yanada takomillashtirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2010-y., 44-45-son, 376-modda) va 2012-yil 24-iyuldagi PF–4456-son “Oliy malakali ilmiy va ilmiy-pedagog kadrlar tayyorlash va attestatsiyadan oʻtkazish tizimini yanada takomillashtirish toʻgʻrisida”gi Farmoniga (Oʻzbekiston Respublikasi qonun hujjatlari toʻplami, 2012-y., 30-son, 346-modda) hamda Oʻzbekiston Respublikasi Vazirlar Mahkamasining 2012-yil 28-dekabrdagi 365-son “Oliy oʻquv yurtidan keyingi taʼlim hamda oliy malakali ilmiy va ilmiy-pedagog kadrlarni attestatsiyadan oʻtkazish tizimini takomillashtirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2013-y., 1-son, 5-modda) muvofiq fan doktori ilmiy darajasini berish tartibini belgilaydi.

1. Mazkur Nizomda quyidagi asosiy tushunchalardan foydalaniladi:

talabgor — fan doktori ilmiy darajasini olish uchun ilmiy izlanishlar olib borayotgan shaxs;

attestatsiya — oliy malakali ilmiy va ilmiy-pedagog kadrlarni tayyorlash jarayoni bosqichlarida tegishli chora-tadbirlarni oʻtkazish, jumladan malakaviy imtihonlarni qabul qilish, seminarlar va davra suhbatlarida dissertatsiyani aprobatsiyadan (muhokamadan) oʻtkazish, fan doktori ilmiy darajasini beruvchi ilmiy kengashda (keyingi oʻrinlarda Kengash deb yuritiladi) dissertatsiya himoyasini oʻtkazish va dissertatsiyani Oʻzbekiston Respublikasi Vazirlar Mahkamasi huzuridagi Oliy attestatsiya komissiyasida (keyingi oʻrinlarda OAK deb yuritiladi) ekspertizadan oʻtkazish asosida talabgorlarning ilmiy saviyasini hamda dissertatsiya natijalarining yangiligi va sifatini baholash;

attestatsiya ishi — talabgorning attestatsiyaga oid hujjatlari toʻplami;

dissertatsiya — talabgorning eʼlon qilingan ilmiy ishlari asosida tayyorlangan qoʻlyozma shaklidagi yuqori malakaviy ilmiy asar;

dissertatsiya avtoreferati — dissertatsiyaning asosiy gʻoyasi, xulosalari, oʻtkazilgan tadqiqotlarga talabgorning qoʻshgan hissasi, tadqiqot natijalarining yangiligi, ilmiy va amaliy ahamiyati hamda tatbigʻi bayon qilingan qoʻlyozma;

ish bajarilgan tashkilot — talabgorning dissertatsiya tadqiqotlari oʻtkazilgan va ishlanmalari bajarilgan tashkilot;

ekspertiza — dissertatsiya ilmiy natijalarining qay darajada toʻgʻriligi, yangiligi, dissertatsiyaning nazariy va amaliy ahamiyati, uni dissertatsiyalarni baholash mezonlariga mos kelishini baholash;

dastlabki ekspertiza — dissertatsiyaning himoyadan oldin oʻtkaziladigan ekspertizasi;

fan doktori ilmiy darajasi — oliy taʼlimdan keyingi taʼlim negizida attestatsiya natijalari asosida beriladigan ilmiy daraja;

ilmiy maslahatchi — dissertatsiya mavzusini tanlashda talabgorga koʻmaklashgan, tadqiqot maqsadi va vazifalarini belgilab beradigan va tadqiqotni oʻtkazishda maslahat beradigan masʼul shaxs;

apellyatsiya — fan doktori ilmiy darajasini berish yoki uni berishni rad qilish yoxud undan mahrum etish yoki uni tiklash toʻgʻrisidagi qarorlar yuzasidan berilgan shikoyat arizasi.

2. Fan doktori ilmiy darajasi:

magistr darajasiga yoki magistr darajasi joriy etilgungacha olingan oliy maʼlumotga;

oliy harbiy taʼlim diplomiga;

fan nomzodi, xorijiy davlatlarda berilgan falsafa doktori (Rh.D) yoki unga tenglashtirilgan boshqa ilmiy darajalarga;

bakalavr darajasiga, oliy maʼlumotli harbiy mutaxassis diplomiga yoki oliy maʼlumotli mutaxassis diplomiga, besh yildan kam boʻlmagan amaliy ish stajiga, ilmiy izlanishlarga layoqatli va belgilangan talablarga mos keladigan maʼlum bir ilmiy yutuqlarga (ixtiro uchun patentlar, ilmiy maqolalar, ilmiy-texnologik ishlanmalarda ishtirok etish va boshqalar) ega, shuningdek ilmiy yoki ilmiy-pedagogik faoliyat olib borayotgan, fanning muayyan sohasida chuqur kasbiy bilimlarga va ilmiy yutuqlarga ega boʻlgan yuksak maʼnaviyatli shaxslarga beriladi.

Tibbiyot fanlari boʻyicha dissertatsiya himoya qilish — tibbiyot sohasi boʻyicha oliy maʼlumotga, veterinariya fanlari boʻyicha dissertatsiya himoya qilish – veterinariya sohasi boʻyicha oliy maʼlumotga, yuridik fanlari boʻyicha dissertatsiya himoya qilish — yurisprudensiya sohasi boʻyicha oliy maʼlumotga ega boʻlgan shaxslarga ruxsat etiladi.

3. Talabgor oʻz dissertatsiyasini ilmiy jamoatchilik oldida himoya qilgandan keyin Kengashning fan doktori ilmiy darajasini berish toʻgʻrisidagi qarori tegishli ekspert kengashining tavsiyasi inobatga olingan holda OAK tomonidan tasdiqlanadi.

4. Fan doktori ilmiy darajasini olish uchun yozilgan dissertatsiya talabgorning eʼlon qilingan ilmiy ishlari asosida tayyorlanadi.

Dissertatsiyani rasmiylashtirish va uni himoya qilish talabgorning xohishiga koʻra oʻzbek, rus, qoraqalpoq va ingliz tillarida yoki OAK bilan kelishilgan holda boshqa tilda amalga oshiriladi.

Ilmiy maslahatchi va talabgor tadqiqotning maqsad va vazifalarini aniq belgilash hamda dissertatsiya va dissertatsiya avtoreferatining sifati va mazmuni uchun masʼuldir.

5. Fan doktori ilmiy darajasini olish uchun talabgor tomonidan tegishli malakaviy imtihonlar topshirilishi lozim.

6. Fan va texnologiyalarni rivojlantirishga hamda iqtisodiyot tarmoqlarini modernizatsiya qilishga ulkan hissa qoʻshgan eng yirik ixtiro muallifiga OAK Rayosati qarori bilan, istisno tariqasida, dissertatsiya himoyasisiz fan doktori ilmiy darajasi berilishi mumkin.

