Avtomobil yo‘llari sohasini rivojlantirish va qo‘llab-quvvatlash hamda O‘zbekiston Respublikasi Transport vazirligi huzuridagi Avtomobil yo‘llari qo‘mitasi va unga idoraviy mansub tashkilotlar xodimlari mehnatiga haq to‘lash va moddiy rag‘batlantirish maqsadida Vazirlar Mahkamasi qaror qiladi:

1. O‘zbekiston Respubikasi Moliya vazirligi va Transport vazirligining yuridik shaxs tashkil etmagan holda O‘zbekiston Respublikasi Transport vazirligi huzuridagi Avtomobil yo‘llari qo‘mitasi faoliyatini rivojlantirish va qo‘llab-quvvatlash jamg‘armasini tashkil etish to‘g‘risidagi taklifiga rozilik berilsin.

2. Quyidagilar:

O‘zbekiston Respublikasi Transport vazirligi huzuridagi Avtomobil yo‘llari qo‘mitasi faoliyatini rivojlantirish va qo‘llab-quvvatlash jamg‘armasi to‘g‘risidagi nizom 1-ilovaga muvofiq;

O‘zbekiston Respublikasi Transport vazirligi huzuridagi Avtomobil yo‘llari qo‘mitasi va unga idoraviy mansub tashkilotlar xodimlari mehnatiga haq to‘lash va moddiy rag‘batlantirish tartibi to‘g‘risidagi nizom 2-ilovaga muvofiq tasdiqlansin.

3. O‘zbekiston Respublikasi Hukumatining ayrim qarorlariga 3-ilovaga muvofiq o‘zgartirishlar kiritilsin.

4. O‘zbekiston Respublikasi Transport vazirligi manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari — transport vaziri A.J. Ramatov zimmasiga yuklansin.

1. Ushbu Nizom O‘zbekiston Respublikasi Transport vazirligi huzuridagi Avtomobil yo‘llari qo‘mitasi faoliyatini rivojlantirish va qo‘llab-quvvatlash jamg‘armasi (keyingi o‘rinlarda Jamg‘arma deb ataladi) mablag‘larini shakllantirish, boshqarish va undan foydalanish tartibini belgilaydi.

2. Jamg‘arma yuridik shaxs hisoblanmaydi va uning mablag‘lari O‘zbekiston Respublikasi Transport vazirligi huzuridagi Avtomobil yo‘llari qo‘mitasining (keyingi o‘rinlarda Qo‘mita deb ataladi) g‘aznachilik hisobvaraqlarida jamlanadi hamda tasdiqlangan daromadlar va xarajatlar smetasiga muvofiq sarflanadi.

3. Jamg‘arma avtomobil yo‘llari sohasida loyihalash, qurish, qayta qurish, ta’mirlash va saqlash ishlarini rivojlantirish, ilmiy-tadqiqot, loyiha-konstruktorlik, texnologik ishlarni qo‘llab-quvvatlash, avtomobil yo‘llarida xavfsizlikni ta’minlash, zamonaviy axborot-kommunikatsiya texnologiyalari, intellektual tizimlar, texnik vositalar va dasturiy mahsulotlarni keng joriy etish, avtomobil yo‘llari sohasiga malakali mutaxassislarni jalb etish hamda Qo‘mita va unga idoraviy mansub tashkilotlar xodimlarini moddiy rag‘batlantirish maqsadida tashkil etiladi.

4. Jamg‘arma mablag‘lari quyidagilar hisobidan shakllantiriladi:

a) O‘zbekiston Respublikasi hududiga xorijiy davlatlar avtotransport vositalarining kirganligi va tranzit o‘tishi uchun yig‘imning 25 foizi;

b) og‘ir yukli va katta hajmli transport vositalarining umumiy foydalanishdagi yo‘llar bo‘ylab yurishi uchun to‘lovning 100 foizi (qatnov yo‘lini kelishib olish va yurishga ruxsatnomani rasmiylashtirish, transport vositasi umumiy haqiqiy vaznining yo‘l qo‘yiladigan umumiy vazndan oshib ketganligi, g‘ildirak o‘qi haqiqiy yuklamalarining yo‘l qo‘yiladigan yo‘l konstruksiyalaridan oshib ketganligi hamda transport vositasi hajmlarining oshib ketganligi uchun to‘lov);

