O‘zbekiston Respublikasining Saylov kodeksining 14 va 16-moddalariga muvofiq, O‘zbekiston Respublikasi Markaziy saylov komissiyasi qaror qiladi:

1. Qamoqda saqlash va ozodlikdan mahrum etish joylarida saylov uchastkalarini tashkil etish tartibi to‘g‘risidagi nizom ilovaga muvofiq tasdiqlansin.

2. O‘zbekiston Respublikasi Markaziy saylov komissiyasining “O‘zbekiston Respublikasi Oliy Majlisiga saylov o‘tkazish bilan bog‘liq normativ-huquqiy hujjatlarni tasdiqlash to‘g‘risida” 2014-yil 11-sentabrdagi 618-son qarorining 1-bandi o‘n ikkinchi hatboshisi va 11-ilovasi o‘z kuchini yo‘qotgan deb hisoblansin.

3. Ushbu qaror O‘zbekiston Respublikasi Markaziy saylov komissiyasining rasmiy veb-saytida e’lon qilinsin.

4. Mazkur qarorning ijrosini nazorat qilish O‘zbekiston Respublikasi Markaziy saylov komissiyasi raisining o‘rinbosari M. Istamov zimmasiga yuklansin.

Mazkur Nizom O‘zbekiston Respublikasining Saylov kodeksiga (bundan buyon matnda Saylov kodeksi deb yuritiladi) muvofiq O‘zbekiston Respublikasi Prezidenti saylovini, O‘zbekiston Respublikasi Oliy Majlisi Qonunchilik palatasiga (bundan buyon matnda Qonunchilik palatasi deb yuritiladi) va xalq deputatlari viloyat, tuman va shahar Kengashlariga (bundan buyon matnda mahaliy Kengash deb yuritiladi) saylov o‘tkazishda qamoqda saqlash va ozodlikdan mahrum etish joylarida saylov uchastkasini tuzish, uchastka saylov komissiyalarini shakllantirish va ovoz berishni tashkil etish tartibini belgilaydi.

1. Ushbu Nizomda quyidagi asosiy tushunchalar qo‘llaniladi:

ushlab turilgan — jinoyat sodir etganlikda gumon qilinib, O‘zbekiston Respublikasi Jinoyat-protsessual kodeksining 221-moddasida nazarda tutilgan asoslar bo‘yicha ozodlikdan mahrum etish joyi hisoblanmagan xizmat binolarida yoki vaqtincha saqlash hibsxonasi kamerasida ushlab turilgan shaxs;

qamoqqa olingan — O‘zbekiston Respublikasi Jinoyat-protsessual kodeksiga muvofiq qamoqqa olish tarzidagi ehtiyot chorasi qo‘llanilgan gumon qilinuvchi, ayblanuvchi va sudlanuvchi;

qamoqda saqlash — jinoyat sodir etganlikda gumon qilinib ushlab turilgan shaxslarni yoxud qamoqqa olish tarzidagi ehtiyot chorasi qo‘llanilgan shaxslarni tergov hibsxonalarida saqlash;

ijtimoiy xavfi katta bo‘lmagan jinoyatlar — qasddan sodir etilib, qonunda uch yildan ko‘p bo‘lmagan muddatga ozodlikdan mahrum qilish tarzidagi jazo nazarda tutilgan jinoyatlar, shuningdek ehtiyotsizlik oqibatida sodir etilib, qonunda besh yildan ko‘p bo‘lmagan muddatga ozodlikdan mahrum qilish tarzidagi jazo nazarda tutilgan jinoyatlar;

uncha og‘ir bo‘lmagan jinoyatlar — qasddan sodir etilib, qonunda uch yildan ortiq, lekin besh yildan ko‘p bo‘lmagan muddatga ozodlikdan mahrum qilish tarzidagi jazo nazarda tutilgan jinoyatlar, shuningdek ehtiyotsizlik oqibatida sodir etilib, qonunda besh yildan ortiq muddatga ozodlikdan mahrum qilish tarzidagi jazo nazarda tutilgan jinoyatlar;

