Oʻzbekiston Respublikasi Vazirlar Mahkamasining 2010-yil 13-dekabrdagi 294-son “2011 — 2015-yillar uchun past kuchlanishli elektr tarmoqlarni modernizatsiyalash va yangilash dasturi toʻgʻrisida”gi qarori ijrosini taʼminlash uchun buyuraman:

1. Elektr energiyasidan foydalanish qoidalarini buzganlik uchun tarmoqdan uzilgan isteʼmolchilarning elektr qurilmalarini elektr tarmoqlariga qaytadan ulash uchun toʻlovni undirish tartibi toʻgʻrisida nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Vazirlar Mahkamasining 2009-yil 22-avgustdagi 245-son qarori (Oʻzbekiston Respublikasi qonun hujjatlari toʻplami, 2009-y., 35-son, 382-modda) bilan tasdiqlangan Elektr energiyasidan foydalanish qoidalariga (bundan buyon matnda Qoidalar deb yuritiladi) va Oʻzbekiston Respublikasi Vazirlar Mahkamasining 2010-yil 13-dekabrdagi 294-son “2011—2015-yillar uchun past kuchlanishli elektr tarmoqlarni modernizatsiya qilish va yangilash dasturi toʻgʻrisida”gi qaroriga muvofiq Qoidalarni buzganlik uchun elektr tarmogʻidan uzilgan isteʼmolchilarning elektr qurilmalarini elektr tarmoqlariga qaytadan ulash uchun toʻlovni undirish tartibini belgilaydi.

1. Ushbu Nizom isteʼmolchilar, hududiy elektr tarmoqlari korxonalari va ularning elektr taʼminoti korxonalari (bundan buyon matnda hududiy elektr tarmoqlari korxonasi deb yuritiladi) uchun taalluqlidir.

2. Isteʼmolchilarning elektr qurilmalari hududiy elektr tarmoqlari korxonasi tomonidan Qoidalarda belgilangan holatlarda va tartibda elektr tarmogʻidan uzib qoʻyilishi mumkin.

3. Isteʼmolchilarning elektr qurilmalarini elektr tarmogʻiga qaytadan ulash va elektr energiyasini yetkazib berish isteʼmolchi tomonidan Qoidalarning buzilgan holatlari bartaraf etilganidan va ushbu Nizomda belgilangan toʻlovlar toʻlanganidan soʻng amalga oshiriladi.

4. Qoidalarni buzganlik uchun elektr tarmogʻidan uzilgan isteʼmolchilarning elektr qurilmalarini elektr tarmoqlariga qaytadan ulash, ushbu qurilmalarni elektr tarmogʻidan uzgan hududiy elektr tarmoqlari korxonasi tomonidan isteʼmolchilarning yozma arizasiga muvofiq amalga oshiriladi.

5. Isteʼmolchining arizasiga asosan hududiy elektr tarmoqlari korxonasi vakili isteʼmolchi bilan birgalikda isteʼmolchining elektr qurilmalarini elektr tarmogʻidan uzishga sabab boʻlgan Qoidalarni buzish holatlari bartaraf etilganligini tekshirib, ikki tomonlama dalolatnoma tuzadi.

6. Isteʼmolchining elektr qurilmalarini elektr tarmogʻidan uzishga sabab boʻlgan Qoidalarni buzish holatlari bartaraf etilganligini tasdiqlovchi dalolatnoma asosida hududiy elektr tarmoqlari korxonasi vakili tomonidan elektr tarmogʻidan uzilgan elektr qurilmalarini elektr tarmoqlariga qaytadan ulash uchun isteʼmolchiga toʻlov hujjati (hisob-faktura, kvitansiya) beriladi.

Bunda toʻlov hujjati (hisob-faktura, kvitansiya)ga muvofiq toʻlanadigan pul miqdori ushbu Nizomning ilovasida keltirilgan isteʼmolchilarning elektr qurilmalarini hududiy elektr tarmoqlariga qaytadan ulash uchun toʻlov stavka miqdorlariga muvofiq belgilanadi.

7. Isteʼmolchi toʻlov hujjati (hisob-faktura, kvitansiya) boʻyicha toʻlovni amalga oshirib, ushbu toʻlov hujjatini hududiy elektr tarmoqlari korxonasi vakiliga topshirganidan soʻng uning elektr tarmogʻidan uzilgan elektr qurilmalarini elektr tarmoqlariga qaytadan ulash amalga oshirilgan toʻlovlar navbati boʻyicha uch kun ichida bajariladi.

