O‘zbekiston Respublikasi Prezidentining “O‘zbekiston Respublikasi Transport vazirligi faoliyatini tashkil etish to‘g‘risida” 2019-yil 1-fevraldagi PQ-4143-son qaroriga muvofiq Vazirlar Mahkamasi qaror qiladi:

1. Quyidagilar:

O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasi to‘g‘risidagi nizom 1-ilovaga muvofiq;

O‘zbekiston Respublikasi Transport vazirligi va uning idoraviy mansub tashkilotlari xodimlarini O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasi hisobiga qo‘shimcha moddiy rag‘batlantirish tartibi to‘g‘risidagi nizom 2-ilovaga muvofiq tasdiqlansin.

2. O‘zbekiston Respublikasi Hukumatining 3-ilovaga muvofiq ayrim qarorlariga o‘zgartirishlar kiritilsin.

3. O‘zbekiston Respublikasi Transport vazirligi vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari — transport vaziri A.J. Ramatov zimmasiga yuklansin.

1. Ushbu Nizom O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasi (keyingi o‘rinlarda Jamg‘arma deb ataladi) mablag‘larini shakllantirish, boshqarish va undan foydalanish tartibini belgilaydi.

2. Jamg‘arma yuridik shaxs hisoblanmaydi va uning mablag‘lari O‘zbekiston Respublikasi Transport vazirligining (keyingi o‘rinlarda Transport vazirligi deb ataladi) g‘aznachilik hisobvaraqlarida jamlanadi.

3. Jamg‘arma mablag‘lari quyidagi manbalar hisobiga shakllantiriladi:

shahar, shahar atrofi, shaharlararo va xalqaro avtomobillarda yo‘lovchilar va yuk tashishga litsenziya berilganligi uchun davlat boji to‘lashdan olingan tushumlarning 60 foizi;

Transport vazirligining hududiy boshqarmalari inspektorlari tomonidan avtomobil tashuvchilari sohasida ma’muriy huquqbuzarliklar to‘g‘risida tuzilgan bayonnomalar bo‘yicha undiriladigan jarima to‘lovlari tushumining 60 foizi;

temir yo‘l transportida yo‘lovchilar va yuk tashish bo‘yicha faoliyatni amalga oshirish huquqini beruvchi litsenziya berilganligi uchun davlat bojining 20 foizi;

avtomobil va temir yo‘l transportida yo‘lovchilar va yuk tashish huquqi uchun litsenziya olishga berilgan arizalarni ko‘rib chiqish, shuningdek, xalqaro avtomobilda tashishlarni amalga oshirish uchun ruxsatnoma blankalari berilganligi uchun yig‘imlarning 60 foizi;

shahar, shahar atrofi va viloyat ichki shaharlararo yo‘nalishlarini yo‘lga qo‘yish uchun tenderlarda ishtirok etish uchun to‘lovlarning 100 foizi;

tegishli ruxsatnomasiz og‘ir vaznli, yirik gabaritli, xavfli yuklarni tashish va yuk bilan yoki yuksiz holdagi gabarit o‘lchamlari belgilangan normalardan ortiq bo‘lgan transport vositalarida yo‘lga chiqish uchun undiriladigan jarimalar summasining 10 foizi;

yuk ko‘tarish quvvati 10 tonnadan yuqori bo‘lgan yuk avtotransporti vositalari va tirkamalarining avtomobil yo‘llari bo‘ylab harakatlanishi huquqi uchun yig‘imning 10 foizi;

tadbirkorlik subyektlariga tegishli o‘lchov nazorat shoxobchalari qayd etgan tegishli ruxsatnomasiz og‘ir vaznli, yirik gabaritli, xavfli yuklarni tashish va yuk bilan yoki yuksiz holdagi gabarit o‘lchamlari belgilangan normalardan ortiq bo‘lgan transport vositalarida yo‘lga chiqish uchun undiriladigan jarimalar summasining 15 foizi;

