Қайд этилсинки, қайта-қайта кўрсатмалар ва топшириқлар берилаётганлигига қарамай, қиймат ва моддий балансларнинг тайёрланаётган лойиҳалари сифати ва асосланишига Ўзбекистон Республикаси Вазирлар Маҳкамасининг комплекслари, ахборот-таҳлил департаментлари, тегишли вазирликлар, идоралар ва хўжалик бирлашмалари раҳбарлари томонидан зарур даражада эътибор берилмаяпти.

Ишларнинг бундай аҳволи 2006 йилга нефть ва газ конденсати, табиий газ, нефть маҳсулотлари ресурслари ва уларни тақсимлаш балансларини тасдиқлашда асосли танбеҳлар берилишига, шунингдек, 2006 йилда пахта толаси ишлаб чиқариш ва етказиб бериш балансини кўриб чиқиш чўзилиб кетишига олиб келди.

Қиймат ва моддий балансларнинг тасдиқланган параметрлари бажарилиши устидан назорат қилиш расмиятчилик тусини олмоқда, уларнинг бажарилишига тўсқинлик қилаётган сабабларни аниқлаш учун иқтисодиёт тармоқларидаги ишларнинг аҳволи етарлича таҳлил қилинмаяпти, мавжуд муаммоларни бартараф этиш юзасидан тезкорлик билан зарур чора-тадбирлар кўрилиши таъминланмаяпти.

Кўрсатиб ўтилган камчиликларни тугатиш, баланслар лойиҳалари сифатли тайёрланиши учун мансабдор шахсларнинг масъулиятини ошириш, қиймат ва моддий балансларнинг тасдиқланган параметрлари бажарилишининг самарали мониторинги олиб борилишини таъминлаш мақсадида Вазирлар Маҳкамаси қарор қилади:

1. 2006 йилга нефть ва газ конденсати, табиий газ, нефть маҳсулотлари ресурслари ва уларни тақсимлаш, пахта толаси ишлаб чиқариш ва етказиб бериш баланслари лойиҳалари сифатли ишлаб чиқилиши таъминланмаганлиги учун:

Ёқилғи-энергетика комплекси, кимё, металлургия ва машинасозлик масалалари ахборот-таҳлил департаменти мудири Р. М. Мамадалиевга ҳамда Қишлоқ ва сув хўжалиги, қишлоқ хўжалиги маҳсулотларини қайта ишлаш ҳамда истеъмол товарлари масалалари ахборот-таҳлил департаменти мудири вазифасини бажарувчи Ў. И. Барноевга, Қишлоқ ва сув хўжалиги, қишлоқ хўжалиги маҳсулотларини қайта ишлаш ҳамда истеъмол товарлари масалалари ахборот-таҳлил департаменти мудирининг ўринбосари вазифасини бажарувчи Р. Ш. Акбархўжаевга кўрсатиб ўтилсин;

«Ўзбекнефтгаз» миллий-холдинг компанияси раиси А. А. Азизов, «Ўзпахтасаноат» уюшмаси раиси Э. 3. Зикриёев, Иқтисодиёт вазирининг биринчи ўринбосари Ў. Ў. Розуқулов, Иқтисодиёт вазирининг ўринбосари А. X. Салимов қатъий огоҳлантирилсин.

2. 2006 йилга нефть ва газ конденсати, табиий газ, нефть маҳсулотлари ресурслари ва уларни тақсимлаш, пахта толаси ишлаб чиқариш ва етказиб бериш баланслари лойиҳаларини ишлаб чиқишда йўл қўйилган камчиликлар учун Ёқилғи-энергетика комплекси, кимё, металлургия ва машинасозлик масалалари ахборот таҳлил департаментининг етакчи мутахассиси 3. 3. Аброровга, Қишлоқ ва сув хўжалиги, қишлоқ хўжалиги маҳсулотларини қайта ишлаш ҳамда истеъмол товарлари масалалари ахборот-таҳлил департаментининг бош мутахассиси Т. А. Йўлдошевга ҳайфсан берилсин.

