Ўзбекистон Республикаси Ҳукумати ва Глобал яшил ўсиш институти, кейинги ўринларда «Томонлар» деб аталувчилар,

Глобал яшил ўсиш институти («GGGI») халқаро ташкилот сифатида 2012 йил 20 июнь куни Рио-де-Жанейро шаҳрида имзоланган «Глобал яшил ўсиш институтини таъсис этиш тўғрисида («Таъсис этиш Битими») Битимга мувофиқ ташкил этилганлигини,

Таъсис этиш Битими 2012 йил 18 октябрда кучга кирганлигини,

GGGIнинг асосий мақсади ривожланаётган ва бозор иқтисодиётига ўтаётган, шу жумладан кам ривожланган давлатларнинг барқарор ривожланишига кўмаклашиш эканлигини,

Ўзбекистон Республикаси Таъсис этиш Битимига қўшилганлиги ва GGGIга аъзо давлат ҳисобланишини,

Таъсис этиш Битимининг 15-моддасига мувофиқ, одатда ўхшаш турдаги халқаро ташкилотларга бериладиган имтиёз ва иммунитетларни инобатга олган ҳолда, GGGI ўз аъзо-давлатларида GGGIнинг лозим даражада фаолият юритиши учун зарур ва тегишли имтиёзлар ва иммунитетларни тақдим қилиш бўйича мурожаат қилиши мумкин ҳамда бундай имтиёз ва иммунитетлар GGGI ва аъзо-давлатлар ўртасида тузиладиган алоҳида шартномаларда белгиланиши мумкинлигини,

GGGIнинг амалда мавжудлиги ва Ўзбекистон Республикасида фаолият юритишини;

ҳукуматлараро ташкилотларнинг ҳуқуқий мақоми ҳамда имтиёз ва иммунитетларига доир халқаро амалиётга мувофиқ, мамлакатда GGGIнинг амалда мавжудлиги ва фаолияти билан боғлиқ муносабатларни тартибга солиш заруриятини англаганлигини;

GGGI вазифаларини, шу жумладан бошқарув органлари, ходимлари ва мутахассислари ҳамда ташкилот билан боғлиқ бошқа шахсларни самарали ва лозим даражада бажариши мақсадида ўз ҳудудида ва халқаро миқёсда фаолият кўрсатиши учун ҳуқуқий мақомга ҳамда имтиёз ва иммунитетларга эга эканлигига таъминлаш истагини инобатга олиб,

қуйидагилар тўғрисида келишиб олдилар:

Мазкур Битимда ишлатиладиган қуйидаги атамалар қуйидаги маъноларни англатади:

«Битим» Ўзбекистон Республикаси Ҳукумати билан GGGI ўртасидаги Битимни англатади;

«Маслаҳат қўмитаси» GGGIнинг Маслаҳат қўмитасини англатади;

«Тегишли органлар» Ўзбекистон Республикасида амал қиладиган қонун ва тартиблар доирасида ҳамда уларга мувофиқ, Ўзбекистон Республикасидаги манфаатдор бўлиши мумкин бўлган органларни англатади;

«GGGI архивлари» GGGIнинг барча архивлари ҳисобланади ҳамда барча ёзувлар, ёзишмалар, ҳужжатлар, қўлёзмалар, расмлар, фильмлар, овоз ёзувлари ва GGGIга тегишли бўлган ёки унинг томонидан ёхуд унинг номидан сақланадиган бошқа материалларни ўз ичига олади;

«Ассамблея» GGGI Ассамблеясини англатади;

«Кенгаш» GGGI Кенгашини англатади;

«Қарамоғидаги болалар» GGGI ходимларининг турмуш қурмаган ва 21 ёшдан кичик бўлган ёки имконияти чекланган болаларни англатади;

«Бош директор» Ассамблея томонидан тайинланадиган GGGI Бош директорини англатади;

«Мутахассис» GGGI ва шахс ўртасидаги ёки ташкилот ва GGGI ўртасидаги шартномавий муносабатлар асосида GGGIга қисқа муддатли хизмат кўрсатадиган ҳар қандай шахсни англатади;

«GGGI вакили» Офис учун масъул бўлган ва унинг раҳбари этиб GGGI томонидан тайинланган юқори мансабдор шахсни англатади;

«Ҳукумат» Ўзбекистон Республикаси Ҳукуматини англатади;

