Vazirlar Mahkamasi qaror qiladi:

Oʻzbekiston Respublikasi Davlat kinokompaniyasi haqidagi ilova qilinayotgan Nizom tasdiqlansin.

1. Oʻzbekiston Respublikasi Davlat kinokompaniyasi* respublika hududida faoliyat koʻrsatuvchi ijodiy-ishlab chiqarish, kino va video ijara tashkilotlari faoliyatiga rahbarlik qiladigan va uni muvofiqlashtiradigan, Oʻzbekiston Respublikasi Prezidentining 1992-yil 9-martdagi Farmoni bilan tashkil etilgan davlat boshqaruv organi hisoblanadi

“Oʻzdavkinokompaniya” oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidentining farmonlariga, Vazirlar Mahkamasi farmoyishlariga hamda mazkur Nizomga amal qiladi, amaldagi qonunning oʻziga qarashli korxonalar va tashkilotlarda toʻgʻri qoʻllanilishini taʼminlaydi.

2. “Oʻzdavkinokompaniya”ning asosiy maqsadi va vazifalari quyidagilardan iborat:

respublika mustaqilligini yanada mustahkamlashda milliy kinematografiyaning rolini oshirish, qadimiy xalq anʼanalari, maʼnaviy qadriyatlarini tiklash;

“Oʻzdavkinokompaniya” tarkibiga kirgan ijodiy ishlab chiqarish, kino va video ijaraga berish tashkilotlari faoliyatiga rahbarlik qilish, uni nazorat etish va muvofiqlashtirishni amalga oshirish; kino-video korxonalari faoliyatini muvofiqlashtirish va ularning, qaysi idoraga qarashliligi va mulkchilik shaklidan qatʼi nazar, repertuarining gʻoyaviy-badiiy saviyasini nazorat qilish;

kino sanʼatining millatlararo aloqalarini rivojlantirish, qoʻshma xalqaro ijodiy dasturlarni, qoʻshma korxonalarni yaratish, xalqaro va mintaqaviy kino festivallar, doimiy faoliyat koʻrsatuvchi kino va video bozorlar uyushtirish, hamkorlikda yaratiladigan filmlarning suratga olish ishlarini muvofiqlashtirish;

“Oʻzdavkinokompaniya” tizimiga kiruvchi korxonalar, tashkilotlar va muassasalarning tashkiliy tuzilmasi va moliya xoʻjalik faoliyatini takomillashtirish yuzasidan meʼyoriy hujjatlar qabul qilish uchun takliflar tayyorlash;

respublikaga olib kelingan, namoyish etish va ijaraga berish uchun moʻljallangan kino va videofilmlarning ekspert bahosini amalga oshirish va qaysi idoraga boʻysunishidan va mulkchilik shaklidan qatʼi nazar, hamma tashkilotlarning olishi uchun majburiy boʻlgan Davlat Respublika ijara guvohnoma (DRIG)sini berish;

respublika hududida kino va videofilmlarni ijaraga berish va ulardan texnik jihatdan foydalanish, qoidalarini ishlab chiqish;

3. “Oʻzdavkinokompaniya” oʻziga yuklatilgan vazifalarga muvofiq:

respublika, shuningdek, uning tashqarisidagi barcha davlat organlari va jamoat tashkilotlarida unga ishonib topshirilgan masalalar boʻyicha respublika manfaatlarini himoya qiladi;

qoʻshma korxonalar tashkil etish, hamkorlikda filmlar yaratish, xorijiy sheriklar bilan boshqa xil ixtisoslashgan tanlovlar, koʻngilochar tadbirlar oʻtkazish yoʻli bilan xalqaro hamkorlik dasturlarini qabul qiladi va amalga oshiradi;

kinovideomahsulotlar, kinoaudiovideoplyonkalar, boshqa tovarlar va jihozlar ishlab chiqarish, kinovideo mahsulotlarini sotish hisobiga chet el kino tashkilotlari xizmatidan foydalanish uchun texnika sotib olish boʻyicha eksport-import va ayirboshlash bitimlarini amalga oshiradi, chet el kino va video tashkilotlari vakillarini transport, aloqa, texnika vositalari, tarjimonlar bilan taʼminlaydi va belgilangan tartibda boshqa pullik xizmatlarni koʻrsatadi.

