So‘nggi yillarda respublikamizda yerlardan oqilona va samarali foydalanishni tashkil etish, yer munosabatlarini tartibga solish, yerlardan foydalanishda davlat nazoratini kuchaytirish borasida qator chora-tadbirlar amalga oshirildi.

Shu bilan birga, yerlardan foydalanishda davlat nazoratini samarali tashkil etish, sohaga zamonaviy texnologiyalarni joriy etish, yer resurslarini hisobga olish ishlari yetarli darajada tashkil etilmasdan qolmoqda.

Jumladan, Qoraqalpog‘iston Respublikasi, viloyatlar, Toshkent shahri, tumanlar (shaharlar), shaharchalar, qishloqlar (ovullar) chegaralarining koordinatalar tizimiga bog‘lanmaganligi hududlarda yer hisobotini yuritish, yer ajratish, yer munosabatlarini tartibga solish borasida muammolarga sabab bo‘lmoqda.

Shuningdek, mavjud 21 mln. gektar yaylov va pichanzorlardan samarali foydalanish, o‘simliklarning turi va sonini ko‘paytirish, hosildorligini oshirish, chorva mollarini tartibli almashlab boqishni yo‘lga qo‘yish, yaylov va pichanzorlar degradatsiyasining oldini olish maqsadida geobotanik tadqiqotlarni o‘tkazish yuzasidan tadbirlar umuman nazoratdan chetda qolib ketgan.

Natijada so‘nggi 25 — 30 yilda yaylov va pichanzorlarning 35 — 40 foizi degradatsiyaga uchragan, o‘simliklar turi va soni 20 foizga kamayib, hosildorlik 1,5-2 barobarga tushib ketgan.

Bundan tashqari, Qoraqalpog‘iston Respublikasi, viloyatlar, Toshkent shahri, tumanlar (shaharlar) ma’muriy chegaralarini belgilash, yer resurslarini xatlovdan o‘tkazish va hisob-kitobini yo‘lga qo‘yish ishlari tizimli tashkil etilmaganligi sababli joylarda ichki chegaralarni aniqlashda turli muammolar yuzaga kelmoqda.

Yuqoridagilarni inobatga olib hamda yerlarni muhofaza qilish va ulardan oqilona foydalanish yuzasidan davlat nazoratini kuchaytirish, yer resurslarini aniq hisobini yuritishni tizimli yo‘lga qo‘yish, qishloq xo‘jaligi yerlaridan, jumladan, sug‘oriladigan, lalmi va yaylov yerlardan foydalanish samaradorligini oshirish maqsadida Vazirlar Mahkamasi qaror qiladi:

1. O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi, Qishloq xo‘jaligi vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan ishlab chiqilgan:

Ma’muriy-hududiy birliklar chegaralarini belgilash tartibi to‘g‘risidagi nizom 1-ilovaga* muvofiq;

Yer resurslarini xatlovdan o‘tkazish tartibi to‘g‘risidagi nizom 2-ilovaga* muvofiq;

Yaylov va pichanzorlarda geobotanik tadqiqot ishlarini o‘tkazish tartibi to‘g‘risidagi nizom 3-ilovaga* muvofiq tasdiqlansin.

2. O‘zbekiston Respublikasi Moliya vazirligi ma’muriy-hududiy birliklar chegaralarini belgilash, yer resurslarini xatlovdan o‘tkazish hamda yaylov va pichanzorlarda geobotanik tadqiqotlarni o‘tkazish ishlari Davlat budjetining yillik ajratiladigan parametrlariga qo‘shimcha mablag‘lar hisobiga moliyalashtirilishini ta’minlasin.

3. O‘zbekiston Respublikasi Davlat soliq qo‘mitasi huzuridagi Kadastr agentligi, Qishloq xo‘jaligi vazirligi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda:

2018 — 2026-yillar mobaynida ma’muriy-hududiy birliklar chegaralari belgilanishini, yer resurslari xatlovdan o‘tkazilishini, yaylov va pichanzorlarda geobotanik tadqiqotlar o‘tkazilishini ta’minlasin;

yer resurslarini xatlovdan o‘tkazish natijalariga ko‘ra, Qoraqalpog‘iston Respublikasi, viloyatlar va Toshkent shahri hududlari bo‘yicha yer resurslarining toifalari va turlarini o‘zgartirish, yer to‘g‘risidagi qonun hujjatlari buzilishi holatlarini bartaraf etish, yer resurslaridan maqsadli va samarali foydalanishni tashkil etish, holati yomonlashgan va degradatsiyaga uchragan maydonlarni tiklash yoki konservatsiya qilish yuzasidan O‘zbekiston Respublikasi Vazirlar Mahkamasiga takliflar kiritib borsinlar.

4. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

ma’muriy-hududiy birliklar chegaralarini belgilash va yer resurslarini xatlovdan o‘tkazishni muvofiqlashtiruvchi komissiyani 4-ilovaga* muvofiq bir hafta muddatda namunaviy tarkibda tashkil etsinlar;

ma’muriy-hududiy birliklar chegaralarini belgilash ishlari yakunlangandan so‘ng bir oy muddatda zaruratga ko‘ra, qonun hujjatlarida belgilangan tartibda ma’muriy-hududiy birliklar chegaralarini belgilash yoki ularga o‘zgartirish kiritish bo‘yicha O‘zbekiston Respublikasi Vazirlar Mahkamasiga, Qoraqalpog‘iston Respublikasi Jo‘qorg‘i Kengesiga hamda tegishli xalq deputatlari viloyat Kengashlariga takliflar kiritilishini ta’minlasinlar.

5. Belgilab qo‘yilsinki, O‘zbekiston Respublikasi Davlat soliq qo‘mitasi huzuridagi Kadastr agentligi va Qishloq xo‘jaligi vazirligining yerdan foydalanish va uni muhofaza qilishni nazorat qilish bo‘yicha davlat inspektorlari tashkiliy-huquqiy shaklidan qat’iy nazar, yerdan foydalanuvchilar tomonidan ularga ajratib berilgan yerlardan foydalanish holatini (moliyaviy xo‘jalik faoliyatiga aralashmagan holda) muntazam monitoring qilib borish huquqiga ega.

6. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari Z.T. Mirzayev hamda O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi raisi A.H. Abdullayev zimmasiga yuklansin.