O‘zbekiston Respublikasi Prezidentining “Meva-sabzavotchilik va uzumchilik tarmog‘ini yanada rivojlantirish, sohada qo‘shilgan qiymat zanjirini yaratishga doir qushimcha chora-tadbirlar to‘g‘risida” 2019-yil 11-dekabrdagi PQ-549-son qaroriga muvofiq Vazirlar Mahkamasi qaror qiladi:

1. Vazirlar Mahkamasining “O‘zbekiston Respublikasi Qishloq xo‘jaligi vazirligi huzuridagi Uzumchilik va vinochilikni rivojlantirish agentligi hamda O‘zbekiston Respublikasi Qishloq xo‘jaligi vazirligi huzuridagi Uzumchilik va vinochilikni rivojlantirish agentligining uzum yetishtiruvchilar va vino tayyorlovchilarni qo‘llab-quvvatlash jamg‘armasi to‘g‘risidagi nizomlarni tasdiqlash haqida” 2019-yil 30-martdagi 271-son qaroriga ilovaga muvofiq o‘zgartirish va qo‘shimchalar kiritilsin.

2. O‘zbekiston Respublikasi Qishloq xo‘jaligi vazirligi manfaatdor vazirliklar va idoralar bilan birgalikda o‘zlari qabul qilgan normativ- huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish O‘zbekiston Respublikasi Bosh vazirining agrar va oziq-ovqat sohalarini rivojlantirish masalalari bo‘yicha o‘rinbosari O‘.I. Barnoyev hamda O‘zbekiston Respublikasi qishloq xo‘jaligi vaziri J.A. Xodjayev zimmasiga yuklansin.

1. 1-ilova 10-bandining “a” kichik bandi quyidagi mazmundagi xatboshi bilan to‘ldirilsin:

“uzumchilik yo‘nalishidagi investitsiya loyihalarini moliyalashtirish uchun tijorat banklari tomonidan ajratiladigan kreditlar bo‘yicha kafillik taqdim etish sohasida umumiy qiymatining kamida 15 foizi loyiha tashabbuskori tomonidan moliyalashtiriladigan uzumchilik yo‘nalishidagi investitsiya loyihalarini moliyalashtirish uchun tijorat banklari tomonidan ajratiladigan kreditlar bo‘yicha bo‘lg‘usi hosil, tokzor va (yoki) yer uchastkasiga bo‘lgan huquqni garovga olgan holda kafillik taqdim etadi;”.

2. 2-ilovada:

a) 5-band quyidagi mazmundagi o‘n birinchi xatboshi bilan to‘ldirilsin:

“O‘zbekiston Respublikasi Prezidenti hamda O‘zbekiston Respublikasi Vazirlar Mahkamasining qarorlari va boshqa hujjatlarida belgilangan topshiriqlarni bajarish;”

o‘n birinchi xatboshi tegishli ravishda o‘n ikkinchi xatboshi deb hisoblansin;

b) 6-band:

“a” kichik band quyidagi tahrirda bayon qilinsin:

“a) qonun hujjatlarida belgilangan miqdorda yaratilayotgan uzum plantatsiyalarida tomchilatib sug‘orish texnologiyasini joriy etish. Agar shartnomada ko‘rsatilgan tomchilatib sug‘orish texnologiyasini joriy qilishga sarflangan summa subsidiyaning qonun hujjatlarida belgilangan miqdoridan kam bo‘lgan taqdirda subsidiya shartnomada nazarda tutilgan summaga ajratiladi;”;

“b” kichik bandidagi “35 gektar va undan ortiq” so‘zlari “35 gektardan ziyod” so‘zlari bilan almashtirilsin;

quyidagi mazmundagi “v” va “g” kichik bandlar bilan to‘ldirilsin:

“v) mahalliy sharoitda tok o‘simligi to‘qima (meristema hujayra)laridan “In vitro” sharoitida yetishtirilgan tok ko‘chatlarini sotib olish xarajatlarining bir qismini qoplash maqsadida bir dona tok ko‘chatiga 4 (to‘rt) ming so‘mdan ortiq bo‘lmagan miqdorda subsidiyalar ajratiladi;

g) tok ko‘chatlarini shpalerga (yog‘och va boshqa sinuvchan ustunlardan tashqari) ko‘tarish xarajatlarining bir qismini qoplash maqsadida bir dona shpalerga 15 (o‘n besh) ming so‘mdan ortiq bo‘lmagan miqdorda subsidiyalar ajratiladi”;

quyidagi mazmundagi o‘n birinchi xatboshi bilan to‘ldirilsin:

