“Turizm toʻgʻrisida”gi Oʻzbekiston Respublikasining Qonuniga, Oʻzbekiston Respublikasi Vazirlar Mahkamasining 2004-yil 28-iyuldagi “Oʻzbekturizm” milliy kompaniyasi faoliyatini yanada takomillashtirish toʻgʻrisida”gi 360-sonli qarori va turizmga taalluqli boʻlgan boshqa amaldagi meʼyoriy hujjatlarga muvofiq hamda Oʻzbekiston Respublikasiga chet ellik turistlarni kirib kelishi va Oʻzbekiston Respublikasi fuqarolarini chet elga sayyoh sifatida safar qilish toʻgʻrisidagi qoidalarini tartibga solish, ularning xavfsizligini taʼminlash maqsadida “Oʻzbekturizm” milliy kompaniyasi, Oʻzbekiston Respublikasi Milliy xavfsizlik xizmati, Ichki ishlar vazirligi va Favqulodda vaziyatlar vazirligi qaror qiladi:

1. “Sayyohlarning Oʻzbekiston Respublikasiga kelishi va ketishi tartibi toʻgʻrisidagi” Nizom ilovaga muvofiq tasdiqlansin.

2. Oʻzbekiston Respublikasi Adliya vazirligi tomonidan 2000-yil 7-mart, 908-son bilan roʻyxatga olingan “Turistik guruhlarni xorijga yuborishning vaqtinchalik tartibi” va 2004-yil 19-may, 1357-son bilan roʻyxatga olingan “Oʻzbekiston Respublikasining turistik tashkilotlari tomonidan chet ellik turistlarni qabul qilish qoidalarini tasdiqlash toʻgʻrisida”gi qarorlar bekor qilinsin.

3. Mazkur qaror Oʻzbekiston Respublikasi Adliya vazirligida davlat roʻyxatidan oʻtgan kundan boshlab 10 kundan keyin kuchga kiradi.

Mazkur Nizom Oʻzbekiston Respublikasi Konstitutsiyasi, Oʻzbekiston Respublikasining “Turizm toʻgʻrisida”gi Qonuni va Oʻzbekiston Respublikasi Vazirlar Mahkamasining 2004-yil 28-iyuldagi 360-son qaroriga muvofiq, turizmga taalluqli boshqa amaldagi meʼyoriy hujjatlarga muvofiq hamda Oʻzbekiston Respublikasida turistik ekskursiyalarni amalga oshirish vaqtida kafolatlangan xizmatlar koʻrsatish va sayyohlarni chet el safariga borishlarini rasmiylashtirish tartibini hamda chet ellik sayyohlarni qabul qilish jarayonida va Oʻzbekiston Respublikasi fuqarolarining chet el safarlariga borishi chogʻida huquqlarini himoya qilish, xavfsizliklarini taʼminlash, turar joylarini kafolatlanishi hamda chet el safaridan oʻz vaqtida qaytishlari maqsadida ishlab chiqilgan.

1. Mulkchilik shaklidan qatʼi nazar, turistik tashkilotlar Oʻzbekiston Respublikasi hududiga kirib kelayotgan chet ellik sayyohlar haqidagi ilovaga muvofiq maʼlumotnomani ular kirib kelishlaridan 5 kun oldin “Oʻzbekturizm” milliy kompaniyasiga taqdim etadilar.

2. Maʼlumotnomada quyidagilar koʻrsatilishi lozim:

a) kirib kelayotgan sayyohlar soni, ular qaysi davlatdan kelayotganligi va qabul qilayotgan tashkilotdan hamroh boʻlib boruvchi shaxs toʻgʻrisida maʼlumot;

b) transport vositasining davlat raqami;

v) Oʻzbekiston hududida yashash va ovqatlanish joylari koʻrsatilgan holda, sayyohlarning harakat qilish marshrut va muddatlari.

