So‘nggi yillarda mahallani jamoatchilik boshqaruvi va nazoratining tayanch bo‘g‘iniga aylantirish, uning jamiyatdagi o‘rni va rolini kuchaytirish, mahallalardagi muammolarni o‘z vaqtida va samarali hal etishda davlat organlari va tashkilotlarining mahallalardagi vakillarining imkoniyatlarini yanada kengaytirish bo‘yicha keng ko‘lamli chora-tadbirlar amalga oshirildi.

Shu bilan birga, mahalladagi hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim va soliq inspektori faoliyatini baholashda mahalla raislarining maqomini oshirish zarurligi taqozo etilmoqda.

“Mahalla yettiligi” faoliyatini samarali va rejali asosda tashkil etish hamda uning a’zolarini eng muhim samaradorlik ko‘rsatkichlari (KPI) bo‘yicha baholash tizimini takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Mahalla institutining jamiyatdagi rolini tubdan oshirish va uning aholi muammolarini hal etishda birinchi bo‘g‘in sifatida ishlashini ta’minlashga qaratilgan chora-tadbirlar to‘g‘risida” 2023-yil 21-dekabrdagi PF-209-son Farmoniga muvofiq:

mahalla raisi tomonidan hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim hamda soliq inspektorlari “Mahalla yettiligi”ning faoliyati eng muhim samaradorlik ko‘rsatkichlari (KPI) bo‘yicha alohida baholanishi. Bunda ko‘rsatkichlar mazkur xodimlarning ish beruvchilari tomonidan O‘zbekiston mahallalari uyushmasi bilan kelishilgan holda tasdiqlanishi;

mahalla raislari hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim va soliq inspektorlari faoliyatini eng muhim samaradorlik ko‘rsatkichlari (KPI) asosida baholashda 20 foiz ball berish huquqiga ega bo‘lishi;

“Mahalla yettiligi” a’zolarining ish haqini asosiy ish joyidan berish tartibi saqlab qolingan holda eng muhim samaradorlik ko‘rsatkichlari (KPI) asosida baholash natijalaridan kelib chiqib, ular moddiy rag‘batlantirilib borilishi ma’lumot uchun qabul qilinsin.

2. Belgilansinki, mahalla raisi tomonidan hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim hamda soliq inspektorlarining (keyingi o‘rinlarda — “Mahalla yettiligi” a’zolari) faoliyati eng muhim samaradorlik ko‘rsatkichlari (KPI) bo‘yicha ilovada keltirilgan indikatorlarga muvofiq baholanadi.

3. Shunday tartib o‘rnatilsinki, unga muvofiq:

a) mahalla raisining faoliyati tuman (shahar) mahallani qo‘llab-quvvatlash kengashi tomonidan O‘zbekiston mahallalari uyushmasining tuman (shahar) bo‘limi boshlig‘i bilan kelishilgan holda tasdiqlanadigan har oylik ish rejalar asosida amalga oshiriladi;

b) “Mahalla yettiligi” a’zolarining faoliyati tegishincha O‘zbekiston Respublikasi Prezidenti huzuridagi Ijtimoiy himoya milliy agentligi, Ichki ishlar vazirligi, Soliq qo‘mitasi, Oila va xotin-qizlar qo‘mitasi, Yoshlar ishlari agentligining bo‘linmalari hamda Mahallabay ishlash va tadbirkorlikni rivojlantirish markazlarining tuman (shahar) rahbarlari tomonidan tasdiqlanadigan har oylik ish rejalar asosida amalga oshiriladi;

v) har oylik ish rejalarda ustuvor ravishda quyidagi asosiy tadbir va vazifalar belgilanadi:

mahalla raisi uchun:

milliy qadriyatlar, urf-odatlar va an’analarni targ‘ib qilish;

davlat organlari vakillarini aholi muammolarini hal etishga safarbar etish;

mahalla infratuzilmasini yaxshilash;

“Obod mahalla”, “Obod ko‘cha” va “Obod xonadon” mezonlarini joriy etish;

“Yashil makon” umummilliy loyihasi amalga oshirilishiga ko‘maklashish;

ommaviy hasharlarni tashkil qilish va ularga aholini jalb qilish;

qonunchilik hujjatlari ijrosi ustidan jamoatchilik nazoratini ta’minlash;

nuroniylar bilan birgalikda ta’lim muassasalarida tarbiyaviy soatlar va suhbatlar o‘tkazish;

