Oʻzbekiston Respublikasi Vazirlar Mahkamasining 2018-yil 7-martdagi 183-son “Nogironligi boʻlgan shaxslarning avtotransport vositalaridan foydalanishi uchun qulay shart-sharoitlar yaratish chora-tadbirlari toʻgʻrisida”gi qaroriga muvofiq, Oʻzbekiston Respublikasi Ichki ishlar vazirligi, Sogʻliqni saqlash vazirligi, Avtomobil yoʻllari davlat qoʻmitasi, Oʻzbekiston avtomobil transporti agentligi va Oʻzbekiston standartlashtirish, metrologiya va sertifikatlashtirish agentligi qaror qiladi:

1. Nogironligi boʻlgan shaxslar avtotransport vositalarining toʻxtab turish joylariga qoʻyiladigan talablar toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran uch oy oʻtgach kuchga kiradi.

Mazkur Nizom Oʻzbekiston Respublikasi Vazirlar Mahkamasining 2018-yil 7-martdagi 183-son “Nogironligi boʻlgan shaxslarning avtotransport vositalaridan foydalanishi uchun qulay shart-sharoitlar yaratish chora-tadbirlari toʻgʻrisida”gi qaroriga muvofiq nogironligi boʻlgan shaxslar avtotransport vositalarining bozorlar, savdo majmualari va boshqa obyektlar hududlaridagi avtotransport vositalarining toʻxtab turish joylariga, avtotransport vositalarining toʻxtab turish joylaridan uzoq va noqulay joyda joylashgan infratuzilma obyektlari atrofidagi avtomobil yoʻllari va koʻchalarning chetida tashkil etiladigan toʻxtab turish joylariga qoʻyiladigan talablarni belgilaydi.

1. Nogironligi boʻlgan shaxslarning avtotransport vositalarini toʻxtab turishi uchun bozorlar, savdo majmualari va boshqa obyektlar hududlaridagi avtotransport vositalari toʻxtab turish joylarining kirish va chiqish qulay boʻlgan qismida nogironligi boʻlgan shaxslarning avtotransport vositalari toʻxtab turish joylari tashkil etiladi.

Nogironligi boʻlgan shaxslar avtotransport vositalarining toʻxtab turish joylari toʻxtab turish joyi umumiy maydonining kamida 5 foizini (kamida 2 ta joy) tashkil etishi lozim.

2. Nogironligi boʻlgan shaxslar avtotransport vositalarining toʻxtab turish joylariga Vazirlar Mahkamasining 2015-yil 24-dekabrdagi 370-son qarori bilan tasdiqlangan Yoʻl harakati qoidalarining 1-ilovasiga muvofiq “5.15. Toʻxtab turish joyi” va “7.17. Nogironlar” yoʻl belgilari oʻrnatiladi.

3. Nogironligi boʻlgan shaxslarning avtotransport vositalari uchun ajratilgan toʻxtab turish joylaridan “Nogiron haydovchi boshqarayotgan avtomobil” taniqlik belgisi oʻrnatilgan avtotransport vositasini boshqarayotgan I va II guruh nogironligi boʻlgan shaxslar — nogironlikni tasdiqlovchi tibbiy maʼlumotnomasi hamda 16 yoshgacha nogiron bolasi boʻlgan ota-onalar (yoki ularning oʻrnini bosuvchi shaxslar) — 16 yoshgacha nogiron bola uchun tayinlangan tegishli pensiya guvohnomasi boʻlganda foydalanishi mumkin.

Nogironligi boʻlgan shaxslarning avtotransport vositalari uchun ajratilgan toʻxtab turish joylaridan foydalanganlik uchun haq olinmaydi.

4. Bozorlar, savdo majmualari va boshqa obyektlar hududlaridagi nogironligi boʻlgan shaxslarning avtotransport vositalari toʻxtab turish joylari mazkur Nizomning 1-ilovasiga muvofiq namunaviy chizma asosida jihozlanadi.

5. Koʻp qavatli avtotransport vositalari toʻxtash joylarida nogironligi boʻlgan shaxslar avtotransport vositalarining toʻxtab turishi uchun joylar birinchi qavatda va boshqa qavatlarda liftga yaqin joylardan ajratilishi kerak.

6. Bozorlar, savdo majmualari va boshqa obyektlar hududlaridagi nogironligi boʻlgan shaxslarning avtotransport vositalari toʻxtab turish joylariga koʻk fonda 2x2 metr oʻlchamli sariq chiziqli nogironligi boʻlgan shaxs avtotransport vositasining toʻxtab turish joyini bildiruvchi Vazirlar Mahkamasining 2015-yil 24-dekabrdagi 370-son qarori bilan tasdiqlangan Yoʻl harakati qoidalarining 2-ilovasiga muvofiq 1.24 “Nogironligi boʻlgan shaxslarning avtotransport vositalari toʻxtab turish joyi” yotiq chizigʻi chiziladi.

7. Nogironligi boʻlgan shaxs avtotransport vositasi uchun ajratiladigan joylarga chiziladigan yotiq chiziq va oʻrnatiladigan yoʻl belgilarining oʻlchamlari yoʻl harakatini boshqarishning texnik vositalarini qoʻllashni belgilovchi normativ hujjatlarning talablariga muvofiq boʻlishi lozim.

8. Bozorlar, savdo majmualari va boshqa obyektlar hududlaridagi nogironligi boʻlgan shaxslarning avtotransport vositalari toʻxtab turish joylarining oʻlchamlari avtomobil harakat yoʻnalishiga burchak ostida qoʻyilganda eni 3,5 metr, uzunligi 5 metr, harakat yoʻnalishiga parallel qoʻyilganda eni 2,5 metr, uzunligi 7,5 metr boʻlishi lozim.

9. Bozorlar, savdo majmualari va boshqa obyektlar hududlaridagi nogironligi boʻlgan shaxslarning avtotransport vositalari toʻxtab turishi uchun ajratilgan joylarga chizilgan yotiq chiziqlar haydovchiga yaxshi koʻrinadigan boʻlishi zarur

10. Nogironligi boʻlgan shaxslarning avtotransport vositalari uchun moʻljallangan joylarni jihozlash ishlari hamda yoʻlning yotiq chiziqlarini soz holatda va yaxshi koʻrinishga ega boʻlishini taʼminlanishi mazkur avtoturargohga yoki avtomobil yoʻliga egalik qiluvchi subyektlar tomonidan amalga oshiriladi.

11. Avtotransport vositalarining toʻxtab turish joylaridan uzoq va noqulay joyda joylashgan infratuzilma obyektlari (sogʻliqni saqlash muassasalari, sport-sogʻlomlashtirish majmualari, ijtimoiy obyekt va boshqalar) atrofida nogironligi boʻlgan shaxslarning avtotransport vositalari toʻxtab turish joylari tashkil etiladi.

Nogironligi boʻlgan shaxslar avtotransport vositalarining toʻxtab turish joylari mazkur Nizomning 2-ilovasiga muvofiq namunaviy chizma asosida jihozlanadi.

12. Avtotransport vositalarining toʻxtab turish joylaridan uzoq va noqulay joyda joylashgan infratuzilma obyektlari atrofidagi nogironligi boʻlgan shaxslarning avtotransport vositalari toʻxtab turish joylari mazkur Nizomning 8-bandiga muvofiq oʻlchamlarda boʻlishi lozim.

13. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladilar.

14. Mazkur Nizom Oʻzbekiston Respublikasi Savdo-sanoat palatasi bilan kelishilgan.