tadbirkorlik subyektlariga tegishli ko‘chma o‘lchov nazorat shoxobchalarida o‘rnatilgan foto va video qayd etish dasturiy-texnik vositalari orqali aniqlangan shoxobchaga kirish joyida to‘la vazni 12 tonnadan yuqori bo‘lgan N₃ va O₄ toifaga kiruvchi avtotransport vositalarini yo‘naltiruvchi yo‘l belgilariga rioya qilmagan holda shoxobcha orqali harakatlanmagan yuk avtotransport vositalari uchun qo‘llanilgan jarima summasining 50 foizi;

“O‘zaeronavigatsiya” markazi” DK sof foydasining 5 foizi;

Jamg‘armaning vaqtincha bo‘sh mablag‘larini O‘zbekiston Respublikasi tijorat banklari depozitlarida joylashtirishdan olinadigan daromadlar;

xalqaro moliya institutlari, xorijiy hukumat tashkilotlari kreditlari (qarzlari) va grantlari;

qonun hujjatlarida taqiqlanmagan boshqa manbalar.

4. Jamg‘arma mablag‘laridan quyidagi maqsadlarda foydalaniladi:

transport sohasidagi ilmiy-tadqiqot ishlari;

yo‘lovchi avtovokzallari va avtostansiyalarini, shuningdek, mahalliy ijro etuvchi hokimiyat organlariga tegishli bo‘lgan umumiy foydalanishdagi fuqarolar qatnov yo‘lining oraliq to‘xtash bekatlarini (keyingi o‘rinlarda infratuzilma obyektlari deb ataladi) qurish, rekonstruksiya qilish va ta’mirlash dasturlari;

Transport vazirligi tuzilmasidagi ixtisoslashtirilgan avtotransport korxonalari uchun yangi avtotransport vositalarini sotib olish, ularni texnik jihatdan qayta jihozlash (gaz-ballon uskunasini, avtotransport vositalari faoliyatini kuzatish tizimini va boshqa shu kabi uskunalarni o‘rnatish);

transport sohasini boshqarish tizimiga axborot-kommunikatsiya texnologiyalarini joriy qilish;

Transport vazirligining markaziy apparati va hududiy boshqarmalari, uning tuzilmasiga kiradigan tashkilotlar xodimlarini moddiy rag‘batlantirish, Transport vazirligini saqlash va uning moddiy-texnika bazasini rivojlantirish xarajatlarini moliyalashtirish.

5. Jamg‘arma mablag‘lari qonun hujjatlariga muvofiq Transport vazirligi hay’atining (keyingi o‘rinlarda hay’at deb ataladi) qaroriga muvofiq ushbu Nizomning 4-bandida nazarda tutilmagan boshqa maqsadlarga ham yo‘naltirilishi mumkin.

6. Jamg‘arma faoliyatini boshqarish va uning mablag‘larini taqsimlash hay’at tomonidan amalga oshiriladi.

7. Hay’at majlisi uning majlisida hay’at tarkibining yarmidan ko‘pi qatnashsa haqiqiy hisoblanadi. Ko‘rilayotgan masalalar bo‘yicha qarorlar oddiy ko‘pchilik ovoz bilan qabul qilinadi. Qabul qilingan qarorlar bayonnomalar shaklida rasmiylashtiriladi.

