“Oʻzbekiston Respublikasining Davlat mustaqilligi asoslari toʻgʻrisida”gi, shuningdek, mualliflar huquqini himoya qilishga taalluqli amaldagi qonunlarga binoan, Mualliflik huquqlari boʻyicha Butunjahon (Jeneva) konvensiyasi qoidalari va inson huquqlari Deklaratsiyasiga muvofiq Vazirlar Mahkamasi qaror qiladi:

1. Oʻzbekiston Respublikasida mualliflik huquqini himoya qilish sohasida yagona davlat siyosatini amalga oshirish mualliflik huquqini himoya qilish vakilligining xalqaro faoliyatini taʼminlash hamda yetuk milliy adabiyot, fan va sanʼat asarlarini targʻib qilish maqsadida 1992-yil yanvardan boshlab Butunittifoq Mualliflik huquqini himoya qilish vakilligining Oʻzbekiston boʻlimi Oʻzbekiston Respublikasi Mualliflik huquqini himoya qilish vakilligiga aylantirilsin. Uning xodimlari soni 11 nafardan iborat etib belgilansin.

2. Oʻzbekiston Respublikasi Mualliflik huquqini himoya qilish vakilligining ilova qilingan Nizomi tasdiqlansin.

Oʻzbekiston Respublikasi mualliflik huquqini himoya qilish vakilligining oʻz vakolati doirasida qabul qilgan tegishli qarorlari va boshqa hujjatlarning Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar, noshirlik, teatrlashgan konsert tashkil etish bilan shugʻullanadigan va oʻz faoliyatida turli sanʼat namunalaridan foydalanadigan tashkilot va muassasalar, korxonalar, shirkatlar, xususiy firmalar, shuningdek fuqarolar tomonidan bajarilishi majburiydir.

3. Oʻzbekiston Respublikasi Moliya vazirligi Oʻzbekiston Respublikasi Mualliflik huquqini himoya qilish vakilligi idorasi xodimlariga 1992-yil uchun Vakillik oʻz daromadi bilan qoplay ololmaydigan sarf-xarajatlariga mablagʻ ajratishni nazarda tutsin hamda 1,5 smena ishlaydigan yengil avtomashina saqlash uchun limit ajratsin.

Belgilab qoʻyilsinki, vakillikning xarajatlari daromadlaridan oshib ketganda kamomad davlat budjeti hisobidan qoplanadi.

4. Oʻzbekiston Respublikasi Mualliflik huquqini himoya qilish vakilligi bir oy mobaynida oʻz faoliyatini belgilovchi meʼyoriy hujjatlarni tayyorlab Vazirlar Mahkamasiga tasdiqlash uchun taqdim etsin.

1. Oʻzbekiston Respublikasi Mualliflik huquqini himoya qilish vakilligi Oʻzbekiston Respublikasi Konstitutsiyasi hamda amaldagi qonunlar va ushbu Nizom asosida ish yurituvchi, Oʻzbekiston Respublikasida mualliflik huquqini himoya qilish sohasida yagona davlat siyosatini amalga oshiruvchi respublika davlat tashkilotidir.

2. Oʻzbekiston Respublikasi Mualliflik huquqini himoya qilish vakilligi Oʻzbekiston Respublikasi hududida mualliflar va ularning merosxoʻrlari haq-huquqini himoya qiluvchi yagona tashkilotidir.

3. Oʻzbekiston Respublikasi Mualliflik huquqini himoya qilish vakilligi Butunittifoq Mualliflik huquqini himoya qilish vakilligi Oʻzbekiston Respublikasi boʻlimining vorisidir.

4. Oʻzbekiston Respublikasi Mualliflik huquqini himoya qilish vakilligini qayta tashkil qilish yoki tarqatib yuborish Oʻzbekiston Respublikasi Vazirlar Mahkamasi tomonidan amaldagi qonunlarda belgilangan tartibda amalga oshiriladi.

