Oʻzbekiston Respublikasi Prezidentining “Qoraqalpogʻiston Respublikasi va Xorazm viloyatida ichimlik suv taʼminoti tizimini takomillashtirish” loyihasini amalga oshirish borasidagi qoʻshimcha chora-tadbirlar toʻgʻrisida” 2005-yil 4-iyuldagi PQ–113-son qarorini bajarish yuzasidan Vazirlar Mahkamasi qaror qiladi

1. Xalqaro moliyaviy institutlarning ichimlik suv taʼminoti tizimini takomillashtirishga jalb qilingan kreditlarini qaytarish uchun Qoraqalpogʻiston Respublikasi va Xorazm viloyati suv taʼminoti tashkilotlari mablagʻlarini jamlash toʻgʻrisidagi Nizom ilovaga muvofiq tasdiqlansin.

2. Oʻzbekiston Respublikasi Moliya vaziri Xalqaro Tiklanish va Taraqqiyot banki hamda Quvaytning arab iqtisodiy rivojlantirish jamgʻarmasining qarz mablagʻlarini qayta kreditlash toʻgʻrisida Qoraqalpogʻiston Respublikasi Vazirlar Kengashi va Xorazm viloyati hokimligi, shuningdek Qoraqalpogʻiston Respublikasi va Xorazm viloyati suv taʼminoti tashkilotlari bilan bitimlarni imzolashga vakil qilinsin.

3. Vazirliklar va idoralar Oʻzbekiston Respublikasi Adliya vazirligi bilan birgalikda bir oy muddatda oʻz normativ hujjatlarini ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari V.A.Golishev zimmasiga yuklansin.

Mazkur Nizom:

Oʻzbekiston Respublikasi Prezidentining 2005-yil 4-iyuldagi PQ–113-son qaroriga;

Vazirlar Mahkamasining 1998-yil 15-oktabrdagi 444-son, 2002-yil 26-noyabrdagi 411-son va 2004-yil 13-yanvardagi 17-son qarorlariga;

“Toza suv, sanitariya va aholi salomatligi” loyihasini moliyalashtirish uchun 1997-yil 29-avgustdagi 75 mln. AQSh dollari summasiga Oʻzbekiston Respublikasi bilan Xalqaro Tiklanish va Taraqqiyot banki oʻrtasidagi Kredit bitimiga muvofiq;

Nukus va Urganch shaharlarida suv taʼminotini yaxshilash uchun 1997-yil 27-iyundagi 6 mln. Quvayt dinori summasiga Oʻzbekiston Respublikasi bilan Quvaytning arab iqtisodiy rivojlantirish jamgʻarmasi oʻrtasidagi Kredit bitimiga;

“Qoraqalpogʻiston Respublikasi va Xorazm viloyatida ichimlik suv taʼminoti tizimini takomillashtirish” loyihasini amalga oshirish uchun 2002-yil 11-maydagi 38 mln. AQSh dollari summasiga Oʻzbekiston Respublikasi bilan Osiyo taraqqiyot banki oʻrtasidagi Kredit bitimiga hamda 2003-yil 17-iyundagi 10 mln. yevro summasiga Oʻzbekiston Respublikasi Tashqi iqtisodiy faoliyat milliy banki bilan Eron eksportni rivojlantirish banki oʻrtasidagi Umumiy bitimga muvofiq investitsiya loyihalarini amalga oshirish maqsadida Xalqaro Tiklanish va Taraqqiyot banki, Osiyo taraqqiyot banki, Quvaytning arab iqtisodiy rivojlantirish jamgʻarmasi va Eron eksportni rivojlantirish bankining jalb qilingan kreditlarini qaytarish uchun suv taʼminoti tashkilotlari mablagʻlarini jamlash tartibini tartibga soladi.

1. Vazirlar Mahkamasining 2004-yil 13-yanvardagi 17-son qaroriga muvofiq Oʻzbekiston Respublikasi Iqtisodiyot vazirligi “Toza suv, sanitariya va aholi salomatligi” loyihasini amalga oshirish uchun Xalqaro Tiklanish va Taraqqiyot banki va Quvaytning arab iqtisodiy rivojlantirish jamgʻarmasining kredit mablagʻlaridan maqsadli va samarali foydalanilishi, foydalanuvchi tashkilotlar bilan birgalikda loyihalar boʻyicha qurilishi tugallangan obyektlarning qabul qilinishi uchun masʼul boʻlgan ijro etuvchi agentlik etib belgilangan.