8. Jamg‘arma faoliyatini boshqarish va uning mablag‘larini taqsimlashda quyidagilar hay’atning asosiy vazifalari hisoblanadi:

Jamg‘armaga tushgan mablag‘lar doirasida daromadlar va xarajatlar smetasini tasdiqlash;

Jamg‘arma mablag‘laridan maqsadli va samarali foydalanilishini nazorat qilish;

Jamg‘arma mablag‘larini ushbu Nizomda ko‘rsatilgan maqsadlarga yo‘naltirish (ajratish) to‘g‘risida qarorlar qabul qilish;

chorak yakunlari bo‘yicha Jamg‘armaning daromadlari va xarajatlari ijrosi to‘g‘risidagi hisobotni ko‘rib chiqish va tasdiqlash;

Jamg‘arma mablag‘laridan foydalanish bo‘yicha ijro etuvchi organni shakllantirish (keyingi o‘rinlarda Ijro etuvchi organ deb ataladi);

Jamg‘arma mablag‘laridan boshqa maqsadlarda foydalanish holatlari aniqlanganda darhol bartaraf etish, asoslanmagan xarajatlar va yetkazilgan zararni qoplash bo‘yicha tegishli choralar ko‘rish.

9. Hay’at o‘z faoliyatini Ijro etuvchi organ orqali amalga oshiradi. Ijro etuvchi organ tarkibi transport vazirining buyrug‘i bilan tasdiqlanadi va buxgalteriya bo‘limi va Transport vazirligi markaziy apparatining tegishli bo‘linmalarining Jamg‘arma mablag‘laridan foydalanish yo‘nalishlari bo‘yicha loyihalarni shakllantirish bilan shug‘ullanuvchi mutaxassislaridan iborat bo‘ladi.

10. Quyidagilar Ijro etuvchi organning asosiy vazifalari hisoblanadi:

Jamg‘arma mablag‘laridan foydalanish yo‘nalishlari bo‘yicha loyihalarni shakllantirish;

Jamg‘arma mablag‘laridan foydalanish yo‘nalishlari bo‘yicha Transport vazirligining tegishli bo‘linmalari va uning idoraviy mansub tashkilotlaridan tushgan moliyalashtirish bo‘yicha buyurtmanomalarni ko‘rib chiqish.

Loyihaning tashabbuskori loyihani iqtisodiy asoslash uchun mas’ul hisoblanadi.

11. Jamg‘arma mablag‘lari hisobiga moliyalashtirilishi mo‘ljallanayotgan loyihalar ularning maqsadga muvofiqligi va zarurligini baholash uchun Ijro etuvchi organ tomonidan Transport vazirligining Ilmiy-texnik kengashiga ekspertizaga kiritiladi.

12. Transport vazirligining Ilmiy-texnik kengashi taqdim etilgan loyihalarni ko‘rib chiqadi, ularni qabul qilish maqsadga muvofiqligi va zarurligini baholaydi va o‘z qarorini bayonnoma shaklida rasmiylashtiradi.

Transport vazirligi Ilmiy-texnik kengashining loyihani moliyalashtirish maqsadga muvofiqligi to‘g‘risidagi qarori loyihani ko‘rib chiqish uchun hay’atga taqdim etishga asos hisoblanadi.

13. Hay’at Ijro etuvchi organ tomonidan taqdim qilingan loyihalarni ko‘rib chiqadi va loyihani Jamg‘arma mablag‘lari hisobiga moliyalashtirish yoki loyihaning maqsadga muvofiqligi va iqtisodiy samaradorligi yetarli asoslanmagan taqdirda moliyalashtirishni rad etish to‘g‘risida qaror qabul qiladi.

Moliyalashtirishni rad etish to‘g‘risida qaror qabul qilingan taqdirda hujjatlar qayta ishlash yoki ularning maqsadga muvofiqligini qo‘shimcha baholash uchun Ijro etuvchi organga qaytariladi.

14. Hay’atning loyihani Jamg‘arma mablag‘lari hisobiga moliyalashtirish to‘g‘risidagi qarori asosida Transport vazirligining buxgalteriya bo‘limi Jamg‘armaning dastlabki smetasini ishlab chiqadi.

