So‘nggi yillarda mamlakatimizda ijtimoiy himoyaga muhtoj, turmush sharoiti og‘ir, ishsiz va kasb-hunarga ega bo‘lmagan, huquqiy va ma’naviy-psixologik qo‘llab-quvvatlashga ehtiyoji bo‘lgan ijtimoiy ahvoli va turmush sharoiti og‘ir oilalarga davlat tomonidan manzilli ko‘maklashish bo‘yicha mutlaqo yangicha tizim joriy qilindi.

Shu bilan birga, “Temir daftar”ga kiritilgan ijtimoiy ahvoli va turmush sharoiti og‘ir oilalarning muammolarini tizimli ravishda tezkor hal etish bo‘yicha samarali chora-tadbirlarni belgilash zarurati yuzaga kelmoqda.

“Temir daftar”ga kiritilgan ijtimoiy ahvoli va turmush sharoiti og‘ir oilalar muammolarini tezkor va soddalashtirilgan tartibda hal etish hamda ularni ijtimoiy qo‘llab-quvvatlash choralarini yanada kuchaytirish maqsadida Vazirlar Mahkamasi qaror qiladi:

1. O‘zbekiston Respublikasi Hukumatining ilovaga muvofiq ayrim hujjatlariga quyidagilarni nazarda tutuvchi o‘zgartirish va qo‘shimchalar kiritilsin:

xalq deputatlari tuman (shahar) Kengashlarining sessiyalari oralig‘idagi davrda “Temir daftar”ga kiritilgan ijtimoiy ahvoli va turmush sharoiti og‘ir oilalarga kechiktirib bo‘lmaydigan hollarda zudlik bilan yordam ko‘rsatish zarurati yuzaga kelganda, bir martalik moddiy yordamni fuqarolar yig‘inlari tomonidan sektorlar rahbarlari bilan kelishgan holda taqdim etilgan xulosaga asosan bir ish kunida tuman (shahar) hokimlari qarorlari bilan berish;

qonunchilik hujjatlarida belgilangan hollarda tuman (shahar) hokimlariga “Saxovat va ko‘mak” jamg‘armasi mablag‘larini tasarruf etish vakolatini berish.

2. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — iqtisodiyot va moliya vaziri J.A. Qo‘chqorov hamda kambag‘allikni qisqartirish va bandlik vaziri B.A. Musayev zimmasiga yuklansin.

1. Vazirlar Mahkamasining 2021-yil 28-apreldagi 250-son qarori bilan tasdiqlangan “Temir daftar”ni yuritish orqali ijtimoiy ahvoli va turmush sharoiti og‘ir oilalar muammolarini tizimli ravishda hal etish va ularni ijtimoiy qo‘llab-quvvatlash bo‘yicha vaqtinchalik tartibning 15-bandida:

“a” kichik band quyidagi tahrirda bayon etilsin:

“a) fuqarolar yig‘inlari tomonidan sektorlar rahbarlari bilan kelishgan holda, oilalarning ehtiyojmandlik darajasidan kelib chiqib, shuningdek, kechiktirib bo‘lmaydigan hollarda, jumladan, og‘ir ahvoldagi kasallarni davolash, jarrohlik amaliyotini o‘tkazish, zarur dori-darmonlarni xarid qilish, ijtimoiy ahvoli va turmush sharoiti og‘ir oilalarga zarur oziq-ovqat mahsulotlarini xarid qilish, texnogen, tabiiy va ekologik tusdagi favqulodda vaziyatlar oqibatida uy-joyidan ayrilib qolgan oilalarga yashash uchun zarur boshpana qilib berish, ijtimoiy ahvoli va turmush sharoiti og‘ir oilalarning farzandlariga maktabga borishiga zarur kiyim-bosh sotib olish uchun zudlik bilan yordam ko‘rsatish lozimligi to‘g‘risida xulosaga kelingan “Temir daftar”ga kiritilgan oilalarga (har bir fuqaroning familiyasi, ismi, otasining ismi, pasport seriyasi va raqami ko‘rsatilgan holda) bir martalik moddiy yordam berish miqdorlari ko‘rsatilgan ro‘yxat tuman (shahar) hokimligiga taqdim etiladi”;

“b” kichik bandda:

quyidagi mazmundagi uchinchi xatboshi bilan to‘ldirilsin:

“xalq deputatlari tuman (shahar) Kengashlarining sessiyalari oralig‘idagi davrda fuqarolar yig‘inlari tomonidan sektorlar rahbarlari bilan kelishgan holda taqdim etilgan ro‘yxatga muvofiq mazkur bandning “a” kichik bandida nazarda tutilgan kechiktirib bo‘lmaydigan hollarda, zudlik bilan yordam ko‘rsatish lozimligi to‘g‘risidagi xulosaga asosan “Temir daftar”ga kiritilgan oilalarga bir martalik moddiy yordam bir ish kunida tuman (shahar) hokimlari qarorlari bilan beriladi. Hokimlarning mazkur qarorlari xalq deputatlari tuman (shahar) Kengashlarining navbatdagi sessiyasida tasdiqlanadi”;

uchinchi xatboshi to‘rtinchi xatboshi deb hisoblansin;

“b¹” kichik band “har oyning 5 sanasiga qadar” so‘zlaridan keyin “, mazkur bandning “a” kichik bandida nazarda tutilgan kechiktirib bo‘lmaydigan hollarda, zudlik bilan yordam ko‘rsatish lozimligi to‘g‘risidagi hokim qarori qabul qilinganidan keyin bir ish kunida” so‘zlari bilan to‘ldirilsin;

“v” kichik band “har oyning 5 — 27-kunlarida” so‘zlaridan keyin “, mazkur bandning “a” kichik bandida nazarda tutilgan kechiktirib bo‘lmaydigan hollarda zudlik bilan yordam ko‘rsatish lozimligi to‘g‘risidagi hokim qarori qabul qilinganidan keyin bir ish kunida” so‘zlari bilan to‘ldirilsin.

2. Vazirlar Mahkamasining 2020-yil 22-apreldagi 213-F-son farmoyishi bilan tasdiqlangan “Saxovat va ko‘mak” jamg‘armasi to‘g‘risidagi nizomning 7-bandi to‘rtinchi xatboshisi quyidagi tahrirda bayon etilsin:

“tuman (shahar) miqyosida — xalq deputatlari tuman (shahar) Kengashlari tomonidan, qonunchilik hujjatlarida belgilangan hollarda — tuman (shahar) hokimlari tomonidan amalga oshiriladi”.