5. Oʻzbekiston Respublikasi Mualliflik huquqini himoya qilish vakilligi:

oʻz nomi bitilgan, davlat gerbi tasviri tushirilgan muhrga;

vakillik nomi va idora manzilgohi koʻrsatilgan toʻrtburchakli shtampga;

ish qogʻoziga;

ramziga ega boʻladi.

6. Vakillikda ish yuritish Oʻzbekiston Respublikasi davlat tilida, xalqaro aloqalarda rus va ingliz tillarida olib boriladi.

7. Oʻzbekiston Respublikasi Mualliflik huquqini himoya qilish vakilligi oʻz ish faoliyatini boshqa davlatlar va xalqaro tashkilotlar bilan ikki tomonlama shartnomalar tuzish asosiga koʻradi.

8. Mualliflik huquqini himoya qilish vakilligi, respublikadan tashqarida istiqomat qiluvchi huquqiy shaxslar bilan, komission ajratmalar olish nazarda tutilgan ikki tomonlama shartnomalar, bitimlar va kelishuvlar asosida oʻz munosabatlarini oʻrnatadi.

Respublika hududida istiqomat qiluvchi mualliflar bilan tuzilgan shartnomalar, bitim va kelishuvlar asosida mualliflik qalam haqidan komission ajratmalar olinadi.

9. Oʻzbekiston Respublikasi Mualliflik huquqini himoya qilish vakilligi Toshkent shahrida joylashgan.

10. Oʻzbekiston Respublikasi Mualliflik huquqini himoya qilish vakilligining maqsad va vazifalari quyidagilardan iborat:

respublika va chet el mualliflarining adabiyot, fan va sanʼatga taalluqli asarlaridan Oʻzbekiston Respublikasi hududida foydalanilganda, shuningdek, Oʻzbekiston Respublikasida istiqomat qiluvchi mualliflar asarlaridan respublikadan tashqarida foydalanilganda mualliflar yoki ularning merosxoʻrlari qonuniy haq-huquqlarini himoya qilish;

adabiyot, fan va sanʼat asarlari mualliflari haq-huquqlarini himoya qilishga yordam beruvchi huquqiy, maʼnaviy va moddiy shart-sharoitlar yaratib berishda faol ishtirok etish;

respublika hududida istiqomat qiluvchi mualliflar ijodini boshqa xalqlar oʻrtasida targʻib qilish, madaniyat va mualliflik huquqi sohasida xalqaro hamkorlikni rivojlantirish;

fan va madaniyat sohasida xalqaro hamkorlikni kengaytirish.

11. Yuqorida koʻrsatilgan vazifalarni bajarish uchun vakillik quyidagi ishlarni amalga oshiradi:

respublika va chet el mualliflari hamda ularning merosxoʻrlarining huquqlarini himoya qilishga vakolat berish, qoida buzishlarning oldini olish va buzilgan haq-huquqlarni tiklash uchun barcha choralarni koʻrish;

mualliflarning mualliflik huquqlari bilan qoʻriqlanadigan asarlaridan foydalanish uchun huquqiy va jismoniy shaxslar bilan shartnomalar tuzishda vositachilik qilish va shartnomalar tuzish (huquq beruvchidan vakolat olgan holda);

mualliflik huquqini himoya qilish boʻyicha Hukumat tasarrufidan tashqaridagi xalqaro tashkilotlarning faoliyatida ishtirok etish;

mualliflik huquqini oʻzaro himoya qilish boʻyicha xalqaro bitim va shartnomalarni tayyorlash va tuzishda, Mualliflik huquqlari boʻyicha Butunjahon (Jeneva) konvensiyasi ishtirokchisi boʻlgan mamlakatlarning tegishli tashkilotlari bilan bitimlar tuzishda qatnashish;

tegishli xorijiy tashkilotlar bilan tuzilgan oʻzaro shartnomalarga koʻra mualliflar va ularning asarlarini hisobga olishga taalluqli axborotlar, mualliflik huquqini himoya qilishni taʼminlash uchun zarur boʻlgan hujjatlar va boshqa materiallarni almashish;

