Ўзбекистон Республикаси ва Италия Республикаси, бундан кейин — Аҳдлашувчи Томонлар деб аталувчилар,

Бирлашган Миллатлар Ташкилоти Низомининг мақсад ва принципларига ва халқаро ҳуқуқнинг бошқа нормаларига амал қилиб,

Европа Иттифоқи, НАТО, Европада хавфсизлик ва ҳамкорлик ташкилоти (бундан кейин — ЕХҲТ деб аталади) ва янги Европани қуришга кўмаклашувчи бошқа Европа тизимларининг аҳамиятини англаган ҳолда,

Хельсинки Якунловчи акти ва янги Европа учун Париж Хартиясининг муҳимлигини тан олиб,

Марказий Осиёда, Европада ва бутун дунёда тинчлик ва хавфсизликни қўллаб-қувватлаш мақсадида икки мамлакат халқлари ўртасидаги дўстона муносабатларни мустаҳкамлашга катта аҳамият бериб,

икки томонлама асосда, шунингдек иккала мамлакат иштирок этадиган кўп томонлама анжуманлар доирасида ҳамкорликни ривожлантиришни хоҳлаб,

1996 йил 21 июнда Флоренцияда имзоланган Шериклик ва ҳамкорлик тўғрисидаги Битимда белгиланган Ўзбекистон Республикаси ва Европа Иттифоқи ўртасидаги алоқаларни чуқурлаштириш мақсадида,

1997 йил 3 майда Тошкентда имзоланган Ўзбекистон Республикаси ва Италия Республикаси ўртасида «Ўзаро муносабатлар принциплари тўғрисида» Қўшма декларация, Ўзбекистон Республикаси ва Италия Республикаси ўртасида «Иқтисодий ҳамкорлик тўғрисида» Қўшма декларация ва Ўзбекистон Республикаси Ҳукумати ва Италия Республикаси Ҳукумати ўртасида маданий ва илмий ҳамкорлик тўғрисида Битим қоидаларини эътиборга олиб,

қуйидагилар тўғрисида аҳдлашиб олдилар:

Аҳдлашувчи Томонлар ўз муносабатларида демократия, инсон ҳуқуқлари ва асосий эркинликларини ҳурмат қилиш принципларига асосланадилар.

Аҳдлашувчи Томонлар ўз муносабатларини суверенитет ва мустақиллик, давлатларнинг тенг ҳуқуқлилиги, бир-бирларининг ички ишларига аралашмаслик, куч ишлатмаслик ёки куч ишлатиш билан қўрқитмаслик, низоларни тинч йўл билан ҳал қилиш, мавжуд давлат чегараларининг бузилмаслиги, ҳудуд яхлитлиги ва улар ҳаракатларининг халқаро ҳуқуқ нормаларига мос бўлиши принципларига амал қилган ҳолда ривожлантирадилар.

Аҳдлашувчи Томонлар ўзаро қизиқиш уйғотадиган икки томонлама ва кўп томонлама масалалар бўйича маслаҳатлашишлар ўтказадилар.

Аҳдлашувчи Томонларнинг ташқи ишлар вазирликлари вақти-вақти билан бўладиган алоқаларни амалга оширадилар.

Аҳдлашувчи Томонлар, шунингдек икки мамлакат парламентлари, марказий ва маҳаллий органлари ўртасидаги, хусусан, тегишли минтақа ва шаҳарлар ўртасидаги, шунингдек икки давлат ижтимоий ташкилотлари ва фуқаролари ўртасидаги алоқаларни ривожлантиришга кўмаклашадилар.

Аҳдлашувчи Томонлар ўзлари иштирокчи бўлган ёки иштирокчи бўладиган халқаро ташкилотлар доирасида ҳамкорлик қиладилар.

Аҳдлашувчи Томонлар Евроатлантик шериклик Кенгашининг фаолиятига кўмаклашиш ва ЕХҲТ ролини мустаҳкамлаш йўли билан минтақавий ва дунё миқёсида хавфсизлик масалаларига алоҳида эътиборни қаратадилар.

Тинчлик ва хавфсизликни таъминлаш мақсадида, айниқса ядро қуролини тарқатмаслик қоидаларини кучайтириш ва шунингдек оддий қурол-аслаҳаларнинг айланиши устидан назоратни яна ҳам кучайтириш йўли билан, ялпи қирғин қуроллари тарқатишнинг олдини олиш муҳим эканлигини эътироф этиб, Аҳдлашувчи Томонлар, имкони борича келишилган шаклда, қуролсизланиш ва ядро қуролини тарқатмаслик жараёнини ривожлантиришга қаратилган махсус халқаро анжуманлар доирасида ҳамкорлик қилиш мажбуриятини оладилар.

Аҳдлашувчи Томонларнинг ҳар бири ўз хавфсизлигини таъминлаш учун воситаларни танлайди, бунда иккинчи Аҳдлашувчи Томон манфаатлари ҳам ҳисобга олинади.

Аҳдлашувчи Томонлар минтақавий характердаги механизмлардан, шунингдек БМТ Низомида ва Бирлашган Миллатлар Ташкилотининг тегишли конвенцияларида кўзда тутилган механизмлардан фойдаланган ҳолда ҳуқуқнинг устуворлиги, демократия, сиёсий плюрализм ва инсон ҳуқуқларини ҳимоя қилиш принципларини мустаҳкамлаш мақсадидаги ҳамкорликка ҳам алоҳида эътиборни қаратадилар.

Аҳдлашувчи Томонлар ушбу Шартноманинг преамбуласида эслатиб ўтилган Ўзбекистон Республикаси ва Италия Республикаси ўртасида «Иқтисодий ҳамкорлик тўғрисида»ги Қўшма декларацияда кўзда тутилган усул ва шакллар воситасида ўзаро ҳурмат, тенг ҳуқуқлилик ва ўзаро фойда олиш принциплари асосида иқтисодий ҳамкорликни ривожлантирадилар.