«Мамлакат қонунлари» Ўзбекистон Республикаси Конституцияси ва қонунларини, шу жумладан, бу билан чекланиб қолмасдан, Ҳукумат ва унинг органлари ваколатига мувофиқ ёки улар томонидан қабул қилинадиган уставлар, қарорлар, фармойишлар, қоидалар, низомлар, буйруқлар ва бошқа ҳужжатларни англатади;

«GGGI томонидан ўтказиладиган мажлислар» GGGIнинг мажлислари, шу жумладан GGGI томонидан ўтказиладиган ҳар қандай халқаро конференция ёки бошқа йиғилишлар ҳамда ҳар қандай мажлисларнинг комиссияси, қўмитаси ёки кичик гуруҳини англатади;

«Хизмат кўрсатувчи ходимлар» Ўзбекистон Республикаси фуқароси бўлмаган, GGGI ходимларининг уй хизматида ишлайдиган шахсларни англатади;

«Офис» кейинги ўринларда 11-моддада батафсил баён этилган GGGIнинг Ўзбекистон Республикасидаги офисини англатади;

«GGGIнинг мансабдор шахслари» мутахассисларни инобатга олмаган ҳолда, Бош директор, GGGI вакили ва GGGI учун тўлиқ ёки тўлиқсиз иш вақти билан банд бўлган ёки тайинланган барча шахсларни англатади;

«GGGI ходимлари» Ассамблеянинг, Кенгаш ва Маслаҳат қўмитасининг барча аъзолари, GGGI мансабдор шахслари (чет элликлар ва фуқаролар ёки Ўзбекистон Республикасида доимий истиқомат қилувчи резидентлар) ва мутахассисларни англатади, аммо маҳаллий соатбай асосида маош олиб ёлланадиган шахслар бундан мустасно;

«GGGI мулки» қаерда жойлашганлигидан ва ким томонидан эгалик қилишидан қатъий назар, GGGIнинг барча мулки ва активларини ҳамда GGGIга тегишли бўлган ёки эгалик қиладиган ёки у томонидан бошқариладиган маблағлар, даромадлар ва ҳуқуқлардан иборатлигини англатади; ва

«Турмуш ўртоғи» ўзаро муносабатларни рўйхатдан ўтказган GGGI ходимларининг умр йўлдошини англатади.

1. Ҳукумат GGGI халқаро юридик шахс сифатидаги халқаро ташкилот эканлигини тан олади.

2. GGGI юридик шахс сифатида (i) шартнома тузиш, (ii) кўчмас ва кўчар мулкка эга бўлиш ва уни тасарруф этиш, ва (iii) судга мурожаат қилиш учун ҳуқуқий лаёқатга эга.

3. GGGI халқаро ташкилотга тегишли бўлган мустақиллик ва фаолият эркинлигига эга.

1. GGGI ҳамда унинг мулки, даромадлари ва активлари қаерда жойлашганлигидан ва ким томонидан эгалик қилинишидан қатъий назар, суд жараёнининг ҳар қандай шаклидан иммунитетга эгадир, аниқ бир ҳолатда ўзининг иммунитетидан воз кечган ҳолатлар бундан мустасно. Агар аниқ ифодаланмаса, иммунитетдан воз кечиш ҳар қандай ижро чораларига татбиқ этилмайди, деб тушунилади.

2. GGGIнинг мулки ва активлари, қаерда жойлашганлигидан ва ким томонидан эгалик қилинишидан ҳамда ижро этувчи, маъмурий, суд ёки қонунчилик ҳаракатлари бўлишидан қатъи назар, қидирув, реквизиция, мусодара қилиш, экспроприация ёки бошқа ҳар қандай аралашувдан иммунитетга эга.

3. GGGI архивлари, қаерда жойлашганлигидан қатъи назар, дахлсиздир.

4. Молиявий назорат, ҳар қандай турдаги тартиб-қоидалар ёки мораторий чекловларига қарамасдан, GGGI ҳар қандай турдаги маблағ ёки валютага эга бўлиши; исталган валютада ҳисоб-рақамларини юритиши; ва унда мавжуд бўлган ҳар қандай валютани бир мамлакатдан иккинчисига эркин ўтказиши ва ўз тасарруфидаги ҳар қандай валютани бошқа валютага эркин конвертация қилиши мумкин.