v) tegishli ruxsatnomasiz og‘ir vaznli, yirik gabaritli, xavfli yuklarni tashish va yuk bilan yoki yuksiz holdagi gabarit o‘lchamlari belgilangan normalardan ortiq bo‘lgan transport vositalarida yo‘lga chiqish uchun undiriladigan jarimalar summasining 80 foizi;

g) yuridik va jismoniy shaxslarning homiylik xayriyalari;

d) xalqaro tashkilotlar va moliya institutlarining, shuningdek, boshqa xorijiy donorlarning grantlari;

e) Jamg‘armaning vaqtincha bo‘sh mablag‘larini tijorat banklari depozitlariga joylashtirishdan tushgan daromadlar bo‘yicha tushumlar;

j) tadbirkorlik subyektlari tomonidan avtomobil yo‘llarida yo‘l harakati qoidalari buzilganligini maxsus avtomatlashtirilgan foto va video qayd etish dasturiy-texnik vositalari joriy etilgandan boshlab 2 yil davomida ular orqali qayd etilgan yo‘l harakati qoidabuzarliklari uchun undirilgan jarima summasining 10 foizi va ishga tushirilganidan 2 yil o‘tgandan so‘ng 10 foizi;

z) yo‘l harakati qoidalari buzilganligi uchun jarimalar summasining 5 foizi (maxsus avtomatlashtirilgan foto va video qayd etish dasturiy-texnik vositalari qayd etgan yo‘l harakati qoidalari buzilganligi uchun jarima summasidan tashqari);

i) maxsus avtomatlashtirilgan foto va video qayd etish dasturiy-texnik vositalari qayd etgan yo‘l harakati qoidalari buzilganligi uchun jarima summasining 5 foizi (tadbirkorlik subyektlariga tegishli maxsus avtomatlashtirilgan foto va video qayd etish dasturiy-texnik vositalari hamda tegishli og‘irlik va gabarit nazorati bo‘yicha statsionar shoxobchalar orqali qayd etilgan yo‘l harakati qoidalari buzilganligi uchun hamda bojxona organlari tomonidan undirilgan jarima summasi bundan mustasno);

k) umumiy foydalanishdagi avtomobil yo‘llarining ajratilgan mintaqalarida joylashgan yer uchastkalarida va inshootlarida tashqi reklama obyektlari (konstruksiyalari) qurish uchun elektron auksionlar yakunlari bo‘yicha huquq taqdim etishdan tushadigan mablag‘lar, shuningdek, tashqi reklamaning o‘rnatilgan obyektlari (konstruksiyalari) uchun oylik to‘lovlarning 60 foizi;

l) umumiy foydalanishdagi avtomobil yo‘llarining ajratilgan mintaqalarida joylashgan yer uchastkalarida va inshootlarida tashqi reklamani joylashtirish huquqi uchun yig‘imlarning 60 foizi;

l¹) yuk ko‘tarish quvvati 10 tonnadan yuqori bo‘lgan yuk avtotransporti vositalari va tirkamalarining avtomobil yo‘llari bo‘ylab harakatlanishi huquqi uchun yig‘imning 90 foizi;

l²) tadbirkorlik subyektlariga tegishli o‘lchov-nazorat shoxobchalari orqali qayd etilgan yo‘l harakati qoidalari buzilganligi uchun dastlabki 2 yil davomida undirilgan jarimalar summasidan tushgan mablag‘larning 35 foizi, ishga tushirilganidan 2 yil o‘tganidan so‘ng 45 foizi;

l³) maxsus ko‘rikdan o‘tkazish va texnik xulosa ishlab chiqish xizmatlari uchun to‘lovlardan kelib tushgan mablag‘larning 50 foizi;

m) qonun hujjatlarida taqiqlanmagan boshqa manbalar.

Mazkur bandning “z” va “i” kichik bandlarida ko‘zda tutilgan mablag‘lar Davlat budjetidan kamaytirilgan holda Jamg‘armaga yo‘naltiriladi.

5. Jamg‘arma mablag‘lari Qo‘mita raisi yoki uning majburiyatlarini bajaruvchi shaxs tomonidan boshqariladi.

6. Jamg‘arma mablag‘lari hisobiga moliyalashtirish uchun taqdim etilgan ilmiy-amaliy tadqiqotlar, innovatsion ishlanmalar va tajriba-konstruktorlik ishlari loyihalari (keyingi o‘rinlarda loyihalar deb ataladi) Qo‘mitaning tarmoq Ilmiy-texnik kengashi (keyingi o‘rinlarda Kengash deb ataladi) tomonidan ko‘rib chiqiladi.

