Oʻzbekiston Respublikasi Prezidentining “Oliy taʼlim muassasalarining moddiy-texnika bazasini mustahkamlash va yuqori malakali mutaxassislar tayyorlash sifatini tubdan yaxshilash chora-tadbirlari toʻgʻrisida” 2011-yil 20-maydagi PQ-1533-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Moliya vazirligi huzuridagi Oliy taʼlim muassasalarining moddiy-texnika bazasini rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizom ilovaga muvofiq tasdiqlansin.

2. Buyurtmachi funksiyasi:

oliy taʼlim muassasalarining oʻquv-laboratoriya korpuslari, sport zallari va talabalar turar joylarini qurish, rekonstruksiya qilish va mukammal taʼmirlash boʻyicha — ushbu maqsadlar uchun tashkil etiladigan Oʻzbekiston Respublikasi Oliy va oʻrta maxsus taʼlim vazirligi huzuridagi Yagona buyurtmachi xizmatiga, shuningdek tasarrufida oliy taʼlim muassasalari boʻlgan vazirliklar va idoralarga;

oliy taʼlim muassasalarining oʻquv-laboratoriya korpuslari, sport zallari va talabalar turar joylarini, shu jumladan birgalikda foydalaniladigan oliy taʼlim muassasalariaro ilmiy-laboratoriya komplekslarini jihozlash boʻyicha — Oʻzbekiston Respublikasi Oliy va oʻrta maxsus taʼlim vazirligiga, tasarrufida oliy taʼlim muassasalari boʻlgan vazirliklar va idoralarga yuklansin.

3. Oʻzbekiston Respublikasi Oliy va oʻrta maxsus taʼlim vazirligi hamda tasarrufida oliy taʼlim muassasalari boʻlgan tegishli vazirliklar va idoralar:

Oʻzbekiston Respublikasi Davlat arxitektura va qurilish qoʻmitasi bilan birgalikda har yili 1-oktabrgacha navbatdagi yil uchun nazarda tutilgan oliy taʼlim muassasalarining oʻquv-laboratoriya korpuslari, sport zallari va talabalar turar joylarini qurish, rekonstruksiya qilish va mukammal taʼmirlash yuzasidan loyiha-smeta hujjatlari ishlab chiqilishini hamda tender (tanlov) savdolari oʻtkazilishini taʼminlasinlar;

har yili 1-dekabrgacha oliy taʼlim muassasalarining oʻquv-laboratoriya korpuslari, sport zallari va talabalar turar joylarini hamda birgalikda foydalaniladigan oliy taʼlim muassasalariaro ilmiy-laboratoriya komplekslarini jihozlash uchun zamonaviy oʻquv-laboratoriya jihozlari va ilmiy jihozlar, axborot-kommunikatsiya texnikasi, mebel va sport anjomlari xarid qilish yuzasidan tender (tanlov) savdolarini amalga oshiriladigan qurilish va taʼmirlash ishlari muddatlari bilan bogʻliq holda oʻtkazsinlar;

har chorakda ishlarning loyihalashtirish bilan aynan bir vaqtda amalga oshirilishiga yoʻl qoʻyib boʻlmasligiga alohida eʼtibor qaratgan holda, shartnoma majburiyatlarining bajarilishi, loyihalash, qurish va taʼmirlash ishlari sifati monitoringi natijalari toʻgʻrisida Oʻzbekiston Respublikasi Vazirlar Mahkamasiga axborot taqdim etsinlar.

4. Oʻzbekiston Respublikasi Oliy va oʻrta maxsus taʼlim vazirligi hamda Davlat arxitektura va qurilish qoʻmitasi tegishli vazirliklar va idoralarni jalb etgan holda oliy taʼlim muassasalarining qurish, rekonstruksiya qilish va mukammal taʼmirlash obyektlarini shaharsozlik normalari va qoidalariga qatʼiyan muvofiq holda qabul qilishni taʼminlasinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov hamda Oʻzbekiston Respublikasi Bosh vazirining oʻrinbosarlari A.N. Aripov va B.A. Xoʻjayev zimmasiga yuklansin.

1. Ushbu Nizom Oʻzbekiston Respublikasi Moliya vazirligi huzuridagi Oliy taʼlim muassasalarining moddiy-texnika bazasini rivojlantirish jamgʻarmasi (keyingi oʻrinlarda Jamgʻarma deb ataladi) mablagʻlarini shakllantirish va ulardan foydalanish, shuningdek Jamgʻarma mablagʻlarini boshqarish tartibini belgilaydi.