og‘ir jinoyatlar — qasddan sodir etilib, qonunda besh yildan ortiq, lekin o‘n yildan ko‘p bo‘lmagan muddatga ozodlikdan mahrum qilish jazosi nazarda tutilgan jinoyatlar;

o‘ta og‘ir jinoyatlar — qasddan sodir etilib, qonunda o‘n yildan ortiq muddatga ozodlikdan mahrum qilish yoxud umrbod ozodlikdan mahrum qilish jazosi nazarda tutilgan jinoyatlar;

manzil-koloniyasi — jazo muddatini o‘tayotgan mahkumlar soqchisiz, ammo nazorat ostida saqlanadigan jazoni ijro etish muassasasi.

2. Saylov kuni 18 yoshga to‘lgan O‘zbekiston Respublikasi fuqarolari saylash huquqiga egadir.

3. Qamoqda saqlash joylarida ushlab turilgan hamda qamoqqa olingan shuningdek, jinoyat sodir etganligi uchun sudning hukmi bilan ozodlikdan mahrum etish joylarida saqlanayotgan shaxslar ovoz berish huquqiga egadirlar.

Sud tomonidan muomalaga layoqatsiz deb topilgan fuqarolar, shuningdek og‘ir va o‘ta og‘ir jinoyatlar sodir etganlik uchun sudning hukmiga ko‘ra ozodlikdan mahrum etish joylarida saqlanayotgan shaxslar saylovda ishtirok etish huquqidan faqat qonunga muvofiq hamda sudning qarori asosida mahrum etilishi mumkin. Boshqa har qanday hollarda fuqarolarning saylov huquqlarini to‘g‘ridan-to‘g‘ri yoki bilvosita cheklashga yo‘l qo‘yilmaydi.

4. Saylov uchastkalari, qoida tariqasida, kamida yigirma nafar va ko‘pi bilan uch ming nafar saylovchidan oshmagan holda tuziladi.

5. Qamoqda saqlash va ozodlikdan mahrum etish joylarida saylov uchastkalari saylovga kamida oltmish kun qolganida, ayrim hollarda esa istisno tariqasida, saylovga kamida yetti kun qolganida tuziladi.

6. Qamoqda saqlash va ozodlikdan mahrum etish joylari rahbarlarining taqdimnomasiga asosan saylov uchastkalari okrug saylov komissiyasi qarori bilan tuziladi. Bu saylov uchastkalari ular joylashgan hududagi saylov okruglariga kiradi.

Ayrim hollarda, manzil-koloniyasi ma’muriyatining tegishli okrug saylov komissiyasiga bergan taklifiga asosan mazkur muassasalarda saqlanayotgan saylovchilar ko‘chma saylov qutisi orqali saylovchilarning turgan joyida ovoz berishi uchun u joylashgan hududagi saylov uchastkasiga biriktirish to‘g‘risida okrug saylov komissiyasining qarori qabul qilinishi mumkin.

7. Uchastka saylov komissiyasi saylovga kamida qirq kun qolganida besh — o‘n to‘qqiz nafar a’zodan, shu jumladan rais, rais o‘rinbosari va kotibdan iborat tarkibda okrug saylov komissiyasi tomonidan tuziladi.

Agar komissiya yetti nafargacha a’zodan iborat tarkibda tuzilsa, rais va kotib saylanadi.

Zarur bo‘lgan hollarda, uchastka saylov komissiyasining son tarkibi o‘zgartirilishi mumkin.

Qamoqda saqlash va ozodlikdan mahrum etish joylarining rahbari tomonidan uchastka saylov komissiyasi a’zoligiga nomzodlar mazkur muassasa xodimlari orasidan okrug saylov komissiyasiga tasdiqlash uchun tavsiya etiladi.

