Vazirlar Mahkamasi qaror qiladi:

Oʻzbekiston sanoat va xoʻjalik qurilish (“Oʻzsanoatqurilish”) davlat korporatsiyasining ilova qilinayotgan Ustavi tasdiqlansin.

1. Oʻzbekiston sanoat va xoʻjalik qurilish davlat korporatsiyasi (bundan keyin matnda “korporatsiya” deb ataladi) Oʻzbekiston Respublikasi Prezidentining “Oʻzbekiston sanoat va xoʻjalik qurilish (“Oʻzsanoatqurilish”) davlat korporatsiyasini tashkil etish toʻgʻrisida”gi Farmoniga muvofiq tashkil etilgan, davlat boshqaruvi organi huquqlari berilgan xoʻjalik tashkiloti hisoblanadi va oʻz faoliyatini Oʻzbekiston Respublikasi Vazirlar Mahkamasining “Oʻzbekiston sanoat va xoʻjalik qurilish (“Oʻzsanoatqurilish”) korporatsiyasini tashkil etish va uning faoliyati masalalari” deb nomlangan 1993-yil 14-yanvardagi 33-son qaroriga muvofiq amalga oshiradi. Korporatsiya qurilishni va Oʻzbekiston Respublikasi qonun hujjatlari bilan taqiqlanmagan boshqa barcha faoliyat turlarini taʼminlovchi, mulkchilikning barcha shakllaridagi qurilish tashkilotlarini, qurilish industriyasi korxonalarini, transport, loyiha-konstruktorlik va boshqa tashkilotlarni (bundan keyin matnda “qatnashchilar” deb ataladi) ixtiyoriy asosda va aksiyalash prinsiplari boʻyicha birlashtiradi.

2. Korporatsiya yuridik shaxs hisoblanadi, bank muassasalarida hisob-kitob, valyuta va boshqa hisoblarga ega boʻladi. Agar taʼsis shartnomasida boshqa hollar koʻzda tutilmagan boʻlsa, u sudda daʼvogar va javobgar boʻlishi mumkin. Korporatsiya oʻz faoliyatini Oʻzbekiston Respublikasining amaldagi qonun hujjatlari, taʼsis konferensiyasida qabul qilinadigan va Vazirlar Mahkamasi tomonidan tasdiqlanadigan korporatsiya Ustavi asosida amalga oshiradi.

Korporatsiyaning Oʻzbekiston Respublikasi Gerbi tasviri tushirilgan, oʻz nomi oʻzbek va rus tillarida yozilgan muhri, burchakli va boshqa shtamplar boʻladi.

3. Korporatsiya:

davlat va taʼsischilar tomonidan oʻziga berilgan huquqlarni nazarda tutgan holda ishlab chiqarish-xoʻjalik, moliyaviy faoliyat va ijtimoiy rivojlanish masalalarini mustaqil hal qiladi. Toʻliq xoʻjalik hisobi va oʻzini-oʻzi boshqarish prinsiplari asosida ishlaydi, markazlashgan investitsiya, sugʻurta va boshqa jamgʻarmalarni tuzadi;

pudrat ishlarining rejalashtirilgan dasturi uchun davlat tomonidan ajratiladigan moddiy-texnika resurslarining fond egasi hisoblanadi;

Oʻzbekiston Respublikasi Qurilish vazirligi tomonidan ilgari tuzilgan barcha shartnomalar, qabul qilingan majburiyatlar boʻyicha javob beradi;

Bevosita korporatsiya tarkibiga kiruvchi birlashmalar, korxonalar va tashkilotlarning davlat mulkini boshqaradi, ularni davlat tasarrufidan chiqarishda, xususiylashtirishda va aksionerlik jamiyatlariga aylantirishda belgilangan tartibda qatnashadi.