3. Қуйидагилар:

қиймат ва моддий балансларнинг тасдиқланган параметрлари бажарилишининг йил чораги ва ойлик жадваллар асосидаги мониторингини олиб бориш;

жадвалларга мувофиқ қиймат ва моддий балансларнинг тасдиқланган кўрсаткичлари бажарилиши ҳар ойда Ўзбекистон Республикаси Вазирлар Маҳкамаси комплекслари раҳбарлари томонидан кўриб чиқилиши ва уларни сўзсиз бажариш юзасидан тегишли чора-тадбирлар кўриш, шунингдек, тегишли вазирликлар, идоралар ва хўжалик бирлашмалари раҳбарлари ва мансабдор шахсларига нисбатан жавобгарлик чора-тадбирларини белгилаш;

жадвалларга мувофиқ балансларнинг тасдиқланган параметрлари бажарилишини йилнинг ҳар чорагида (зарурат бўлганда — ҳар ойда) Ўзбекистон Республикаси Вазирлар Маҳкамаси Президиумида кўриб чиқиш тартиби жорий этилсин.

4. Ўзбекистон Республикаси Вазирлар Маҳкамаси комплекслари раҳбарлари Иқтисодиёт вазирлиги билан биргаликда бир ҳафта муддатда қиймат ва моддий баланслар параметрлари йил чорагида ва ҳар ойда бажарилишининг жадваллари ишлаб чиқилиши ва тасдиқланишини таъминласинлар.

5. Ўзбекистон Республикаси Иқтисодиёт вазирлиги (Розуқулов) манфаатдор вазирликлар, идоралар ва хўжалик бирлашмалари билан биргаликда:

қиймат ва моддий балансларнинг тасдиқланган параметрлари бажарилишининг ҳар ойлик мониторингини;

қиймат ва моддий балансларнинг тасдиқланган параметрлари бажарилиши тўғрисидаги таҳлилий ахборот қолоқликнинг аниқ сабаблари кўрсатилган ҳолда, шунингдек, мавжуд муаммоларни ҳал этишга доир таклифлар билан биргаликда Ўзбекистон Республикаси Вазирлар Маҳкамасига ҳар ойда ҳисобот ойидан кейинги ойнинг 10-кунигача ва ҳар чоракда ҳисобот чорагидан кейинги ойнинг 20-кунигача киритилишини таъминласин.

6. Қиймат ва моддий балансларнинг тасдиқланган параметрлари бажарилишининг йил чораги ва ойлик жадваллар асосидаги мониторингини олиб бориш тартиби тўғрисидаги низом иловага мувофиқ тасдиқлансин.

7. Белгилансинки, тегишли вазирликлар, идоралар ва хўжалик бирлашмалари раҳбарлари, Ўзбекистон Республикаси Вазирлар Маҳкамасининг тегишли ахборот-таҳлил департаментлари мудирлари ва масъул ходимлари қиймат ва моддий балансларнинг тасдиқланган параметрлари жадвалларга мувофиқ ўз вақтида бажарилиши учун шахсан жавоб берадилар.

8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари ва Ўзбекистон Республикаси Вазирлар Маҳкамаси Ижро этувчи аппаратининг бошқарувчиси С.Х. Бекенов зиммасига юклансин.

1. Мазкур Низом қиймат ва моддий балансларнинг тасдиқланган параметрлари бажарилишининг йил чораги ва ойлик жадваллар асосидаги мониторингини олиб бориш тартибини белгилайди.

2. Қиймат ёки моддий баланс тасдиқланган кундан бошлаб бир ҳафта муддатда Ўзбекистон Республикаси Иқтисодиёт вазирлиги манфаатдор вазирликлар, идоралар ва хўжалик бирлашмалари билан биргаликда йил чораги ва ойлар бўйича баланс параметрлари бажарилиши жадвалини ишлаб чиқади ва келишиш учун Ўзбекистон Республикаси Вазирлар Маҳкамасининг тегишли Ахборот-таҳлил департаментига тақдим этади ва у кейинчалик тегишли Комплекс раҳбари томонидан тасдиқланади.

3. Ўзбекистон Республикаси Вазирлар Маҳкамасининг ахборот таҳлил департаментлари жадвал тасдиқланган кундан бошлаб икки кун муддатда уни Ўзбекистон Республикаси Иқтисодиёт вазирлигига ҳамда тегишли вазирликлар, идоралар ва хўжалик бирлашмаларига — балансни ижро этувчиларга юборади.