Zarurat tug‘ilganida, qamoqda saqlash va ozodlikdan mahrum etish joylarining rahbari tomonidan Saylov kodeksining 25-moddasiga muvofiq boshqa shaxslar va jamoatchilik vakillari ham uchastka saylov komissiyasi a’zoligiga nomzod sifatida tavsiya etilishi mumkin.

Qamoqda saqlash va ozodlikdan mahrum etish joylarida saylov uchastkasi saylovga kamida yetti kun qolganda tuzilsa, okrug saylov komissiyasiga saylov uchastkasini tuzish to‘g‘risida taqdimnoma bilan birga uchastka saylov komissiyasi a’zoligiga nomzodlar ham tasdiqlash uchun tavsiya etiladi.

Uchastka saylov komissiyasining shaxsiy tarkibi tegishli okrug saylov komissiyasining qarori bilan tasdiqlanadi.

8. Qamoqda saqlash va ozodlikdan mahrum etish joylaridagi maxsus ajratilgan binolarda yashirin ovoz berish uchun yetarli miqdorda kabinalar yoki xonalar tayyorlangan bo‘lishi, saylov byulletenlari berish uchun joy ajratilgan va saylov qutilari o‘rnatilishi kerak.

Saylov qutilari ularning yoniga ovoz beruvchilar albatta yashirin ovoz berish kabinalari yoki xonalaridan o‘tib boradigan qilib joylashtiriladi. Binoni jihozlash va unda zarur tartibni saqlab turish mas’uliyati muassasa ma’muriyati va uchastka saylov komissiyasi zimmasida bo‘ladi.

9. Qamoqda saqlash joylarida ushlab turilgan hamda qamoqqa olingan shuningdek, jinoyat sodir etganligi uchun sudning hukmi bilan ozodlikdan mahrum etish joylarida saqlanayotgan shaxslar qamoqda saqlash va ozodlikdan mahrum etish joylarida tuzilgan saylov uchastkalaridagi saylovchilar ro‘yxatiga kiritiladi.

Sud tomonidan muomalaga layoqatsiz deb topilgan fuqarolar, shuningdek og‘ir va o‘ta og‘ir jinoyatlar sodir etganlik uchun sudning hukmiga ko‘ra ozodlikdan mahrum etish joylarida saqlanayotgan shaxslar saylovda ishtirok etish huquqidan faqat qonunga muvofiq hamda sudning qarori asosida mahrum etilishi mumkin. Boshqa har qanday hollarda fuqarolarning saylov huquqlarini to‘g‘ridan-to‘g‘ri yoki bilvosita cheklashga yo‘l qo‘yilmaydi.

10. Qamoqda saqlash va ozodlikdan mahrum etish joylarida tuzilgan saylov uchastkalari bo‘yicha saylovchilarning ro‘yxatlari mazkur muassasalar rahbarlari tomonidan taqdim etilgan ma’lumotlar asosida uchastka saylov komissiyasi tomonidan tuziladi.

11. Saylovchilar ro‘yxatiga har bir saylovchining familiyasi, ismi, otasining ismi, tug‘ilgan sanasi kiritiladi.

12. Har bir saylovchi faqat bitta saylovchilar ro‘yxatiga kiritilishi mumkin.

O‘zbekiston Respublikasi Ichki ishlar vazirligi markazlashgan tartibda qamoqda saqlash va ozodlikdan mahrum etish joylarida tuzilgan saylov uchastkalaridagi saylovchilar haqidagi ma’lumotlarni saylovga kamida bir oy qolgunga qadar O‘zbekiston Respublikasi Vazirlar Mahkamasi huzuridagi Davlat personallashtirish markaziga Saylovchilar yagona elektron ro‘yxatiga tuzatishlar kiritish uchun yuboradi.