Ishlab chiqilgan texnologiyalarni tajriba-sanoat sinovlaridan o‘tkazish, mahsulotning sinov partiyalarini chiqarishni va seriyali ishlab chiqarishni tashkil etish bo‘yicha loyihalarni amalga oshirish va ishlarni muvofiqlashtirish maqsadida buyurtmalar portfelini shakllantirish uchun Qo‘mita markaziy apparati tomonidan loyihalar Kengashga ko‘rib chiqish uchun kiritiladi.

Kengash loyihalarning ilmiy-texnik ekspertizasini o‘tkazadi va loyihani Jamg‘arma mablag‘lari hisobiga moliyalashtirishga qabul qilish yoki loyihani moliyalashtirishni rad etish to‘g‘risida qaror qabul qiladi.

Zarurat bo‘lganda, tegishli tarmoqda yetarli darajada bilim va malakaga ega bo‘lgan olimlar yoki mutaxassislar ekspert sifatida jalb etiladi.

Kengash qarorlari ko‘pchilik ovoz bilan qabul qilinadi va uning raisi imzolaydigan bayonnoma tarzida rasmiylashtiriladi.

7. Qo‘mita va unga idoraviy mansub korxonalar xodimlarini moddiy rag‘batlantirish va moliyaviy qo‘llab-quvvatlash O‘zbekiston Respublikasi Transport vazirligi huzuridagi Avtomobil yo‘llari qo‘mitasi va unga idoraviy mansub tashkilotlar xodimlari mehnatiga haq to‘lash va moddiy rag‘batlantirish tartibi to‘g‘risidagi nizomga muvofiq amalga oshiriladi.

8. Jamg‘armaning mablag‘lari quyidagilarga sarflanadi:

Qo‘mita markaziy apparati va uning Qoraqalpog‘iston Respublikasi va viloyatlar hududiy boshqarmalari, shuningdek, Avtomobil yo‘llari ilmiy-tadqiqot instituti” davlat muassasasi hamda “Avtoyo‘linvest” agentligi xodimlariga qo‘shimcha haqlar, ustamalar, mukofot pullari, moddiy yordam, ijtimoiy va boshqa to‘lovlarni to‘lash hamda ularni moddiy rag‘batlantirish va ijtimoiy muhofaza qilish;

Qo‘mita markaziy apparati xodimlarining mamlakat ichiga va undan tashqariga xizmat safari xarajatlarini to‘lash, yengil avtotransport vositalarini xarid qilish va saqlash, Qo‘mita va unga idoraviy mansub korxonalar rahbariyati uchun mobil aloqa xizmatlariga haq to‘lash, shuningdek, idoraviy mansub korxonalar xodimlarining mamlakat tashqarisiga xizmat safari xarajatlarini to‘lash;

ofis jihozlari va mebellar, asosiy vositalar, inventarlar va tovar-moddiy boyliklarni xarid qilish;

videokonferensiya tizimini o‘rnatish va saqlash, Qo‘mita va unga idoraviy mansub korxonalarda kompleks axborot tizimini ishlab chiqish va joriy etish;

Qo‘mita va unga idoraviy mansub korxonalar xodimlarining davolanishi va tibbiy xizmat bo‘yicha xarajatlarini qisman qoplash, shuningdek, sanatoriy, dam olish maskanlari va davolanish-sog‘lomlashtirish muassasalari, pansionatlar va boshqalarga yo‘llanmalarni xarid qilish;

yo‘l xo‘jaligi sohasidagi kam ta’minlangan oilalarni va faxriylarini ijtimoiy va moddiy qo‘llab-quvvatlash;