Transport vazirligining buxgalteriya bo‘limi Jamg‘armaning dastlabki smetasini tuzishda:

kelgusi yilda Jamg‘armaga pul mablag‘lari tushumining umumiy hajmini belgilaydi;

prognozlashtirilayotgan yil boshida Jamg‘arma mablag‘lari qoldig‘ini va yil davomida prognozlashtirilayotgan tushumlar va xarajatlar hajmini hisobga oladi.

Transport vazirligining buxgalteriya bo‘limi tomonidan tuzilgan Jamg‘armaning dastlabki smetasi hay’at tomonidan ko‘rib chiqiladi va qonun hujjatlarida belgilangan tartibda tasdiqlanadi.

15. Ilmiy-tadqiqot ishlarini moliyalashtirishda Ijro etuvchi organ tomonidan quyidagi talablarga javob beruvchi loyihalar tanlab olinadi:

transport xizmatlari xavfsizligini ta’minlashning ilg‘or innovatsion texnologiyalarini joriy qilish;

yuqori sifatli transport xizmatlari, nazariy-metodik hujjatlar va avtomobil transporti standartlarining iqtisodiy-matematik modellashtirilishi (optimizatsiya);

asosan yangi texnika, texnologiya va materiallarning muayyan turlarini yaratishga yo‘naltirilgan loyihalar yoki kompleks nazariy yoki eksperemental tadqiqotlar jarayonida amaliy natijalarga erishish.

16. Infratuzilma obyektlarini loyihalashtirish, qurish, rekonstruksiya qilish va ta’mirlashning yillik hajmlari O‘zbekiston Respublikasi Prezidentining “Avtomobil transportini boshqarish tizimini yanada takomillashtirish chora-tadbirlari to‘g‘risida” 2018-yil 6-martdagi PQ-3589-son qarori, shuningdek, O‘zbekiston Respublikasi Prezidenti va O‘zbekiston Respublikasi Vazirlar Mahkamasining tegishli qarorlari va topshiriqlari bilan tasdiqlangan parametrlar asosida shakllantiriladi.

17. Jamg‘arma mablag‘lari hisobiga moliyalashtiriladigan loyiha-qidiruv ishlarining manzilli ro‘yxatlarini shakllantirish, infratuzilma obyektlarini qurish, rekonstruksiya qilish va kapital ta’mirlash uchun loyiha-smeta hujjatlarini tasdiqlash Vazirlar Mahkamasining 2016-yil 26-iyuldagi 240-son qarori bilan tasdiqlangan Markazlashtirilgan investitsiyalar hisobiga moliyalashtiriladigan obyektlarni qurish, rekonstruksiya qilish va mukammal ta’mirlash uchun loyiha-tadqiqot ishlarining manzilli ro‘yxatlarini shakllantirish, loyiha-smeta hujjatlarini ishlab chiqish va tasdiqlash tartibi to‘g‘risidagi nizomga muvofiq Ijro etuvchi organ tomonidan amalga oshiriladi.

18. Infratuzilma obyektlarini qurish, rekonstruksiya qilish va kapital ta’mirlash uchun pudratchi tashkilotlarni aniqlash qonun hujjatlarida belgilangan tartibda amalga oshiriladi.

19. Infratuzilma obyektlarini qurish, rekonstruksiya qilish va kapital ta’mirlash uchun pudratchi tashkilotlarni moliyalashtirish (to‘lovlarni amalga oshirish) Vazirlar Mahkamasining 2003-yil 12-sentabrdagi 395-son qarori bilan tasdiqlangan Markazlashtirilgan mablag‘lar hisobiga qurilishni tashkil etish, moliyalashtirish va kreditlash tartibi to‘g‘risidagi nizomga muvofiq amalga oshiriladi.

20. Manzilli ro‘yxatlarga kiritilgan infratuzilma obyektlarini qurish, rekonstruksiya qilish va kapital ta’mirlash bo‘yicha loyiha hujjatlari, ajratilgan moliyalashtirish mablag‘larining maqsadli ishlatilishi, bajarilgan ishlarning hajmi va sifati Transport vazirligi tomonidan amalga oshiriladi.