Oʻzbekiston Respublikasi Moliya vazirligi bilan birgalikda kino va video mahsulotlari uchun narxlarni, xizmat va ijara uchun tariflarni soʻm va chet el valyutasida belgilaydi, shuningdek, u kino va video mahsulotlarining namoyish etilishini va dasturini nazorat qilish huquqiga egadir;

kino va video uchun barcha turdagi asarlarni yaratganlik uchun mualliflik, suratga olish va ijrochilik, shuningdek, ssenariylar va filmlarga muzika yaratganlik uchun mukofotlarni belgilaydi;

badiiy ishlab chiqarish, sanʼatkorlik va badiiy xodimlarning tarif tartibini belgilaydi;

barcha toifadagi xizmatchilarni ragʻbatlantiruvchi ustamalar, qoʻshimcha ish haqi, mukofot va boshqa turdagi toʻlovlarning miqdorini aniqlaydi;

xalqimizning milliy-maʼnaviy va madaniy merosining bir boʻlagi sifatida kino va video mahsulotlar fondini tanlash, tartibga solish va saqlash boʻyicha davlat funksiyasini amalga oshiradi;

mulkchilikning barcha shakllaridagi korxonalarga, tashkilotlarga Oʻzbekiston Respublikasining amaldagi qonunlariga muvofiq kino va video ishlab chiqarish faoliyati, kino va video koʻrsatuvlari bilan shugʻullanish huquqini beruvchi maxsus ruxsatnoma (litsenziya)lar beradi;

respublikadagi barcha vazirliklar, idoralar va tashkilotlar uchun majburiy boʻlgan kinoteatrlar va kino-videoqurilmalardan foydalanishning texnik normalari va qoidalariga, shuningdek,video va film nusxalaridan texnik foydalanish qoidalariga qanday rioya etilayotganligini nazorat qiladi.

Kino-videofilmlar ijarasi uchun belgilangan tariflar meʼyori, kinoteatrlarga va boshqa kino-videoqurilmalarga kirish chiptalarining bahosi meʼyorining toʻgʻri qoʻllanilishini nazorat qiladi, qaysi idoraga boʻysunishidan qatʼi nazar, kinoteatrlar va kino-videoqurilmalarning razryadlarga oʻtkazilishining toʻgʻriligini tekshiradi;

respublikadagi kino-video tizimi obyektlariga, shuningdek, respublikaning boshqa idoralariga ularning buyurtmalariga koʻra kino-video texnologiyasi uskunalari va ishda foydalanadigan kinomateriallarni sotib olishda vositachilik xizmati koʻrsatadi;

kinomotografiya sohasidagi xodimlarni tanlash, joy-joyiga qoʻyish, tarbiyalash va ularning malakasini oshirish ishlarini amalga oshiradi.

tizimning moliyaviy faoliyatiga rahbarlik qiladi, yigʻma hisob-kitoblar va balanslarni tasdiqlaydi;

belgilangan tartibda reklama-noshirlik faoliyatini amalga oshiradi.

4. “Oʻzdavkinokompaniya” respublika hududida va uning tashqarisida yuridik shaxs huquqiga ega boʻlgan korxonalar, tashkilotlar va vakolatxonalarni tuzish ular haqidagi nizomlarni tasdiqlash, shuningdek, belgilangan tartibda MDH respublikalarida va chet elda kino va video mahsulotlarini sotish va xarid qilishda oʻz vakiliga ega boʻlish, birja aʼmollarida ishtirok etish huquqiga egadir.

5. “Oʻzdavkinokompaniya”ga tashqi iqtisodiy faoliyatni mustaqil ravishda olib borish huquqi beriladi. “Oʻzdavkinokompaniya”tashqi iqtisodiy faoliyatning ruxsat berilgan turlarini amalga oshirish uchun zarur ruxsatnomani Oʻzbekiston Respublikasining “Tashqi iqtisodiy faoliyat haqida”gi Qonuni bilan belgilangan tartibda oladi. Oʻz valyuta mablagʻlari, bankning valyuta kreditlari, shuningdek, boshqa mablagʻlar hisobiga import boʻyicha jihozlar, xomashyo, kino, video va audiofilmlar sotib olishi va sotishi mumkin.

6. “Oʻzdavkinokompaniya”ning huquq doirasiga kiruvchi va oʻzining manfaatlariga daxldor masalalar davlat organlari va xoʻjalik tashkilotlari tomonidan “Oʻzdavkinokompaniya” ishtirokida hal etiladi.

7. “Oʻzdavkinokompaniya”ning markaziy apparatini moliyaviy taʼminlash respublika budjeti hisobidan, kinolashtirish va kinofilmlarni ijaraga beruvchi hududiy boshqarmalar esa mahalliy budjet hisobidan amalga oshiriladi.

Bundan tashqari, moliyaviy taʼminlash manbalari quyidagilar ham boʻlishi mumkin:

tashkilotlar, muassasalar va xususiy shaxslarning pulli va moddiy ulushlari;

tijorat faoliyatidan olingan daromadlar;

banklarning kreditlari va boshqa kreditlar;

respublika qonunlari bilan taqiqlanmagan boshqa manbalar.