8. Elektr energiyasi isteʼmolini hisobga olish va nazorat qilishning avtomatlashtirilgan tizimiga ulangan isteʼmolchilarning elektr qurilmalari elektr taʼminoti shartnomasi bilan belgilangan miqdorlarda va muddatlarda elektr energiyasi (quvvat) uchun toʻlov amalga oshirilmaganligi sababli elektr tarmogʻidan uzilgan holatlarda ularni elektr tarmoqlariga qaytadan ulash uchun toʻlov miqdori ushbu Nizom ilovasining 2 va 4-bandlarida keltirilgan stavka miqdorlari boʻyicha, Qoidalarning boshqa xil buzilish holatlarida elektr qurilmalarni elektr tarmogʻiga qaytadan ulash uchun toʻlov miqdori esa ushbu Nizom ilovasining 1 va 3-bandlarida keltirilgan stavka miqdorlari boʻyicha belgilanadi.

9. Quyidagi holatlarda elektr tarmogʻidan uzilgan isteʼmolchilarning elektr qurilmalarini elektr tarmoqlariga qaytadan ulash uchun toʻlov miqdori ushbu Nizomning ilovasida belgilangan toʻlov stavkasining ikki barobari miqdorida belgilanadi:

Qoidalar buzilganligi uchun elektr tarmogʻidan uzilgan isteʼmolchilarning elektr qurilmalari elektr tarmoqlariga oʻzboshimchalik bilan ulanganda;

isteʼmolchi tomonidan Qoidalar bir yil davomida takroran buzilganda, maishiy isteʼmolchilar bundan mustasno.

10. Qoidalar buzilganligi uchun elektr tarmogʻidan uzilgan isteʼmolchilarning elektr qurilmalarini elektr tarmoqlariga qaytadan ulash uchun hududiy elektr tarmoqlari korxonasining hisobiga toʻlangan mablagʻlar ushbu korxonaning asosiy faoliyatidan tushadigan boshqa daromadlari jumlasiga kiritilgan holda quyidagi tartibda taqsimlanadi:

40 foizi — elektr tarmogʻidan uzilgan isteʼmolchilarning elektr qurilmalarini elektr tarmoqlariga qaytadan ulashni amalga oshirgan hududiy elektr tarmoqlari korxonasi moddiy-texnika resurslarini xarid qilishga;

60 foizi — Vazirlar Mahkamasining 2010-yil 13-dekabrdagi 294-son qarori bilan tasdiqlangan 2011 — 2015-yillar uchun past kuchlanishli elektr tarmoqlarni modernizatsiya qilish va yangilash dasturini moliyalashtirish uchun mablagʻlardan maqsadli foydalanishga “Oʻzbekenergo” davlat-aksiyadorlik kompaniyasining maxsus hisobiga yoʻnaltiriladi. Bunda ushbu Dastur amalga oshirilganidan soʻng mablagʻlar har yili “Oʻzbekenergo” davlat-aksiyadorlik kompaniyasining manzilli qurilishlar roʻyxatiga kiritiladigan past kuchlanishli elektr tarmoqlarni rekonstruksiya qilish va yangilarini qurishni moliyalashtirishga yoʻnaltiriladi.

11. Bir nechta ulanish nuqtasiga ega boʻlgan elektr tarmogʻidan uzilgan isteʼmolchilarning elektr qurilmalarini elektr tarmoqlariga ulashda har bir amaldagi qaytadan ulash nuqtasi boʻyicha alohida toʻlov amalga oshiriladi.

12. Isteʼmolchilarning elektr qurilmalari hududiy elektr tarmoqlari korxonasining aybi bilan elektr tarmogʻidan uzib qoʻyilgan holatlarda ularni elektr tarmogʻiga qaytadan ulash uchun toʻlov undirilmaydi.

Bunda isteʼmolchilar elektr energiyasi toʻliq yetkazib berilmaganligi oqibatida hududiy elektr tarmoqlari korxonasi tomonidan yetkazilgan zararni qonun hujjatlarida belgilangan tartibda undirishlari mumkin.

13. Isteʼmolchilar tomonidan elektr tarmogʻidan uzilgan elektr qurilmalarini elektr tarmoqlariga qaytadan ulash uchun amalga oshirilgan toʻlovlar ularni Qoidalar buzilganligi uchun qonun hujjatlarida belgilangan tartibdagi javobgarlikdan ozod qilmaydi.

14. Ushbu Nizom talablari buzilishida aybdor boʻlgan shaxslar qonun hujjatlarida belgilangan tartibda javobgarlikka tortiladi.

15. Mazkur Nizom Oʻzbekiston Respublikasi Moliya vazirligi, Iqtisodiyot vazirligi, Monopoliyadan chiqarish va raqobatni rivojlantirish davlat qoʻmitasi va “Oʻzbekenergo” davlat-aksiyadorlik kompaniyasi bilan kelishilgan.