“Mazkur bandning “a” va “b” kichik bandlarida ko‘rsatilgan maqsadlarga mablag‘lar O‘zbekiston Respublikasining respublika budjetidan har yili ajratiladigan subsidiyalar hisobidan, “v” va “g” kichik bandlaridagi maqsadlar uchun mablag‘lar Jamg‘armaning qolgan manbalaridan kelib tushadigan tushumlar hisobidan amalga oshiriladi.”

v) 7-band quyidagi tahrirda bayon qilinsin.

“7. Subsidiyalarni ajratish tomchilab sug‘orish tizimini joriy qilish, yaratilayotgan uzum plantatsiyalarida suv chiqarish uchun nasos stansiyalari va suv chiqarish uchun burg‘ulash quduqlarini qurish, “In vitro” sharoitida yetishtirilgan tok ko‘chatlari ekish va shpalerga ko‘tarish holati bo‘yicha amalga oshiriladi, Tomchilab sug‘orish tizimini joriy qilish, yaratilayotgan uzum plantatsiyalarida suv chiqarish uchun nasos stansiyalari va suv chiqarish uchun burg‘ulash quduqlarini qurish, “In vitro” sharoitida yetishtirilgan tok ko‘chatlari ekish va shpalerga ko‘tarish holati Vazirlar Mahkamasining 2019-yil 6-fevraldagi 103-son qarori bilan tasdiqlangan Paxta xomashyosi yetishtiruvchilarning tomchilatib sug‘orish texnologiyasini joriy qilish bilan bog‘liq xarajatlarini qoplash tartibi to‘g‘risidagi nizomning 6-bandiga muvofiq tarkibdagi foydalanishga topshirish bo‘yicha komissiyaning dalolatnomasi bilan tasdiqlangan bo‘lishi lozim”;

g) 16-bandning uchinchi xatboshi quyidagi tahrirda bayon qilinsin:

“uzum plantatsiyalarini barpo etish uchun yoki shpalerga ko‘tarilishi lozim bo‘lgan tokzorlar joylashgan yer uchastkasi mavjudligini tasdiqlaydigan hujjat — subsidiyalarni olishda;”

d) 24-banddagi “uzum ekilishi mavsumi” so‘zlaridan keyin “yoki shpalerga ko‘tarish ishlari” so‘zlari bilan to‘ldirilsin;

e) 25-banddagi “plantatsiyalarini barpo qilish” so‘zlaridan keyin “yoki shpalerga ko‘tarish ishlari” so‘zlari bilan to‘ldirilsin;

j) 26-band quyidagi mazmundagi ikkinchi xatboshi bilan to‘ldirilsin:

“Agentlik tijorat banklari tomonidan ajratiladigan kreditlar bo‘yicha bo‘lg‘usi hosil, tokzor va (yoki) yer uchastkasiga bo‘lgan huquqni garovga olgan holda kafillik taqdim etadi, bunda Jamg‘arma mablag‘larining sarflanishi Jamg‘armaning respublika budjetidan ajratiladigan subsidiyalardai tashqari boshqa manbalari hisobidan amalga oshiriladi”;

ikkinchi-uchinchi xatboshilari tegishli ravishda uchinchi-to‘rtinchi xatboshilar deb hisoblansin;

z) nizomga 2-ilovaning VII-bosqichi chora-tadbirlar ustunining 1-bandi quyidagi tahrirda bayon qilinsin:

“1. Mablag‘lardan qat’iy ravishda uzum plantatsiyalarini yaratish, tomchilab sug‘orish texnologiyasini joriy qilish va/yoki burg‘ulash quduqlarini qurish, “In vitro” sharoitida yetishtirilgan tok ko‘chatlari ekish va shpalerga ko‘tarish uchun belgilangan maqsadda foydalanadi”;

i) 3-ilovaning “Amalga oshiriladigan ishlar” grafasi kuyidagi mazmundagi 5¹-band bilan to‘ldirilsin:

“5¹. Tok ko‘chatlarini shpalerga ko‘tarish”.