Yopiq mavzular boʻyicha dissertatsiya himoyasini tashkil etish va fan doktori ilmiy darajasini berish qonun hujjatlarida belgilangan tartibda amalga oshiriladi.

7. Fan doktori ilmiy darajasiga ega boʻlgan shaxslarga davlat namunasidagi fan doktori diplomi beriladi.

8. Fan doktori ilmiy darajasini olish uchun taqdim etilgan dissertatsiya:

talabgor oʻtkazgan tadqiqotlar va u yaratgan ishlanmalar asosida muhim ijtimoiy-iqtisodiy ahamiyatga molik dolzarb ilmiy yoki amaliy muammo hal qilingan;

tegishli fan sohasining istiqbolli yoʻnalishini rivojlantirishda maʼlum bir yutuq deb baholash mumkin boʻlgan yangi nazariy qoidalar majmui ishlab chiqilgan;

joriy etilishi fan, texnikani rivojlantirishga hamda ijtimoiy-siyosiy sohani va iqtisodiyot tarmoqlarini modernizatsiya qilishga hissa qoʻshadigan ilmiy asoslangan yechimlar oʻz ifodasini topgan yuqori malakaviy ilmiy asar boʻlishi kerak.

9. Dissertatsiya talabgor tomonidan shaxsan tayyorlangan, oshkora himoya uchun ilmiy jamoatchilik muhokamasiga taqdim etilayotgan yangi ilmiy holatlar va amaliy natijalarning majmuini oʻz ichiga olgan, mohiyati jihatidan ichki birlikka ega mazmunan yaxlit va tugallangan boʻlishi hamda talabgorning shaxsan fanga qoʻshgan hissasini aks ettirishi lozim.

10. Nazariy ahamiyatga molik dissertatsiyada olingan ilmiy xulosalardan fanda foydalanilganligi, amaliy ahamiyatga molik dissertatsiyada esa, iqtisodiyot tarmoqlari va ijtimoiy sohaning dolzarb muammolarining yechimi va ilmiy natijalardan amaliyotda foydalanilganligi toʻgʻrisida maʼlumotlar aks ettirilishi lozim.

Dissertatsiya natijalarini fanga, amaliyotga tatbiq etilganligi yoki tashkilotlar tomonidan joriy qilish uchun qabul qilinganligi yuzasidan asosli hujjatlar Kengashda muhokama etilib, attestatsiya ishiga ilova qilinadi. Ushbu hujjatlar tashkilotlarning ilmiy-texnikaviy kengashlari tomonidan koʻrib chiqilgan, maqullangan va uning rahbariyati tomonidan tasdiqlangan boʻlishi kerak.

11. Ilmiy maʼruza shaklidagi dissertatsiya talabgor ilmiy ishini muntazam bajargan va uning asarlarida eʼlon qilingan, ushbu fan sohasining mutaxassislariga maʼlum boʻlgan fan va amaliyot uchun katta ahamiyatga molik natijalarning qisqacha umumlashtirilgan bayonidan iborat boʻladi.

Ilmiy ishning ahamiyati, ilmiy maʼruza shaklida dissertatsiya himoya qilishning maqsadga muvofiqligi toʻgʻrisidagi xulosa talabgorning asosiy tadqiqotlari oʻtkazilgan tashkilot tomonidan beriladi. Ilmiy maʼruza shaklidagi dissertatsiyani himoya qilish uchun OAK Rayosatining ruxsati boʻlishi zarur.

12. Dissertatsiya mavzusi dolzarb hamda respublika fan va texnologiyalari rivojlanishining asosiy ustuvor yoʻnalishlari bilan bogʻliq boʻlishi lozim. Dissertatsiya mavzusi oliy taʼlim muassasasi kengashi yoki ilmiy-tadqiqot muassasasi ilmiy kengashi tomonidan tasdiqlanadi.

Mavzu toʻgʻrisidagi maʼlumot dissertatsiya mavzusi tasdiqlangandan soʻng, “OAK Byulleteni” jurnalida eʼlon qilish uchun OAKga yuboriladi.

Dissertatsiya himoyaga qabul qilingunga qadar uning mavzusiga oʻzgartirishlar kiritilishi mumkin.

13. Dissertatsiya kirish qismi, kamida toʻrtta bob, asosiy xulosalar va foydalanilgan adabiyotlar roʻyxatidan iborat boʻlgan shaklda rasmiylashtiriladi.

Dissertatsiyaning matni 200 sahifadan oshmasligi kerak. Ijtimoiy-gumanitar fanlar sohasidagi dissertatsiya hajmi koʻpi bilan 30 foizga oshirilishi mumkin.

Dissertatsiyaning titul varagʻi va dissertatsiya avtoreferati muqovasining orqa tomonida bitta ilmiy maslahatchi koʻrsatiladi. Zarur hollarda, OAK ruxsati bilan ikkinchi ilmiy maslahatchi ham koʻrsatilishi mumkin, ixtisosliklar tutashligida bajarilgan dissertatsiyalar uchun OAK ruxsati talab etilmaydi.

Kengash tomonidan dissertatsiya himoyaga qabul qilinganidan soʻng, dissertatsiya va uning avtoreferatiga oʻzgartirishlar kiritilishi mumkin emas.

14. Dissertatsiya mavzusi boʻyicha foydalanilgan adabiyotlar asosan oxirgi oʻn besh yil ichida eʼlon qilingan boʻlishi tavsiya etiladi.

Dissertatsiyada foydalanilgan adabiyotlar roʻyxati talabgorning xohishiga koʻra alifbo, sistematik yoki matnda havola qilinishi ketma-ketligi tarzida keltiriladi. Foydalanilmagan va havola qilinmagan adabiyotlarni roʻyxatga kiritish mumkin emas.

15. Talabgor oʻz dissertatsiyasida foydalangan materiallar manbaini, ularning muallifi va nomini toʻliq koʻrsatishi lozim. Talabgor dissertatsiyada ilmiy ish yozishda ishtirok etgan hammualliflarning gʻoya yoki ishlanmalaridan foydalangan taqdirda, buni dissertatsiya va dissertatsiya avtoreferatida qayd etishi shart.

Hammualliflikdagi ilmiy ish natijalari faqat birgina talabgorning dissertatsiyasiga toʻla-toʻkis kiritilishi mumkin.

Oʻzganing materialidan uning muallifi va manbaini koʻrsatmasdan foydalanilgan hollarda, dissertatsiya u qaysi bosqichda koʻrilayotgan boʻlishidan qatʼi nazar, muhokamadan olib tashlanadi va talabgor ushbu mavzu boʻyicha dissertatsiyani qayta himoya qilish huquqidan mahrum etiladi.

