“Xalq soʻzi” va “Narodnoye slovo” gazetalari tahririyati davlat korxonasini davlat muassasasi sifatida qayta tashkil etish hamda uning faoliyatini yanada takomillashtirish maqsadida Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:

1. Oʻzbekiston Respublikasi Vazirlar Mahkamasining 2023-yil 3-apreldagi “Davlat muassasalari va davlat ishtirokidagi korxonalarni qayta tashkil etish va tugatishning qoʻshimcha chora-tadbirlari toʻgʻrisida”gi 139-sonli Qarori maʼlumot uchun qabul qilinsin.

2. “Xalq soʻzi” va “Narodnoye slovo” gazetalari tahririyati” davlat korxonasi tashkiliy-huquqiy shakli oʻzgargan holda “Xalq soʻzi” va “Narodnoye slovo” gazetalari tahririyati” davlat muassasasi sifatida qayta tashkil etilsin.

3. Quyidagilar:

“Xalq soʻzi” va “Narodnoye slovo” gazetalari tahririyati” davlat muassasasining tashkiliy tuzilmasi 1-ilovaga* muvofiq;

“Xalq soʻzi” va “Narodnoye slovo” gazetalari tahririyati” davlat muassasasi toʻgʻrisidagi nizom 2-ilovaga* muvofiq;

“Xalq soʻzi” va “Narodnoye slovo” gazetalari tahririyati” davlat muassasasining tahrir hayʼati 3-ilovaga* muvofiq tasdiqlansin.

4. Belgilab qoʻyilsinki:

“Xalq soʻzi” va “Narodnoye slovo” gazetalari tahririyati” davlat muassasasi (bundan buyon matnda Tahririyat deb yuritiladi) xodimlarining ish haqi va unga tenglashtirilgan toʻlovlar Davlat budjeti mablagʻlari hisobidan amalga oshiriladi;

Tahririyat xodimlarini moddiy ragʻbatlantirish maxsus jamgʻarmasi mehnatga haq toʻlash fondining 25 foizi miqdorida belgilanadi.

5. Tahririyatni tashkil etish uchun shakllantirilgan 21 mln. soʻm miqdoridagi ustav fondi Tahririyat balansida qoldirilsin.

6. Tahririyat bosh muharriri (Oʻ. Rahmatov) Tahririyatning belgilangan tartibda qayta davlat roʻyxatidan oʻtkazilishini taʼminlasin.

7. Oʻzbekiston Respublikasi Davlat aktivlarini boshqarish agentligi Toshkent shahar hokimligi bilan birgalikda Tahririyatni Toshkent shahri, Mirobod tumani Matbuotchilar koʻchasi, 32-uyga (ushbu manzildagi rekonstruksiya ishlari yakunlangunga qadar vaqtincha Chilonzor tumani I. Karimov koʻchasi, 55-uyga) tekin foydalanish huquqi asosida joylashtirish yuzasidan zarur choralar koʻrsin.

8. Qoraqalpogʻiston Respublikasi Vazirlar Kengashi va viloyatlar hokimliklari Tahririyatning hududlardagi mintaqaviy muxbirlik punktlarini tegishincha Nukus shahri va viloyatlar markazlaridagi zarur shart-sharoitlarga ega boʻlgan binolardan tekin foydalanish huquqi asosida xona (bino) bilan taʼminlash choralarini koʻrsin.

9. Tahririyat balansidagi moddiy va maʼnan eskirgan 22 ta yengil xizmat avtotransport vositasini qonunchilikda belgilangan tartibda “E-auksion” elektron savdo platformasi orqali sotishga hamda yangi yengil xizmat avtotransport vositalarini sotib olishga rozilik berilsin.

10. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2020-yil 27-fevraldagi “Xalq soʻzi” va “Narodnoye slovo” gazetalari tahririyati” davlat korxonasi faoliyatini tashkil etishning ayrim masalalari toʻgʻrisida”gi 150-IV/KQ-17-IV-sonli Qoʻshma qarorining (Oʻzbekiston Respublikasi Oliy Majlisi palatalarining Axborotnomasi, 2020-yil, № 2, 194-modda) 2-bandi oʻz kuchini yoʻqotgan deb topilsin.

11. Oʻzbekiston Respublikasi Vazirlar Mahkamasi Tahririyat xodimlarining ish haqi va unga tenglashtirilgan toʻlovlar uchun zarur mablagʻlarni 2024-yildan boshlab Oʻzbekiston Respublikasining Davlat budjeti hisobidan ajratish choralarini koʻrsin.

12. Mazkur Qoʻshma qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari A. Saidov hamda Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklatilsin.

13. Ushbu Qoʻshma qaror qabul qilingan kundan eʼtiboran kuchga kiradi.