2. Vazirlar Mahkamasining 2002-yil 26-noyabrdagi 411-son qaroriga va Oʻzbekiston Respublikasi Prezidentining 2005-yil 4-iyuldagi PQ—113-son qaroriga muvofiq Oʻzbekiston Respublikasi Iqtisodiyot vazirligi “Qoraqalpogʻiston Respublikasi va Xorazm viloyatida ichimlik suv taʼminoti tizimini takomillashtirish” loyihasini amalga oshirish uchun Osiyo taraqqiyot banki va Eron eksportni rivojlantirish bankining kredit mablagʻlaridan maqsadli va samarali foydalanilishi uchun masʼul boʻlgan ijro etuvchi agentlik etib belgilangan.

3. Vazirlar Mahkamasining 1998-yil 15-oktabrdagi 444-son, 2002-yil 26-noyabrdagi 411-son qarorlariga hamda Oʻzbekiston Respublikasi Prezidentining 2005-yil 4-iyuldagi PQ–113-son qaroriga muvofiq kredit mablagʻlarini qaytarish, foizlar va vositachilik haqini hamda kreditlarga xizmat koʻrsatish boʻyicha boshqa toʻlovlarni toʻlash quyidagi manbalardan:

Xalqaro Tiklanish va Taraqqiyot banki, Osiyo taraqqiyot banki va Quvaytning arab iqtisodiy rivojlantirish jamgʻarmasi kreditlari boʻyicha — Xorazm viloyati va Qoraqalpogʻiston Respublikasi suv taʼminoti tashkilotlari mablagʻlari hisobiga va mablagʻlarning yetishmagan qismi — Davlat budjeti mablagʻlari hisobiga;

Eron eksportni rivojlantirish bankining kreditlari boʻyicha — Davlat budjeti mablagʻlari hisobiga amalga oshiriladi.

4. Xalqaro Tiklanish va Taraqqiyot banki va Quvaytning arab iqtisodiy rivojlantirish jamgʻarmasi kreditlari boʻyicha toʻlovlar 2005-yilgacha toʻliq Davlat budjeti mablagʻlari hisobiga amalga oshirilgan.

5. “Qoraqalpogʻiston Respublikasi va Xorazm viloyatida ichimlik suv taʼminoti tizimini takomillashtirish” loyihasining tasdiqlangan TIAga muvofiq Xalqaro Tiklanish va Taraqqiyot banki, Osiyo taraqqiyot banki, Quvaytning arab iqtisodiy rivojlantirish jamgʻarmasi va Eron eksportni rivojlantirish banki kreditlariga xizmat koʻrsatish yuzasidan xarajatlarni qoplash ulushlari ushbu Nizomga 1 va 2-ilovalarga* muvofiq manbalar (Davlat budjeti va suv taʼminoti tashkilotlari mablagʻlari) va yillar boʻyicha belgilangan.

6. Loyihalar doirasida tovarlar (ishlar, xizmatlar) xarid qilish, Xalqaro Tiklanish va Taraqqiyot banki, Osiyo taraqqiyot banki, Quvaytning arab iqtisodiy rivojlantirish jamgʻarmasi va Eron eksportni rivojlantirish banki kreditlari mablagʻlarini oʻzlashtirish, shuningdek loyihalarning milliy va xorijiy valyutalardagi hisobvaraqlarini ochish, ulardan foydalanish va ularni toʻldirib borish Xalqaro Tiklanish va Taraqqiyot banki, Osiyo taraqqiyot banki, Quvaytning arab iqtisodiy rivojlantirish jamgʻarmasi bilan tuzilgan tegishli kredit bitimlari, shuningdek Eron eksportni rivojlantirish banki bilan tuzilgan Umumiy bitim va yakka tartibdagi bitim-xatlar shartlariga muvofiq amalga oshiriladi.