Agarda mazkur muassasalarda tuzilgan saylov uchastkalaridagi saylovchilar ro‘yxatida o‘zgarishlar amalga oshirilsa, saylovga kamida besh kun qolgunga qadar ushbu ma’lumotlar ham O‘zbekiston Respublikasi Vazirlar Mahkamasi huzuridagi Davlat personallashtirish markaziga yetkazib berish choralari ko‘riladi.

13. Manzil-koloniyalarida saylov uchastkalari tuzilmagan holatlarda, ular biriktirilgan uchastka saylov komissiyalariga muassasadagi saylovchilar haqidagi ma’lumotlar ushbu muassasa rahbari tomonidan saylovga kamida yetti kun qolganda taqdim etiladi.

14. Qamoqda saqlash va ozodlikdan mahrum etish joylarida ushbu muassasalarning ichki tartib qoidalari va rejimini inobatga olgan holda, saylovga uch kun qolganida fuqarolarga saylovchilar ro‘yxati bilan tanishish imkoniyati ta’minlanadi.

Qamoqda saqlash va ozodlikdan mahrum etish joylarining ma’muriyati mazkur ma’lumotlarning haqqoniyligi va to‘liqligi uchun mas’uldir.

15. Uchastka saylov komissiyasi saylovchilar ro‘yxati bilan tanishish joyi va vaqti to‘g‘risida saylovchilarni xabardor etadi.

16. Har bir fuqaro saylovchilar ro‘yxatidagi xato yoki noaniqlik to‘g‘risida uchastka saylov komissiyasiga shikoyat qilishi mumkin. Uchastka saylov komissiyasi 24 soat ichida murojaatni tekshirishi va xatoni yoki noaniqlikni bartaraf etishi yoxud murojaat qiluvchiga uning murojaati rad etilganligi to‘g‘risida asoslantirilgan javob berishi shart.

17. Saylovga tayyorgarlik ko‘rish hamda uni o‘tkazishga doir barcha tadbirlarda, shuningdek saylov kuni ovoz berish xonalarida va ovozlarni sanab chiqishda O‘zbekiston Respublikasi Prezidentligiga, Qonunchilik palatasi va mahalliy Kengashlar deputatligiga nomzodlar ko‘rsatgan siyosiy partiyalardan, fuqarolarning o‘zini o‘zi boshqarish organlaridan kuzatuvchilar, ommaviy axborot vositalari vakillari, boshqa davlatlardan, xalqaro tashkilotlardan kuzatuvchilar ishtirok etish huquqiga ega.

18. Kuzatuvchilar, siyosiy partiyalarning vakolatli vakillari va akkreditatsiyadan o‘tgan ommaviy axborot vositalari vakillari qamoqda saqlash va ozodlikdan mahrum etish joylarida tuzilgan saylov uchastkalariga borishi haqida kamida uch kun oldin uchastka saylov komissiyasini xabardor qilishi kerak.

19. Uchastka saylov komissiyasi, o‘z navbatida, qamoqda saqlash va ozodlikdan mahrum etish joylarining ma’muriyatiga mazkur Nizomning 18-bandida ko‘rsatilgan shaxslar haqidagi ma’lumotlarni (ularning familiyasi, ismi, otasining ismi, tug‘ilgan yili, saylovda kim sifatida ishtirok etishi) ushbu muassasaga to‘siqsiz kirib-chiqishlari uchun taqdim etadi.

Qamoqda saqlash va ozodlikdan mahrum etish joylarining ma’muriyati ularning kirib chiqishi va xavfsizligini ta’minlash, ichki tartib-qoidalariga rioya etishi uchun mas’ul hisoblanadi.

20. Qamoqda saqlash va ozodlikdan mahrum etish joylarida tuzilgan uchastka saylov komissiyalari mazkur muassasalarning ma’muriyati bilan birgalikda saylovchilarni saylov to‘g‘risidagi qonun hujjatlari, saylovga tayyorgarlik ko‘rish va uni o‘tkazish jarayonlari, saylov o‘tkazish vaqti va tartibi hamda nomzodlar haqida xabardor qilib boradi.