21. Infratuzilma obyektlarini qurish, rekonstruksiya qilish va kapital ta’mirlash manzilli ro‘yxatlariga yil davomida qo‘shimcha obyektlarni kiritishga avariya holatlarida va moliyalashtirish mablag‘lari mavjud bo‘lganda ruxsat beriladi.

22. O‘zbekiston Respublikasi Prezidenti va O‘zbekiston Respublikasi Vazirlar Mahkamasining tegishli qarorlari bilan tasdiqlangan avtotransport vositalarini yangilash (sotib olish) parametrlari doirasida avtomobil transporti tashuvchilariga avtotransport vositalari sotib olish uchun shartnoma asosida qaytarish sharti bilan mablag‘ ajratiladi.

23. Jamg‘arma mablag‘larini olish uchun avtomobil transporti tashuvchisi Transport vazirligiga quyidagi hujjatlarni taqdim etadi:

Jamg‘arma mablag‘larini olish uchun buyurtmanoma;

pul mablag‘larini sarflash yo‘nalishlari ko‘rsatilgan biznes-reja;

uchinchi yuridik shaxsdan kafillik shartnomasi;

soliq organlari tomonidan tasdiqlangan so‘nggi hisobot davridagi moliya hisoboti shakllari, yangi tuzilgan xo‘jalik subyektlari bundan mustasno;

24. Mablag‘larni olish uchun Transport vazirligi va oluvchi o‘rtasida qonun hujjatlarida belgilangan tartibda ikki tomonlama shartnoma tuziladi.

25. Transport sohasini boshqarish tizimiga axborot-kommunikatsiya texnologiyalarini joriy qilish uchun mablag‘lar Jamg‘arma daromadlari va xarajatlari smetasi doirasida ajratiladi.

26. Transport sohasini boshqarish tizimiga axborot-kommunikatsiya texnologiyalarini joriy qilish uchun mablag‘ ajratish O‘zbekiston Respublikasi Prezidentining 2018-yil 6-martdagi PQ-3589-son qarori bilan tasdiqlangan Avtomobil transporti boshqaruv tizimida axborot-kommunikatsiya texnologiyalarini joriy etish dasturi doirasida amalga oshiriladi.

27. Transport vazirligi xodimlarini moddiy rag‘batlantirishga xarajatlar Vazirlar Mahkamasi tomonidan belgilanadigan O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasi hisobiga Transport vazirligi va uning idoraviy mansub tashkilotlari xodimlarini qo‘shimcha moddiy rag‘batlantirish tartibiga muvofiq amalga oshiriladi.

28. Transport vazirligini saqlash xarajatlariga:

joriy xarajatlarni;

moddiy-texnika bazani rivojlantirish xarajatlarini;

O‘zbekiston Respublikasida va xorijiy davlatlarda Transport vazirligi tomonidan tashkil etiladigan biznes-forumlar, seminarlar, ko‘rgazmalarni o‘tkazish xarajatlarini;

yo‘lovchilar va yuklarni avtomobil transportida tashish huquqiga litsenziya olish uchun berilgan arizalarni ko‘rib chiqish, e’lonlar bo‘yicha xarajatlarni hisobga olgan holda ruxsatnomalar blankalari va tender hujjatlari to‘plamlarini tayyorlashning haqiqiy tannarxi bo‘yicha ularni tayyorlash xarajatlarini;

xalqaro avtomobilda tashish masalalari bo‘yicha qo‘shma/aralash komissiyalar majlislarini va boshqa tadbirlarni tashkil etish va o‘tkazish xarajatlari, ushbu sohada O‘zbekiston Respublikasining xalqaro shartnomalarini amalga oshirish doirasida vakillik xarajatlarini;

davlat organlari va boshqa tashkilotlar, yetakchi loyiha institutlari, ilmiy va ta’lim muassasalari, shuningdek, xalqaro tashkilotlar, xorijiy kompaniyalarning yuqori malakali mutaxassislari va ekspertlarni maslahatchilar sifatida jalb qilish xarajatlarini o‘z ichiga oladi.