1. GGGI, унинг активлари, даромадлари ва бошқа мулки қуйидагилардан озод қилинади:

(а) барча тўғридан-тўғри солиқлардан, аниқ кўрсатилган хизматлар учун тўловлар ҳисобланадиганлари бундан мустасно;

(b) GGGI томонидан расмий фойдаланиш учун олиб кирилган ёки экспорт қилинган буюмларга нисбатан ва GGGI томонидан олиб кирилган ёки экспорт қилинган ҳар қандай нашрларга нисбатан импорт ва экспортга қўйилган тақиқ ва чекловлардан, Ўзбекистон Республикасининг қонунчилигига мувофиқ алоҳида рухсат талаб қилинадиган масалалар бундан мустасно; аммо, бундай озод қилиш шарти билан олиб кирилган буюмлар Ўзбекистон Республикаси ҳудудида сотилмайди, Ҳукумат билан келишилган ҳолатлар бундан мустасно.

(c) Ҳукумат белгилаган шартларга риоя қилган ҳолда расмий фойдаланиш учун GGGI томонидан ёки унинг номидан олиб кирилган товарларни импорт қилишда божхона божларидан.

2. GGGI Ўзбекистон Республикасининг солиқ қонунчилигига мувофиқ, GGGIнинг расмий фойдаланиши учун тақдим қилинадиган товарлар ва хизматларга тўланган қўшилган қиймат солиғини қоплаш ҳақида мурожаат қилиши мумкин.

3. GGGI, унинг мансабдор шахслари ва мутахассисларига нисбатан Ўзбекистон Республикасининг меҳнат ва ижтимоий таъминот тўғрисидаги қоидалари қўлланилмайди.

1. Электрон почталар, оддий почта, кабеллар, телеграммалар, телекслар, радиограммалар, телефакс, телефон ва бошқа алоқа воситаларига ҳамда матбуот ва радиога бериладиган маълумот учун матбуот тўловлари бўйича устуворликлар, ставкалар ва устамалар масалаларида GGGIнинг расмий алоқалари учун Ўзбекистон Республикаси томонидан бериладиган режим Ҳукумат томонидан бошқа халқаро ташкилотларга ёки ҳукуматларга, шу жумладан мамлакатда жойлашган дипломатик ваколатхоналарга тақдим қилинадиган режимдан ноқулайроқ бўлиши мумкин эмас.

2. Ўзбекистон Республикаси ҳудудига, унинг ҳудудидан ва унинг ҳудуди орқали ҳар қандай усулларда ёки ҳар қандай шаклда етказиладиган барча хабарлар цензурадан ҳамда ҳар қандай шакллардаги қўлга киритилишлардан ёки уларнинг махфийлигига дахл қилинишидан иммунитетга эга. Бу Ҳукумат ва GGGI ўртасидаги маслаҳатлашувлардан сўнг белгиланадиган тегишли хавфсизлик чораларини кўришни истисно қилмайди.

3. GGGI Ўзбекистон Республикасида кодлардан фойдаланиш, дипломатик курьер ва вализларга тақдим қилинадиган иммунитет ва имтиёзлардан кам бўлмаган курьер орқали ёки муҳрланган вализларда ёзишмалар ва бошқа хабарларни юбориш ва қабул қилиш ҳуқуқига эга. Вализлар кўзга кўринадиган GGGI эмблемаларига эга бўлиши ва фақат расмий фойдаланиш учун мўлжалланган ҳужжатлар ёки буюмлардан иборат бўлиши лозим ҳамда курьер GGGI томонидан берилган курьерлик гувоҳномаси билан таъминланиши лозим.

1. Ҳукумат билан маслаҳатлашган ҳолда, GGGI Ўзбекистон Республикасида мажлислар ўтказиш ҳуқуқига эга.

2. GGGI ва унинг ходимлари ушбу модданинг 1-бандига мувофиқ ўтказилган йиғилишлар, муҳокама ва қарорларнинг тўлиқ эркинлигига эга. Ҳукумат Ўзбекистон Республикасида GGGI томонидан ўтказиладиган мажлисларга ҳеч қандай тўсқинлик қилинмаслиги учун барча зарур чораларни кўриши лозим.

