Oʻzbekiston Respublikasi Prezidentining “Oʻzbekiston Respublikasi Fan va texnika davlat qoʻmitasini tashkil etish toʻgʻrisida” 1992-yil 18-fevraldagi Farmoniga muvofiq hamda ijtimoiy-iqtisodiy muammolarni hal etishda respublikaning ilmiy-texnika va axborot imkoniyatidan samarali foydalanishni taʼminlash maqsadida Vazirlar Mahkamasi qaror qiladi:

1. Belgilab qoʻyilsinki, Oʻzbekiston Respublikasi Fan va texnika davlat qoʻmitasi (Oʻzbekiston Respublikasi FTDQ) davlat ilmiy-texnika siyosatini shakllantirish va amalga oshirish, ixtirochilik faoliyatini, patent xizmatini va ilmiy-texnika axboroti tizimini rivojlantirish boʻyicha vazirliklar, idoralar, konsernlar, uyushmalar, korxonalar, ilmiy tashkilotlar faoliyatini, ularning qaysi idoraga boʻysunishlari va mulkchilik shakllaridan qatʼi nazar, muvofiqlashtirishni amalga oshiradi.

2. Yuklatilgan vazifalarga va faoliyatining yoʻnalishiga muvofiq Oʻzbekiston Respublikasi Fan va texnika davlat qoʻmitasiga quyidagi huquqlar berilsin:

prognozlarni, tarmoqlararo yirik ilmiy-texnik dasturlarining loyihalarini ishlab chiqish uchun Oʻzbekiston Respublikasi Fanlar akademiyasini, tarmoq fanlar akademiyalarini, Oʻzbekiston ixtirochilari va ratsionalizatorlari jamiyatini, ilmiy-texnika jamiyatlarini, ilmiy-tadqiqot, loyiha-konstruktorlik va texnologiya tashkilotlarini, oliy oʻquv yurtlarini va boshqa muassasalar, birlashmalar va korxonalarni, shuningdek, alohida olimlar va mutaxassislarni jalb qilish;

fan va texnikaning respublika uchun ustuvor yoʻnalishlari boʻyicha idoralararo ilmiy, muvofiqlashtirish kengashlari, shuningdek, ilmiy-texnika komissiyalari, ekspert va ishchi guruhlari tashkil etish;

tarmoqlararo yirik ilmiy-texnika muammolarini hal etish, xalq xoʻjaligi uchun muhim ahamiyatga ega boʻlgan, yangi texnika, texnologiya va materiallar ishlab chiqish boʻyicha tanlovlar oʻtkazish;

zarur hollarda fan va texnika taraqqiyotining respublika uchun ustuvor yoʻnalishlari boʻyicha ilmiy-texnika loyihalari va dasturlarining davlat ekspertizasini tashkil etish va oʻtkazish;

muzokaralarda qatnashish va respublika Hukumatining topshiriqlariga muvofiq davlatlararo ilmiy-texnika hamkorligi masalalari boʻyicha shartnomalar va bitimlarni imzolash, ilmiy kadrlarni oʻqitish, stajirovka va ishlash uchun chet elga yuborish toʻgʻrisida takliflar kiritish;

respublika va davlatlararo ilmiy-texnika konferensiyalari, simpoziumlar, seminarlar va kengashlarni tashkil etish, Oʻzbekiston vakillarini respublikadan tashqarida oʻtkaziladigan shunga oʻxshash tadbirlarda qatnashish uchun yuborish;

ixtiro uchun talabnomalarni koʻrib chiqishga qabul qilish, ular yuzasidan ekspertiza oʻtkazish, kashfiyotlar, ixtirolar, sanoat namunalari, tovar belgilari va boshqa sanoat mulki obyektlari uchun qoʻriqlash hujjatlari berish, xalq xoʻjaligiga fan-texnika yutuqlari qanday joriy qilinayotganligini nazorat qilishni amalga oshirish;

vazirliklardan, idoralardan, Fanlar akademiyasidan va tarmoq akademiyalaridan, konsernlardan, uyushmalardan, korxonalardan, tashkilotlar va muassasalardan, shuningdek, Oʻzbekiston Respublikasi Davlat statistika qoʻmitasidan qoʻmitaga yuklatilgan vazifalarni bajarish uchun zarur boʻlgan materiallarni olish;

patent-litsenziya ishlarini tashkil qilish va oʻtkazish, ilmiy-texnika axboroti tizimini shakllantirish va samarali foydalanish boʻyicha umumiy metodologik rahbarlikni amalga oshirish;

oʻz huquq doirasida meʼyoriy hujjatlar qabul qilish, ilmiy-texnik va maslahat tashkilotlari, qoʻshma ilmiy-qidirish va tadqiqot jamoalarini va korxonalarini taʼsis etish, noshirlik faoliyatini amalga oshirish.