hamkorlik toʻgʻrisida xorijiy sheriklar bilan muzokaralar olib borish, xorijiy huquqiy va jismoniy shaxslar bilan tegishli bitimlar tuzish;

xorijiy firmalar va tashkilotlar bilan birgalikda respublikada va undan tashqarida mualliflik huquqini himoya qilish masalalariga hamda madaniyat yutuqlarini ayirboshlashga taalluqli xalqaro anjumanlar, kitob yarmarkalari, koʻrgazmalar, festivallar va boshqa tadbirlarni tashkil etish va ularda ishtirok etish;

manfaatdor vazirliklar, idoralar, ijodiy uyushmalar va birlashmalar bilan birgalikda milliy adabiyot, fan va sanʼat asarlarini xorijda targʻib etish va reklama qilish, Oʻzbekiston Respublikasining siyosiy, iqtisodiy va madaniy manfaatlarini koʻzlagan holda respublikada chet el mualliflarining asarlaridan foydalanishga koʻmaklashish;

mualliflik huquqini himoya qilish toʻgʻrisidagi respublika qonunlarini hayotga tatbiq etish tajribasini, shuningdek, mualliflik huquqini himoya qilish boʻyicha xorijiy qonunlarni va tajribani oʻrganish, mualliflik huquqiga taalluqli takliflarni ishlab chiqish, Oʻzbekiston Respublikasi hududida mualliflik huquqini himoya qiluvchi turli tashkilotlarning faoliyatini muvofiqlashtirish;

Oʻzbekiston Respublikasining joriy qonunlari asosida va oʻsha qonunlarni bajarish uchun mualliflik huquqini himoya qilish masalalari boʻyicha oʻz vakolati doirasida tegishli yoʻriqnomalar va tushuntirishlar ishlab chiqish;

kino-, tele-, videofilmlar, gramplastinkalar, lazer disklari, magnit yozuvlarida nusxa koʻchirganligi hamda sanʼat asarlaridan oʻz mahsulotlarida foydalanganlik uchun belgilangan tartibda, amaldagi qonun asosida qoʻshimcha haq (tirajiga qarab) undirib olish hamda respublikada va xorijda yashovchi mualliflarga yoki ularning merosxoʻrlariga toʻlash;

Oʻzbekiston Respublikasi hududida istiqomat qilgan mualliflar asarlaridan respublikada va undan chetda foydalanganlik uchun qalam haqini belgilangan tartibda olish va ularning merosxoʻrlariga toʻlash;

respublikada yashovchi va xorijiy mualliflar asarlaridan magnit, audiovizual va boshqa yozuvlarda foydalanganlik uchun mualliflik qalam haqini yigʻish va toʻlash;

shartnomalar va bitimlarga muvofiq musiqa, adabiyot, jurnalistika va boshqa jamgʻarmalarga, shuningdek, tashkilotlarga ajratmalar yigʻish va toʻlash;

mualliflik qalam haqi Oʻzbekiston Respublikasi Mualliflik huquqini himoya qilish vakilligi orqali toʻlanadigan asarlardan tashqari, respublika hududida ommaviy ijro etilgan asarlar va ularning mualliflarini roʻyxatga olish;

vakillikning maxsus ishlab chiqilgan yoʻriqnomasi asosida adabiyot, fan va sanʼat asarlari muallifini roʻyxatga olish;

noshirlik, teatrlashgan konsert tashkil etish bilan shugʻullanadigan va oʻz faoliyatlarida turli sanʼat namunalaridan foydalanadigan kichik va boshqa turdagi korxonalar, kooperativlar, xususiy firmalar, tashkilot va muassasalar, shuningdek, fuqarolarni hisobga olish.