Qo‘mitaga yuklangan vazifalarni bajarish uchun konsalting va boshqa tashkilotlardan xorijiy mutaxassislarni o‘rnatilgan tartibda shartnoma asosida jalb qilish hamda mahalliy mutaxassislarni, maslahatchilarni shartnoma asosida jalb qilish, shuningdek, Qo‘mita ekspert-tahlil guruhi faoliyatini moliyalashtirish;

yo‘l-qurilish faoliyati sohasidagi Davlat ilmiy dasturlari bajarilishini moliyalashtirish va ularni ishlab chiqarishga joriy etish, avtomobil yo‘llarini loyihalashtirish, qurish, ta’mirlash va yo‘l-qurilish materiallari hamda konstruksiyalarini ishlab chiqarish, ishlab chiqarishni tashkil etish va boshqarish, mehnat samaradorligini oshirish, yo‘l-qurilish faoliyatini boshqarishning avtomatlashtirilgan tizimlarini yaratish sohasidagi ilmiy-tadqiqot va tajriba-konstruktorlik ishlarini moliyalashtirish, ilmiy va ilmiy-tadqiqot tashkilotlari tomonidan yo‘l-qurilish faoliyati sohasidagi normalar va qoidalar ishlab chiqilishini moliyalashtirish, yo‘l-qurilish faoliyati sohasida ilmiy-texnik va ilmiy-metodik adabiyotlar (shu jumladan, davriy nashrlar) tayyorlash hamda chop etish, bu faoliyatni ilmiy-metodik va axborot-tahliliy jihatdan ta’minlashni tashkil etish, yo‘l-qurilish faoliyati sohasidagi xalqaro ko‘rgazmalar, yarmarkalar, tadbirlar, loyihalar va dasturlarda ishtirok etish, tarmoq xodimlarining malakasi oshirilishini va ilg‘or xorijiy tajribani o‘rganishini tashkil etish, kadrlar tayyorlash, qayta tayyorlash va ularning malakasini oshirish, shu jumladan, chet mamlakatlarga va ta’lim muassasalariga amaliyotlarini tashkil etish, shuningdek, innovatsion loyihalar va zamonaviy texnologiyalar joriy etilishini rag‘batlantirish;

respublikada ilk bor ilmiy tadqiqotlar natijalari tekshiriladigan (ishlov beriladigan) eksperimental obyektlarni loyihalashtirish va qurishni ilmiy qo‘llab-quvvatlashga sarflanadigan ilmiy tashkilotlar va loyiha tashkilotlarining qo‘shimcha xarajatlarini qoplash;

ilmiy-texnik simpoziumlar, konferensiyalar, seminarlar, treninglar, ko‘rgazmalar, davra suhbatlari, amaliy mashg‘ulotlar, mahorat darslariga tayyorgarlik ko‘rish va o‘tkazish, ilmiy, normativ, metodik, texnik, texnologik hujjatlar va boshqa ilmiy-texnik axborot manbalarini xarid qilish;

Qo‘mitaga idoraviy mansub korxonalar tasarrufidagi ma’muriy, ishlab chiqarish va boshqa bino hamda inshootlarni, shu jumladan, ijtimoiy obyektlarni (bolalar sog‘lomlashtirish oromgohlari, pansionatlar, dam olish maskanlari va boshqalar) qurish, rekonstruksiya qilish va ta’mirlash, shuningdek, ularni zarur inventar, jihozlar, aloqa, kompyuter va tashkiliy texnika bilan ta’minlash;

o‘qitishning ilg‘or shakllari va usullarini, kompyuter hamda axborot-kommunikatsiya texnologiyalarini joriy etish;

Qo‘mitaga idoraviy mansub korxonalarni zamonaviy laboratoriyalar, kompyuter va boshqa asbob-uskunalar hamda texnik vositalar bilan jihozlash;

risolalar, bukletlar, kitoblar, to‘plamlar va boshqa axborot-ma’rifiy materiallar ishlab chiqish hamda e’lon qilish;

vakillik xarajatlarini to‘lash va sovg‘alar xarid qilish, shu jumladan, O‘zbekiston Respublikasiga kelgan vaqtida xorijiy va xalqaro tashkilotlar rahbarlari hamda mutaxassislarini qabul qilish va ularga hamrohlik qilish;

Qo‘mita va unga idoraviy mansub korxonalarning, shuningdek, Qo‘mitaga idoraviy mansub korxonalar ishtirokida tashkil etiladigan qo‘shma korxonalarning moddiy-texnik bazasini mustahkamlash, ularning ustav fondlarini, aylanma mablag‘larini shakllantirish va to‘ldirish;

