“O‘zbekiston Respublikasida nogironlarni ijtimoiy himoya qilish to‘g‘risida”gi Qonunini ro‘yobga chiqarish, huquq va erkinliklarni amalga oshirishda nogironlarga O‘zbekistonning boshqa barcha fuqarolari bilan teng imkoniyatlarni ta’minlash, to‘laqonli turmush tarzi uchun sharoitlar yaratish maqsadida Vazirlar Mahkamasi qaror qiladi:

2. O‘zbekiston Respublikasi Davlat qurilish ishlari qo‘mitasi:

aholi yashaydigan joylarni rejalashtirish va imorat solishga oid respublika me’yoriy hujjatlarini ishlab chiqishda, turli xil maqsadlardagi binolar va inshootlarni loyihalash va qurishda nogironlarning ijtimoiy va funksional talablari hisobga olinishini ta’minlasin;

1993-1994-yillarda 1-qavatida nogironli oila uchun xonadonlari bo‘lgan uy-joylarning va nogironlarga ijtimoiy xizmat ko‘rsatish markazlarining namunali loyihalarini ishlab chiqishni amalga oshirsin.

3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari mikrorayonlar, kvartallar va aholi yashaydigan boshqa joylar qurilishini rejalashtirishda ixtisoslashtirilgan uy-joylar va nogironlarga ijtimoiy xizmat ko‘rsatish markazlari bo‘lishini hamda nogironlarning funksional talablarini va hayot faoliyatining o‘ziga xosligini hisobga olgan holda turli maqsadlardagi jamoat binolari va inshootlarni qayta qurishni nazarda tutsinlar.

5. O‘zbekiston Respublikasi Moliya vazirligi, Mehnat vazirligi, Ijtimoiy ta’minot vazirligi, Davlat soliq bosh boshqarmasi, Davlat statistika qo‘mitasi bir oy muddat ichida mazkur qarorning 4-bandi bajarilishini hisobga olish, nazorat qilish tartibi bo‘yicha tegishli hujjatlarni tasdiqlasinlar.

6. O‘zbekiston Respublikasi Mehnat vazirligi, Ijtimoiy ta’minot vazirligi, Sog‘liqni saqlash vazirligi Kasaba uyushmalari Federatsiyasi Kengashi va nogironlarning jamoat tashkilotlari bilan birgalikda 1993-yil 1-yanvargacha, nogironlarning mehnat sharoitlarini hisobga olgan holda, xalqaro me’yorlarga asoslanib, ular uchun ixtisoslashgan ishchi o‘rinlari me’yorlarini ishlab chiqsinlar.

7. Ixtisoslashtirilgan sexlar, uchastkalar va korxonalarda ishlovchi nogironlar mehnatiga haq to‘lash fondidan 4,7 foiz stavka bo‘yicha yagona ijtimoiy to‘lov undiriladi yagona ijtimoiy to‘lov summasini belgilangan tartibda taqsimlagan holda.

8. O‘zbekiston Respublikasi davlat mulkini boshqarish va xususiylashtirish qo‘mitasi vazirliklar, idoralar va nogironlar jamiyati bilan birgalikda, keyinchalik imtiyozli shartlarda Nogironlar jamiyatiga berish uchun, davlat tasarrufidan chiqariladigan va xususiylashtiriladigan obyektlar (korxonalar, artellar, ishlab chiqarish sexlari va uchastkalari, maishiy komplekslar va boshqalarni aniqlash bo‘yicha 1992-yil 1-sentabrgacha Vazirlar Mahkamasiga takliflar kiritsin.

9. O‘zbekiston Respublikasi Sog‘liqni saqlash vazirligi Ijtimoiy ta’minot vazirligi bilan birgalikda bolalar jamoasida bo‘lish imkonini bermaydigan hamda yakka tartibda parvarishni talab qiluvchi og‘ir kasalliklarga chalingan, jismoniy kamchiliklari bo‘lgan 16 yoshgacha bo‘lgan bolalarga ijtimoiy pensiyalar va imtiyozlar tayinlash uchun ma’lumotlar ro‘yxatini qayta ko‘rib chiqsin va tasdiqlasin.

10. O‘zbekiston Respublikasi Mehnat vazirligi va Ijtimoiy ta’minot vazirligi O‘zbekiston Respublikasi hududida bolalikdan nogironlarga ijtimoiy pensiyalar va imtiyozlar tayinlash hamda to‘lash tartibi to‘g‘risidagi yo‘riqnomani qayta ko‘rib chiqsinlar va tasdiqlasinlar.

11. O‘zbekiston Respublikasi Ijtimoiy ta’minot vazirligi, Sog‘liqni saqlash vazirligi, Mehnat vazirligi Nogironlar jamiyati va boshqa manfaatdor vazirliklar va idoralar bilan birgalikda 1993-yil 1-yanvargacha “O‘zbekiston Respublikasi nogironlarini reabilitatsiya qilish” Davlat dasturi loyihasini ishlab chiqsinlar.

12. Mazkur qarorning bajarilishini nazorat qilish Vazirlar Mahkamasining ijtimoiy masalalar, fan va ta’lim bo‘limiga yuklatilsin.