4. Korporatsiya Toshkent shahar, Proletar koʻchasidagi 17-uyda joylashgan.

1. Quyidagilar korporatsiyaning asosiy vazifalari:

Korporatsiyaga kiruvchi barcha korxona va tashkilotlarning sanoat va xoʻjalik obyektlarini qurish, qurilish mashinalari, mexanizmlari, transport vositalari va maxsus asbob-uskunalarni ishlab chiqarish, ishlatish va taʼmirlashga doir faoliyatini muvofiqlashtirib borish;

umumtarmoq ahamiyatiga ega ilmiy-tadqiqot va tajriba-konstruktorlik ishlarini tashkil etish va oʻtkazish, ularning natijalarini tayyorlash va ishlab chiqarishga joriy etish;

bozor munosabatlarini investitsiya sohasiga keng joriy qilish, pudrat ishlari bozorini barpo etish, qurilish ishlab chiqarishining progressiv iqtisodiy shakllariga oʻtish, qurilish industriyasining davlat pudratchi qurilish tashkilotlari va korxonalarini mulkchilikning boshqa shakllariga aylantirish chora-tadbirlarini amalga oshirish.

2. Korporatsiya:

Oʻzbekiston Respublikasini iqtisodiy va ijtimoiy rivojlantirishning kapital qurilish sohasidagi uzoq davrga moʻljallangan asosiy yoʻnalishlari loyihalarini tayyorlashda qatnashadi;

qatnashchi tashkilotlar bilan birgalikda buyurtmachi vazirliklar, davlat qoʻmitalari va idoralar talabnomalari asosida ishlab chiqarish quvvatlarini va obyektlarni, uy-joylar va boshqa ijtimoiy maqsadlardagi obyektlarni, ishga tushirish boʻyicha, shuningdek, kelgusi davrda bajarilishi kerak boʻlgan pudrat ishlari hajmlari boʻyicha takliflarni tayyorlaydi va Vazirlar Mahkamasiga taqdim etadi;

korporatsiya qurilish-montaj ishlarining dasturini shakllantiradi;

ishlab chiqarish quvvatlari va obyektlarni, uy-joylar va boshqa ijtimoiy maqsadlardagi obyektlarni ishga tushirish boʻyicha, pudrat ishlari, binokorlik materiallari, detallar va konstruksiyalar ishlab chiqarish hajmlari va boshqa topshiriqlar boʻyicha tasdiqlangan dasturlarni qatnashchi tashkilotlar va korxonalarga oʻz vaqtida yetkazishni amalga oshiradi hamda ularning bajarilishini nazorat qiladi.

3. Korporatsiya quyidagilarni amalga oshiradi:

Boʻlinmalarning kompyuterlashtirish, hisoblash texnikasining tarmoq va mahalliy shoxobchalarini yaratish sohasidagi faoliyatini muvofiqlashtirib borish;

Loyiha yechimlarini takomillashtirish ishlarini muvofiqlashtirish, dastlabki loyiha yechimlarini kelishib olish,loyihalarini ekspertizadan oʻtkazish ishlarini amalga oshirish;

Qurilish va qurilish konstruksiyalarini ishlab chiqarishning investitsion siklni tubdan qisqartirishni taʼminlovchi yangi texnologiyalarini ishlab chiqish;

Obyektlarni loyihalash va qurish masalalaridagi ilgʻor tajribani oʻrganish va ommalashtirish;

Xorijiy sheriklar va MDH mamlakatlarning obyektlarini loyihalash, qurish, shuningdek, industriya korxonalari tomonidan mahsulot ishlab chiqarish masalalaridagi ilgʻor tajribasini oʻrganish va ommalashtirish;

Yangi samarali texnologik jarayonlarni va asbob-uskunalarni joriy etish, mahalliy xomashyo resurslari bazasidan foydalanish, ishlab chiqarilayotgan mahsulotlarning texnikaviy darajasini oshirish va ularning raqobatbardoshliligini koʻtarish asosida binokorlik materiallari chiqarishni tashkil etish sohasidagi texnika siyosatini oʻtkazishda qurilish industriyasi korxonalariga koʻmaklashish;

