LexUZ sharhi
Mazkur qarorga O‘zbekiston Respublikasi Prezidentining 2021-yil 13-fevraldagi PQ-4992-sonli “Kimyo sanoati korxonalarini yanada isloh qilish va moliyaviy sog‘lomlashtirish, yuqori qo‘shilgan qiymatli kimyoviy mahsulotlar ishlab chiqarishni rivojlantirish chora-tadbirlari to‘g‘risida”gi qaroriga asosan o‘zgartirishlar kiritilgan.
O‘zbekiston Respublikasi Prezidentining 2019-yil 21-22-yanvar kunlari Germaniya Federativ Respublikasiga qilgan rasmiy tashrifi O‘zbekiston-Germaniya tarixida do‘stlik va sheriklik munosabatlarining yangi sahifasini ochdi, ikki mamlakat o‘rtasidagi ko‘p qirrali hamkorlikni kengaytirish hamda o‘zaro anglashuvni chuqurlashtirishga kuchli turtki berdi.
Ochiq, do‘stona va konstruktiv muhitda o‘tgan oliy darajadagi samarali muzokaralar, Bundestagdagi, Bavariya hukumatidagi va ishbilarmon doiralar bilan bo‘lib o‘tgan uchrashuvlar tomonlarning O‘zbekiston va Germaniya o‘rtasidagi o‘zaro manfaatli hamkorlikni rivojlantirishga bo‘lgan ikki tomonlama intilishlarining kuchayganligini yana bir bor tasdiqladi.
Siyosiy, savdo-iqtisodiy, investitsiyaviy, moliyaviy-texnik, innovatsion, harbiy-texnik, madaniy-gumanitar va boshqa sohalarda o‘zaro hamkorlikni rivojlantirish masalalari muhokama qilindi va qo‘shma qarorlar qabul qilindi.
O‘zbekiston Respublikasi hamda Germaniya Federativ Respublikasi o‘rtasida siyosiy, savdo-iqtisodiy, investitsiyaviy, moliyaviy-texnik, innovatsion, harbiy-texnik, madaniy-gumanitar hamkorlikni yanada kengaytirish bo‘yicha imzolangan ikki tomonlama bitimlar va erishilgan kelishuvlarni to‘liq hajmda amalga oshirishni ta’minlash maqsadida:
O‘zbekiston Respublikasi Prezidentining Germaniya Federativ Respublikasiga qilgan rasmiy tashrifi davomida imzolangan ikki tomonlama hujjatlarni amalga oshirish bo‘yicha amaliy chora-tadbirlar rejasi (“Yo‘l xaritasi”) 1-ilovaga* muvofiq;
O‘zbekiston Respublikasi hamda Germaniya Federativ Respublikasi o‘rtasida siyosiy, savdo-iqtisodiy va madaniy-gumanitar, shuningdek xavfsizlik sohasidagi o‘zaro hamkorlikni kengaytirish bo‘yicha 2019-2020-yillarga mo‘ljallangan amaliy chora-tadbirlar rejasi (“Yo‘l xaritasi”) 2-ilovaga* muvofiq;
O‘zbekiston Respublikasi Prezidentining Germaniya Federativ Respublikasiga qilgan rasmiy tashrifi davomida imzolangan investitsiya loyihalari va savdo shartnomalarini amalga oshirish bo‘yicha amaliy chora-tadbirlar rejasi (“Yo‘l xaritasi”) 3-ilovaga* muvofiq;
O‘zbekiston Respublikasi Prezidentining Germaniya Federativ Respublikasiga qilgan rasmiy tashrifi davomida imzolangan ikki tomonlama bitimlar va erishilgan kelishuvlarning o‘z vaqtida va so‘zsiz amalga oshirilishini monitoring hamda nazorat qilishni ta’minlash mexanizmi 4-ilovaga muvofiq* tasdiqlansin.
2. O‘zbekiston Respublikasi Vazirlar Mahkamasi ikki hafta muddatda mazkur qarorning 3-ilovasiga* kiritilgan investitsiya loyihalari va savdo shartnomalarini amalga oshirishning tarmoq jadvallarini tasdiqlasin.