3. Sayyohlarni qabul qiluvchi turistik tashkilotlar sayyohlar xavfsizligini taʼminlash va sodir boʻlishi mumkin boʻlgan baxtsiz hodisalarning oldini olish maqsadida quyidagilarni amalga oshiradi:

a) aeroport, vokzal va boshqa kirish joylarida chet ellik sayyohlarni kutib olish, maʼlumotnomada koʻrsatilgan mehmonxonalarga joylashtirish va tegishli rasmiylashtirish ishlarini amalga oshirish;

b) barcha yoʻnalishlarda sayohat tugaguncha sayyohlarni kuzatib borish;

v) sayyohlarni respublika hududida belgilangan muddat davomida boʻlishi va belgilangan muddat tugagandan soʻng respublika hududidan oʻz vaqtida chiqib ketishlarini taʼminlash;

g) xavf-xatar manbalari boʻlgan hududlarga chet ellik sayyohlarni olib chiqishlaridan oldin, Oʻzbekiston Respublikasi Favqulodda vaziyatlar vazirligining tegishli boshqarmalaridan baxtsiz hodisalar yoki xavf-xatarlar kelib chiqishi mumkin boʻlishi yoki boʻlmasligi yuzasidan tegishli maʼlumotlarni olish;

d) ruxsat etilgan xavfsiz yoʻnalishlar boʻyicha Oʻzbekiston Respublikasi Favqulodda vaziyatlar vazirligining tegishli hududiy boshqarmasi bilan kelishilgan holda belgilangan xavfsiz yoʻnalish boʻyicha sayohat qilishni taʼminlash;

e) belgilangan yoʻnalishning xususiyati va sayyohlarning xatti-harakatiga bogʻliq holda yuzaga kelishi mumkin boʻlgan xavf-xatar manbalari haqida ularning oʻzini xabardor qilish va xavfsizligini taʼminlash;

j) zarur hollarda, chet ellik sayyohlar haqidagi maʼlumotlarni huquqni muhofaza qiluvchi organlarga taqdim etish;

z) chet ellik sayyohlar tomonidan chegara hududidan oʻtish vaqtida belgilangan tartibga rioya qilinishida tegishli davlat organlariga koʻmaklashish.

4. Qabul qiluvchi turistik tashkilot chet el sayyohlari bilan xavfsizlik choralariga rioya etishlari, Oʻzbekiston Respublikasida boʻlish tartibi, ekologik xavfsizlik talablari, milliy urf-odatlarga hamda sanitariya-gigiyena qoidalariga amal qilishlari toʻgʻrisida tegishli tushuntirish ishlarini oʻtkazadi.

5. Sayyohlarni chet el safariga yuborish “Oʻzbekturizm” milliy kompaniyasi bilan kelishilgandan soʻng amalga oshiriladi. Turistik tashkilot tomonidan quyidagi hujjatlar taqdim etiladi:

sayyohlar roʻyxati, guruh rahbari koʻrsatilgan holda (roʻyxat sayyohlarni joʻnatish vaqtidan kamida 3 ish kuni oldin topshirilishi lozim);

qabul qilayotgan davlat vizasi;

sayyohlarga taqdim etilgan turistik yoʻllanma;

aviachipta;

sayyohlar sugʻurta qilinganligini tasdiqlovchi hujjat (sugʻurta polisi);

sayyohlarni chet el safariga yuboruvchi Oʻzbekiston Respublikasi turistik tashkilotining chet eldagi hamrohining sayyohlarga kafolatlangan xizmat koʻrsatishini tasdiqlovchi hujjat;

6. “Oʻzbekturizm” milliy kompaniyasi turistik tashkilot taqdim etgan hujjatlar asosida hujjat topshirilgan kundan 2 kun muddatda hujjat topshirgan turistik tashkilot sayyohlarni chet elga yuborishiga oʻz roziligini yoki asoslantirilgan rad javobini beradi.

Quyidagi hollarda turistik tashkilotlarga rad javobi berilishi mumkin:

turizm sohasida faoliyat koʻrsatishga ruxsat beruvchi litsenziyasi mavjud boʻlmasa;

chet ellik hamkorlari bilan imzolangan shartnoma muddati tugagan yoki shartnomasi boʻlmagan taqdirda;

soxta hujjatlar taqdim etganda.

7. Turistik tashkilot rahbari sayyohlar chet el safarlaridan qaytganlaridan soʻng bir hafta ichida, “Oʻzbekturizm” milliy kompaniyasiga sayyohlarni qaytganligi toʻgʻrisida maʼlumot taqdim etadi.

8. Turizm toʻgʻrisidagi qonunchilik hujjatlarini buzganlikda aybdor shaxslar belgilangan tartibda javobgarlikka tortiladi.