12. Oʻz ish faoliyatida Oʻzbekiston Respublikasi Mualliflik huquqini himoya qilish vakilligi quyidagi huquqlarga ega:

mualliflarga qalam haqi toʻlovchilar, turli jamgʻarmalarga mablagʻ oʻtkazuvchilarning tegishli hujjat va materiallarini tanishish va solishtirish uchun talab qilib olish;

asar roʻyxatga olinganligi toʻgʻrisida maʼlumotnoma berish.

13. Oʻzbekiston Respublikasi Mualliflik huquqini himoya qilish vakilligining raisi Oʻzbekiston Respublikasi Vazirlar Mahkamasi tomonidan tayinlanadi va boʻshatiladi.

Oʻzbekiston Respublikasi Mualliflik huquqini himoya qilish vakilligining raisi:

vakillik ish faoliyatiga rahbarlik qiladi;

chet el va xalqaro tashkilotlar, shuningdek, huquqiy shaxslar bilan oʻzaro munosabatda, vakillikning vazifalarini bajarishda vakillik nomidan ish koʻradi;

vakillik mablagʻlarini taqsimlaydi, moliyaviy rejalarning bajarilishini, shuningdek, kirim va chiqimlar smetasini nazorat qilib boradi;

vakillik shtat jadvalini tasdiqlaydi;

vakillik vakolatiga kiruvchi boshqa masalalarni koʻrib chiqadi;

vakillik vakolati doirasida vakillikning barcha xodimlari uchun bajarish majburiy boʻlgan buyruqlar, farmoyishlar chiqaradi va koʻrsatmalar beradi

14. Vakillik raisining oʻrinbosari, vakillik boʻlinmalarining rahbarlari Oʻzbekiston Respublikasi Mualliflik huquqini himoya qilish vakilligi raisining buyrugʻi bilan ishga tayinlanadi va boʻshatiladi.

15. Oʻzbekiston Respublikasi Mualliflik huquqini himoya qilish vakilligining rais oʻrinbosari, struktura boʻlinmalari boshliqlari vakillik faoliyatining tegishli boʻlimlardagi ishning ahvoli uchun toʻla javob beradilar.

16. Oʻzbekiston Respublikasi Mualliflik huquqini himoya qilish vakilligi huquqiy shaxs hisoblanadi, asosiy va oborot mablagʻlariga ega boʻladi, oʻz nomidan huquq va majburiyat olishi, oʻz vazifalaridan kelib chiqqan holda turli kelishuvlar va shartnomalar tuzishi, sudda, hakamlikda va hakamlik sudida daʼvogar, javobgar boʻlishi, hisob-kitob schyotlari, shuningdek, valyuta schyoti ochishi, vakillik manfaatlarini nazarga olgan holda kredit olishi va vakillik vazifalarini bajarish uchun zarur boʻlgan boshqa xoʻjalik ishlarini yuritishi mumkin.

17. Oʻzbekiston Respublikasi Mualliflik huquqini himoya qilish vakilligi xoʻjalik mustaqilligi asosida ishlovchi xoʻjalik hisobidagi tashkilotdir.

Uning daromadlari adabiyotchilar, musiqachilar, jurnalistlar va respublikaning boshqa ijodiy uyushmalaridan kelib tushadigan hamda vakillik yigʻadigan boshqa komission yigʻimlardan tashkil topadi.

Xarajatlar daromaddan oshib ketganda kamomad davlat budjeti hisobidan qoplanadi.

18. Oʻzbekiston Respublikasi Mualliflik huquqini himoya qilish vakilligining xoʻjalik yili kalendar yilning 1-yanvaridan 31-dekabrigacha qilib belgilanadi. Vakillikning hisob-kitobi hisobot toʻgʻrisidagi respublika yoʻriqnoma va nizomlari asosida olib boriladi.

19. Oʻzbekiston Respublikasi Mualliflik huquqini himoya qilish vakilligining shtat jadvali vakillik raisi tomonidan tasdiqlanadi.

20. Oʻzbekiston Respublikasi Mualliflik huquqini himoya qilish vakilligining moliyaviy faoliyatini taftish qilish va tekshirish respublika moliya tashkilotlari tomonidan amalga oshiriladi.