7. Oʻzbekiston Respublikasi nomidan Oʻzbekiston Respublikasi Moliya vazirligi Qoraqalpogʻiston Respublikasi Vazirlar Kengashi va Xorazm viloyati hokimligi (keyingi oʻrinlarda subqarz oluvchilar deb ataladi) bilan qayta kreditlash toʻgʻrisida bitimlar tuzish yoʻli bilan Xalqaro Tiklanish va Taraqqiyot banki, Osiyo taraqqiyot banki va Quvaytning arab iqtisodiy rivojlantirish jamgʻarmasi mablagʻlarini (keyingi oʻrinlarda subsidiar kreditlar deb ataladi) qayta kreditlaydi.

8. Subsidiar kreditlar quyidagi hajmlarda beriladi:

a) Qoraqalpogʻiston Respublikasi Vazirlar Kengashiga va Qoraqalpogʻiston Respublikasi suv taʼminoti tashkilotlariga:

Xalqaro Tiklanish va Taraqqiyot banki kredit mablagʻlarining bir qismi — 37.000,0 ming AQSh dollari;

Osiyo taraqqiyot banki kredit mablagʻlarining bir qismi — 20.890,0 ming AQSh dollari;

Quvaytning arab iqtisodiy rivojlantirish jamgʻarmasi kredit mablagʻlarining bir qismi — 3.004,8 ming Quvayt dinori.

b) Xorazm viloyati hokimligiga va Xorazm viloyati suv taʼminoti tashkilotlariga:

Xalqaro Tiklanish va Taraqqiyot banki kredit mablagʻlarining bir qismi — 24.300,0 ming AQSh dollari;

Osiyo taraqqiyot banki kredit mablagʻlarining bir qismi — 17.110,0 ming AQSh dollari;

Quvaytning arab iqtisodiy rivojlantirish jamgʻarmasi kredit mablagʻlarining bir qismi — 2.995,2 ming Quvayt dinori.

9. Subsidiar kreditlar quyidagi asosiy shartlarda beriladi:

a) Xalqaro Tiklanish va Taraqqiyot banki krediti mablagʻlari hisobiga:

subsidiar kredit subqarz oluvchilar tomonidan Xalqaro Tiklanish va Taraqqiyot banki bilan Kredit bitimi imzolangan sanadan boshlab, 5 yillik imtiyozli davrni qoʻshgan holda 20 yil mobaynida qaytariladi;

Libor (6 oy) stavkasi boʻyicha foizlarni plyus Libor spret summasini, shuningdek kreditning foydalanilmagan qismining yillik 0,75 foiz miqdoridagi majburiyat uchun vositachilik haqini subqarz oluvchilar tomonidan toʻlash har yili 15-fevralda va 15-avgustda amalga oshiriladi;

subsidiar kreditning asosiy qarzini, foizlarni hamda majburiyat uchun vositachilik haqini toʻlash qayta kreditlash toʻgʻrisidagi tegishli bitimda koʻrsatilgan sanadan boshlab har yili 15-fevralda va 15-avgustda amalga oshiriladi;

subsidiar kreditlarning asosiy qarzini, foizlarni va majburiyat uchun vositachilik haqini toʻlash muddatlari buzilgan taqdirda subqarz oluvchilar tomonidan, toʻlov muddati oʻtgan har bir kun uchun toʻlov muddati oʻtgan qarzlar summasiga 0,1 foiz miqdorida, lekin toʻlov muddati oʻtgan qarz summasining 50 foizidan koʻp boʻlmagan miqdorda penya hisoblab yoziladi;

subsidiar kreditlarni berish va ularni qaytarishning qolgan shartlari qayta kreditlash toʻgʻrisidagi tegishli bitimlar bilan belgilanadi.

b) Osiyo taraqqiyot banki kredit mablagʻlari hisobiga:

subqarz oluvchilar tomonidan subsidiar kreditni toʻlash Osiyo taraqqiyot banki bilan kredit bitimi imzolangan sanadan boshlab, 5 yillik imtiyozli davrni qoʻshgan holda 25 yil mobaynida amalga oshiriladi;