Korporatsiya qurilish industriyasi korxonalarning ishlab chiqarish quvvatlarini rivojlantirishning iqtisodiy, texnikaviy va ekologik jihatdan maqsadga muvofiq yoʻnalishlarini ishlab chiqish va amalga oshirishda amaliy yordam koʻrsatish;

Korporatsiya qatnashchilarining ishlab chiqarish bazalarini qayta qurishda va texnika bilan qayta qurollantirishda amaliy yordam koʻrsatish;

Binokorlik materiallari va konstruksiyalari, asbob-uskunalar, butlovchi buyumlar yetkazib beruvchilar bilan toʻgʻridan toʻgʻrishartnomaviy munosabatlar oʻrnatishda qatnashchilarga koʻmaklashish;

Korporatsiya korxonalari ishlab chiqaradigan mahsulotlarga narxlarni ishlab chiqish va tasdiqlash;

Qatnashchilarning tadbirkorlik va tashqi iqtisodiy faoliyatini muvofiqlashtirib borish va amalga oshirishda ularga amaliy yordam koʻrsatish.

4. Korporatsiya:

Boshqa davlatlarda sheriklar bilan masʼuliyati cheklangan qoʻshma korxonalar va jamiyatlar barpo etishda;

Xoʻjalik faoliyatini eng samarali yuritish, eng koʻp foyda olish, moliya kredit mexanizmini takomillashtirish, xomashyo, material, energetika hamda mehnat resurslaridan oqilona foydalanish va shu asosda tarmoqni iqtisodiy va ijtimoiy rivojlantirishni jadallashtirish uchun korporatsiya qatnashchilarining birgalikdagi kuch-gʻayratlari bilan shart-sharoitlar yaratishda;

Bozor iqtisodiy aloqalari sharoitida davlat manfaatlari bilan oqilona uygʻunlashtirishni taʼminlovchi yangi iqtisodiy va huquqiy munosabatlarga asoslangan samarali boshqaruv tizimini yaratishda;

Korporatsiya qatnashchilarning korxonalarida va tashkilotlarida amaldagi qonun hujjatlarini toʻgʻri qoʻllanishini taʼminlashda;

Korporatsiya kadrlarini tayyorlash (mutaxassislarni oʻqitish, malakasini oshirish va tajribasini orttirish) tizimini boshqarishda qatnashadi.

5. Korporatsiya oʻz qatnashchilariga:

Xalq isteʼmol mollari ishlab chiqarishni yoʻlga qoʻyishda va rivojlantirishda hamda pulli xizmatlar koʻrsatishni amalga oshirishda;

Tovar, fond, valyuta bozorlarida va birjalarda, qiymatli qogʻozlar bozorlarida aʼmollarini oʻtkazishda, eksport-import va boshqa bitishuvlarni amalga oshirishda, Oʻzbekiston Respublikasining amaldagi qonun hujjatlari bilan taqiqlanmagan boshqa faoliyat turlarini roʻyobga chiqarishda koʻmaklashadi.

6. Korporatsiya muhim xalq xoʻjaligi qurilishlari boʻyicha vazirliklar, idoralar, konsernlar darajasida asosiy kontraktlar tuzilishi mumkin.

1. Korporatsiya:

Korporatsiya qatnashchilarining muntazam foydalanilishda boʻlgan davlat mulkini, korporatsiyaga kiruvchi aksionerlik jamiyatlar va kompaniyalarning davlatga tegishli aksiyalarini “Oʻzdavjamgʻarma” tomonidan oʻziga berilgan huquqlar asosida tasarruf qiladi va boshqaradi;

davlatga tegishli aksiyalar paketlariga muvofiq aksionerlik jamiyatlari faoliyatini boshqarish boʻyicha “Oʻzdavjamgʻarma” tomonidan oʻziga berilgan huquqni amalga oshiradi;

davlatga tegishli boʻlgan va shartnoma asosida davlat mulki jamgʻarmasi tomonidan berilgan aksiyalar boʻyicha dividentlarning bir qismidan aksionerlik jamiyatlarni va umuman korporatsiyani rivojlantirish uchun foydalaniladi;

oʻz aksionerlarini majburiyatlari uchun javob bermaydi, aksionerlar ham korporatsiya majburiyatlari uchun javob berishmaydi.