2. Jamgʻarma Oʻzbekiston Respublikasi Prezidentining 2011-yil 20-maydagi PQ-1533-son qarori bilan tasdiqlangan 2011 — 2016-yillarda oliy taʼlim muassasalarining moddiy-texnika bazasini modernizatsiyalash va mutaxassislar tayyorlash sifatini tubdan yaxshilash Dasturini amalga oshirish uchun tashkil etilgan.

3. Jamgʻarma yuridik shaxs hisoblanmaydi.

4. Jamgʻarma mablagʻlari quyidagi manbalar hisobiga shakllantiriladi:

Oʻzbekiston Respublikasi Davlat budjeti mablagʻlari;

zamonaviy texnologiya uskunalari bilan jihozlash uchun jalb etiladigan xalqaro moliya tashkilotlarining imtiyozli kreditlari;

xalqaro donorlar grantlari, vasiylar va mamlakatimizdagi homiylar mablagʻlari;

Jamgʻarmaning vaqtincha boʻsh mablagʻlarini joylashtirishdan tushadigan daromadlar va qonunchilikda taqiqlanmagan boshqa tushumlar.

5. Oʻzbekiston Respublikasi Davlat budjetidan mablagʻlar Jamgʻarmaga har oyda, oliy taʼlim muassasalarining oʻquv-laboratoriya korpuslari, sport zallari va talabalar turar joylarini, shu jumladan birgalikda foydalaniladigan oliy taʼlim muassasalariaro ilmiy-laboratoriya komplekslarini qurish, rekonstruksiya qilish, mukammal taʼmirlash va jihozlash ishlarini moliyalashtirish uchun mablagʻlarga boʻlgan ehtiyojga qarab ajratiladi.

6. Xalqaro moliya tashkilotlari hamda donorlarning grantlari va imtiyozli kreditlari, homiylarning, shu jumladan Oʻzbekiston Respublikasi norezidentlari mablagʻlari Jamgʻarmaning gʻaznachilik hisob raqamlariga qonun hujjatlarida belgilangan tartibda tushadi.

7. Jamgʻarma mablagʻlari Oʻzbekiston Respublikasi Markaziy bankining Bosh boshqarmasi hisob-kitob kassa markazida Oʻzbekiston Respublikasi Moliya vazirligi Gʻaznachiligi tomonidan ochiladigan gʻaznachilik hisob raqamlarida jamlanadi.

8. 2011 — 2016-yillarda oliy taʼlim muassasalarining moddiy-texnika bazasini modernizatsiyalash va mutaxassislar tayyorlash sifatini tubdan yaxshilash Dasturini amalga oshirish doirasida Jamgʻarma mablagʻlaridan quyidagi maqsadlarda foydalaniladi:

oliy taʼlim muassasalarining oʻquv-laboratoriya korpuslari, sport zallari va talabalar turar joylarini hamda boshqa infratuzilma obyektlarini qurish, rekonstruksiya qilish va mukammal taʼmirlash ishlarini moliyalashtirish;

oliy taʼlim muassasalarining oʻquv-laboratoriya korpuslari, sport zallari va talabalar turar joylarini hamda birgalikda foydalaniladigan oliy taʼlim muassasalariaro ilmiy-laboratoriya komplekslarini mebellar, zamonaviy oʻquv-laboratoriya va ilmiy uskunalar, axborot-kommunikatsiya texnikasi va sport anjomlari bilan jihozlashni (keyingi oʻrinlarda jihozlash deb ataladi) moliyalashtirish.

9. Jamgʻarma mablagʻlarini boshqarish Oʻzbekiston Respublikasi Moliya vazirligi Investitsiyalar boshqarmasining Jamgʻarma mablagʻlarini boshqarish boʻlimi tomonidan amalga oshiriladi.