3. GGGI томонидан ташкиллаштирилган конференция ёки мажлисга таклиф қилинган ва аккредитациядан ўтган барча шахслар Ўзбекистон Республикасига кириш ва ундан чиқиш ҳуқуқига эга ҳамда мажлис ёки конференция биносига ва ундан транзит ўтишига нисбатан ҳеч қандай тўсқинлик қилинмайди. Уларга тезроқ ҳаракатланиши учун қулайликлар яратилади. Зарур ҳолларда, амалдаги қонунчиликка мувофиқ, визалар ва кириш рухсатномалари бепул берилади.

GGGI ўз биноси ва транспорт воситаларида ўз байроғини ва/ёки бошқа белгиларни қўйиш ҳуқуқига эга.

1. GGGI аъзолари вакилларининг ҳамда GGGI Ассамблеяси, Кенгаши ва Маслаҳат қўмитаси таркибига кирувчи бошқа шахслар ўз вазифаларини бажариш вақтида ва GGGI томонидан ўтказиладиган мажлислар жойига бориш ва қайтиш сафарлари давомида қуйидаги имтиёз ва иммунитетларга эга:

(а) шахсан ҳибсга олиниш ёки ушланишдан иммунитет ҳамда улар томонидан расмий равишда айтилган ёки ёзилган сўзларга ҳамда бажарилган барча ҳаракатларга нисбатан суд иши қўзғатишдан иммунитет (суд иши қўзғатишдан иммунитет юқорида кўрсатилган шахсларга нисбатан улар томонидан йўл ҳаракати қоидалари бузилса ёки уларга тегишли бўлган ёки бошқарувида бўлган автотранспорт воситалари туфайли зарар етказилганда қўлланилмайди);

(b) турмуш ўртоқлари ва қарамоғидаги болалари билан биргаликда, иммиграция билан боғлиқ чекловлар ва чет элликларни рўйхатдан ўтказиш талабларидан иммунитет;

(c) вақтинча расмий хизмат сафарларида хорижий ҳукуматларнинг вакилларига тақдим қилинадиган валюта ва пул айирбошлаш билан чекловларига нисбатан бир хил қулайликлар; ва

(d) агар Ассамблея, Кенгаш ва Маслаҳат таркибига кирувчи бошқа шахслар GGGI мажлисларида иштирок этиш учун ташриф буюришлари лозим бўлса, GGGI томонидан берилган визалар бўйича барча аризалар Ўзбекистон Республикаси томонидан кўриб чиқилади.

2. 8(1)-модданинг қоидалари Ўзбекистон Республикасининг вакиллари ва фуқароларига нисбатан қўлланилмайди.

3. GGGI Ҳукуматга мунтазам равишда ушбу модданинг қоидалари қўлланиладиган мансабдор шахсларнинг исмларини маълум қилади.

1. GGGI мансабдор шахслари:

(а) шахсан ҳибсга олиниш ёки ушланишдан иммунитет ҳамда улар томонидан расмий равишда айтилган ёки ёзилган сўзларга ҳамда бажарилган барча ҳаракатларга нисбатан суд иши қўзғатишдан иммунитет, бунда иммунитет уларга нисбатан GGGI мансабдор шахслари бўлмасалар ҳам қўлланишда давом этади (суд иши қўзғатишдан иммунитет юқорида кўрсатилган шахсларга нисбатан улар томонидан йўл ҳаракати қоидалари бузилса ёки уларга тегишли бўлган ёки бошқарувида бўлган автотранспорт воситалари туфайли зарар етказилганда қўлланилмайди);

(b) GGGI томонидан уларга тўланадиган иш ҳақи, нафақа ва мукофот пулларига нисбатан ёки солиққа тортишнинг барча шаклларидан озод қилинади;

(c) ижтимоий таъминот тўғрисидаги қоидалари қўлланилмайди;

(d) турмуш ўртоқлари ва қарамоғидаги болалари билан биргаликда, иммиграция билан боғлиқ чекловлар ва чет элликларни рўйхатдан ўтказишдан иммунитет, Ўзбекистон Республикаси фуқаролари бундан мустасно;

(e) пул айирбошлашга нисбатан дипломатик ваколатхоналарнинг тегишли даражадаги мансабдор шахсларига тақдим қилинадиган бир хил имтиёзлардан фойдаланиш;

(f) турмуш ўртоқлари ва қарамоғидаги болалари билан биргаликда, халқаро инқирозлар даврида дипломатик ваколатхоналарнинг тегишли даражадаги мансабдор шахслари каби ватанига қайтиб чиқиб кетиш учун имконият берилади, Ўзбекистон Республикаси фуқаролари бундан мустасно;

(g) Ўзбекистон Республикасидаги Офисда ўз лавозимини биринчи марта эгаллаган вақтда мебеллари, рўзғор буюмлари ва ашёларини божсиз олиб кириш ҳуқуқига эга; ва

(h) Ўзбекистон Республикасидаги Офисда ўз лавозимини эгаллаган вақтда, Ҳукумат белгилайдиган шартларга риоя қилган ҳолда, шахсий фойдаланиш учун транспорт воситасини божсиз олиб кириш ҳуқуқига эга.