Barcha xarajatlar Jamg‘arma daromadlari va xarajatlari smetasi doirasida moliyalashtiriladi.

29. Ekologiya, sog‘lomlashtirish va xayriya tashkilotlari, madaniyat va sog‘liqni saqlash muassasalari, mehnat organlari, jismoniy tarbiya va sport, ta’lim muassasalari, mahalliy davlat hokimiyati organlari, fuqarolarning o‘z o‘zini boshqarish organlari uchun homiylik va xayriya yordami shaklidagi subsidiyalar, to‘lovlar, mablag‘lar faqat O‘zbekiston Respublikasi Vazirlar Mahkamasining qarorlari va farmoyishlariga muvofiq ajratiladi.

30. O‘zbekiston Respublikasi Prezidentining “O‘zbekiston Respublikasi fuqarolarining vaqtinchalik mehnat faoliyatini amalga oshirish uchun respublika tashqarisiga chiqish vaqtida xavfsizligini ta’minlash chora-tadbirlari to‘g‘risida” 2018-yil 5-martdagi PQ-3584-son qarorining 3-bandiga asosan ixtisoslashtirilgan kompaniyalar tomonidan jalb qilingan kreditlarni qaytarishga va xarajatlarni qoplashga yo‘naltiriladigan, ular bo‘yicha foizlar va vositachilik haqi to‘lash bilan bog‘liq bo‘lgan mablag‘lar Jamg‘arma daromadlari va xarajatlari smetasi doirasida ajratiladi.

31. Jamg‘armaning joriy yilda sarflanmagan mablag‘lari keyingi yilga o‘tkaziladi va qaytarib olinmaydi.

32. Transport vazirligining hay’ati va bosh buxgalteri Jamg‘arma mablag‘larining qonuniyligi va maqsadli yo‘naltirilishi uchun javob beradi.

33. Ushbu Nizom talablari buzilishida aybdor bo‘lgan shaxslar qonun hujjatlarida belgilangan tartibda javob beradilar.

1. Ushbu Nizom O‘zbekiston Respublikasi Transport vazirligi va uning idoraviy mansub tashkilotlari (keyingi o‘rinlarda Transport vazirligi deb ataladi) xodimlari mehnatini moddiy rag‘batlantirish tartibini belgilaydi.

2. Transport vazirligi va uning idoraviy mansub tashkilotlari xodimlari mehnatini moddiy rag‘batlantirish va ijtimoiy muhofaza qilish (keyingi o‘rinlarda moddiy rag‘batlantirish deb ataladi) samaradorlik, bajarilayotgan ish sifati oshirilishidan ularning moddiy va ma’naviy manfaatdorligini oshirish, ularga yuklangan vazifalarni bajarishda tashabbus ko‘rsatilishini rag‘batlantirish, mehnat va ijro intizomini ta’minlash maqsadida amalga oshiriladi.

3. Ushbu Nizom Transport vazirligi markaziy apparati va hududiy bo‘linmalari, shuningdek, O‘zbekiston Respublikasi Transport vazirligi huzuridagi Transport va logistikani rivojlantirish muammolarini o‘rganish markazi, Transport vazirligi huzuridagi Transport nazorati inspeksiyasi xodimlariga joriy qilinadi.

4. Moddiy rag‘batlantirish to‘g‘risidagi qaror Transport vazirligi xodimlarini moddiy rag‘batlantirish komissiyasi (keyingi o‘rinlarda Komissiya deb ataladi) tomonidan qabul qilinadi.

Komissiya tarkibi va uning ishi reglamenti O‘zbekiston Respublikasi transport vaziri tomonidan tasdiqlanadi (keyingi o‘rinlarda transport vaziri deb ataladi).