Libor (6 oy) stavkasi boʻyicha foizlarni plyus yillik 0,6 foizni, subsidiar kreditning 1 foizi miqdoridagi bir martalik vositachilik haqini, shuningdek subsidiar kreditning foydalanilmagan qismining 0,75 foiz miqdoridagi yillik stavka boʻyicha majburiyat uchun vositachilik haqini subqarz oluvchilar tomonidan toʻlash har yili 1-may va 1-noyabrda amalga oshiriladi;

“Qoraqalpogʻiston Respublikasi va Xorazm viloyatida ichimlik suv taʼminoti tizimini takomillashtirish” loyihasini amalga oshirish davrida foizlarni va vositachilik haqini kapitalizatsiya qilish hamda kapitalizatsiya qilingan summani subsidiar kreditning asosiy qarzi summasigi kiritish;

subsidiar kreditning asosiy qarzini toʻlash qayta kreditlash toʻgʻrisidagi tegishli bitimda koʻrsatilgan sanadan boshlab, har yili 1-may va 1-noyabrda amalga oshiriladi;

subqarz oluvchilar tomonidan subsidiar kreditlarning asosiy qarzini, foizlarni va vositachilik haqini toʻlash muddatlari buzilgan taqdirda toʻlov muddati oʻtgan har bir kun uchun toʻlov muddati oʻtgan qarzlar summasiga 0,1 foiz miqdorida, lekin toʻlov muddati oʻtgan qarz summasining 50 foizidan koʻp boʻlmagan miqdorda penya hisoblab yoziladi;

subsidiar kreditlarni berish va ularni qaytarishning qolgan shartlari qayta kreditlash toʻgʻrisidagi tegishli bitimlar bilan belgilanadi.

v) Quvaytning arab iqtisodiy rivojlantirish jamgʻarmasi kredit mablagʻlari hisobiga:

subqarz oluvchilar tomonidan subsidiar kreditni toʻlash Quvaytning arab iqtisodiy rivojlantirish jamgʻarmasi bilan kredit bitimi imzolangan sanadan boshlab, 5 yillik imtiyozli davrni qoʻshgan holda 20 yil mobaynida amalga oshiriladi;

subqarz oluvchilar tomonidan 2,5 foiz miqdoridagi yillik stavka boʻyicha foizlarni kreditning foydalanilmagan qismining yillik 0,75 foiz miqdoridagi majburiyat uchun vositachilik haqini toʻlash har yili 15-may va 15-noyabrda amalga oshiriladi;

subsidiar kreditlarning asosiy qarzini toʻlash qayta kreditlash toʻgʻrisidagi tegishli bitimda koʻrsatilgan sanadan boshlab, har yili 15-may va 15-noyabrda amalga oshiriladi;

subqarz oluvchilar tomonidan subsidiar kreditlarning asosiy qarzini, foizlarni va vositachilik haqini toʻlash muddatlari buzilgan taqdirda toʻlov muddati oʻtgan har bir kun uchun toʻlov muddati oʻtgan qarzlar summasiga 0,1 foiz miqdorida, lekin toʻlov muddati oʻtgan qarz summasining 50 foizidan koʻp boʻlmagan miqdorda penya hisoblab yoziladi;

subsidiar kreditlarni berish va ularni qaytarishning qolgan shartlari qayta kreditlash toʻgʻrisidagi tegishli bitimlar bilan belgilanadi.

10. Xalqaro Tiklanish va Taraqqiyot banki, Osiyo taraqqiyot banki va Quvaytning arab iqtisodiy rivojlantirish jamgʻarmasining subsidiar kreditlari boʻyicha tegishli toʻlov sanasidan 20 ish kuni oldin Oʻzbekiston Respublikasi Moliya vazirligi toʻlanishi kerak boʻlgan summa hisob-kitobi bilan birga yozma bildirishnomani tegishli subqarz oluvchilarga yuboradi. Biror-bir sabab bilan subqarz oluvchilarning bunday bildirishnomani olmasliklari subqarz oluvchilarni qayta kreditlash toʻgʻrisidagi bitimlar boʻyicha toʻlov majburiyatlaridan ozod qilmaydi.