3. O‘zbekiston Respublikasi Prezidentining 2018-yil 30-oktabrdagi PF-5565-son Farmoni bilan tashkil etilgan Oliy darajadagi tashriflar davomida imzolangan hujjatlar ijrosini ta’minlash masalalari bo‘yicha respublika muvofiqlashtiruvchi guruhi:
imzolangan hujjatlarning so‘zsiz va sifatli bajarilishi, shu jumladan Germaniya Federativ Respublikasiga oliy darajadagi tashrif davomida erishilgan kelishuvlar hamda alohida hujjatlarning kuchga kirishi bo‘yicha mamlakat ichki tartib-taomillarini o‘z vaqtida amalga oshirish ustidan doimiy va tizimli monitoring hamda nazoratni tashkil qilish;
mazkur qaror bilan tasdiqlangan amaliy chora-tadbirlar rejalari (“yo‘l xaritalari”)ning so‘zsiz ijro etilishi bo‘yicha mas’ul ijrochilar — vazirliklar, idoralar, mahalliy davlat hokimiyati organlari va boshqa tashkilotlar rahbarlari tomonidan ko‘rilayotgan amaliy choralar to‘g‘risida hisobotlarni har oyda eshitish;
siyosiy, savdo-iqtisodiy, investitsiyaviy, moliyaviy-texnik, innovatsion, harbiy-texnik va madaniy-gumanitar hamkorlikni yanada kengaytirish bo‘yicha imzolangan ikki tomonlama bitimlar va erishilgan kelishuvlarni amalga oshirish, shuningdek ushbu masalalar bo‘yicha nemis tomoni, avvalo Investitsiya va texnologiyalar bo‘yicha O‘zbekiston-Germaniya qo‘mitasi doirasida muntazam va samarali hamkorlikni tashkil qilishni ta’minlasin.
4. Mas’ul ijrochilar — vazirliklar, idoralar, mahalliy davlat hokimiyati organlari va boshqa tashkilotlar:
“Ijro.gov.uz” tizimidan foydalangan holda tarmoq jadvallarini va mazkur qaror bilan tasdiqlangan amaliy chora-tadbirlar rejalarini o‘z vaqtida va sifatli bajarish;
hisobot oyidan keyingi oyning 3 sanasiga qadar tarmoq jadvallari va mazkur qaror bilan tasdiqlangan amaliy chora-tadbirlar rejalari ijrosi bo‘yicha ma’lumotlarni tegishlicha Tashqi ishlar vazirligiga — 1 va 2-ilovalarga* muvofiq, Investitsiyalar va tashqi savdo vazirligiga — 3-ilovaga* muvofiq taqdim etishni ta’minlasin.
Tashqi ishlar vazirligi, Investitsiyalar va tashqi savdo vazirligi hisobot oyidan keyingi oyning 7 sanasiga qadar O‘zbekiston Respublikasi Vazirlar Mahkamasi va Hisob palatasiga tarmoq jadvallari va mazkur qaror bilan tasdiqlangan amaliy chora-tadbirlar rejalarining ijrosi bo‘yicha umumlashtirilgan ma’lumotlarni kiritsin.
Vazirlar Mahkamasi va Hisob palatasi hisobot oyidan keyingi oyning 10 sanasiga qadar O‘zbekiston Respublikasi Prezidenti Administratsiyasi Ijro etuvchi apparatiga va O‘zbekiston Respublikasi Prezidenti huzuridagi Xavfsizlik kengashi apparatiga mazkur qaror hamda tasdiqlangan amaliy chora-tadbirlar rejalari ijrosining tanqidiy tahlilini taqdim etsin.
5. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov, O‘zbekiston Respublikasi Prezidenti Administratsiyasi rahbari Z.Sh. Nizomiddinov, O‘zbekiston Respublikasi Prezidenti huzuridagi Xavfsizlik kengashi kotibi V.V. Maxmudov va O‘zbekiston Respublikasi Hisob palatasi raisi M.M. Ikramov zimmasiga yuklansin.