10. Oʻzbekiston Respublikasi Moliya vazirligi Investitsiyalar boshqarmasining Jamgʻarma mablagʻlarini boshqarish boʻlimi:

2011 — 2016-yillarda oliy taʼlim muassasalarining moddiy-texnika bazasini modernizatsiyalash va mutaxassislar tayyorlash sifatini tubdan yaxshilash Dasturini amalga oshirish boʻyicha Maxsus komissiyaga (keyingi oʻrinlarda Maxsus komissiya deb ataladi) taqdim etish uchun Jamgʻarma daromadlari va xarajatlari prognozini hamda choraklar va oylar boʻyicha taqsimlagan holda uning bir yildagi ijrosi toʻgʻrisidagi hisobotni tayyorlaydi;

Maxsus komissiyaga, moliyalashtirish manbalari bilan bogʻlagan holda, asosiy yoʻnalishlar (qurish, rekonstruksiya qilish mukammal taʼmirlash va jihozlash) boʻyicha Jamgʻarma mablagʻlaridan foydalanishga doir takliflar kiritadi;

oliy taʼlim muassasalarini qurish, rekonstruksiya qilish, mukammal taʼmirlash va jihozlashning aniq manzilli roʻyxatlari bajarilishini tahlil qiladi va uning monitoringini olib boradi hamda tegishli materiallarni Maxsus komissiyaga kiritadi;

zaruriyat boʻlganda, joylarga borgan holda, oliy taʼlim muassasalarini qurish, rekonstruksiya qilish, mukammal taʼmirlash va jihozlashning har yilgi dasturlarini shakllantirishda qatnashadi;

Jamgʻarma daromadlari va xarajatlarining oylar boʻyicha roʻyxatini Oʻzbekiston Respublikasi Moliya vazirligi rahbariyatiga tasdiqlash uchun kiritadi;

Jamgʻarmaning oliy taʼlim muassasalarini qurish, rekonstruksiya qilish, mukammal taʼmirlash va jihozlash uchun nazarda tutilgan mablagʻlari hisobi yuritilishini taʼminlaydi.

11. Jamgʻarma daromadlari va xarajatlari prognozini tayyorlash, koʻrib chiqish va tasdiqlash ushbu Nizomga muvofiq Oʻzbekiston Respublikasining Investitsiya dasturi va Davlat budjeti loyihalarini tayyorlash bilan bogʻliq holda amalga oshiriladi.

12. Oʻzbekiston Respublikasi Moliya vazirligi Iqtisodiyot vazirligi, Oliy va oʻrta maxsus taʼlim vazirligi hamda Tashqi iqtisodiy aloqalar, investitsiyalar va savdo vazirligi bilan birgalikda har yili kelgusi yil uchun — Davlat budjetidan va boshqa manbalardan, shu jumladan xalqaro tashkilotlarning grantlari va kreditlari, homiylar va mamlakatimiz xayr-saxovat qiluvchilari mablagʻlari jalb etilishidan tushumlar prognozlarini tayyorlaydi.

13. Oʻzbekiston Respublikasi Oliy va oʻrta maxsus taʼlim vazirligi Iqtisodiyot vazirligi, “Davarxitektqurilish” qoʻmitasi, tasarrufida oliy taʼlim muassasalari boʻlgan vazirliklar va idoralar bilan birgalikda har yili 1-iyulgacha Moliya vazirligiga kelgusi yil uchun Jamgʻarmaning barcha yoʻnalishlar boʻyicha xarajatlari prognozini hamda oliy taʼlim muassasalarini qurish, rekonstruksiya qilish, mukammal taʼmirlash va jihozlashning aniq manzilli roʻyxatlari loyihalarini taqdim etadi.

14. Oʻzbekiston Respublikasi Moliya vazirligi Jamgʻarmaga tushadigan prognozlashtiriladigan mablagʻlar doirasida, Iqtisodiyot vazirligi bilan birgalikda kelgusi yil uchun oliy taʼlim muassasalarini qurish, rekonstruksiya qilish, mukammal taʼmirlash va jihozlashning aniq manzilli roʻyxatlarining uzil-kesil parametrlarini shakllantiradi va 1-avgustgacha uni Maxsus komissiyaga koʻrib chiqish va tasdiqlash uchun kiritadi.

15. Jamgʻarma daromadlari va xarajatlarining yillik parametrlari tasdiqlangandan keyin Oʻzbekiston Respublikasi Moliya vazirligi Jamgʻarma mablagʻlarini oluvchilarga (Oʻzbekiston Respublikasi Oliy va oʻrta maxsus taʼlim vazirligiga, tasarrufida oliy taʼlim muassasalari boʻlgan vazirliklar va idoralarga) kelgusi yil uchun ularga belgilangan xarajatlar hajmlari toʻgʻrisidagi maʼlumotlarni 5 kun mobaynida yetkazadi.