2. GGGI мансабдор шахслари ҳарбий хизмат ўташ мажбуриятидан озод қилинади, агар Ўзбекистон Республикаси фуқаролари ёки доимий резидентлар бўлган мансабдор шахсларга нисбатан бундай озодлик GGGI мансабдор шахслари билан чекланса, ўз вазифалари туфайли, GGGI Бош директори томонидан тузилган ва Ҳукумат томонидан тасдиқланган рўйхатга киритилади. Агар GGGIнинг бошқа мансабдор шахслари ҳарбий хизмат ўташ учун чақирилган бўлса, Ҳукумат GGGI сўровига кўра, асосий ишларини давом эттиришга тўсқинлик қилмаслик учун бундай мансабдор шахсларни ҳарбий хизматга чақиришни вақтинча кечиктириши мумкин.

3. GGGI Ҳукуматнинг тегишли органлари билан одил судловни тўғри амалга оширишда ҳамкорлик қилади ва ушбу моддада белгиланган имтиёз, иммунитет ва қулайликлар билан боғлиқ ҳар қандай суиистеъмолликлар содир бўлишини бартараф қилади.

(1) GGGI мутахассислари, ўз вазифаларини самарали бажариш учун зарур бўлган, шу жумладан ўз хизматлари билан боғлиқ сафарлар давомида, қуйидаги имтиёз ва иммунитетларга эга:

(а) хизмат вазифаларини бажариши давомида шахсан ҳибсга олиниш ёки ушланишдан иммунитет ҳамда улар томонидан айтилган ёки ёзилган сўзларга ҳамда бажарилган барча ҳаракатларга нисбатан суд иши қўзғатишдан иммунитет, бундай иммунитет уларга нисбатан GGGI билан шартномавий муносабатларда бўлмасалар ҳам қўлланишда давом этади (суд иши қўзғатишдан иммунитет юқорида кўрсатилган шахсларга нисбатан улар томонидан йўл ҳаракати қоидалари бузилса ёки уларга тегишли бўлган ёки бошқарувида бўлган автотранспорт воситалари туфайли зарар етказилганда қўлланилмайди);

(b) вақтинча расмий хизмат сафарларида хорижий ҳукуматларнинг вакилларига тақдим қилинадиган валюта ва пул айирбошлаш билан чекловларига нисбатан бир хил қулайликлар; ва

(c) турмуш ўртоқлари ва қарамоғидаги болалари билан биргаликда, иммиграция билан боғлиқ чекловлар ва чет элликларни рўйхатдан ўтказишдан иммунитет, Ўзбекистон Республикаси фуқаролари бундан мустасно;

1. Ҳукумат билан келишувга мувофиқ GGGI Ўзбекистон Республикасида ўз офисини (Офис) очиши мумкин.

2. Офисда тайинланган GGGI мансабдор шахслари ва мутахассислари хизмат қилади.

3. Агар ушбу Битимда бошқача қоида назарда тутилмаган бўлса, Офисда Ўзбекистон Республикаси қонунлари қўлланилади ва Ўзбекистон Республикаси судлари Офис томонидан бажариладиган ҳаракатлар устидан юрисдикцияга эга.

4. Офис биноси дахлсиздир ва GGGI назорати остида ва тасарруфида ҳисобланади. Ўзбекистон Республикаси ҳокимият органлари GGGI розилиги ва у билан келишилган шартларсиз вазифаларини бажариш учун Офис биносига киришга ҳақли эмас. GGGI ва Ўзбекистон Республикаси ҳокимият органлари ёнғинни олдини олиш, санитария қоидалари ёки фавқулодда вазиятлар туфайли GGGIнинг олдиндан розилигисиз идоранинг биносига қайси ҳолатларда ва қандай тартибда киришлари мумкинлигини келишиб оладилар.