16. Talabgor tomonidan eʼlon qilingan ilmiy ishlar dissertatsiyaning himoya qilinayotgan asosiy natijalarini aks ettirishi kerak. Dissertatsiya natijalari xalqaro va respublika doirasida oʻtkaziladigan ilmiy konferensiyalarda, seminarlarda, davra suhbatlarida aprobatsiyadan (muhokamadan) oʻtkazilishi shart.

Dissertatsiyaning asosiy ilmiy natijalari OAK roʻyxatidagi ilmiy jurnallarda va boshqa davriy ilmiy nashrlarda eʼlon qilinishi lozim. Dissertatsiya boʻyicha talabgorning eʼlon qilingan ilmiy ishlarining umumiy soni oʻn beshtadan kam boʻlmasligi va ulardan kamida oʻntasi OAK roʻyxatidagi ilmiy jurnallarda eʼlon qilingan boʻlishi kerak.

Ijtimoiy-gumanitar va iqtisodiyot sohalari boʻyicha dissertatsiya natijalari yuzasidan monografiya eʼlon qilingan boʻlishi kerak.

17. Talabgorning dissertatsiya mavzusi boʻyicha kamida ikkita maqolasi OAK roʻyxatidagi tegishli fan sohasi rivojlangan xorijiy mamlakatlarning nufuzli ixtisoslashgan ilmiy jurnallarida, shuningdek ikkita maqolasi xalqaro ilmiy-amaliy konferensiya materiallarida, shundan bittasi xorijiy mamlakatlarda oʻtkazilgan konferensiya materiallarida eʼlon qilingan boʻlishi shart.

18. Talabgor tomonidan eʼlon qilingan maqolalar mazkur Nizomning 16-17-bandlarida nazarda tutilgan talablarga javob bermagan, lekin dissertatsiya yuksak ilmiy yoki amaliy ahamiyatga ega boʻlgan hollarda, dissertatsiyaning himoyasi masalasi, istisno tariqasida, OAK Rayosati tomonidan hal qilinadi.

19. Intellektual mulk obyektlariga boʻlgan muhofaza (egalik) hujjatlari, preprintlar, ilmiy xaritalar, ilmiy anjuman, konferensiya, simpozium va seminarlarda qilingan maʼruzalarning eʼlon qilingan tezislari, korxonalar qurish, ularni kengaytirish, modernizatsiya qilish hamda texnik va texnologik qayta jihozlash loyihalarining texnologik qismlari ham dissertatsiyaning ilmiy natijalarini aks ettiruvchi eʼlon qilingan ishlar jumlasiga kiradi.

Dissertatsiya mavzusi boʻyicha intellektual mulk obyektlariga boʻlgan muhofaza (egalik) hujjatlari shu fan sohasi rivojlangan xorijiy mamlakatlarning ixtisoslashgan ilmiy jurnallarida eʼlon qilingan maqolalar sifatida hisoblanadi.

Oliy taʼlim muassasasi kengashi yoki ilmiy-tadqiqot muassasasi ilmiy kengashi qarori bilan chop etilgan va kamida olti bosma taboq hajmdan iborat boʻlgan monografiya respublikada chop etiladigan ixtisoslashgan ilmiy jurnallarda eʼlon qilingan maqola sifatida hisoblanadi.

Darsliklar, oʻquv qoʻllanmalari, uslubiy koʻrsatmalar va boshqa oʻquv-uslubiy ishlar dissertatsiyaning natijalarini aks ettiruvchi eʼlon qilingan ilmiy ishlar jumlasiga kirmaydi.

20. Dissertatsiya avtoreferatida ilmiy ishlar roʻyxati xronologik tarzda quyidagi tartibda keltiriladi:

birinchi boʻlimda — monografiyalar va ilmiy jurnallarda eʼlon qilingan maqolalar roʻyxati;

ikkinchi boʻlimda — intellektual mulk obyektlariga boʻlgan muhofaza (egalik) hujjatlarining roʻyxati (agar mavjud boʻlsa);

uchinchi boʻlimda — ilmiy toʻplamlarda eʼlon qilingan maqolalar, tezislar, preprintlar, ilmiy jurnallarda eʼlon qilingan referat, axborot va annotatsiyalarning roʻyxati.

21. Dissertatsiya avtoreferatida keltirilgan barcha ilmiy ishlar dissertatsiya mavzusiga muvofiq boʻlishi kerak.

Dissertatsiya va dissertatsiya avtoreferatida koʻrsatilgan ilmiy ishlarning nashr qilinganligiga oid maʼlumotlar keltirilishi, jumladan barcha mualliflar toʻliq yozilishi va maqolalar eʼlon qilingan jurnal yoki toʻplamlarning betlari aniq koʻrsatilishi lozim.

Dissertatsiya himoyasi talabgorning ilmiy natijalarini aks ettiruvchi ishlari eʼlon qilingandan ikki oy oʻtgach, oʻtkazilishi mumkin. Nashrga topshirilgan, lekin eʼlon qilinmagan ishlar dissertatsiyada va dissertatsiya avtoreferatida keltirilishi mumkin emas.

22. Agar talabgorning maqolalari hammualliflikda yozilgan boʻlsa, u har bir hammuallifning hissasini xolis aks ettirishi lozim va maqolalardan oʻz dissertatsiyasida qisman yoki toʻla foydalanish uchun hammualliflarning yozma roziligini olishi zarur.

23. OAKga talabgorning asosiy ilmiy ishlari nusxalari yuboriladi.

24. Talabgor tayyorlagan dissertatsiyasini dastlabki ekspertizadan oʻtkazish uchun ish bajarilgan tashkilot rahbari nomiga ariza bilan murojaat qiladi. Tashkilot rahbari dissertatsiyani ushbu tashkilotning yoki dissertatsiya ixtisosligi boʻyicha ilmiy ishlar bajarilayotgan boshqa tashkilot(lar)ning tegishli kafedra, boʻlim, laboratoriya yoki kafedralararo, laboratoriyalararo birlashgan seminarlariga yoki muammoviy kengashga dastlabki ekspertizaga yuboradi.

25. Ish bajarilgan tashkilot tomonidan dissertatsiyani dastlabki ekspertizasi yuzasidan xulosa beriladi. Xulosa seminar yoki muammoviy kengash bayonnomasidan kengaytirilgan batafsil koʻchirma shaklida rasmiylashtiriladi, seminar yoki muammoviy kengash raisi va ilmiy kotibi tomonidan imzolanadi hamda tashkilot rahbari tomonidan tasdiqlanib, tashkilotning gerbli muhri qoʻyiladi. Xulosada dissertatsiya natijalarini olishda talabgorning shaxsiy ishtiroki, oʻtkazilgan tadqiqot natijalarining qay darajada toʻgʻriligi, yangiligi va amaliy ahamiyati, dissertatsiya mavzusining ixtisoslikka mosligi, dissertatsiya materiallarining talabgor eʼlon qilgan ilmiy ishlarda nechogʻlik toʻliq bayon etilganligi oʻz ifodasini topishi lozim.