16. Jamgʻarma mablagʻlari Oʻzbekiston Respublikasi Moliya vazirligi tomonidan ochiladigan Moliya vazirligining Gʻaznachiligi shaxsiy hisob raqamlari orqali Jamgʻarmaning gʻaznachilik hisob raqamidan sarflanadi.

17. Jamgʻarma mablagʻlaridan foydalanish Oʻzbekiston Respublikasi Moliya vazirligida roʻyxatdan oʻtkazilgan tegishli xarajatlar smetalari asosida:

oliy taʼlim muassasalari obyektlarini qurish, rekonstruksiya qilish va mukammal taʼmirlash boʻyicha — qonun hujjatlarida belgilangan tartibda oʻtkazilgan qurish, rekonstruksiya qilish va mukammal taʼmirlash boʻyicha tender (tanlov) savdolari natijalari asosida Oʻzbekiston Respublikasi Oliy va oʻrta maxsus taʼlim vazirligi huzuridagi Yagona buyurtmachi xizmati, shuningdek tasarrufida oliy taʼlim muassasalari boʻlgan vazirliklar va idoralar tomonidan;

oliy taʼlim muassasalari obyektlarini jihozlash boʻyicha — qonun hujjatlarida belgilangan tartibda oʻtkazilgan tanlov savdolari asosida Oʻzbekiston Respublikasi Oliy va oʻrta maxsus taʼlim vazirligi, tasarrufida oliy taʼlim muassasalari boʻlgan vazirliklar va idoralar tomonidan amalga oshiriladi.

18. Oʻzbekiston Respublikasi Moliya vazirligining Gʻaznachiligi oliy taʼlim muassasalarini qurish, rekonstruksiya qilish, mukammal taʼmirlash va jihozlash boʻyicha shartnomalarni belgilangan tartibda roʻyxatdan oʻtkazadi hamda ular boʻyicha qatʼiyan xarajatlar smetalarida nazarda tutilgan mablagʻlar doirasida va oliy taʼlim muassasalarini qurish, rekonstruksiya qilish, mukammal taʼmirlash va jihozlash boʻyicha qurilishlarning tasdiqlangan aniq manzilli roʻyxatlariga muvofiq xarajatlarni toʻlaydi.

19. Oliy taʼlim muassasalarini qurish, rekonstruksiya qilish va mukammal taʼmirlash boʻyicha xarajatlarni toʻlash oliy taʼlim muassasalarini qurish, rekonstruksiya qilish va mukammal taʼmirlashning aniq manzilli roʻyxatlari boʻyicha belgilangan limitlar doirasida hamda tender (tanlov) savdolari natijalari hisobga olingan holda tuzilgan shartnomalar boʻyicha Oʻzbekiston Respublikasi Oliy va oʻrta maxsus taʼlim vazirligi huzuridagi Yagona buyurtmachi xizmatining, shuningdek tasarrufida oliy taʼlim muassasalari boʻlgan vazirliklar va idoralarning toʻlov topshiriqnomalari asosida Oʻzbekiston Respublikasi Moliya vazirligining Gʻaznachiligi tomonidan amalga oshiriladi. Shartnomalarda quyidagilar nazarda tutiladi:

qurish, rekonstruksiya qilish va mukammal taʼmirlashning dastlabki ikki oyi mobaynida qurishning prognozlashtirilayotgan yili uchun tender (tanlov) savdolari natijalari boʻyicha aniqlangan ishlar qiymatining 30 foizigacha miqdorida avans toʻlovlarini teng ulushlarda amalga oshirish;

ajratilgan avansni proporsional ravishda ushlab qolishni hisobga olgan holda, bajarilgan ishlar qiymatining 95 foizi miqdorida har oyda joriy moliyalashtirish;

qolgan 5 foizni pudratchiga shartnomada qayd etilgan kafolat muddati tamom boʻlgandan keyin toʻlash.

20. Oliy taʼlim muassasalarini jihozlash boʻyicha xarajatlarni toʻlash nazarda tutilgan mablagʻlar doirasida va Moliya vazirligining Gʻaznachiligida roʻyxatdan oʻtkazilgan tuzilgan shartnomalar boʻyicha Oʻzbekiston Respublikasi Oliy va oʻrta maxsus taʼlim vazirligining, tasarrufida oliy taʼlim muassasalari boʻlgan vazirliklar va idoralarning toʻlov topshiriqnomalari asosida Oʻzbekiston Respublikasi Moliya vazirligining Gʻaznachiligi tomonidan amalga oshiriladi. Shartnomalarda quyidagilar nazarda tutiladi:

shartnoma umumiy summasining 30 foizi miqdorida avans toʻlash;

ajratilgan avans toʻlovlarini ushlab qolgan holda, yetkazib berishning amaldagi hajmidan kelib chiqib, har oyda joriy moliyalashtirish.