Qo‘mita va unga idoraviy mansub korxonalar xodimlariga uy-joy va mahalliy ishlab chiqarilgan avtotransport vositalarini xarid qilish uchun kreditlarni rasmiylashtirishda uy-joy va avtotransport vositalari qiymatining 50 foizigacha bo‘lgan miqdorda dastlabki badalni to‘lash uchun Qo‘mita tomonidan belgilanadigan tartibda foizsiz qarzlar berish;

ilmiy-tadqiqot, loyiha-konstruktorlik, texnologik ishlarni o‘tkazish bilan bog‘liq investitsiya loyihalarining texnik iqtisodiy asosi/texnik iqtisodiy hisobini ishlab chiqish;

respublikada zamonaviy landshaft dizayni elementlarini o‘zlashtirish, yo‘lbo‘yi infratuzilma obyektlarini rivojlantirish sohasidagi ilg‘or xorijiy tajribani joriy etish;

avtomobil yo‘li o‘qining maydonlarida vazn o‘lchovchi statsionar nazorat postlarini joylashtirish, ularni avtotransport vositalarining gabarit parametrlari va og‘irliklarini o‘lchash uchun uskunalar bilan ta’minlash hamda maxsus avtomobillarda ko‘chma vazn o‘lchov nazorat postini tashkil etish, nazorat postlari xodimlarini saqlash, shuningdek, avtotransport vositalarining ruxsat etilgan vazn va gabarit parametrlariga rioya etilishi ustidan nazorat qilish uchun Ichki ishlar vazirligi Jamoat xavfsizligi departamenti Yo‘l harakati xavfsizligi xizmati xodimlarini shartnoma asosida jalb etish;

“Qo‘mita raisi stipendiyasi”ni ta’sis etish va to‘lash bilan bog‘liq chora-tadbirlarni moliyalashtirish;

Qo‘mitaning iqtisodiy nochor korxona va tashkilotlarini moliyaviy sog‘lomlashtirish, moddiy-texnik bazasini mustahkamlash hamda qo‘shimcha bajarilgan yo‘l ishlari (moliyaviy manbasi aniq bo‘lmagan) natijasida yuzaga kelgan debitorlik qarzdorliklarini so‘ndirish maqsadida qaytarib berish sharti bilan moliyaviy yordam berish.

9. Jamg‘armaning mablag‘lari Jamg‘arma daromadlari va xarajatlarining O‘zbekiston Respublikasi Moliya vazirligi bilan kelishgan holda tasdiqlangan smetasi doirasida Qo‘mita raisining yoki uning majburiyatlarini bajaruvchi shaxsning qarori asosida sarflanadi.

10. Qo‘mita tasdiqlangan xarajatlar smetalariga muvofiq Jamg‘arma mablag‘laridan maqsadli va samarali foydalanilishi uchun javobgardir.

1. Ushbu Nizom O‘zbekiston Respublikasi Transport vazirligi huzuridagi Avtomobil yo‘llari qo‘mitasi (keyingi o‘rinlarda Qo‘mita deb ataladi) va unga idoraviy mansub tashkilotlar xodimlari mehnatiga haq to‘lash va moddiy rag‘batlantirish tartibini belgilaydi.

2. Ushbu Nizom:

Qo‘mita markaziy apparati, Qoraqalpog‘iston Respublikasi va viloyatlar hududiy boshqarmalari, “Avtomobil yo‘llari ilmiy-tadqiqot instituti” davlat muassasasi hamda “Avtoyo‘linvest” agentligi (keyingi o‘rinlarda boshqarmalar deb ataladi) xodimlariga;

Qo‘mita tuzilmasidagi yo‘llardan muntazam foydalanish unitar korxonalari, tuman yo‘llardan foydalanish unitar korxonalari, ko‘priklardan foydalanish unitar korxonalari, “O‘zyo‘lko‘kalamzorlashtirish” unitar korxonasi tarkibidagi Qoraqalpog‘iston Respublikasi, viloyatlar va Toshkent shahar xududiy korxonalari, “Do‘rmonavtoyo‘l” va “Qamchiqavtoyo‘l” ixtisoslashtirilgan yo‘llardan foydalanish unitar korxonalari, “Umumiy foydalanishdagi avtomobil yo‘llarini qurish va rekonstruksiya qilish Direksiyasi” davlat unitar korxonasi hamda Qoraqalpog‘iston Respublikasi va viloyatlar hududiy boshqarmalari tarkibidagi “Mintaqaviy yo‘llarga buyurtmachi xizmati” davlat unitar korxonalari (keyingi o‘rinlarda tarkibiy korxonalar deb ataladi) xodimlariga (ishlab chiqarish xodimlari bundan mustasno) joriy qilinadi.