26. Xulosa dissertatsiya dastlabki ekspertiza uchun topshirilgan kundan eʼtiboran ikki oy ichida talabgorga beriladi. Tashkilot rahbari xulosaning sifati, xolisligi va tayyorlash muddati uchun masʼuldir.

27. Talabgor dissertatsiyasini oʻz xohishi bilan seminarlarga mustaqil ravishda murojaat qilgan holda dastlabki ekspertizadan oʻtkazishi mumkin.

28. Ish bajarilgan tashkilot rahbari dastlabki ekspertiza natijalaridan qoniqmagan taqdirda, dissertatsiyani qoʻshimcha ravishda ekspertizaga yuborishi mumkin.

29. Talabgor Oʻzbekiston Respublikasida bajarilgan ilmiy-tadqiqot ishlari asosida tayyorlangan dissertatsiyani xorijiy davlatda himoya qilmoqchi boʻlgan taqdirda, belgilangan tartibda OAK ruxsatnomasi va yoʻllanmasini olishi lozim.

30. Dissertatsiya ish bajarilgan tashkilotda dastlabki ekspertizadan muvaffaqiyatli oʻtgandan soʻng, himoyaga qabul qilish uchun tashkilot rahbari tomonidan tegishli Kengashga yuboriladi.

Tashkilot rahbari tegishli Kengash raisi boʻlsa, dissertatsiya Kengash qoshidagi ilmiy seminarga (keyingi oʻrinlarda Ilmiy seminar deb yuritiladi) yuboriladi.

Dissertatsiya ixtisosligi yoki fan sohasi boʻyicha Kengash boʻlmasa, ish bajarilgan tashkilot Bir martalik kengash tuzishni soʻrab, dissertatsiya ixtisosligiga mos yoki yaqin keluvchi Kengashga murojaat qiladi. Dissertatsiya ixtisosligiga mos yoki yaqin keluvchi Kengash boʻlmagan taqdirda, OAKga murojaat qilinadi.

31. Oliy taʼlim, ilmiy-tadqiqot muassasalarining rahbarlari va ularning oʻrinbosarlari oʻzlari ishlayotgan joydagi Kengashlarda, vazirlik, idoralar va Fanlar akademiyasining rahbarlari oʻz tashkilotlariga qarashli muassasalardagi Kengashlarda dissertatsiya himoya qilishiga ruxsat berilmaydi. OAK xodimlari OAK rahbariyati ruxsati bilan dissertatsiyalarini himoya qilishlari mumkin.

32. Ish bajarilgan tashkilot tomonidan dissertatsiyani dastlabki ekspertizadan oʻtkazish natijalari boʻyicha ijobiy xulosa berilganda, talabgor tomonidan Kengashga quyidagi hujjatlar taqdim etiladi:

ish bajarilgan tashkilotning dissertatsiyani himoyaga qabul qilish haqidagi murojaatnomasi;

talabgor toʻgʻrisidagi obyektiv-maʼlumotnoma;

oliy taʼlim muassasasini bitirganligi toʻgʻrisidagi diplomning nusxasi;

talabgorning ilmiy-tadqiqot va ilmiy-pedagogik faoliyat olib borishga layoqatini aniqlash boʻyicha test sinovlaridan oʻtganligi haqidagi guvohnoma yoki fan nomzodi yoki xorijiy davlatlarda berilgan falsafa doktori (Ph.D) yoki unga tenglashtirilgan boshqa ilmiy darajalari toʻgʻrisidagi diplomining nusxasi;

malakaviy imtihonlarni topshirganligi haqidagi guvohnomalar;

ish bajarilgan tashkilot xulosasi;

dissertatsiya mavzusi va ilmiy maslahatchi tasdiqlanganligi toʻgʻrisida oliy taʼlim muassasasi kengashi yoki ilmiy-tadqiqot muassasasining ilmiy kengashi va muvofiqlashtiruvchi kengash qarorlaridan koʻchirmalar;

dissertatsiya muhokama qilingan tashkilotlarning xulosalari;

talabgorning ilmiy ishlari roʻyxati, ish bajarilgan tashkilot tomonidan tasdiqlangan holda;

talabgorning ilmiy maslahatchisining taqrizi, ilmiy maslahatchisi ikkita boʻlgan taqdirda, ilmiy kengashning qaroridan koʻchirma va OAK ruxsatnomasi;

hammualliflikdagi ilmiy ishlarni dissertatsiyaga toʻla yoki qisman kiritish uchun talabgor hammualliflarining yozma roziligi;

dissertatsiya va dissertatsiya avtoreferati;

talabgorning asosiy ilmiy ishlari nusxalari.

Kengash dastlabki ekspertizalar natijalaridan qoniqmagan taqdirda, dissertatsiyani qoʻshimcha ravishda ekspertizaga yuborishi mumkin.

Kengash tomonidan dissertatsiya dastlabki ekspertizaga qabul qilib olinadi va yakuniy dastlabki ekspertizadan oʻtkazish uchun Ilmiy seminarga yuboriladi.

33. Dissertatsiya talabgor tegishli hujjatlarni topshirgan kundan eʼtiboran ikki oy ichida Kengash tomonidan dastlabki ekspertizadan oʻtkaziladi.

34. Ilmiy seminar dissertatsiyaga mazkur Nizom talablari va dissertatsiyalarni baholash mezonlari asosida xolisona xulosa berish va Kengashga dissertatsiyani himoyaga qabul qilish yuzasidan asosli tavsiyalar berish uchun masʼuldir. Ilmiy seminar Kengash hamda OAKning tegishli boʻlimlari, ekspert kengashi nazorati ostida faoliyat yuritadi.

35. Ilmiy seminar kamida oʻn besh kishidan, jumladan rais, rais oʻrinbosari va ilmiy kotibdan iborat tarkibda Kengash raisi tomonidan OAK bilan kelishilgan holda bir yilgacha muddatga tasdiqlanadi. Kengash raisi tomonidan OAK bilan kelishilgan holda Ilmiy seminarning tarkibiga oʻzgartirishlar kiritilishi mumkin.

Ilmiy seminar tarkibiga Kengash aʼzolari, OAK ekspert kengashlari aʼzolari, ilmiy va ilmiy-pedagogik faoliyat koʻrsatayotgan mutaxassis-olimlar kiritiladi.