“Mahalla yettiligi” a’zolari faoliyatini muvofiqlashtirib borish;

hokim yordamchisi uchun:

doimiy daromad manbaiga ega bo‘lmagan ishsiz aholini kasb-hunar va tadbirkorlikka o‘qitish hamda ularning bandligini ta’minlash;

aholining tadbirkorlik tashabbuslarini qo‘llab-quvvatlash, shu jumladan, kredit va subsidiyalar ajratilishida ko‘maklashish;

dehqon xo‘jaliklari bilan eksport qiluvchi, broker va qayta ishlovchi korxonalarning hamkorligini tashkil etish;

mahallalarda mikroloyihalar manzilli dasturini shakllantirish va ularning amalga oshirilishiga ko‘maklashish;

bo‘sh turgan bino va inshootlar hamda yer maydonlarini auksion savdolariga chiqarishda ko‘maklashish;

Ijtimoiy reyestrga kiritilgan oilalarning daromadini oshirish choralarini ko‘rish;

mehnat migratsiyasiga chiqib ketgan yoki qaytib kelgan fuqarolar va ularning oila a’zolari bilan ishlash;

tomorqa va ijara yerlaridan samarali foydalanish ishlarini tashkil etish;

yoshlar yetakchisi uchun:

uyma-uy yurish orqali “Yoshlar balansi”ni shakllantirish;

yoshlar bilan manzilli ishlash va ularning bandligini ta’minlash;

ijtimoiy faol yoshlarni qo‘llab-quvvatlash;

sog‘lom turmush tarzi va sportni ommalashtirish;

“Yoshlar daftari”dagi yoshlarning muammolarini hal etish;

xorijdagi vatandosh yoshlar bilan ishlash va ularni qo‘llab-quvvatlash;

yoshlar o‘rtasida kitobxonlikni keng targ‘ib qilish;

xotin-qizlar faoli uchun:

oilalarni mustahkamlash va ajrimlarning oldini olish;

xotin-qizlar muammolari va qiziqishlarini o‘rganib, ularga ko‘maklashish;

xotin-qizlar o‘rtasida tushuntirish ishlarini olib borish hamda “Sog‘lom oila — sog‘lom jamiyat” tamoyilini targ‘ib qilish;

xotin-qizlar o‘rtasida tizimli ma’naviy-ma’rifiy tadbirlarni o‘tkazish;

xotin-qizlarning ijtimoiy-siyosiy faolligini oshirish hamda ta’lim imkoniyatlarini kengaytirish;

tazyiq va zo‘ravonlikka nisbatan murosasizlik muhitini yaratishda faol ishtirok etish;

profilaktika inspektori uchun:

mahalla hududida jamoat tartibini saqlash;

huquqbuzarlik sodir etishga moyil shaxslar bilan manzilli ishlash;

mahalladagi kriminogen vaziyatni tahlil qilish, huquqbuzarliklarni sodir etish sabablarini aniqlash va bartaraf etish choralarini ko‘rish;

qarovsiz va nazoratsiz qolgan voyaga yetmaganlarning ijtimoiy-huquqiy himoyasini ta’minlash;

aholini terrorchilik, ekstremistik va boshqa g‘ayriqonuniy buzg‘unchilik hamda axloqsizlik yo‘nalishidagi oqimlar ta’siridan himoya qilish;

ijtimoiy xodim uchun:

parvarishga muhtoj yolg‘iz keksalarni ijtimoiy qo‘llab-quvvatlash;

nogironligi bo‘lgan va og‘ir kasallikka chalinganlar shaxslar hamda turli nuqsonlari bo‘lgan va uzoq vaqt davolanishga muhtoj bolalarga yordam berish;

Ijtimoiy reyestrga kiritilgan oilalarga yordam ko‘rsatish;

yetim bolalar va ota-ona qaramog‘idan mahrum bo‘lgan hamda to‘liq bo‘lmagan oilalardagi bolalarga yordam ko‘rsatish;

ota-onasi xorijiy davlatlarga ketgan bolalar hamda voyaga yetmagan yolg‘iz onalar va otalar bilan ishlash;

soliq inspektori uchun:

hududning soliq bazasini kengaytirish va tadbirkorlik faoliyatini qonuniylashtirishga ko‘maklashish;

mol-mulk solig‘i va yer solig‘i to‘lovchilarini hisobga olish ishlarini bajarish hamda soliqlar o‘z vaqtida to‘lanishini nazorat qilish;

soliqlar ixtiyoriy to‘lanishiga qaratilgan targ‘ibot ishlarini tashkil etish;

mablag‘larning g‘ayriqonuniy aylanishi manbalariga barham berish, naqd pul tushumining to‘liq va o‘z vaqtida topshirilishini nazorat qilish;

soliq to‘lovchilarga soliq majburiyatlarini bajarishda ko‘maklashish;

g) mahalla raisi va “Mahalla yettiligi” a’zolarining faoliyatini eng muhim samaradorlik ko‘rsatkichlari (KPI) bo‘yicha baholashda boshqa ko‘rsatkichlar bilan bir qatorda har oylik ish rejalarning amalda bajarilish holati ham inobatga olinadi.