3. Qo‘mita, boshqarmalar va tarkibiy korxonalar xodimlarining mehnatiga haq to‘lash, shuningdek, qo‘shimcha mehnat kafolatlari O‘zbekiston Respublikasining Mehnat kodeksiga, ushbu Nizomga, boshqa qonun hujjatlariga, jamoa shartnomasiga va boshqa normativ hujjatlarga muvofiq amalga oshiriladi.

4. Qo‘mita, boshqarmalar va tarkibiy korxonalar xodimlarining lavozim maoshlari qonun hujjatlariga muvofiq mehnatga haq to‘lash bo‘yicha yagona tarif setkasi asosida belgilanadi.

Xodimlarning lavozim maoshi belgilangan mehnatga haq to‘lashning eng kam miqdorini Yagona tarif setkasining tegishli razryadi tarif koeffitsiyentiga ko‘paytirish yo‘li bilan aniqlanadi.

5. Qo‘mita va boshqarmalar xodimlari mehnatiga xaq to‘lash, mukofotlash va ularga moddiy yordam ko‘rsatish quyidagi mablag‘lar hisobiga amalga oshiriladi:

a) budjet mablag‘lari hisobiga:

lavozim maoshlari;

bir yilda ikki oylik ish haqi fondi miqdoridagi mablag‘lar;

bir yilda bir oylik ish haqi fondi miqdoridagi moddiy yordam mablag‘lari;

qonun hujjatlarida belgilangan miqdor va tartibda davlat xizmatchilarining lavozim maoshiga mehnatni rag‘batlantirish mablag‘lari (rag‘batlantirish koeffitsiyenti);

mehnatga haq to‘lash fondining 15 foizi miqdorida shakllantiriladigan budjet muassasalari va tashkilotlari xodimlarini moddiy rag‘batlantirish maxsus fondi mablag‘lari;

davlat mukofotlari bilan taqdirlanganligi uchun qonun hujjatlarida belgilangan miqdor va tartibda rag‘batlantirish.

b) O‘zbekiston Respublikasi Transport vazirligi huzuridagi Avtomobil yo‘llari qo‘mitasi faoliyatini rivojlantirish va qo‘llab-quvvatlash jamg‘armasi, budjetdan tashqari jamg‘armalar va qonun hujjatlarida taqiqlanmagan boshqa manbalar hisobiga:

xodimning umumiy ish staji davomiyligidan kelib chiqib uzoq muddat xizmati uchun lavozim maoshiga har oylik ustamalar;

bayram sanalariga mukofotlash;

xizmat vazifalarini sidqidildan va samarali bajarganlik uchun yuqori malakali xodimlarning lavozim maoshlariga ustamalar;

oy va yil yakunlari bo‘yicha mukofotlar;

xodimning pensiyaga chiqishi munosabati bilan qimmatbaho sovg‘alar yoki pul mablag‘lari bilan taqdirlash;

xodimlarni ijtimoiy muhofaza qilish maqsadida ularning sog‘ligini tiklash, ovqatlanish va transport xarajatlarini qoplash hamda qishloq xo‘jaligi mahsulotlarini xarid qilish va boshqalar.

6. Tarkibiy korxonalar xodimlarining mehnatiga haq to‘lash, lavozim maoshlariga qo‘shimchalar va ustamalar, shuningdek, mukofotlar va boshqa barcha turdagi to‘lovlar:

Qo‘mita tarkibidagi yo‘llardan muntazam foydalanish unitar korxonalari, tuman yo‘llardan foydalanish unitar korxonalari, ko‘priklardan foydalanish unitar korxonalari, “O‘zyo‘lko‘kalamzorlashtirish” unitar korxonasi tarkibidagi Qoraqalpog‘iston Respublikasi, viloyatlar va Toshkent shahar xududiy korxonalari, “Do‘rmonavtoyo‘l” va “Qamchiqavtoyo‘l” ixtisoslashtirilgan yo‘llardan foydalanish unitar korxonalari — avtomobil yo‘llarini saqlash va ko‘kalamzorlashtirish xarajatlariga ajratilgan mablag‘lar limiti doirasida amalga oshiriladi;

“Umumiy foydalanishdagi avtomobil yo‘llarini qurish va rekonstruksiya qilish Direksiyasi” davlat unitar korxonasi va Qoraqalpog‘iston Respublikasi, viloyatlar hududiy boshqarmalari tarkibidagi “Mintaqaviy yo‘llarga buyurtmachi xizmati” davlat unitar korxonalari — buyurtmachilik funksiyasini bajargan ish xajmlaridan belgilangan tartibda ajratiladigan ajratmalar hisobidan korxona rahbarlari tomonidan jamoa shartnomalarida, shuningdek, ish beruvchi tomonidan kasaba uyushmasi qo‘mitasi yoki xodimlarning boshqa vakillik organi bilan kelishib qabul qilgan boshqa lokal hujjatlar asosida amalga oshiriladi.