Oʻzbekiston Respublikasi hududida va undan tashqarida Oʻzbekiston Respublikasi hamda tegishli mamlakatlarning qonun hujjatlarida belgilangan tartibda xoʻjalik jamiyatlari va shirkatlar tuzishi va tashqi iqtisodiy faoliyatni amalga oshirishi mumkin.

2. Korporatsiya tarkibiga kiruvchi aksionerlik yuridik shaxslar hisoblanadilar va korporatsiya majburiyatlari uchun javob bermaydilar.

3. Korporatsiya oʻzining davlat buyurtmasidan tashqari faoliyati yoʻnalishi bozor konyunkturasiga muvofiq mustaqil ravishda belgilaydi.

4. Korporatsiya berilgan huquqlarga muvofiq, belgilangan tartibda:

obyektlarni toʻliq qurib topshirish va qonunchilikka zid boʻlmagan boshqa faoliyatlarni amalga oshirish uchun mablagʻlarni jamlash maqsadida korporatsiya tuzilmasida investitsiya bankini va sugʻurta jamgʻarmasini tashkil qiladi;

korporatsiya huzurida, korporatsiya tarkibiga kiruvchi korxonalar va tashkilotlarni davlat tasarrufidan chiqarish va hususiylashtirishdan budjetga oʻtkazilgan mablagʻlarning 10 foizini davlatga tegishli aksiyalar boʻyicha olinadigan va “Oʻzdavjamgʻarma” tomonidan jamgʻarma tomonidan shartnoma asosida berilgan dividentlarning bir qismini korporatsiyaga oʻtkazish hisobiga, qurilish mashinalari, asbob-uskunalar va materiallarning raqobatbardoshli turlarini ishlab chiqarish, qoʻshimcha ishchi oʻrinlari tashkil qilish, boʻshab qolgan xodimlarni qayta oʻqitish uchun investitsiya jamgʻarmasini tuzadi;

korporatsiya korxona va tashkilotlarida amaldagi qonunchilikni bajarishda yordam koʻrsatadi, zaruriyat boʻlganda uni takomillashtirish boʻyicha takliflar ishlab chiqadi va ularni belgilangan tartibda Oʻzbekiston Respublikasi Vazirlar Mahkamasiga koʻrib chiqish uchun kiritadi;

buyurtmachilar va davlat boshqaruv organlari bilan birgalikda davlat buyurtmasidagi obyektlarni qurish dasturini ishlab chiqishda, pudrat ishlari dasturi uchun moddiy-texnika resurslari va sanoat mahsulotlariga boʻlgan ehtiyojni aniqlashda qatnashadi;

korporatsiya qatnashchilarining ishlab chiqarish va moliya-xoʻjalik faoliyatini takomillashtirishga koʻmaklashadi, shuningdek, korporatsiyaning aksioner qatnashchilari tomonidan ular zimmasiga yuklatilgan vazifalarning bajarilishini taʼminlash boʻyicha shoshilinch chora-tadbirlar koʻradi;

markazlashgan kapital mablagʻlar hisobiga qurilayotgan, qiymati 6 mln soʻmgacha boʻlgan hamda korxonalar hisobiga qurilayotgan, qiymati 9 mln soʻmdan koʻp boʻlgan (1991-yilgi narxlarda) korxonalarni kapital qurish va qayta qurish boʻyicha loyiha-smeta hujjatlarini ekspertizadan oʻtkazish va tasdiqlashni amalga oshirish.