4. O‘zbekiston Respublikasi Prezidenti huzuridagi Ijtimoiy himoya milliy agentligi, Ichki ishlar vazirligi, Soliq qo‘mitasi, Oila va xotin-qizlar qo‘mitasi, Mahallabay ishlash va tadbirkorlikni rivojlantirish agentligi hamda Yoshlar ishlari agentligi O‘zbekiston mahallalari uyushmasi va O‘zbekiston Respublikasi Prezidenti huzuridagi Davlat xizmatini rivojlantirish agentligi bilan kelishilgan holda bir oy muddatda “Mahalla yettiligi” a’zolari faoliyatini eng muhim samaradorlik ko‘rsatkichlari (KPI) bo‘yicha baholash metodikasini qayta ishlab chiqsin.

Bunda:

xotin-qizlar faoli faoliyatini eng muhim samaradorlik ko‘rsatkichlari (KPI) bo‘yicha baholashda ichki ishlar organlari tomonidan tazyiq va (yoki) zo‘ravonlikdan jabrlangan xotin-qizlarga berilgan himoya orderlari soni inobatga olinmasin;

hokim yordamchilari faoliyatini eng muhim samaradorlik ko‘rsatkichlari (KPI) bo‘yicha baholashda “yangi tashkil qilingan subyektlar” ko‘rsatkichiga asosan ularning olis hududlarda faoliyat yuritayotganlariga qo‘shimcha koeffitsiyent berish nazarda tutilsin.

5. O‘zbekiston Respublikasi Raqamli texnologiyalar vazirligi O‘zbekiston mahallalari uyushmasi bilan birgalikda uch oy muddatda Mahallaning yagona platformasi doirasida mahalla raisi tomonidan “Mahalla yettiligi” a’zolari faoliyatini eng muhim samaradorlik ko‘rsatkichlari (KPI) bo‘yicha baholash mexanizmlarini nazarda tutuvchi modulni yaratsin va ushbu tizimni ishga tushirish bilan bog‘liq barcha tashkiliy-texnik chora-tadbirlarni amalga oshirsin.

Bunda ushbu tizimni yaratish va texnik qo‘llab-quvvatlash bilan bog‘liq xarajatlar O‘zbekiston mahallalari uyushmasining mahallalar faoliyatini rag‘batlantirish jamg‘armasi mablag‘lari hisobidan amalga oshirilsin.

6. O‘zbekiston Respublikasi Prezidenti huzuridagi Ijtimoiy himoya milliy agentligi, Ichki ishlar vazirligi, Soliq qo‘mitasi, Oila va xotin-qizlar qo‘mitasi, Mahallabay ishlash va tadbirkorlikni rivojlantirish agentligi hamda Yoshlar ishlari agentligi O‘zbekiston mahallalari uyushmasi bilan birgalikda uch oy muddatda “Mahalla yettiligi” a’zolari faoliyatining eng muhim samaradorlik ko‘rsatkichlari (KPI) ma’lumotlari shakllanadigan axborot tizimlarini Mahallaning yagona platformasi bilan o‘zaro integratsiya qilishni ta’minlasin.

7. O‘zbekiston mahallalari uyushmasiga:

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari hamda manfaatdor vazirlik va idoralar bilan birgalikda doimiy ravishda barcha fuqarolar yig‘inlarida mahalla raisi tomonidan “Mahalla yettiligi” a’zolari faoliyatini eng muhim samaradorlik ko‘rsatkichlari (KPI) bo‘yicha baholashni yo‘lga qo‘yishda fuqarolarning o‘zini o‘zi boshqarish organlariga har tomonlama ko‘maklashib borish;

bir oy muddatda mahalla raislarining faoliyatini eng muhim samaradorlik ko‘rsatkichlari (KPI) bo‘yicha baholash tartibini ishlab chiqish va belgilangan tartibda tasdiqlash, bunda baholash natijalari bo‘yicha mahalla raislarini moddiy rag‘batlantirishni nazarda tutish tavsiya etilsin.

8. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — iqtisodiyot va moliya vaziri J.A. Qo‘chqorov hamda Vazirlar Mahkamasining “Mahalla yettiligi”, yoshlar siyosati va ma’naviyat masalalari departamentiga yuklansin.