Oʻzbekiston Respublikasi Prezidentining “Xususiy tadbirkorlikda tashabbus koʻrsatish va uni ragʻbatlantirish toʻgʻrisida”gi Farmonini bajarish hamda chorvachilikda iqtisodiy islohotlarni chuqurlashtirish maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi, viloyatlar va tumanlar hokimliklari Oʻzbekiston Respublikasi Qishloq xoʻjaligi vazirligiga, “Oʻzmevasabzavotuzumsanoat” uyushmasi, Oʻzbekiston qishloq xoʻjaligi fanlari akademiyasi Davlat mulki qoʻmitasi bilan birgalikda 1995-yil oxirigacha, qonunchilikda belgilangan tartibda, chorvachilik mahsulotlari yetishtirishga ixtisoslashtirilmagan xoʻjaliklar chorvachilik fermalarining xususiylashtirilishini taʼminlasinlar.

2. Chorvachilik fermalarini xususiylashtirishni amalga oshirish uchun tegishli xoʻjaliklarda tuman hokimliklari, xoʻjaliklar, qishloq xoʻjaligi organlari va jamoatchilik vakillaridan iborat tarkibda maxsus komissiyalar tuzilsin.

3. Qishloq xoʻjaligi vazirligiga, Davlat mulki qoʻmitasi, Moliya vazirligi va Adliya vazirligi bilan birgalikda ikki hafta muddatda:

chorva mollari, binolar va asbob-anjomlarni tanlov — kimoshdi savdosi asosida sotish;

yer maydonlarini umrbod egalik qilish uchun yangi mulkdorlarga sotish;

chorva mollari va boshqa mulklar qiymatini toʻlash muddatini uzaytirish tartibini ishlab chiqsin va tasdiqlasin.

4. Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi, viloyatlar va tumanlar hokimliklari xususiylashtirilgan fermalarga chorva ozuqasi yetishtirish uchun, har bir xoʻjalikning aniq tabiiy-iqtisodiy hududlarini va yer resurslarini hisobga olgan holda, shartli har bosh mol hisobiga Andijon, Fargʻona, Namangan, Toshkent, Xorazm va Samarqand viloyatlarida 0,3 gektardan, Qoraqalpogʻiston Respublikasida va boshqa viloyatlarda 0,45 gektardan sugʻoriladigan yerlar, lalmi yerlarda esa 2 gektardan yer ajratsinlar.

5. Oʻzbekiston Respublikasi Qishloq xoʻjaligi vazirligi, “Oʻzmevasabzavotuzumsanoat” uyushmasi, Oʻzbekiston qishloq xoʻjaligi fanlari akademiyasi, Qoraqalpogʻiston Respublikasi Vazirlar Kengashi va viloyatlar hokimliklari chorvachilik fermalarini xususiylashtirishda yangi mulkdorlarning ulush qoʻshib qatnashishlari asosida mavjud kommunikatsiyalar, ozuqa sexlari, transport vositalari va qishloq xoʻjaligi texnikasi negizida shirkatlar tashkil etishni nazarda tutsinlar.

Xususiylashtirilgan fermalarga 1995-yilda Qishloq xoʻjaligi vazirligi, “Oʻzmevasabzavotuzumsanoat” uyushmasi va Oʻzbekiston qishloq xoʻjaligi fanlari akademiyasi limitlari hisobiga davlat resurslaridan paxta shroti ajratish boʻyicha topshiriq 2-ilovaga* muvofiq tasdiqlansin.

6. Xususiylashtirilgan fermalar, fermer va dehqon xoʻjaliklaridagi mahsuldor mollar podasini muntazam yangilab borish maqsadida naslchilik zavodlari va xoʻjaliklarining roʻyxati 3-ilovaga muvofiq tasdiqlansin.