4. Вазирликлар, идоралар ва хўжалик бирлашмалари — моддий ва қиймат балансларини ижро этувчилар:

йил чораги ва ойлик жадвалларга мувофиқ қиймат ва моддий балансларнинг тасдиқланган параметрлари ўз вақтида бажарилишини таъминлайдилар;

ҳар ойда ҳисобот ойидан кейинги ойнинг 5-кунигача ва ҳар чоракда ҳисобот чорагидан кейинги ойнинг 15-кунигача Ўзбекистон Республикаси Иқтисодиёт вазирлигига қолоқлик сабабларини батафсил кўрсатган, мавжуд муаммоларни ва уларни ҳал этишга доир таклифларни баён этган ҳолда қиймат ва моддий балансларнинг тасдиқланган параметрлари жадвалга мувофиқ бажарилиши тўғрисида батафсил ахборот тақдим этадилар.

5. Ўзбекистон Республикаси Иқтисодиёт вазирлиги:

вазирликлар, идоралар ва хўжалик бирлашмаларининг қиймат ва моддий балансларнинг тасдиқланган параметрлари чораклик ва ойлик жадвалларга мувофиқ бажарилиши тўғрисидаги ахборотини ҳар ойда умумлаштиради ва таҳлил қилади, прогноз бажарилишига тўсқинлик қилаётган мавжуд муаммоларни аниқлайди, уларни бартараф этиш юзасидан таклифларни ишлаб чиқади;

ойлик жадваллар бажарилишини ўрганиб чиқиш натижалари бўйича ҳисобот ойидан кейинги ойнинг 10-кунигача, шунингдек, йил чораклари жадваллари бажарилишини ўрганиб чиқиш натижалари бўйича ҳисобот чорагидан кейинги ойнинг 20-кунигача бўлган муддатда қолоқликнинг аниқ сабабларини, шунингдек, мавжуд муаммоларни ҳал этишга доир таклифларни кўрсатган ҳолда Ўзбекистон Республикаси Вазирлар Маҳкамасининг тегишли Ахборот-таҳлил департаментига батафсил ахборот киритади.

6. Ўзбекистон Республикаси Вазирлар Маҳкамасининг ахборот-таҳлил департаментлари:

Ўзбекистон Республикаси Иқтисодиёт вазирлиги томонидан тақдим этилган ахборотни кўриб чиқади ва таҳлил этади;

ҳар ойнинг 15-кунигача бўлган муддатда Ўзбекистон Республикаси Вазирлар Маҳкамаси комплексларининг тегишли раҳбарлари кўриб чиқиши учун қиймат ва моддий балансларнинг тасдиқланган параметрлари ойлик жадвалларга мувофиқ бажарилиши тўғрисидаги материаллар тайёрланишини ва киритилишини таъминлайди;

қиймат ва моддий балансларнинг тасдиқланган параметрлари бажарилишидаги қолоқликнинг сабаблари Ўзбекистон Республикаси Вазирлар Маҳкамаси комплекслари раҳбарларининг кўрсатмалари бўйича тегишли вазирликлар, идоралар ва хўжалик бирлашмаларининг раҳбарлари ва мансабдор шахслари иштирокида муҳокама қилинишини ташкил этади;

йил чораги жадваллари (зарурат бўлганда — ойлик жадваллар) бажарилиши тўғрисидаги материалларни Ўзбекистон Республикаси Вазирлар Маҳкамасининг Президиумида кўриб чиқиш учун тайёрлайди;

қиймат ва моддий балансларнинг тасдиқланган параметрлари бажарилишида қолоқликка йўл қўяётган вазирликлар, идоралар ва хўжалик бирлашмалари раҳбарлари Ўзбекистон Республикаси Вазирлар Маҳкамаси Президиумининг мажлисида иштирок этишини таъминлайди.

7. Қиймат ва моддий балансларнинг тасдиқланган параметрлари Ўзбекистон Республикаси Вазирлар Маҳкамаси Комплекси Раҳбари ҳузуридаги кенгашларда ва Ўзбекистон Республикаси Президиуми мажлисларида кўриб чиқилиши натижалари бўйича тасдиқланган параметрлар сўзсиз бажарилишини таъминлаш юзасидан тегишли чора-тадбирлар кўрилади, тегишли вазирликлар, идоралар ва хўжалик бирлашмалари раҳбарлари ва мансабдор шахсларининг жавобгарлиги даражаси белгиланади.