21. Qamoqda saqlash va ozodlikdan mahrum etish joylarining ma’muriyati tomonidan nomzodlarga, ularning ishonchli vakillariga, siyosiy partiyalarga fuqarolar bilan uchrashuvlar o‘tkazish orqali saylovoldi tashviqoti uchun teng sharoitlar yaratib beriladi.

22. Saylov kuni va ovoz berish boshlanishiga bir kun qolganida saylovoldi tashviqotiga yo‘l qo‘yilmaydi.

23. Qamoqda saqlash va ozodlikdan mahrum etish joylarida ovoz berish ushbu muassasalarning ichki tartib-qoidalari, rejimi va ularning boshqa o‘ziga xos xususiyatlarini inobatga olgan holda Saylov kodeksiga va tegishincha O‘zbekiston Respublikasi Markaziy saylov komissiyasining 2019-yil 23-iyuldagi 924-son va 2021-yil 14-apreldagi 1066-son qarorlari bilan tasdiqlangan nizomlarga muvofiq tashkil etiladi.

24. Qamoqda saqlash va ozodlikdan mahrum etish joylarining ichki-tartib qoidalari va rejimidan kelib chiqib, saylovchilar ovoz berish binosiga kichik guruhlarga bo‘lingan holda olib kelinadi.

25. Saylov uchastkasi tuzilmagan manzil-koloniyalarida biriktirilgan uchastka saylov komissiyasi tomonidan saylovchilarga turgan joyida ovoz berish tashkil etiladi.

Biriktirilgan uchastka saylov komissiyasi mazkur saylovchilarni saylovchilar ro‘yxati ilovasiga kiritadi.

26. Ovoz berish binosiga kelgach saylovchilar ro‘yxatga imzo qo‘yadi. Shundan keyin unga saylov byulleteni beriladi.

27. Saylov byulleteni saylovchi tomonidan yashirin ovoz berish kabinasi yoki xonasida to‘ldiriladi. Saylov byulletenini to‘ldirish vaqtida saylovchidan boshqa shaxslarning hozir bo‘lishi taqiqlanadi.

28. Saylovchi o‘zi yoqlab ovoz berayotgan nomzodning familiyasi ro‘parasida, o‘ng tomonda joylashgan bo‘sh kvadratga “+” yoki “” yoxud “x” belgisini qo‘yadi.

Saylovchi to‘ldirilgan saylov byulletenini saylov qutisiga tashlaydi.

29. Qamoqda saqlash va ozodlikdan mahrum etish joylarida tuzilgan saylov uchastkalarida uchastka saylov komissiyasi, agar ro‘yxatga kiritilgan barcha fuqarolar ovoz berib bo‘lgan bo‘lsa, istalgan vaqtda ovoz berish tugaganligini e’lon qilishi mumkin.

30. Qamoqda saqlash va ozodlikdan mahrum etish joylarida tuzilgan saylov uchastkalarida saylov qutilarini soat 20:00 dan oldin ochish va ovozlarni sanab chiqishga yo‘l qo‘yilmaydi.

31. Qamoqda saqlash va ozodlikdan mahrum etish joylarida tuzilgan uchastka saylov komissiyalari O‘zbekiston Respublikasi Prezidenti saylovi yakunlarini chiqarilgandan so‘ng, tegishli saylov okruglaridan saylangan Qonunchilik palatasi deputatlari O‘zbekiston Respublikasi Markaziy saylov komissiyasi tomonidan, mahalliy Kengashlarga saylangan deputatlar viloyat, tuman, shahar saylov komissiyasi tomonidan ro‘yxatga olinganidan keyin o‘z faoliyatini tugatadi.

32. Mazkur Nizom O‘zbekiston Respublikasi Ichki ishlar vazirligi bilan kelishilgan.