36. Dissertatsiya Ilmiy seminar rahbariyati tomonidan Kengash raisi (oʻrinbosari)ning yoʻllanmasi asosida Kengash ilmiy kotibidan qabul qilinadi va roʻyxatga olinadi hamda Ilmiy seminar aʼzolaridan yoki boshqa mutaxassis-olimlar orasidan ikki nafar taqrizchi tayinlanadi.

Taqrizchilar dissertatsiya bilan tanishib chiqib, taqrizlarini oʻn besh kun ichida Ilmiy seminarning ilmiy kotibiga taqdim etadi. Talabgor taqrizlar bilan ilmiy kotib tomonidan Ilmiy seminar majlisidan kamida besh kun oldin tanishtirilishi lozim.

37. Ilmiy seminar ishi majlis shaklida tashkil etiladi. Majlis kun tartibi aʼzolarga majlis oʻtkazilishidan kamida besh kun oldin ilmiy kotib tomonidan tarqatiladi va jamoatchilikka eʼlon qilinadi. Majlisda aʼzo boʻlmagan mutaxassislar ham ishtirok etishlari mumkin.

Ilmiy seminar majlisi unda aʼzolarining kamida uchdan ikki qismi ishtirok etganda vakolatli hisoblanadi. Ilmiy seminar majlisi rais, u yoʻqligida, rais oʻrinbosari rahbarligida oʻtkaziladi.

Ilmiy kotib yoʻqligida, uning vazifasini bajarish Ilmiy seminar raisi tomonidan Ilmiy seminar aʼzolaridan birining zimmasiga yuklatiladi.

Bir vaqtning oʻzida rais, rais oʻrinbosari va ilmiy kotib boʻlmasa, Ilmiy seminar majlisi oʻtkazilmaydi.

38. Ilmiy seminarga raislik qiluvchi majlisni ochish vaqtida qayd etish varaqasi asosida Ilmiy seminar aʼzolarini majlisning vakolatliligi haqida xabardor qilib, talabgorning familiyasi, ismi va otasining ismi hamda dissertatsiya nomini eʼlon qiladi.

Talabgor haqida Ilmiy seminar ilmiy kotibi tomonidan qisqacha maʼlumot beriladi.

Dissertatsiyaning mohiyati va asosiy holatlarini bayon etish uchun soʻz talabgorga beriladi. Maʼruza tugagach, savol-javoblardan soʻng, soʻz taqrizchilarga beriladi. Taqrizchilardan biri uzrli sabablarga koʻra kelmagan taqdirda, uning taqrizi Ilmiy seminar majlisida ilmiy kotib tomonidan toʻliq oʻqib eshittiriladi. Taqrizchilarning ikkalasi ham boʻlmagan taqdirda, Ilmiy seminar majlisi boshqa kunga yoki boshqa vaqtga qoldiriladi.

Har bir taqrizchining maʼruzasidan soʻng, javob berish uchun talabgorga soʻz beriladi.

Dissertatsiya boʻyicha muhokamada barcha ishtirok etishi mumkin.

Ilmiy seminar raisi mazkur dissertatsiya boʻyicha tushgan takliflarni navbatiga qarab ochiq ovozga qoʻyadi.

Ilmiy seminarning dissertatsiyani himoyaga qabul qilish toʻgʻrisidagi xulosasi majlisda ishtirok etayotgan Ilmiy seminar aʼzolarining kamida uchdan ikki qismi tomonidan yoqlab ovoz berilgan taqdirda, qabul qilingan hisoblanadi. Mazkur xulosa shartli ravishda boʻlmasligi kerak. Ilmiy seminar xulosalari ochiq ovoz berish yoʻli bilan qabul qilinadi va ovoz berish natijalari Ilmiy seminar bayonnomasida aks ettiriladi.

39. Ilmiy seminar majlisining bayonnomasi raislik qiluvchi va ilmiy kotib tomonidan imzolanadi hamda Kengash faoliyat koʻrsatib turgan tashkilot rahbari tomonidan tasdiqlanadi va tashkilotning gerbli muhri qoʻyiladi. Ilmiy seminar bayonnomasiga majlisda ishtirok etgan aʼzolar va taklif etilgan shaxslarning qayd varaqasi nusxasi ilova qilinadi.

Ilmiy seminar majlisi bayonnomasida dissertatsiya himoyasini oʻtkazish uchun asos boʻlgan ixtisoslikka uning muvofiqligi, dissertatsiyaning ilmiy saviyasi, uning ilmiy va amaliy ahamiyati, olingan natijalarning asoslanganligi, eʼlon qilingan ishlarda dissertatsiya natijalari qanchalik toʻliq bayon etilganligi, ilmiy natijalarning amaliyotga joriy etilganligi, talabgorlarga qoʻyiladigan talablarning bajarilganligi, dissertatsiya va dissertatsiya avtoreferatini rasmiylashtirish qay darajada bajarilganligiga xulosa, shuningdek Kengashga dissertatsiyani himoyaga qabul qilish, rasmiy opponentlar va yetakchi tashkilotni tayinlash boʻyicha tavsiya aks ettiriladi.

Ilmiy seminar bayonnomasi talabgorga va Kengash raisiga Ilmiy seminar raisi yoki ilmiy kotibi tomonidan beriladi. Ilmiy seminarda dissertatsiya muhokamasini oʻtkazish bir oy ichida amalga oshiriladi.

40. Ilmiy seminar majlisi mazkur Nizomning 36—39-bandlariga muvofiq oʻtkazilmagan yoki Ilmiy seminarda dissertatsiyaga obyektiv baho berilmagan taqdirda, Kengashga OAK tomonidan Ilmiy seminar faoliyatini toʻxtatish va uni qayta tashkil etish toʻgʻrisida taklif beriladi.

Ilmiy seminar raisi yil oxirida Ilmiy seminar faoliyati haqidagi hisobotni Kengash raisiga taqdim etadi. Hisobot umumiy koʻrinishda yozilib, unda Ilmiy seminarga topshirilgan va koʻrib chiqilgan ishlar yuzasidan aniq maʼlumotlar keltirilishi kerak. Kengash Ilmiy seminar hisobotini oʻz majlisida muhokama qiladi va oʻzining yillik hisoboti bilan birga OAKga taqdim etadi.

41. Kengash tomonidan dissertatsiya boʻyicha Ilmiy seminarning ijobiy xulosasi taqdim etilgan kundan eʼtiboran bir oy ichida dissertatsiya himoyaga qabul qilib olinishi, bu haqda dissertatsiyani himoyaga qabul qilish toʻgʻrisida qaror qabul qilinishi lozim.

42. Qaror qabul qilingandan soʻng, Kengash dissertatsiya avtoreferati chop etilishidan oldin himoya haqida OAK veb-sayti va “OAK Byulleteni” jurnalida eʼlon berish uchun OAKga murojaat qiladi.