Xodimlarni mukofotlash va xodimlarga beriladigan qo‘shimcha va ustamalar belgilangan tartibda amalga oshiriladi.

Xodimlar davlat mukofotlari, faxriy unvonlar bilan taqdirlanganligi uchun qonun hujjatlarida belgilangan miqdorda va tartibda rag‘batlantiriladi.

7. Qo‘mita, boshqarmalar va tarkibiy korxonalarning xodimlariga uzoq muddat xizmati uchun rag‘batlantirish koeffitsiyentini hisobga olgan holda lavozim maoshiga foiz miqdorida har oyda quyidagi miqdorlarda ustamalar to‘lanadi:

Uzoq muddat xizmat qilganlik uchun ustama olish huquqini beruvchi ish staji Qo‘mita tomonidan tasdiqlanadigan tartib yoki jamoa shartnomasi asosida amalga oshiriladi.

8. Qo‘mita, boshqarmalar va tarkibiy korxonalar xodimlariga bayram sanalarida — Yangi yil bayrami, Xotin-qizlar kuni, Navro‘z bayrami, Xotira va qadrlash kuni, Mustaqillik kuni, O‘qituvchi va murabbiylar kuni, Konstitutsiya kuni, diniy bayramlarda (“Ro‘za hayit” (Iyd al-Fitr) va “Qurbon hayit” (Iyd al-Adha) hamda kasb bayramida O‘zbekiston kasaba uyushmalari kuni munosabati bilan oylik lavozim maoshining rag‘batlantirish koeffitsentini hisobga olgan holda uch barobari miqdorida mukofot beriladi.

9. Qo‘mita, boshqarmalar va tarkibiy korxonalarning xizmat vazifalarini sidqidildan va samarali bajarib kelayotgan yuqori malakali va tashabbuskor xodimlariga har oy yakuni bo‘yicha lavozim maoshining rag‘batlantirish koeffitsentini hisobga olgan holda 250 foizgacha ustamalar to‘lanadi.

Ustamaning aniq miqdori tegishliligi bo‘yicha belgilangan tartibda Qo‘mita, boshqarmalar va tarkibiy korxonalar rahbari tomonidan belgilanadi.

10. Qo‘mita, boshqarmalar va tarkibiy korxonalar xodimlariga ish ko‘rsatkichlarining bajarilishiga qarab, lavozim oylik maoshining rag‘batlantirish koeffitsiyentini hisobga olgan holda har oy yakuni bo‘yicha 300 foizgacha va yil yakuni bo‘yicha besh barobari miqdorida mukofotlar beriladi.

11. Qo‘mita, boshqarmalar va tarkibiy korxonalar xodimlarini ijtimoiy muhofaza qilish va ularning mehnati samaradorligini oshirish maqsadida:

har oyda transport xarajatlarini qoplash uchun bazaviy hisoblash miqdorining ikki barobarigacha;

har oyda ovqatlanish xarajatlarini qoplash uchun bazaviy hisoblash miqdorining to‘rt barobarigacha;

qishloq xo‘jaligi mahsulotlarini xarid qilish uchun xodimlarga bir yilda bir marotaba bazaviy hisoblash miqdorining o‘ttiz barobarigacha bo‘lgan miqdorda to‘lovlar amalga oshiriladi.

12. Kasaba uyushmasi tashkiloti bilan kelishilgan holda Qo‘mita, boshqarmalar va tarkibiy korxonalar xodimlariga va (yoki) ularning oila a’zolariga quyidagi holatlarda bazaviy hisoblash miqdorining o‘n barobarigacha bo‘lgan miqdorda moddiy yordam beriladi:

xodim vafot etganda — bunda moddiy yordam xotiniga (eriga) to‘lab beriladi, agar xodimning xotini (eri) bo‘lmasa, moddiy yordam farzandlariga yoki qonuniy vakillariga (vasiylari va homiylariga) yoxud ularning voyaga yetmagan farzandlarini asrab olgan shaxslarga to‘lab beriladi, shuningdek, xodim turmush qurmagan bo‘lsa, moddiy yordam ota-onasi yoki boqimandalar o‘rtasida teng ulushlarda taqsimlanadi;