5. Transport vazirligi xodimlarini moddiy rag‘batlantirish bo‘yicha takliflar Komissiyaning ko‘rib chiqishi uchun:

transport vaziri o‘rinbosarlari tomonidan — Transport vazirligi faoliyatini baholash mezonlari asosida mutasaddilik qilinadigan tegishli tarkibiy bo‘linmalar rahbarlariga nisbatan;

tarkibiy bo‘linmalar rahbarlari tomonidan — Transport vazirligi faoliyatini baholash mezonlari asosida transport vazirining mutasaddilik qiladigan o‘rinbosarlari bilan kelishgan holda bo‘linmalar tegishli xodimlari yuzasidan kiritiladi.

6. Moddiy rag‘batlantirish:

O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasining (keyingi o‘rinlarda Jamg‘arma deb ataladi) belgilangan tartibda tasdiqlangan xarajatlar smetasida nazarda tutilgan mablag‘lar hisobiga;

xodimning haqiqatda ishlagan vaqtidan kelib chiqib amalga oshiriladi (vaqtincha mehnatga layoqatsizlik varaqasi va/yoki mehnat ta’tili kunlarini hisobga olmagan holda) va ish haqining o‘rtacha miqdorini hisoblab chiqishda hisobga olinadi.

7. Transport vazirligi va uning idoraviy mansub tashkilotlari xodimlari uchun moddiy rag‘batlantirishning quyidagi turlari amalga oshiriladi:

a) har oylik oziq-ovqat uchun xarajatlarni qoplash bo‘yicha to‘lovlar — bazaviy hisoblash miqdorining ikki baravari miqdorida;

b) har oylik yo‘lkira uchun xarajatlarni qoplash bo‘yicha to‘lovlar — Transport vazirligining xizmat avtotransporti biriktirilgan xodimlaridan tashqari barcha xodimlari uchun bazaviy hisoblash miqdorida;

v) oylik va choraklik mukofot pullari — bir lavozim maoshigacha bo‘lgan miqdorda (mehnatni rag‘batlantirish koeffitsiyentini hisobga olgan holda);

g) tasdiqlangan xarajatlar smetasiga muvofiq to‘lanadigan mehnatga haq to‘lash fondidan 200 foizgacha bo‘lgan miqdorda har oylik ustama;

d) bayram kunlari munosabati bilan beriladigan mukofotlar — bir lavozim maoshgacha bo‘lgan miqdorda (mehnatni rag‘batlantirish koeffitsiyentini hisobga olgan holda), haqiqatda ishlangan vaqtdan qat’i nazar xarajatlar smetasida ushbu maqsadlar uchun tasdiqlangan summa doirasida;

e) qonun hujjatlarida belgilangan xodimlarning alohida toifalariga ustamalar.

Mehnatga haq to‘lashning oylik fondi miqdorini belgilashda mehnatga haq to‘lash bo‘yicha Yagona tarif setkasi bo‘yicha tarif koeffitsiyentlari bilan bir qatorda davlat hokimiyati va boshqaruvi organlari davlat xizmatchilarining lavozim maoshlariga ustamalar (mehnatni rag‘batlantirish koeffitsiyenti) hisobga olinadi.

Har oylik ustamalar miqdori Komissiya tomonidan har oyda Transport vazirligi xodimining shaxsiy hissasini baholash hisobga olingan holda belgilanadi.

8. Komissiyaning qarori bilan bir martalik rag‘batlantirish, ijtimoiy, kompensatsiya to‘lovlari va taqdirlashlarning quyidagi turlari amalga oshirilishi mumkin:

a) xodimning 50, 60 yoshga to‘lishi — ikki lavozim maoshigacha;

b) xodimning mehnat pensiyasiga chiqishi — ikki lavozim maoshigacha;

v) xodimning, shuningdek, uning bolalarining turmush qurishi — bazaviy hisoblash miqdorining o‘n baravarigacha;

g) moddiy yordam — yiliga bir lavozim maoshi;

d) xodimning yaqin qarindoshlari yoki o‘zining vafot etishi — bazaviy hisoblash miqdorining yigirma baravarigacha.