5. Korporatsiya davlat hokimiyati va boshqaruv organlarida, hokimliklarda, vazirliklarda, idoralarda, davlat qoʻmitalarida, davlat konsernlarida, uyushmalarida va boshqa tashkilotlar va korxonalarda (shu jumladan, boshqa mamlakatlarning ham) qatnashchi aksionerning manfaatlarini ifoda qiladi.

6. Korporatsiya qatnashchilari zarurat boʻlganda korporatsiya Kengashi va boshqaruviga koʻrib chiqish uchun korporatsiya faoliyatiga doir masalalar boʻyicha takliflar kiritadilar hamda ularning majlislarida ushbu masalalarni muhokama qilishda qatnashadilar.

7. Korporatsiya qatnashchilari:

korporatsiya vazifalariga muvofiq ravishda ishlab chiqarish-xoʻjalik va boshqa faoliyatlarni amalga oshiradilar;

korporatsiya Ustaviga amal qiladilar, korporatsiya bilan tuzilgan shartnomalar boʻyicha majburiyatlarni, korporatsiya Kengashi raisining koʻrsatmalari va buyruqlarini bajaradilar;

korporatsiya oldida oʻz zimmasiga olgan majburiyatlarni bajarmaganlik uchun moddiy javob beradilar.

1. Quyidagilar korporatsiya mulkini shakllantirish manbalari hisoblanadi:

davlat tomonidan beriladigan mulklar;

mahsulotlarni sotishdan, xizmat koʻrsatishdan, shuningdek, korporatsiya faoliyatini boshqa turlaridan olinadigan daromadlar;

jismoniy va yuridik shaxslarning begʻaraz va xayriya badallari va ajratmalari;

qonunchilik bilan taqiqlanmagan boshqa manbalar.

2. Korporatsiyaning ustav jamgʻarmasi korporatsiya tarkibiga kiruvchi birlashmalar, trestlar, korxonalar va tashkilotlarni davlat tasarrufidan chiqarish va xususiylashtirish natijasida hosil boʻladigan aksionerlik jamiyatlari davlatga tegishli aksiyalarining 60 foizi, shuningdek, boshqa manfaatdor shaxslarning paylari hisobiga tashkil topadi.

Taʼsischilarning ustav jamgʻarmasiga qoʻshadigan ulushlari pul mablagʻlari (soʻm va xorijiy valyuta), mulklarning har xil turlari (binolar, inshootlar, mashinalar, mexanizmlar, xomashyo, yoqilgʻi va boshqa moddiy boylik), qiymatli qogʻozlar, boshqa mulkiy ulushlar holida boʻlishi mumkin.

Soʻmlarda va amaldagi narxlarda baholangan ulush taʼsischining korporatsiya ustav jamgʻarmasidagi hissasini tashkil qiladi.

Korporatsiya har bir qatnashchisining ulush va badallari miqdorlari, tarkibi ularni toʻlash tartibi taʼsis shartnomalari yoki boshqa shartnomalar bilan belgilanadi.

3. Birlashmalar, trestlar, korxonalar va tashkilotlar:

ochiq xildagi aksionerlik jamiyatlariga aylantirilganida davlatga tegishli aksiyalar ulushi 51 foizni tashkil qiladi;

yopiq xildagi davlat-aksionerlik kompaniyalariga aylantirilganda davlatga tegishli aksiyalar ulushi 55 foizni, kompaniyaga kiruvchi mehnat jamoalari aksiyalari ulushi 25 foizni korporatsiyaning qolgan qatnashchilari aksiyalari ulushi 20 foizni tashkil qiladi.

4. Korporatsiya kengashining qarori bilan markazlashtirilgan jamgʻarmalar, shu jumladan, investitsiya sugʻurta, valyuta jamgʻarmalari va boshqa jamgʻarmalar tuziladi.

Ularning tarkibi, maqsadi, miqdori va foydalanish tartibi korporatsiya kengashi tomonidan belgilanadi.

5. Markazlashtirilgan jamgʻarmalar qatnashchilar tomonidan foydaning bir qismini ajratish yoʻli bilan, shuningdek, korporatsiyaning maqsadli vazifalarini bajarish uchun investorlardan olingan badallar hisobiga tashkil topadi.

