O‘zbekiston Respublikasida rangli metallar ishlab chiqarishni ko‘paytirish va geologiya-razvedka ishlari samaradorligini to‘g‘ridan to‘g‘ri xorijiy investitsiyalarni jalb etish yo‘li bilan oshirish maqsadida Vazirlar Mahkamasi qaror qiladi:

1. “Oksus Resorsis Korporeyshn” (Buyuk Britaniya) kompaniyasiga 1-ilovaga* muvofiq Xonjiza polimetall konini (Surxondaryo viloyati) ochishga eksklyuziv huquqlar berilsin.

2. O‘zbekiston Respublikasi Davlat geologiya va mineral resurslar qo‘mitasi Xonjiza polimetall konini texnik-iqtisodiy asoslashni tayyorlash uchun “Oksus Resorsis Korporeyshn” kompaniyasi bilan bitimni imzolashga vakil qilinsin.

3. Quyidagilar:

“Oksus Resorsis Korporeyshn” kompaniyasi Davlat geologiya qo‘mitasi bilan birgalikda mazkur qaror qabul qilingan paytdan boshlab 24 oy mobaynida loyihaning texnik-iqtisodiy asoslanishini ishlab chiqishni tugallashi;

“Oksus Resorsis Korporeyshn” kompaniyasiga loyihaning texnik-iqtisodiy asoslanishi ishlab chiqilishi va ekspertiza o‘tkazilishi davrida geologiya-razvedka ishlarini amalga oshirish uchun eksklyuziv huquq berilishi;

loyihaning ishlab chiqilgan texnik-iqtisodiy asoslanishi natijalari bo‘yicha “Oksus Resorsis Korporeyshn” kompaniyasi Xonjiza konini ishga tushirishda hamkorlikning aniq shaklini (konsessiya shartnomasi yoxud mahsulotni bo‘lish to‘g‘risidagi bitim) aniqlash bo‘yicha muzokaralar olib borishda, shuningdek loyihani amalga oshirishning moliyaviy va boshqa shartlari bo‘yicha eksklyuziv huquqlarga ega bo‘lishi;

“Oksus Resorsis Korporeyshn” kompaniyasiga 1-ilovada ko‘rsatilgan hududda foydali qazilmalarni ishlash uchun iqtisodiy samarali konlar aniqlanmagan taqdirda geologiya-razvedka ishlarini davom ettirish uchun yer ostining yangi uchastkalarini olishda ustunlik huquqi berilishi;

“Oksus Resorsis Korporeyshn” kompaniyasi geologik o‘rganishning to‘liqligi, yer ostidan oqilona foydalanish va uni saqlashni ta’minlash bo‘yicha o‘z zimmasiga majburiyatlar olishi ma’lumot uchun qabul qilinsin.

4. “Oksus Resorsis Korporeyshn” kompaniyasi va uning “Oksus Servises Limited” shu’ba kompaniyasi texnik-iqtisodiy asoslashni ishlab chiqish davrida geologiya-razvedka ishlarini amalga oshirish uchun mo‘ljallangan 2-ilovaga* muvofiq texnologiya uskunalari va moddiy-texnika resurslarini import qilishda bojxona to‘lovlaridan (bojxona rasmiylashtiruvi yig‘imlaridan tashqari) ozod qilinsin.

5. O‘zbekiston Respublikasi Tashqi ishlar vazirligi mazkur loyihani amalga oshirishda qatnashuvchi xorijiy mutaxassislarni belgilangan tartibda kirish vizalari bilan ta’minlasin.

6. O‘zbekiston Respublikasi Ichki ishlar vazirligi, “Oksus Resorsis Korporeyshn” va “Oksus Servises Limited” kompaniyalarining buyurtmanomalari bo‘yicha, loyihani amalga oshirishda qatnashuvchi xorijiy mutaxassislarga bir yillik ko‘p martalik vizalar berilishi va ularning muddati uzaytirilishini, shuningdek ular vaqtincha — ro‘yxatdan o‘tkazilishini va vaqtincha ro‘yxatdan o‘tkazish muddati uzaytirilishini, ularni davlat bojlari to‘lashdan ozod etgan xolda, ta’minlasin.

7. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari K.N. To‘laganov zimmasiga yuklansin.