Ушбу Шартноманинг преамбуласида эслатиб ўтилган Ўзбекистон Республикаси Ҳукумати ва Италия Республикаси Ҳукумати ўртасида маданий ва илмий ҳамкорлик тўғрисидаги Битимдан келиб чиқиб, Аҳдлашувчи Томонлар икки мамлакат ўртасида маданий алмашувни рағбатлантирадилар, шу йўсинда ўз ҳудудларида иккинчи мамлакатнинг адабиёти, санъати ва маданиятини ўқитиш ва тарқатиш йўли билан ўз халқларини яқинлаштирадилар.

Аҳдлашувчи Томонлар илғор техника ва технологияларни жорий қилиш, олимлар, илмий-тадқиқот институтлари, илмий-ишлаб чиқариш бирлашмаларининг бевосита алоқаларини ва биргаликдаги ташаббусларини қўллаб-қувватлаш учун фундаментал ва амалий фанлар соҳасида самарали ҳамкорликка кўмаклашадилар. Шу мақсадда улар қўшма дастур ва лойиҳаларни амалга оширишни, қўшма корхоналар тузишни, олимлар ва мутахассислар билан алмашишни ва ҳамкорликнинг бошқа шаклларини рағбатлантирадилар.

Аҳдлашувчи Томонлар аҳоли соғлиғини сақлаш, тиббиёт фани ва амалиётини ривожлантириш ва касалликларнинг олдини олиш соҳасидаги ҳамкорликни қўллаб-қувватлайдилар.

Аҳдлашувчи Томонлар ахборот, тажриба, қўшма нашрлар ва экспертлар ташрифи билан алмашиш воситасида архелогик, бадиий ва маданий меросни сақлаш, муҳофаза қилиш, фойдаланиш ва қайта тиклаш соҳасидаги экспертлар ва ваколатли органлар ҳамкорлигига кўмаклашадилар.

Аҳдлашувчи Томонларнинг ҳар бири ўз ҳудудида ишлаётган бошқа Аҳдлашувчи Томоннинг археологик экспедициялари фаолиятига ҳам кўмаклашади.

Аҳдлашувчи Томонлар бир Аҳдлашувчи Томон ҳудудида бўлиш қоидаларини бузган Аҳдлашувчи Томонлардан бирининг фуқароларини қайтариб бериш тўғрисида махсус битимлар тузиш мақсадида музокаралар олиб бориш мажбуриятини олган ҳолда, иммиграция устидан назорат олиб бориш, шунингдек ноқонуний иммиграция ва унга дахлдор жиноий ташкилотларга қарши курашиш соҳасида самарали ҳамкорликни қўллаб-қувватлайдилар.

Аҳдлашувчи Томонлар халқаро ҳуқуқ нормалари ва ички қонунчиликка мувофиқ икки томонлама ва кўп томонлама асосда халқаро уюшган жиноятчилик; гиёҳванд моддаларни ташиш, жиноий фаолиятдан келган даромадларни легализация қилиш; терроризм, шу жумладан фуқаролик авиацияси ва транспортнинг бошқа турлари хавфсизлигига қарши қаратилган ноқонуний ҳаракатлар; гиёҳванд ва психотроп моддаларнинг ноқонуний айланиши; маданий ва тарихий бойликларни ноқонуний олиб чиқиш ва жиноятнинг бошқа турларига қарши курашда ҳамкорлик қиладилар. Шу мақсадда миллий қонунчиликка мувофиқ Аҳдлашувчи Томонлар тажриба ва оператив ахборот билан алмашадилар, шу йўналишда биргаликда чора-тадбирлар ўтказадилар.

Аҳдлашувчи Томонлар ҳуқуқий ахборот билан алмашиш ва ҳуқуқий актларни қўллаш соҳасида ҳамкорлик қиладилар.

Аҳдлашувчи Томонлар ушбу Шартнома қоидаларини амалга ошириш учун зарур бўлган, шунингдек ўзаро қизиқиш уйғотадиган бошқа соҳаларда алоҳида битимлар тузиш мақсадида музокаралар олиб бориш мажбуриятини оладилар.

Аҳдлашувчи Томонлар ушбу Шартномани талқин қилиш ва қўллаш билан боғлиқ масалаларни маслаҳатлашишлар ва музокаралар йўли билан ҳал қиладилар.

Ушбу Шартнома ратификация қилиниши лозим ва ратификация ёрлиқлари билан алмашилган куни кучга киради.

Аҳдлашувчи Томонлар, ўзаро келишган ҳолда, ушбу Шартномага қўшимча ва ўзгартишлар киритишлари мумкин, улар ушбу Шартноманинг ажралмас қисми бўлиб ҳисобланадиган тегишли — протоколлар билан расмийлаштирилади. Бу протоколлар 15-модданинг қоидаларига мувофиқ кучга киради.

БМТ Низомининг 102-моддасига мувофиқ ушбу Шартнома БМТнинг Котибиятида рўйхатдан ўтказилиши лозим.

Ушбу Шартнома ўн йиллик муддатга тузилади ва унинг амал қилиши ўз-ўзидан кейинги беш йиллик муддатларга узаяверади.

Ушбу Шартнома исталган вақтда денонсация қилиниши мумкин ва унинг амал қилиши бошқа Аҳдлашувчи Томон хабардор қилингандан олти ой ўтгандан сўнг тўхтатилади.

Тошкент шаҳрида 1997 йил 17 сентябрда икки нусхада, ҳар бири ўзбек ва итальян тилларида имзоланди, барча матнлар бир хил кучга эга.