50, 55, 60 (yubiley) yoshi munosabati bilan, pensiyaga chiqqanda, xodimning o‘zi, shuningdek uning farzandlari turmush qurganda;

yaqin qarindoshi vafot etganda, vafoti to‘g‘risida guvohnoma nusxasi taqdim etilganda;

alohida zaruratga ko‘ra (baxtsiz hodisa, falokat, uzoq muddatli kasallik sababli davolanish va boshqa holatlarda).

13. Qo‘mita, boshqarmalar va tarkibiy korxonalar xodimlariga davolanish muassasalariga, dam olish, sanatoriylar, pansionatlar, turizm bazalari va bolalarni sog‘lomlashtirish muassasalariga yo‘llanmalar qiymatining 50 foizidan ko‘p bo‘lmagan miqdorida bir yilda bir martalik kompensatsiya to‘lovi beriladi.

14. Qo‘mita, boshqarmalar va tarkibiy korxonalar rahbarlari va bosh buxgalterlari xodimlar mehnatini normalash va hisobga olishning tashkil etilishi, lavozim maoshlari va tarif stavkalarining to‘g‘ri belgilanganligi, ushbu Nizomda nazarda tutilgan qo‘shimchalar, ustamalar va mukofotlar to‘g‘ri hisoblab chiqilganligi, mablag‘lardan maqsadli va oqilona foydalanganligi uchun shaxsan javob beradi.

15. Qo‘mita, xududiy boshqarmalar va tarkibiy korxonalarni moliyalashtirish qonun hujjatlarida belgilangan tartibda tasdiqlangan xarajatlar smetasiga muvofiq tegishli manbalar hisobiga amalga oshiriladi.

16. Xodimlarni moddiy rag‘batlantirish bo‘yicha takliflar kiritishda xolis yondashuv ta’minlanadi va ushbu Nizom talablari buzilishida aybdor bo‘lgan shaxslar qonun hujjatlarida belgilangan tartibda javob beradilar.

1. Vazirlar Mahkamasining “Avtomobilda xorijiy yuk tashuvchilarning O‘zbekiston Respublikasi hududiga kirishlari, bo‘lishlari, yuk olib o‘tishlari va undan chiqib ketishlari tartibi to‘g‘risida” 1995-yil 11-yanvardagi 11-son qarorida:

5-bandning ikkinchi xatboshi quyidagi tahrirda bayon qilinsin:

“Yig‘imlarni undirish milliy valyuta “so‘m”da naqd pulsiz shaklda yoki tijorat banklari tomonidan bevosita bojxona postlarida O‘zbekiston Respublikasi Markaziy bankining to‘lov kunidagi kursi bo‘yicha naqd pul shaklida amalga oshiriladi, olingan mablag‘larning 20 foizi O‘zbekiston Respublikasi Moliya vazirligining hisob raqamiga, qolgan 80 foizi O‘zbekiston Respublikasi Transport vazirligi huzuridagi Avtomobil yo‘llari qo‘mitasi faoliyatini rivojlantirish va qo‘llab-quvvatlash jamg‘armasi hisob raqamiga qonun hujjatlarida belgilangan tartibda o‘tkaziladi”;

15-bandning ikkinchi xatboshi quyidagi tahrirda bayon qilinsin:

“Belgilab qo‘yilsinki, xorijiy mamlakatlarning og‘ir yuk ko‘taruvchi va katta hajmli transport vositalarining O‘zbekiston Respublikasi hududi bo‘ylab yurishidan tushgan mablag‘lar O‘zbekiston Respublikasi Transport vazirligi huzuridagi Avtomobil yo‘llari qo‘mitasi faoliyatini rivojlantirish va qo‘llab-quvvatlash jamg‘armasi hisob raqamiga o‘tkaziladi”.

2. Vazirlar Mahkamasining “Avtomobil yo‘llari infratuzilmasini yanada rivojlantirish va yo‘l harakatini tashkil etish tizimini takomillashtirish chora-tadbirlari to‘g‘risida” 2018-yil 26-iyuldagi 584-son qarori 7-bandining “v” kichik bandi hamda 8-bandining uchinchi xatboshi chiqarib tashlansin.