8. “Oʻzdavkinokompaniya”ga Vazirlar Mahkamasi tomonidan lavozimga tayinlanadigan Rais boshchilik qiladi.

“Oʻzdavkinokompaniya” raisining oʻrinbosarlari Vazirlar Mahkamasi tomonidan lavozimga tayinlanadi va lavozimdan ozod qilinadi. Rais oʻrinbosarlari oʻrtasida vazifalar “Oʻzdavkinokompaniya” raisi tomonidan taqsimlanadi.

“Oʻzdavkinokompaniya” raisi:

“Oʻzdavkinokompaniya”ga yuklatilgan vazifa va majburiyatlarning bajarilishi uchun shaxsan javob beradi, rais oʻrinbosarlarining, boshqarmalar, boʻlimlar va “Oʻzdavkinokompaniya”ning boshqa boʻlinmalari rahbarlarining javobgarlik darajasini belgilaydi;

“Oʻzdavkinokompaniya” oʻz huquq doirasida va amaldagi qonunlar, Oʻzbekiston Respublikasi Prezidenti farmonlari, Vazirlar Mahkamasining qarorlari va farmoyishlari asosida buyruqlar, farmoyishlar va yoʻriqnomalar chiqaradi, kino va video tarmoqlari, kino va video ijara idoralari, korxonalar, tashkilotlar va muassasalar uchun, ularning qaysi idoraga qarashligi, mulkchilik shaklidan qatʼi nazar, majburiy boʻlgan koʻrsatmalar beradi;

zarurat boʻlgan hollarda Oʻzbekiston Respublikasi vazirliklari, idoralari, jamoat tashkilotlari rahbarlari bilan birgalikda qoʻshma qarorlar, yoʻriqnomalar chiqaradi;

oʻziga qarashli korxonalar va tashkilotlarning nizomlari va ustavlarini tasdiqlaydi.

9. “Oʻzdavkinokompaniya” raisi va lavozimlari boʻyicha rais oʻrinbosarlari, shuningdek, “Oʻzdavkinokompaniya”ning boshqa rahbar xodimlari, respublikaning ijodiy ziyolilaridan iborat tarkibda boshqaruvga ega boʻladi. “Oʻzdavkinokompaniya” raisi boshqaruv raisi hisoblanadi. Boshqaruv aʼzolari Vazirlar Mahkamasi tomonidan tasdiqlanadi.

Boshqaruv oʻzining muntazam ravishda oʻtkaziladigan majlislarida milliy kinematografiyani yanada rivojlantirishning, tashkilotlar, korxonalar va ijara iqtisodiyotni yaxshilashning muhim masalalarini, yagona dasturiy va texnik siyosatni olib borishni koʻrib chiqadi, oʻziga qarashli boʻlinmalarga amaliy rahbarlik qilish, ijroni tekshirish, kadrlarni tanlash, joy-joyiga qoʻyish masalalarini, muhim buyruqlar va yoʻriqnomalarning loyihalarini muhokama qiladi.

10. “Oʻzdavkinokompaniya”ning markaziy apparati tuzilmasi va xodimlarning soni Vazirlar Mahkamasi tomonidan tasdiqlanadi.

11. Kinolashtirish va kinoni ijaraga berish idoralarining viloyat boshqarmalari tuzilmasi va xodimlarining soni Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishilgan holda “Oʻzdavkinokompaniya” tomonidan tasdiqlanadi. “Oʻzdavkinokompaniya” tuzilmasini, shtatlarni mustaqil ravishda aniqlaydi va tasdiqlaydi hamda belgilangan mehnat haqi fondi doirasida turli toifadagi xodimlarga nisbatan cheklanmagan holda tarmoq xodimlari sonini tasdiqlaydi.

“Oʻzdavkinokompaniya”, uning korxonalari va tashkilotlari ijodiy, ijrochilik, texnik xodimlar va boshqa boʻgʻinlarning rahbarlari bilan boʻladigan oʻzaro munosabatlarni amaldagi qonunlarga va mazkur Nizomga muvofiq shartnoma asosida tashkil etadilar.

12. “Oʻzdavkinokompaniya” banklarda hisob-kitob va boshqa schyotlarga ega boʻladi, shuningdek, qonun bilan nazarda tutilgan hollarda va tartibda valyuta schyotlarini ochishi mumkin.

13. “Oʻzdavkinokompaniya” Oʻzbekiston Respublikasi Davlat gerbi tasvirlangan va oʻz nomi oʻzbek tilida yozilgan muhrga ega boʻladi.