43. Dissertatsiya avtoreferati xalqaro ekspertizadan oʻtkazish va ilmiy yutuqlarni targʻib qilish maqsadida oʻzbek, rus va ingliz tillarida 4,5 bosma taboq, jumladan oʻzbek, rus va ingliz tillarida har biri bir yarim bosma taboq hajmda Kengash raisining ruxsati bilan chop etiladi. Tarjimaning aniqligi va toʻgʻriligi uchun talabgor, ilmiy maslahatchi, ish bajarilgan tashkilot va Kengash masʼuldir.

Gumanitar va ijtimoiy fanlar sohasidagi dissertatsiya avtoreferatining hajmi, koʻpi bilan 30 foizga oshirilishi mumkin.

Dissertatsiya avtoreferatida dissertatsiyaning asosiy gʻoyasi va xulosalari, yangi ilmiy yoʻnalish yoki iqtisodiyot tarmogʻi muammosi yechimi bayon qilingan, oʻtkazilgan tadqiqotga talabgor qoʻshgan hissa, tadqiqot natijalarining qay darajada yangiligi va amaliy ahamiyati koʻrsatilishi kerak.

Dissertatsiya avtoreferati kamida 50 nusxada chop etiladi.

Dissertatsiya avtoreferati dissertatsiya himoyasidan kamida bir oy oldin dissertatsiya avtoreferati yuborilishi shart boʻlgan tashkilotlarga hamda Kengash tomonidan tuzilgan qoʻshimcha roʻyxat boʻyicha yuboriladi. Kengash tomonidan tuzilgan qoʻshimcha roʻyxatga Kengash aʼzolari, fan sohalari boʻyicha ilmiy-muvofiqlashtiruvchi markazlar, manfaatdor tashkilotlar, dissertatsiya ixtisosligiga mos Kengashlar hamda yetakchi mutaxassis-olimlar kiritiladi.

44. Dissertatsiyaning bir nusxasi va dissertatsiya avtoreferatining ikki nusxasi Kengash tuzilgan tashkilotning Axborot-resurs markaziga dissertatsiya himoyasidan kamida bir oy oldin topshiriladi va bu yerda ular qoʻlyozma huquqida doim saqlanadi.

45. Kengash tomonidan dissertatsiya boʻyicha fanning shu sohasidan xabardor fan doktorlari yoki professorlari orasidan uchta rasmiy opponent tayinlanadi, bunda ularning ikkitasi himoya oʻtayotgan Kengash aʼzosi boʻlishi mumkin. Rasmiy opponentlar turli tashkilotlarning xodimlari boʻlishi lozim.

46. Quyidagi shaxslar rasmiy opponent boʻla olmaydilar:

OAK Rayosati aʼzolari;

OAK apparati xodimlari;

OAK ekspert kengashlari aʼzolari;

dissertatsiyani koʻrib chiqayotgan Kengash raisi, rais oʻrinbosari va ilmiy kotibi;

talabgorning ilmiy maslahatchisi;

talabgorning hammualliflari;

dissertatsiya bajarilgan yoki huzurida Kengash faoliyat koʻrsatayotgan yoxud ilmiy-tadqiqot ishlari boʻyicha talabgor buyurtmachi yoki ijrochi (sherik ijrochi) boʻlgan oliy taʼlim muassasalari hamda ilmiy-tadqiqot muassasalarining rahbarlari va ularning oʻrinbosarlari;

talabgor ishlayotgan kafedra, laboratoriya, sektor yoki boʻlim xodimlari.

47. Rasmiy opponent dissertatsiyani va dissertatsiya mavzusi boʻyicha eʼlon qilingan bosma ishlarni oʻrganib chiqib, Kengashga oʻz fikrini taqriz shaklida taqdim etadi. Taqrizda tanlangan mavzuning dolzarbligi, dissertatsiyada keltirilgan ilmiy tafsilot, asosiy natijalar, xulosa hamda amaliy va nazariy tavsiyalar qay darajada asoslanganligi va yangiligi, shuningdek dissertatsiyaning mazkur Nizom talablariga muvofiqligi aks ettiriladi.

Rasmiy opponentlarning taqrizlari nusxalari Kengash tomonidan dissertatsiya himoyasidan kamida oʻn kun oldin talabgorga topshirilishi kerak.

Rasmiy opponent oʻzi tayyorlagan taqrizning xolis va sifatli boʻlishi hamda Kengash belgilagan muddatda taqdim etilishi uchun masʼuldir.

Rasmiy opponentning taqrizi belgilangan talablarga javob bermagan taqdirda, Kengash taqrizni qayta ishlash uchun rasmiy opponentga qaytarib berishga yoki rasmiy opponentni almashtirishga haqli. Bunda dissertatsiya himoyasi boshqa kunga qoldiriladi.

48. Kengash tomonidan dissertatsiya yuzasidan yetakchi tashkilot sifatida tegishli fan sohalari yoki iqtisodiyot tarmoqlarida oʻz yutuqlari bilan tanilgan tashkilot tayinlanadi. Etakchi tashkilotlar roʻyxati OAK tomonidan tasdiqlanadi.

49. Quyidagi tashkilotlar yetakchi tashkilot boʻlishi mumkin emas:

dissertatsiya bajarilgan tashkilot;

talabgor ilmiy-tadqiqot ishlari boʻyicha buyurtmachi, ijrochi (sherik ijrochi) boʻlgan tashkilotlar;

talabgor ishlayotgan tashkilot;

rasmiy opponentlar va ilmiy maslahatchining asosiy ish joyi boʻlgan tashkilot.

50. Etakchi tashkilotning taqrizida talabgor erishgan natijalarning fan va ishlab chiqarish uchun ahamiyati aks ettirilishi, shuningdek dissertatsiya natijalari va xulosalaridan foydalanilganligi va foydalanishga doir aniq tavsiyalar boʻlishi kerak.

Etakchi tashkilot taqrizi seminar bayonnomasidan kengaytirilgan batafsil koʻchirma shaklida yozilib, seminar raisi va ilmiy kotibi tomonidan imzolanadi hamda shu tashkilot rahbari yoki rahbar oʻrinbosari tomonidan tasdiqlanadi. Ular taqrizning sifati va xolisligi uchun shaxsan masʼuldir.

Etakchi tashkilot taqrizining nusxasi Kengash tomonidan dissertatsiya himoyasidan kamida oʻn kun oldin talabgorga topshiriladi.

51. Taqriz talabga javob bermagan taqdirda, Kengash uni yetakchi tashkilotga qaytarishga yoki yetakchi tashkilotni almashtirishga haqli. Bunda dissertatsiya himoyasi boshqa kunga qoldiriladi.

52. Kengash tomonidan xorijiy mamlakatlarning tegishli oliy taʼlim, ilmiy va ilmiy-ishlab chiqarish muassasalari yetakchi tashkilot, taniqli mutaxassis-olimlari ularning roziligi bilan dissertatsiya himoyasi yuzasidan rasmiy opponent etib tayinlanishi mumkin.