5. GGGI Ўзбекистон Республикасида ҳамда унинг ташқарисида Офис билан алоқаларга кўмаклашиш мақсадида зарур бўладиган тўғридан-тўғри телекоммуникация воситалари ва бошқа алоқалар ҳамда алоқа узатиш воситаларини Ўзбекистон Республикасида ўрнатиш ва фойдаланиш ҳуқуқига эга.

6. GGGI ўз фаолиятини тўлиқ ва мустақил амалга ошириш ва вазифаларини бажариш учун Офис биносида амалда бўладиган қоида ва низомлар ишлаб чиқиш ҳуқуқига эга.

7. GGGI Офис биносида мажлислар ўтказиш ҳуқуқига эга.

8. Офис биноси GGGI мақсадлари ва вазифаларига мос тарзда фойдаланилиши лозим. GGGI Офиси биноси одил судловдан яшириниб юрган шахслар ёки экстрадиция қилиниши лозим бўлган шахслар ёхуд суд иши ёки суд процессида иштирок этишдан қочиб юрган шахслар учун бошпанага айланишини бартараф этиши лозим.

9. Ўзбекистон Республикасининг тегишли ҳокимият органлари Офис жойлашган бинонинг осойишталиги рухсатсиз киришга уринган ёки Офис яқинидаги ҳудудларда ноқулайликлар туғдираётган шахслар томонидан бузилмаслигини лозим даражада таъминлайдилар.

10. Агар GGGI сўров билан мурожаат қилса, Ўзбекистон Республикасининг тегишли органлари Офисда ҳуқуқ-тартиботни сақлаш ва ҳуқуқбузарларни четлаштириш учун ҳуқуқни муҳофаза қилувчи органлар ходимлари билан таъминлайди.

1. Ҳукумат миллатидан қатъий назар, қуйидаги шахсларнинг Ўзбекистон Республикасига кириши, ундан чиқиб кетиши ва ҳаракатланиши эркинлигини таъминлаш мақсадида ҳамда Офисга тайинланган шахсларнинг Ўзбекистон Республикасида истиқомат қилиши учун чекловларсиз барча чораларни кўради:

(а) ўз вазифаларини бажариш вақтида ва GGGI томонидан ўтказиладиган мажлислар жойига бориш ва қайтиш билан боғлиқ хизмат сафарлари давомида GGGI аъзолари вакиллари ва Ассамблея, Кенгаш ва Маслаҳат қўмитаси таркибига кирувчи бошқа шахслар, Ўзбекистон Республикаси фуқаролари бундан мустасно;

(b) GGGI мансабдор шахслари, Ўзбекистон Республикаси фуқаролари бундан мустасно;

(c) Мутахассислар, Ўзбекистон Республикаси фуқаролари бундан мустасно;

(d) юқорида кўрсатилган шахсларнинг турмуш ўртоғи ва қарамоғидаги болалари.

2. Ҳукумат ўз элчихоналари, ваколатхоналари, консуллик муассасалари ва Ўзбекистон Республикасининг манфаатларини намоён қиладиган бошқа идораларга, зарур ҳолларда, 12-моддада белгиланган шахсларга тўловларсиз ва уларнинг одатда талаб қилинадиган шахсий иштирокисиз виза бериш тўғрисида кўрсатмалар беради.

1. Ушбу Битим билан шахсларга берилган имтиёз ва иммунитетлар GGGI манфаати учун тақдим қилинади ва шахсий манфаатлар учун берилмайди.

Иммунитет адолат қарор топишига тўсқинлик қилиши ва ундан GGGI манфаатларига зарар етказмасдан воз кечиш мумкин бўлган ҳолатларда қуйидаги ҳокимият органлари қуйидаги шахсларнинг иммунитетидан воз кечиш ҳуқуқига ва мажбуриятига эга:

(а) GGGI аъзолари — Ассамблея ва Кенгашдаги вакилларига нисбатан;

(b) Ассамблея — GGGI Бош директорига нисбатан;

(c) Кенгаш — Кенгаш ёки Маслаҳат қўмитасининг аъзолари сифатида хизмат қиладиган бўлган мутахассислар ёки нодавлат субъектларига нисбатан; ва

(d) GGGI Бош директори — GGGI мансабдор шахслари (ўзидан ташқари), мутахассислар ва GGGIнинг ўзига нисбатан.