11. Subqarz oluvchilar tegishli toʻlov sanasidan 10 ish kuni oldin qayta kreditlash toʻgʻrisidagi bitimda va/yoki yozma bildirishnomada koʻrsatilgan zarur mablagʻlarni Oʻzbekiston Respublikasi Moliya vazirligining maxsus hisob raqamiga milliy valyutada oʻtkazishlari kerak.

12. Oʻzbekiston Respublikasi Moliya vazirligi kreditlarga xizmat koʻrsatish boʻyicha xarajatlarni qisman qoplashga ajratiladigan budjet mablagʻlarini Oʻzbekiston Respublikasi Moliya vazirligining maxsus hisob raqamiga oʻtkazish chora-tadbirlarini koʻradi.

13. Oʻzbekiston Respublikasi Moliya vazirligi milliy valyutada jamlangan mablagʻlar hisobiga banklararo savdo sessiyalarida xorijiy valyutadagi mablagʻlarni belgilangan tartibda sotib oladi, koʻrsatib oʻtilgan mablagʻlar keyinchalik tegishli kredit boʻyicha Oʻzbekiston Respublikasining tashqi majburiyatlarini toʻlashga yoʻnaltiriladi.

14. Oʻzbekiston Respublikasi Tashqi iqtisodiy faoliyat milliy banki va Eron eksportni rivojlantirish banki oʻrtasidagi Umumiy bitim shartlariga muvofiq Oʻzbekiston Respublikasi Iqtisodiyot vazirligi bilan Eron kompaniyalari oʻrtasida kontraktlar tuzilishi va maʼqullanishi davomida Oʻzbekiston Respublikasi Tashqi iqtisodiy faoliyat milliy banki tegishli kontraktni mablagʻ bilan taʼminlash boʻyicha Eron eksportni rivojlantirish banki bilan yakka tartibdagi bitim-xatlar tuzadi.

15. Yakka tartibdagi tegishli bitim-xat imzolangandan keyin Oʻzbekiston Respublikasi Tashqi iqtisodiy faoliyat milliy banki, Eron eksportni rivojlantirish banki krediti mablagʻlarini kredit shartnomalari tuzish yoʻli bilan Qoraqalpogʻiston Respublikasi va Xorazm viloyatining tegishli suv taʼminoti tashkilotlariga qayta moliyalashtiradi.

16. Eron eksportni rivojlantirish banki kreditining qayta moliyalashtirilgan mablagʻlaridan foydalanish tartibi va ularni qaytarish shartlari tegishli kredit shartnomalari bilan belgilanadi.

17. Eron eksportni rivojlantirish banki krediti boʻyicha asosiy qarzni qaytarish, vositachilik haqini toʻlash, moliyalashtirish uchun toʻlov, sugʻurta mukofoti va kreditga xizmat koʻrsatish bilan bogʻliq boshqa moliyaviy chiqimlar Davlat budjeti mablagʻlari hisobiga amalga oshiriladi.

18. Oʻzbekiston Respublikasi Tashqi iqtisodiy faoliyat milliy banki kredit shartnomalari boʻyicha tegishli toʻlov sanasidan 20 ish kuni oldin Oʻzbekiston Respublikasi Moliya vazirligiga bunday toʻlovni amalga oshirish uchun zarur boʻlgan milliy valyutadagi mablagʻlarni oʻtkazish toʻgʻrisida yozma buyurtmanoma yuboradi.

19. Oʻzbekiston Respublikasi Moliya vazirligi Oʻzbekiston Respublikasi Tashqi iqtisodiy faoliyat milliy bankining tegishli yozma buyurtmanomasi asosida toʻlov sanasidan 10 ish kuni oldin zarur mablagʻlarni Qoraqalpogʻiston Respublikasi Xorazm viloyati tegishli suv taʼminoti tashkilotining Oʻzbekiston Respublikasi Tashqi iqtisodiy faoliyat milliy bankidagi tegishli yozma buyurtmanomada koʻrsatilgan hisob raqamiga oʻtkazadi.