3. Oʻzbekiston Respublikasi Fan va texnika davlat qoʻmitasi markaziy apparatining tuzilmasi ilovaga muvofiq tasdiqlansin.

Qoʻmita raisiga zarur boʻlganda markaziy apparat tuzilmasiga tasdiqlangan xodimlar soni va mehnatga haq toʻlash fondi doirasida oʻzgartishlar kiritish huquqi berilsin.

4. Oʻzbekiston Respublikasi Fan va texnika davlat qoʻmitasi markaziy apparati xodimlarining cheklangan soni (xizmat koʻrsatuvchi xodimlardan tashqari) Oʻzbekiston Respublikasi Iqtisodiyot qoʻmitasi va unga qarashli ilmiy tashkilotlar xodimlari soni va cheklangan mablagʻlar hisobidan 50 nafar qilib belgilansin.

Oʻzbekiston Respublikasi Fan va texnika davlat qoʻmitasiga Raisning 2 nafar oʻrinbosari, shu jumladan, bir nafar birinchi oʻrinbosari va shaxsiy tarkibi Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlanadigan 7 kishidan iborat hayʼatga ega boʻlishiga ruxsat berilsin.

5. Tugatilgan SSSR Davlat ixtirolar qoʻmitasi patent xizmati koʻrsatish Butunittifoq markazining Toshkent filiali qayta tashkil etilsin. Uning funksiyasi Oʻzbekiston Respublikasi FTDQning respublika fan-texnika va patent-litsenziya axboroti markazi (OʻzFTPA)ga berilsin.

6. Oʻzbekiston Respublikasi Fan va texnika davlat qoʻmitasi:

bir oy muddat ichida respublika fan-texnika va patent-litsenziya axboroti markazi (OʻzFTPA) faoliyatini tashkil etishga doir qaror loyihasini, Qoʻmita va OʻzFTPA toʻgʻrisidagi nizomlar loyihalarini;

joriy yilning ikkinchi choragida ixtirochilik, patent-litsenziya faoliyati, sanoat mulki obyektlari masalalari boʻyicha Oʻzbekiston Respublikasining qonunchilik aktlari loyihalarini tayyorlasin va koʻrib chiqish uchun Vazirlar Mahkamasiga taqdim etsin.

7. Toshkent shahar hokimi:

Oʻzbekiston Respublikasi Fan va texnika davlat qoʻmitasi X. Sulaymonova koʻchasi, 2-uyga Oʻzbekistonning taraqqiyot istiqbolini beligilash qoʻmitasining Hisoblash markazi boʻlgan sobiq Iqtisodiyot va normativlar ilmiy-tadqiqot instituti binosiga joylashtirilsin;

bir hafta muddat ichida Oʻzbekiston Respublikasi OʻzFTPA bilan birgalikda Respublika fan-texnika va patent-litsenziya axboroti markazini joylashtirish masalasini koʻrib chiqsin va hal qilsin.

8. Oʻzbekiston Respublikasi Moliya vazirligi, “Davkooptaʼminot”, Avtomobil transporti vazirligi va Aloqa vazirligi Oʻzbekiston Respublikasi Fan va texnika davlat qoʻmitasining hisob-kitoblariga muvofiq zarur mablagʻlar, moddiy-texnika resurslari, transport va aloqa vositalarini ajratsinlar.

9. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari oʻrtoq M. Q. Qoraboyev zimmasiga yuklatilsin.

Rahbariyat

Fan va texnikaning ustuvor yoʻnalishlari boʻyicha yirik fan-texnika dasturlarini ishlab chiqish va amalga oshirish boʻlimi

Ilmiy tashkilotlarning faoliyatini muvofiqlashtirish boʻlimi

Fan-texnika kadrlarini tayyorlash va qayta tayyorlash boʻlimi

Maʼnaviy potensialni rivojlantirish va mualliflik huquqlarini himoya qilish, kashfiyotlar va ixtirolar boʻlimi

Umumiy boʻlim

Kadrlar boʻlimi

Moliya-iqtisodiyot boʻlimi

Maʼmuriy-xoʻjalik boʻlimi

Respublika fan-texnika kutubxonasi boʻlgan Respublika fan-texnika va patent-litsenziya axboroti markazi (OʻzFTPA).