1. Qatnashchilar vakillaridan tuziladigan korporatsiya Kengashi uni boshqarishning yuqori organi hisoblanadi. Kengash tarkibiga korporatsiya rahbarlari, qatnashchi korxonalarning birinchi rahbarlari, korporatsiya apparati ayrim boshqarmalarning boshliqlari kiradi.

Kengash majlislari yilning har choragida kamida bir marta oʻtkaziladi, majlislar ularda Kengash aʼzolarining uchdan ikki qismi qatnashgan taqdirda toʻla huquqli boʻladi.

Kengash korporatsiya faoliyatiga taalluqli boʻlgan barcha masalalarni hal qiladi.

Kengash qarorlari ochiq ovoz berish yoʻli bilan qabul qilinadi va agar ular uchun majlisda jami qatnashganlarning koʻpchiligi, lekin jami aʼzolarning kamida 50 foizi ovoz bergan taqdirda qabul qilingan hisoblanadi.

Korporatsiya kengashi qabul qilgan hujjatlar korporatsiya Kengash raisi imzolaydigan qaror bilan rasmiylashtiriladi.

Kengash faoliyati korporatsiya kengashi toʻgʻrisidagi nizom bilan tartibga solinadi.

2. Korporatsiya Kengashi:

korporatsiya boshqaruvi raisini va uning oʻrinbosarlarini saylaydi, boshqaruv raisi ayni bir vaqtda lavozimiga koʻra korporatsiya kengashining raisi hisoblanadi. Boshqaruv raisi va uning oʻrinbosarlari Vazirlar Mahkamasi tomonidan tasdiqlanadi:

korporatsiya boshqaruvini saylaydi;

korporatsiya Ustaviga oʻzgarishlar va qoʻshimchalar kiritadi;

markazlashtirilgan jamgʻarmalar tuzadi;

qatnashchilarni korporatsiyaga qabul qilish va undan chiqarish masalalarini hal etadi;

korporatsiya qatnashchilarini ishlab chiqarish, ilmiy-texnikaviy, xoʻjalik va ijtimoiy-maishiy faoliyatini asosiy yoʻnalishlari va dasturlarini tasdiqlaydi;

korporatsiya hamda uning qatnashchilari apparati tarkibiy boʻlinmalari rahbarlarining hisobotlarini tinglaydi.

3. Boshqaruv raisi:

Kengash qarorini amalga oshiradi va yakkaboshlik prinsiplari boʻyicha ishlaydi, ishlarni tashkil qiladi va korporatsiya faoliyatini pirovard natijalari uchun shaxsan javob beradi, qatnashchi tashkilotlar bilan shartnomalar tuzish yoʻli bilan ularning birinchi rahbarlarini va bosh buxgalterlarini tanlash va joy-joyiga qoʻyishni amalga oshiradi. Tuzilgan shartnomalarda tomonlarning huquq va vazifalari, pirovard natijalarga erishishga bogʻliq boʻlgan mehnatga haq toʻlash shartlari, shuningdek, xodimlarning ijtimoiy-maishiy sharoitlari kelishib olinadi;

korporatsiya qatnashchilari tomonidan berilgan huquqlar doirasida, korporatsiya qatnashchilarining bajarishi majburiy boʻlgan buyruqlar va koʻrsatmalar chiqaradi;

korporatsiya apparati xodimlar bilan mehnat munosabatlarini shartnoma asosida oʻrnatadi;

markaziy apparat tuzilmasini, shtatlarini, uni mablagʻ bilan taʼminlash xarajatlari smetasini tasdiqlaydi hamda korporatsiya apparati xodimlarini mukofotlash va ragʻbatlantirish tizimini belgilaydi.