21. Mablagʻlarni (shu jumladan tovarlarni yetkazib beruvchilar, ishlarni bajaruvchilar va xizmat koʻrsatuvchilar tomonidan shartnoma majburiyatlari bajarilmaganligi uchun jarima sanksiyalarini qoʻllashdan olingan mablagʻlarni) xarajatlar smetasisiz, shuningdek Jamgʻarma xarajatlari prognozida nazarda tutilmagan tadbirlarga sarflash taqiqlanadi.

22. Qurish, rekonstruksiya qilish, mukammal taʼmirlash va jihozlashning aniq manzilli roʻyxatlarida nazarda tutilgan toʻliq moliyalashtirilmagan mablagʻlar joriy moliyaviy yil yakunlari boʻyicha, Jamgʻarma daromadlari va xarajatlari muvozanatliligini taʼminlashni hisobga olgan holda, Oʻzbekiston Respublikasi Moliya vazirligi tomonidan belgilangan tartibda navbatdagi moliyaviy yilda toʻlanadi.

23. Jamgʻarma hisob raqamlaridan mablagʻlarni ushbu Nizomda nazarda tutilmagan maqsadlar uchun oʻtkazish va vaqtincha olib qoʻyish taqiqlanadi.

24. Jamgʻarma mablagʻlari tushumi va sarfi boʻyicha buxgalteriya hisobini yuritish, shuningdek hisobot tuzish qonun hujjatlarida belgilangan tartibda Oʻzbekiston Respublikasi Moliya vazirligi tomonidan amalga oshiriladi.

25. Oʻzbekiston Respublikasi Oliy va oʻrta maxsus taʼlim vazirligi, tasarrufida oliy taʼlim muassasalari boʻlgan vazirliklar va idoralar tomonidan har oyda, hisobot davridan keyingi oyning 5-kunidan kechikmay Oʻzbekiston Respublikasi Moliya vazirligi tomonidan ishlab chiqilgan shakl boʻyicha oliy taʼlim muassasalarini qurish, rekonstruksiya qilish, mukammal taʼmirlash, shuningdek jihozlash uchun ajratilgan Jamgʻarma mablagʻlaridan foydalanish boʻyicha hisobotlar Oʻzbekiston Respublikasi Moliya vazirligiga taqdim etiladi.

26. Jamgʻarma mablagʻlaridan maqsadli foydalanilishini nazorat qilish Oʻzbekiston Respublikasi Moliya vazirligining Nazorat-taftish bosh boshqarmasi va uning hududiy boʻlinmalari tomonidan amalga oshiriladi.

27. Oʻzbekiston Respublikasi Moliya vazirligi Oliy va oʻrta maxsus taʼlim vazirligi, tasarrufida oliy taʼlim muassasalari boʻlgan vazirliklar va idoralarning oliy taʼlim muassasalarini qurish, rekonstruksiya qilish va mukammal taʼmirlash boʻyicha bajarilgan ishlar va toʻlangan mablagʻlar, amalda yetkazib berilgan mebellar, oʻquv-laboratoriya va ilmiy asbob-uskunalar, axborot-kommunikatsiya texnikasi va sport anjomlari, shu jumladan toʻlangan mablagʻlar, shuningdek ularning boshlangʻich hujjatlarga (schyot-fakturalarga) va amalda bajarilgan ishlarga (xizmatlarga) muvofiqligi toʻgʻrisida taqdim etilgan hisobot maʼlumotlari asosida Jamgʻarma mablagʻlaridan maqsadli va oqilona foydalanilishi yuzasidan doimiy monitoring olib boradi.

28. Jamgʻarma mablagʻlaridan tasdiqlangan xarajatlar smetalariga muvofiq qatʼiyan maqsadli va samarali foydalanilishi yuzasidan javobgarlik Jamgʻarma mablagʻlarini oluvchilarga — Oʻzbekiston Respublikasi Oliy va oʻrta maxsus taʼlim vazirligi, tasarrufida oliy taʼlim muassasalari boʻlgan vazirliklar va idoralar rahbarlariga yuklanadi.