20. Oʻzbekiston Respublikasi Iqtisodiyot vazirligi vazirlik huzurida tashkil etilgan loyihalarni amalga oshirish guruhlari orqali investitsiya davri mobaynida:

hisobot oyidan keyingi oyning 5-kunigacha har oyda Oʻzbekiston Respublikasi Moliya vazirligiga loyihalar amalga oshirilishining joriy holati, shu jumladan Xalqaro Tiklanish va Taraqqiyot banki, Osiyo taraqqiyot banki, Quvaytning arab iqtisodiy rivojlantirish jamgʻarmasi kreditlari mablagʻlaridan va Eron eksportni rivojlantirish banki kreditidan foydalanish, keyingi davr uchun oʻzlashtirish prognozi toʻgʻrisidagi axborotni taqdim etadi;

yilning har choragida Xalqaro Tiklanish va Taraqqiyot banki, Osiyo taraqqiyot banki, Quvaytning arab iqtisodiy rivojlantirish jamgʻarmasi va Eron eksportni rivojlantirish bankiga ular uchun maqbul shaklda amalga oshirilgan ishlar toʻgʻrisidagi hisobotlarni, ish rejasini va budjetni taqdim etadi;

loyihalar amalga oshirilishini nazorat qiladi, loyihalar boʻyicha moliyaviy va boshqa zarur hisob va hisobotlarni yuritadi;

Xalqaro Tiklanish va Taraqqiyot banki, Osiyo taraqqiyot banki, Quvaytning arab iqtisodiy rivojlantirish jamgʻarmasi bilan tuzilgan tegishli kredit bitimlari, shuningdek Eron eksportni rivojlantirish banki bilan tuzilgan Umumiy bitim va yakka tartibdagi bitim-xatlar talablariga muvofiq loyihalarni amalga oshirish bilan bogʻliq boʻlgan tovarlar (ishlar, xizmatlar) xaridini amalga oshiradi;

kredit mablagʻlaridan foydalanishini nazorat qiladi va ularning hisobini yuritadi, shuningdek Xalqaro Tiklanish va Taraqqiyot banki, Osiyo taraqqiyot banki, Quvaytning arab iqtisodiy rivojlantirish jamgʻarmasi, Eron eksportni rivojlantirish banki tartib-qoidalariga va Oʻzbekiston Respublikasi qonun hujjatlariga muvofiq zarur hisobotlar va hujjatlarning oʻz vaqtida tayyorlanishi va kiritilishini taʼminlaydi;

Xalqaro Tiklanish va Taraqqiyot banki, Osiyo taraqqiyot banki, Quvaytning arab iqtisodiy rivojlantirish jamgʻarmasi va Eron eksportni rivojlantirish banki tomonidan belgilangan shakllarda kredit mablagʻlaridan foydalanish boʻyicha toʻlov hujjatlari toʻgʻri rasmiylashtirilishini va Xalqaro Tiklanish va Taraqqiyot banki, Osiyo taraqqiyot banki va Quvaytning arab iqtisodiy rivojlantirish jamgʻarmasi bilan tuzilgan tegishli kredit bitimlarida, shuningdek Eron eksportni rivojlantirish banki bilan tuzilgan Umumiy bitimda va yakka tartibdagi bitim-xatlarda nazarda tutilgan loyiha boʻyicha bajaruvchining boshqa majburiyatlari bajarilishini taʼminlaydi;

auditorlarning hisobotlari Xalqaro Tiklanish va Taraqqiyot banki, Osiyo taraqqiyot banki, Quvaytning arab iqtisodiy rivojlantirish jamgʻarmasi, Eron eksportni rivojlantirish banki hamda Oʻzbekiston Respublikasi Moliya vazirligiga oʻz vaqtida taqdim etilishini taʼminlaydi.

Iqtisodiyot vazirligi:

kredit mablagʻlaridan maqsadli va samarali foydalanilishi;

loyihalarni amalga oshirishda muammolar paydo boʻlgan taqdirda tegishli chora-tadbirlar oʻz vaqtida koʻrilishi uchun javob beradi.

21. Mazkur Nizomning talablarini buzishda aybdor boʻlgan shaxslar qonun hujjatlariga muvofiq javobgarlikka tortiladi.