Xodim vafot etgan taqdirda moddiy zarar (agar u xodim vafot etgan yili bevosita xodimning o‘ziga berilmagan bo‘lsa) turmush o‘rtog‘iga to‘lanadi, u yo‘q bo‘lsa xodim bilan yashagan voyaga yetgan bolalari yoki qonuniy vakillariga (vasiylar, homiylarga) yoxud voyaga yetmagan bolalarni (yoshidan qat’i nazar bolalikdan nogironligi bo‘lgan shaxslar) farzandlikka olganlarga, shuningdek, xodimlarning qaramog‘idagi shaxslarga, yoki agar xodim turmush qurmagan bo‘lsa va bolalari bo‘lmasa teng qismda ota-onasiga beriladi;

e) kuz-qish mavsumida qishloq xo‘jaligi mahsulotlarini sotib olish — bazaviy hisoblash miqdorining o‘n baravarigacha;

j) davolash muassasalariga, dam olish, sanatoriylar, pansionatlar, turizm bazalari va bolalar sog‘lomlashtirish muassasalariga yo‘llanmalar qiymatining qisman kompensatsiyasi — ular qiymatining 50 foizidan ko‘p bo‘lmagan miqdorda.

Transport vazirining qarori bilan xodimlarga boshqa turdagi shaxsiy ijtimoiy rag‘batlantirish amalga oshirilishi mumkin.

9. Ushbu bo‘limda nazarda tutilgan to‘lovlarning barcha turlari Jamg‘armaning tasdiqlangan xarajatlar smetasi mablag‘lari hisobiga, ularning haqiqatda mavjudligidan va Transport vazirligining moliyaviy-iqtisodiy faoliyati ko‘rsatkichlaridan kelib chiqib amalga oshiriladi.

10. Komissiya a’zolari, Transport vazirligi tarkibiy bo‘linmalari rahbarlari tarkibiy bo‘linmalar tegishli xodimlarini moddiy rag‘batlantirish bo‘yicha takliflar kiritishda xolis yondashuvni ta’minlashlari kerak.

11. Ushbu Nizom talablari buzilishida aybdor bo‘lgan shaxslar qonun hujjatlarida belgilangan tartibda javob beradilar.

2. Vazirlar Mahkamasining “Aholiga transport xizmati ko‘rsatish hamda shaharlar va qishloqlarda avtobuslarda yo‘lovchilar tashish tizimini yanada takomillashtirish chora-tadbirlarini amalga oshirish to‘g‘risida” 2017-yil 25-apreldagi 238-son qarorining 6-bandi uchinchi xatboshi (O‘zbekiston Respublikasi QT, 2017-y., 17-son, 300-modda) quyidagi tahrirda bayon qilinsin:

“undiriladigan jarimalar summasining 60 foizi O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasiga o‘tkaziladi”.

3. Vazirlar Mahkamasining “Mahalliy va xalqaro yo‘nalishlar bo‘yicha temir yo‘l transportida yo‘lovchilarni hamda yuklarni tashish faoliyatini litsenziyalash tartibini takomillashtirish chora-tadbirlari to‘g‘risida” 2018-yil 9-apreldagi 278-son qaroriga 1-ilovaning 38-bandi ikkinchi-uchinchi xatboshilari quyidagi tahrirda bayon qilinsin:

“Litsenziyalar berilganligi uchun davlat boji mablag‘lari Transport vazirligining maxsus g‘aznachilik hisobvarag‘iga o‘tkaziladi va quyidagi tarzda taqsimlanadi:

20 foizi — O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasiga;”.