53. Dissertatsiya ijobiy taqriz va xulosalar berilgan taqdirda, himoyaga qabul qilib olinadi.

54. Dissertatsiya salbiy taqriz va xulosalar berilgan, lekin olingan salbiy taqriz va xulosalar Kengashning ekspert komissiyasi tomonidan asosli emas, deb topilgan taqdirdagina, Kengash tomonidan talabgorning xohishiga koʻra dissertatsiyani himoyaga qabul qilish masalasi koʻrib chiqilishi mumkin.

55. Dissertatsiya himoyaga qabul qilingandan soʻng, unda aniqlangan noaniqliklar va xatolarni tuzatishga yoʻl qoʻyilmaydi.

56. Dissertatsiyani ilmiy jamoatchilik oldida himoya qilish ilmiy bahs bilan oʻtishi, yuksak talabchanlik, qatʼiylik, ilmiy axloq-odobga rioya etilgan holda dissertatsiyadagi barcha ilmiy va amaliy xulosa hamda tavsiyalarning asoslanganligi tahlil qilinishi lozim.

57. Dissertatsiya himoyasiga dissertatsiyaga ijobiy taqriz bergan rasmiy opponentlardan faqat bittasi uzrli sabablarga koʻra ishtirok eta olmagan taqdirda, ruxsat beriladi. Bunda ushbu opponentning taqrizi ilmiy kotib tomonidan Kengash majlisida toʻliq oʻqib eshittiriladi.

58. Dissertatsiya himoyasi tugaganidan soʻng, fan doktori ilmiy darajasini berish toʻgʻrisidagi masala Kengash tomonidan yashirin ovoz berish yoʻli bilan hal etiladi.

59. Kengash tomonidan ovoz berish natijalari asosida fan doktori ilmiy darajasini berish yoki uni berishni rad qilish toʻgʻrisida qaror qabul qilinadi.

60. Dissertatsiyaning birinchi nusxasi va talabgorning attestatsiya ishi hamda ularning elektron shakli dissertatsiya himoyasidan keyin bir oy ichida Kengash tomonidan OAKga yuboriladi.

61. Talabgorning attestatsiya ishining ikkinchi nusxasi tashkilot arxivida saqlanadi.

62. Talabgor dissertatsiyani koʻrib chiqish jarayonining har qanday bosqichida, Kengashda yashirin ovoz berishdan oldin, OAKda esa, Kengashning fan doktori ilmiy darajasini berish toʻgʻrisidagi qarori tasdiqlanishidan oldin dissertatsiyasini muhokamadan olishga haqlidir.

Kengash yoki OAKning dissertatsiyani muhokamadan olish toʻgʻrisidagi qarori talabgorning yozma arizasi asosida qabul qilinadi.

63. Dissertatsiya talabgorning yozma arizasiga asosan muhokamadan olinganda hamda Kengash yoki OAK Rayosati tomonidan salbiy qaror qabul qilinganda, qayta ishlangan holda takroran himoyaga taqdim etilishi mumkin.

64. Talabgor oʻz dissertatsiyasini muhokama qilmaslikni soʻrab Kengashga yozma ariza bergan taqdirda, Kengash raisi ilmiy kotibga talabgor tomonidan topshirilgan hujjatlarni qaytarishga koʻrsatma beradi, uning arizasi hamda dissertatsiya bilan dissertatsiya avtoreferatining bir nusxasi Kengashda qoladi. Dissertatsiyani himoya qilish paytida tayyorlangan hujjatlar ham Kengashda qoladi va ular talabnoma asosida himoya qayta oʻtadigan joyga yuborilishi mumkin.

65. Dissertatsiya himoyasi natijalari boʻyicha Kengash salbiy qaror qabul qilgan taqdirda, oliy maʼlumot haqidagi diplom nusxasi, malakaviy imtihonlarni topshirganlik haqidagi guvohnomalar, ilmiy ishlarning nusxalari va dissertatsiya talabgorga qaytarib beriladi. Bunda dissertatsiya Axborot-resurs markazi fondidan olib qoʻyiladi va tashkilot arxivida saqlanadi.

Dissertatsiya boʻyicha berilgan taqrizlar, dissertatsiya avtoreferati, majlis stenogrammasi, obyektiv-maʼlumotnoma, dissertatsiya bajarilgan tashkilotning xulosasi hamda ovoz berish natijalari Kengashda qoladi va talabnoma asosida himoya qayta oʻtadigan joyga yuborilishi mumkin.

Kengash oʻzining salbiy qarori haqida dissertatsiya himoya qilingan kundan eʼtiboran bir oy ichida OAKni yozma ravishda xabardor qiladi. Bunda OAKga dissertatsiya avtoreferati va Kengash majlisining stenogrammasi yuboriladi.

66. Dissertatsiya himoyasi natijalari yuzasidan Kengashning qarori salbiy boʻlganda yoki OAK Rayosati tomonidan salbiy qaror chiqarilganda qaror qabul qilingandan keyin kamida bir yil oʻtgach, dissertatsiya qayta ishlangan holda takroran himoyaga taqdim etilishi mumkin.

Dissertatsiya qayta himoya qilish uchun taqdim etilganda, oldingi yetakchi tashkilot va rasmiy opponentlar almashtiriladi.

67. Attestatsiya ishi va dissertatsiya OAKning tegishli boʻlimlari tomonidan qabul qilib olinadi va ekspertizadan oʻtkazish uchun tegishli ekspert kengashiga taqdim etiladi.

68. Kengash dissertatsiya himoyasini oʻtkazishda mazkur Nizom talablarini buzgan boʻlsa, OAK rahbariyati OAK Tartib-qoida komissiyasining qaroriga asosan attestatsiya ishi koʻrilishini toʻxtatadi va mazkur dissertatsiya himoyasi Kengash tomonidan qayta oʻtkaziladi.

69. OAKning ekspert kengashi attestatsiya ishi va dissertatsiyani ekspertizadan oʻtkazib, tegishli qaror qabul qiladi va ushbu qaror OAK Rayosatida koʻrib chiqiladi.

70. OAK Rayosati attestatsiya ishi va dissertatsiya boʻyicha OAKning ekspert kengashi qarorini asosli deb topmasa, qayta koʻrib chiqish uchun ekspert kengashiga qaytaradi.

71. Attestatsiya ishi va dissertatsiyani OAKda koʻrib chiqish muddati, qoida tariqasida, uch oydan oshmasligi kerak. Ekspertizadan oʻtkazish batafsil oʻrganib chiqishni talab qiladigan hollarda, OAK Rayosatining qarori bilan attestatsiya ishi va dissertatsiyani koʻrib chiqish muddati ikki oygacha uzaytirilishi mumkin.