4. Korporatsiya boshqaruvi:

korporatsiya Kengashi majlislari oʻrtasidagi davrda uning faoliyatiga rahbarlik qiladi va korporatsiyaga yuklatilgan vazifalarning bajarilishi uchun javob beradi;

oʻzining muntazam oʻtkaziladigan majlislarida korporatsiya vazifalarini xal etish, Kengash qarorlarini amalga oshirish, yagona texnika siyosatini oʻtkazish, loyiha-smeta ishlarini, texnikaviy normalashtirish va standartlashni takomillashtirish, qurilish va sanoat ishlab chiqarishi, mehnat unumdorligini oshirish, tasarrufidagi tashkilotlar va korxona faoliyatini yaxshilash bilan bogʻliq boʻlgan masalalarni koʻrib chiqadi.

korporatsiya boshqaruvi faoliyati, uning majlislari tartibi, hujjatlar qabul qilish va qarorlar chiqarish boshqaruv tomonidan tasdiqlanadigan boshqaruv ish tartibiga muvofiq amalga oshiriladi.

5. Ijro etuvchi apparat:

korporatsiyaning ijro etuvchi apparati korporatsiya Kengashi boshqaruvi va raisi qarorlarining bajarilishini taʼminlaydi.

Ijro etuvchi apparat xodimlari mehnatiga haq toʻlash shartlari yollashning muayyan tizimi bilan belgilanadi.

Ijro etuvchi apparat korporatsiya foydasidan ajratmalar hisobiga, korporatsiya Kengashi tomonidan tasdiqlangan smeta doirasida mablagʻ bilan taʼminlanadi.

Ijro etuvchi apparat oʻrtacha ish haqining oʻsish surʼati umuman korporatsiya boʻyicha oʻrtacha oylik ish haqining oʻsish surʼatiga muvofiq boʻlishi kerak.

Ijro etuvchi apparatning ayrim vazifalari alohida shartnomalar yoki bitimlar boʻyicha yollangan xodimlar tomonidan bajariladi.

1. Korporatsiya natijalarining yigʻma hisobini, ishlab chiqarishning borishini nazorat qilishni amalga oshiradi, operativ, buxgalteriya va statistik hisobni yuritadi.

2. Korporatsiya qatnashchilari har oyda korporatsiyaga yuqori organlar tomonidan belgilangan statistik hisobotni, yilning har choragida buxgalteriya hisobotini, shuningdek, qurilish va sanoat ishlab chiqarishini operativ boshqarishni amalga oshirish uchun korporatsiya xizmatiga zarur boʻlgan axborotlarni taqdim etishga majburdir.

3. Korporatsiya buxgalteriya, operativ statistik hisobga olish va hisobot ishlari Oʻzbekiston Respublikasi yuqori organlarining yoʻriqnoma hujjatlariga muvofiq olib boriladi.

1. Korporatsiya faoliyati amaldagi qonun hujjatlariga muvofiq vakil qilingan organlarning qaroriga binoan toʻxtatilishi mumkin.

2. Korporatsiya qayta tuzilganda uning barcha huquq va vazifalari korporatsiyaning huquqiy vorisiga oʻtadi.

3. Korporatsiyani tugatish toʻgʻrisida qaror qabul qilgan organ tugatish komissiyasini tayinlaydi.

4. Tugatish komissiyasi mavjud mulklarni baholaydi, tugatish balansini tuzadi va uni korporatsiya qatnashchilariga taqdim etadi.

5. Korporatsiyaning pul mablagʻlari, shu jumladan, tugatish vaqtida mulklarni sotishdan tushgan mablagʻlar, ijro etuvchi apparat xodimlari bilan hisob-kitob qilingandan hamda banklar, budjet va boshqa kreditorlar oldidagi majburiyatlar bajarilgandan keyin, komissiya tomonidan, konferensiya belgilangan tartibda, korporatsiya qatnashchilari oʻrtasida taqsimlanadi.

6. Korporatsiya davlat tomonidan roʻyxatiga olish Reyestrdan chiqarilgan vaqtdan boshlab oʻz faoliyatini toʻxtatadi.