2. Барча ҳолларда воз кечиш аниқ ёзма равишда амалга оширилиши лозим.

3. Ушбу Битимга мувофиқ имтиёз ва иммунитетлардан фойдаланадиган барча шахслар, уларнинг имтиёзлари ва иммунитетларига зарар етказмаган ҳолда, Ўзбекистон Республикаси қонунчилигини ҳурмат қилиши лозим.

GGGI Офиси ва унинг Ўзбекистон Республикаси фуқаролари бўлмаган ходимлари, Ўзбекистон Республикасида ўрнатилган тартибга мувофиқ, Ўзбекистон Республикаси Ташқи ишлар вазирлигида аккредитация қилинади.

1. Ушбу Битимни талқин қилиш ёки қўллашдан келиб чиқадиган барча келишмовчиликлар маслаҳатлашувлар, музокаралар ёки бошқа келишилган тартибда ҳал қилинади.

2. Агар келишмовчиликлар 15-модданинг 1-бандига биноан Томонлардан бирининг ёзма хабарномасидан сўнг уч ой ичида ҳал этилмаса, ҳар икки Томон келишмовчиликни 15-модданинг 3 — 5-бандларида ўрнатилган тартибга мувофиқ ҳакамлик трибунали (арбитраж) томонидан қабул қилинадиган қарор асосида кўриб чиқилиши ҳақида мурожаат қилиши мумкин.

3. Ҳакамлик трибунали уч ҳакамдан иборат бўлади: ҳар бир Томон биттадан ҳакам танлайди, раислик қилувчи учинчи ҳакам эса бошқа икки ҳакам томонидан танланади. Агар бир Томон бошқа Томон ҳаками тайинланганидан сўнг уч ой ичида ўз ҳакамини танламаса, иккинчи ҳакам БМТ Халқаро судининг раиси томонидан тайинланади. Агар дастлабки икки ҳакам, ҳакам тайинланган охирги санадан бошлаб уч ой ичида учинчи ҳакам бўйича келишувга эриша олмаса, учинчи ҳакам иккала Томоннинг сўрови билан БМТ Халқаро судининг раиси томонидан тайинланади.

4. Агар Томонлар бошқача келишмаса, ҳакамлик трибунали ўз тартиб-қоидаларини белгилайди ва харажатлар Томонлар тарафидан трибунал баҳолагандан сўнг қопланади. Арбитраж иши инглиз тилида юритилади.

5. Кўпчилик овоз билан ҳал этиладиган ҳакамлик трибунали ушбу Битим қоидалари ва халқаро ҳуқуқнинг амалдаги қоидалари асосида келишмовчилик бўйича қарор қабул қилади. Ҳакамлик трибуналининг қарори Томонлар учун якуний ва мажбурий ҳисобланади.

1. Ушбу Битим қоидалари ҳеч қандай тарзда Ҳукумат билан GGGI ўртасида алоҳида битим билан келишилган ёки келишилиши мумкин бўлган GGGI учун имтиёз, иммунитетлар, истиснолар ёки ҳар хил турдаги кўмак ёки ҳиссаларни чеклаш ёки зарар етказиш тарзида талқин қилинмайди.

2. Ушбу Битим Таъсис этиш Битимининг қоидаларидан ёки GGGI бошқача тарзда эга бўлиши ёки эгалик қилиши мумкин бўлган ҳуқуқ ёки мажбуриятларни бекор қилиши ёки четга чиқиши тарзда талқин қилинмайди.

3. Ҳукумат ва GGGI ушбу Битим доирасида зарур бўлиши мумкин бўлган қўшимча битимларни тузишлари мумкин.

Ушбу Битим Томонлар имзолаган кундан бошлаб кучга киради.

Ушбу Битим номаълум муддатга тузилади ва Томонлардан бири бошқа Томонни ушбу Битимни тугатиш нияти тўғрисидаги ёзма хабарномасини олган кундан бошлаб олти ой муддат ўтгунга қадар амал қилади.

Тошкент шаҳрида 2021 йил 22 майда ва Сеул шаҳрида 2021 йил 25 майда икки асл нусхада, ҳар бири ўзбек ва инглиз тилларида тузилди, барча матнлар тенг аутентикдир.

Ушбу Битим қоидаларини талқин қилишда келишмовчиликлар юзага келганда, инглиз тилидаги матн устувор ҳисобланади.