Oʻzbekiston Respublikasi Qishloq xoʻjaligi vazirligiga Qoraqalpogʻiston Respublikasi Vazirlar Kengashi va viloyatlar hokimliklari, respublikaning manfaatdor tashkilotlari bilan kelishgan holda, ikki hafta muddatda, ixtisoslashtirilgan naslchilik xoʻjaliklari roʻyxatini aniqlasin va tasdiqlasin hamda Andijon, Namangan, Samarqand, Toshkent va Fargʻona viloyatlarida yangi naslchilik zavodlari va xoʻjaliklari tashkil etish toʻgʻrisida taklif kiritsin.

7. Oʻzbekiston Respublikasi Qishloq xoʻjaligi vazirligi, “Oʻzistiqbolstat” davlat qoʻmitasi, Moliya vazirligi bir oy muddatda Vazirlar Mahkamasiga:

chorva naslchiligini davlat tomonidan qoʻllab-quvvatlash, uni Davlat resurslaridan omixta yem bilan taʼminlash chora-tadbirlari toʻgʻrisida;

Qishloq xoʻjaligi vazirligi huzurida Chorvachilikda naslchilik ishlari boʻyicha davlat inspeksiyasi tashkil etish toʻgʻrisida takliflar kiritsinlar.

8. Oʻzbekiston Respublikasi Qishloq xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi, Qoraqalpogʻiston Respublikasi Vazirlar Kengashi, viloyatlar hokimliklari chorvachilikda zooveterinariya punktlari va texnik servis stansiyalari tarmogʻini rivojlantirishni hamda ularning moddiy-texnika bazasini mustahkamlashni taʼminlasinlar.

9. “Oʻzgoʻshtsutsanoat” va “Oʻzbeksavdo” davlat uyushmalari, boshqa tayyorlov tashkilotlari fermyerlar, xoʻjaliklar va aholidan chorvachilik mahsulotlarini tuzilgan shartnomalar boʻyicha bevosita joyning oʻzida qabul qilib olishni amalga oshirsinlar.

10. “Oʻzdavneftmahsulot” birlashmasi, “Oʻzqishloqxoʻjaliktaʼminottuzatish” davlat-kooperativ qoʻmitasi va Qishloq xoʻjaligi vazirligi xususiylashtirilgan chorvachilik fermalari va dehqon (fermer) xoʻjaliklari ehtiyojlari uchun 1995-yilda vazirlik fondidan yonilgʻi-moylash materiallarini 4-ilovaga* muvofiq miqdorlarda ajratsinlar.

11. Oʻzbekiston Respublikasi Moliya vazirligi, Davlat soliq qoʻmitasi, Qishloq xoʻjaligi vazirligi mahsulot yetishtirish uchun qulay shart-sharoitlar yaratish va uni yanada koʻpaytirishni taʼminlash maqsadida bir oy muddatda chorvachilik mahsulotlari yetishtiruvchi xususiylashtirilgan fermalar, dehqon (fermer) xoʻjaliklari va aholidan soliq olishni takomillashtirish boʻyicha takliflar kiritsinlar.

12. Belgilab qoʻyilsinki, xususiylashtirilgan fermalarni, fermer xoʻjaliklarini moliyaviy qoʻllab-quvvatlash “Mikrokreditbank” aksiyadorlik-tijorat banki va uning joylardagi muassasalari faoliyatining ustuvor yoʻnalishi hisoblanadi.

13. Davlat mulki qoʻmitasi kichik va oʻrta tadbirkorlikni rivojlantirishga koʻmaklashuvchi jamgʻarmadan fermer xoʻjaliklarini qoʻllab-quvvatlash uchun mablagʻlar ajratishni nazarda tutsin.

14. “Oʻzistiqbolstat” davlat qoʻmitasi Oʻzbekiston Respublikasi qishloq xoʻjaligi vazirligi, boshqa vazirliklar va idoralar, Qoraqalpogʻiston Respublikasi Vazirlar Kengashi hamda viloyatlar hokimliklari bilan birgalikda ikki oy muddatda aholi xoʻjaliklari va fermer xoʻjaliklaridagi chorva mollarini hamda chorvachilik mahsulotlari yetishtirishni statistik hisobga olish tartibini ishlab chiqsin va joriy etsin.

15. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. Joʻrabekov zimmasiga yuklansin.