72. Attestatsiya ishi va dissertatsiyani OAKda koʻrib chiqish jarayonida unda aniqlangan xato va kamchiliklarni tuzatishga yoʻl qoʻyilmaydi.

73. OAK Rayosati tegishli ekspert kengashining xulosasiga asosan, Kengashning fan doktori ilmiy darajasini berish toʻgʻrisidagi qarorini tasdiqlaydi yoki rad qiladi.

74. Fan doktori ilmiy darajasi berilgan shaxsning dissertatsiyasi, dissertatsiya avtoreferati va ularning elektron shakli Alisher Navoiy nomidagi Oʻzbekiston Milliy kutubxonasi — axborot resurs markaziga topshiriladi.

75. Xorijiy davlatlarning oliy attestatsiya organlari tomonidan Oʻzbekiston Respublikasi fuqarolari hamda Oʻzbekiston Respublikasida doimiy yashab va ishlab turgan chet el fuqarolariga berilgan ilmiy darajalar haqidagi hujjatlar OAK tomonidan Oʻzbekiston Respublikasi Vazirlar Mahkamasining 2000-yil 25-iyuldagi 283-son qarori bilan tasdiqlangan Xorijiy davlatlarda ilmiy daraja olganlik toʻgʻrisidagi hujjatlarni tan olish va nostrifikatsiyalash (ekvivalentligini qayd etish) tartibi toʻgʻrisidagi nizomga muvofiq nostrifikatsiya (qayta attestatsiyadan oʻtkazish asosida tenglashtiriladi) qilinadi.

76. Ilmiy darajalar haqidagi hujjatlar talabgor ishlab turgan tashkilotning murojaatnomasi yoki talabgorning arizasiga asosan OAK tomonidan nostrifikatsiya qilinadi.

77. OAK Rayosatining fan doktori ilmiy darajasini berish toʻgʻrisidagi Kengash qarorini tasdiqlash toʻgʻrisidagi qarori, u qabul qilingan kundan eʼtiboran kuchga kiradi va yigirma kun ichida fan doktori diplomi rasmiylashtirib beriladi.

78. Ilmiy darajani tasdiqlovchi diplom yoʻqolgan yoki yaroqsiz holga kelgan taqdirda, OAK tomonidan manfaatdor shaxslar arizasiga muvofiq, uning dublikati beriladi.

Talabgorning familiyasi, ismi va otasining ismi oʻzgargan taqdirda, diplom yangisiga almashtirib berilmaydi.

79. Koʻchirmachilik, soxta hujjatlar taqdim etilganlik, dissertatsiyaning ekspertizasi noxolis oʻtkazilganlik kabi holatlar aniqlangan taqdirda, Kengash xulosasi va OAKning tegishli ekspert kengashi qaroriga asosan, ilmiy darajaga ega boʻlgan shaxslar OAK Rayosati tomonidan ilmiy darajadan mahrum etilishi mumkin.

Ilmiy daraja berish toʻgʻrisidagi qaror oʻn yil oldin qabul qilingan boʻlsa, ilmiy darajadan mahrum etish masalasi koʻrib chiqilmaydi.

Ilmiy darajadan mahrum etilgan shaxslarning ilmiy darajasi OAK Rayosatining qaroriga asosan tiklanishi mumkin.

80. Kengashning fan doktori ilmiy darajasidan mahrum etish yoki mahrum etmaslik yoxud uni tiklash boʻyicha xulosasi OAK ekspert kengashi tomonidan koʻrib chiqiladi.

81. OAK ekspert kengashining tegishli qarori OAK Rayosati tomonidan koʻrib chiqiladi va OAK Rayosati shaxsni fan doktori ilmiy darajasidan mahrum etish yoki mahrum etmaslik yoxud uni tiklash toʻgʻrisida qaror qabul qiladi.

82. Manfaatdor shaxslar Kengashning fan doktori ilmiy darajasini berish yoki berishni rad qilish toʻgʻrisidagi qarori yuzasidan Kengashga yoki OAKga apellyatsiya berishi mumkin.

Manfaatdor shaxslar fan doktori ilmiy darajasini berish yoki berishni rad qilish, xorijiy davlatlar oliy attestatsiya organlari tomonidan Oʻzbekiston Respublikasi fuqarolari hamda Oʻzbekiston Respublikasida doimiy yashab va ishlab turgan xorijiy fuqarolarga berilgan ilmiy darajalar haqidagi hujjatlarni tan olish va nostrifikatsiya qilish (ekvivalentligini qayd etish) masalalarini OAKda koʻrib chiqilishi yuzasidan OAKga apellyatsiya berishi mumkin.

Apellyatsiya tegishli qaror qabul qilingan kundan eʼtiboran ikki oy ichida beriladi.

83. Apellyatsiya “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasining Qonunida belgilangan tartibda va muddatlarda koʻrib chiqiladi.

84. Apellyatsiya quyidagi hollarda qabul qilinmaydi:

mazkur Nizomning 82-bandida belgilangan muddat oʻtganda;

apellyatsiya aynan bir masala boʻyicha takroran berilganda.

85. Kengash tomonidan apellyatsiya Kengash faoliyatini tartibga soluvchi qonun hujjatlariga asosan belgilangan tartibda koʻrib chiqiladi.

86. OAK Rayosati qarori yuzasidan berilgan apellyatsiya, shuningdek Kengash qarori yuzasidan berilgan apellyatsiya boʻyicha Kengash xulosasi OAK Tartib-qoida komissiyasi tomonidan koʻrib chiqiladi. OAK Tartib-qoida komissiyasi apellyatsiyani koʻrib chiqishni tegishli ekspert kengashiga topshirishi mumkin. Zarur hollarda, mazkur masalani koʻrib chiqishning avvalgi bosqichlarida ishtirok etmagan mutaxassis-olimlardan iborat Apellyatsiya komissiyasi tuziladi.

87. OAK Rayosati tomonidan Tartib-qoida komissiyasi, tegishli ekspert kengashi yoki Apellyatsiya komissiyasi xulosasi koʻrib chiqiladi va apellyatsiya boʻyicha yakuniy qaror qabul qilinadi.

88. OAK Rayosatining apellyatsiya boʻyicha qabul qilingan yakuniy qarori besh ish kuni ichida apellyatsiya bergan shaxslarga, shuningdek Kengashga yuboriladi.

89. Mazkur Nizom Oʻzbekiston Respublikasi Madaniyat va sport ishlari vazirligi, Oliy va oʻrta maxsus taʼlim vazirligi, Sogʻliqni saqlash vazirligi, Xalq taʼlimi vazirligi, Qishloq va suv xoʻjaligi vazirligi, Tashqi ishlar vazirligi, Fanlar akademiyasi, Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasi bilan kelishilgan.