Oʻzbekiston Respublikasi Prezidentining “Avtomobil yoʻllarini qurish va ulardan foydalanish sohasida ishlarni tashkil etishning ilgʻor xorijiy uslublarini joriy etish chora-tadbirlari toʻgʻrisida” 2018-yil 27-noyabrdagi PQ-4035-son va “Oʻzbekiston Respublikasi Transport vazirligi faoliyatini tashkil etish toʻgʻrisida” 2019-yil 1-fevraldagi PQ-4143-son qarorlari ijrosini taʼminlash, shuningdek, Oʻzbekiston Respublikasida uzoq muddatli istiqbolga moʻljallangan yoʻl qurilishini rivojlantirish strategiyasini (keyingi oʻrinlarda Rivojlantirish strategiyasi deb ataladi) ishlab chiqishda Germaniya Federativ Respublikasining ilgʻor tajribasini qoʻllash maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Investitsiyalar va tashqi savdo vazirligi Oʻzbekiston Respublikasi Transport vazirligi huzuridagi Avtomobil yoʻllari qoʻmitasi, Tashqi ishlar vazirligi va Moliya vazirligi bilan birgalikda yetakchi xorijiy konsalting kompaniyalar va agentliklarning amaliy tajribasini oʻrganish asosida xorijiy konsultantni jalb qilish masalasi ishlab chiqilib, Rivojlantirish strategiyasini moliyalashtirish manbalari belgilangani;

2019-yil 14-yanvarda Oʻzbekiston Respublikasi Transport vazirligi huzuridagi Avtomobil yoʻllari qoʻmitasi va Germaniyaning “Roland Berger GmbN” kompaniyasi oʻrtasida oʻtkazilgan muzokaralar yakunlari asosida Rivojlantirish strategiyasini ishlab chiqish sohasida hamkorlik toʻgʻrisida bitim imzolanib, uning asosida Rivojlantirish strategiyasini ishlab chiqish boʻyicha konsalting kompaniyasining xizmatlari qiymati 2,6 mln yevroni tashkil etishi maʼlumot uchun qabul qilinsin.

2. Oʻzbekiston Respublikasi Transport vazirligi huzuridagi Avtomobil yoʻllari qoʻmitasi, Investitsiyalar va tashqi savdo vazirligi, Moliya vazirligi va Tashqi ishlar vazirligining texnik topshiriqlar taqdim etilgan kundan boshlab, ishlab chiqilishi 120 kundan koʻp boʻlmagan muddatni tashkil qiladigan Rivojlantirish strategiyasini ishlab chiqish boʻyicha konsalting xizmatlar koʻrsatish toʻgʻrisida Germaniyaning “Roland Berger GmbN” kompaniyasi bilan shartnoma tuzish haqidagi takliflariga rozilik berilsin.

3. Oʻzbekiston Respublikasi Transport vazirligi Investitsiyalar va tashqi savdo vazirligi, Iqtisodiyot va sanoat vazirligi, Moliya vazirligi hamda Qurilish vazirligi bilan kelishilgan Rivojlantirish strategiyasini ishlab chiqish boʻyicha texnik topshiriqni tasdiqlasin.

4. Belgilab qoʻyilsinki, Oʻzbekiston Respublikasi Transport vazirligi huzuridagi Avtomobil yoʻllari qoʻmitasi Rivojlantirish strategiyasining ishlab chiqilishi va amalga oshirilishi uchun masʼul ijro etuvchi agentlik hamda organ hisoblanadi.

5. Oʻzbekiston Respublikasi Iqtisodiyot va sanoat vazirligi huzuridagi “Loyihalar va import kontraktlarni kompleks ekspertizadan oʻtkazish markazi” davlat unitar korxonasi Germaniyaning “Roland Berger GmbN” kompaniyasi bilan konsalting xizmatlar koʻrsatish shartnomasini belgilangan tartibda kompleks ekspertizadan oʻtkazsin va tegishli xulosa bersin.

6. Oʻzbekiston Respublikasi Moliya vazirligi tuzilgan shartnomaga muvofiq Germaniyaning “Roland Berger GmbN” kompaniyasi xizmatlariga haqiqatdan bajarilgan ishlar boʻyicha haq toʻlash uchun Oʻzbekiston Respublikasi Vazirlar Mahkamasining zaxira jamgʻarmasi mablagʻlari hisobidan 2019-yilga mablagʻ ajratsin.

7. Oʻzbekiston Respublikasi Tashqi ishlar vazirligi Oʻzbekiston Respublikasi Transport vazirligi huzuridagi Avtomobil yoʻllari qoʻmitasining buyurtmanomalariga binoan Rivojlantirish strategiyasini ishlab chiqish uchun jalb etiladigan xorijiy mutaxassislarga kirish vizalarining konsullik hamda boshqa yigʻimlar undirilmasdan rasmiylashtirilishini taʼminlasin.

8. Oʻzbekiston Respublikasi Ichki ishlar vazirligi Oʻzbekiston Respublikasi Transport vazirligi huzuridagi Avtomobil yoʻllari qoʻmitasining buyurtmanomalariga binoan Rivojlantirish strategiyasini ishlab chiqish uchun jalb etiladigan xorijiy mutaxassislarga davlat boji undirilmagan holda, koʻp martalik vizalar berilishi va muddati uzaytirilishini, shuningdek, ularning vaqtincha turgan joyi boʻyicha roʻyxatga olinishi hamda muddati uzaytirilishini taʼminlasin.

9. Oʻzbekiston Respublikasi Bandlik va mehnat munosabatlari vazirligi Oʻzbekiston Respublikasi Transport vazirligi huzuridagi Avtomobil yoʻllari qoʻmitasining buyurtmanomalariga binoan chet el fuqarolariga Oʻzbekiston Respublikasi hududida mehnat faoliyati bilan shugʻullanish huquqini beradigan tasdiqnomalar berilishini (muddati uzaytirilishini) taʼminlasin.

10. Ushbu qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — Oʻzbekiston Respublikasi transport vaziri A.J. Ramatov zimmasiga yuklansin.