O‘zbekiston Respublikasi Prezidentining “Mahalliy eksport qiluvchi tashkilotlarni yanada qo‘llab-quvvatlash va tashqi iqtisodiy faoliyatni takomillashtirish chora-tadbirlari to‘g‘risida” 2017-yil 21-iyundagi PQ-3077-son qarorini bajarish yuzasidan Vazirlar Mahkamasi qaror qiladi:

1. O‘zbekiston Respublikasi Hukumatining ilovaga muvofiq ayrim qarorlariga o‘zgartirish va qo‘shimchalar kiritilsin.

2. Vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — “O‘zagrotexsanoatxolding” AJ boshqaruvi raisi N.S. Otajonov va O‘zbekiston Respublikasi tashqi savdo vaziri E.M. G‘aniyev zimmasiga yuklansin.

3. Vazirlar Mahkamasining 2004-yil 6-iyuldagi 318-son qarori (O‘zbekiston Respublikasi QT, 2004-y., 7-son, 63-modda) bilan tasdiqlangan Mahsulotlarni sertifikatlashtirish tartibi to‘g‘risidagi nizomda:

a) 5-band quyidagi tahrirda bayon qilinsin:

“Mahsulotning (transport vositalaridan tashqari) muvofiqlik sertifikatini rasmiylashtirish va berish muddati barcha zarur hujjatlar (sinov protokollari, tadqiqot dalolatnomalari, sanitariya-epidemiologiya, veterinariya, fitosanitariya xulosalari, ekologik ekspertiza xulosasi) berilgan vaqtdan boshlab uch ish kunidan oshmasligi lozim”;

b) 23-bandga quyidagi mazmundagi birinchi xatboshi qo‘shilsin:

“Ma’lum turdagi mahsulotni sertifikatlash maqsadida sinovlar protokolini rasmiylashtirish va berish muddati ushbu turdagi mahsulotni texnik tartibga solish sohasidagi normativ hujjatlar bilan belgilanadigan uslublarga muvofiq sinovlardan o‘tkazishning umumiy davom etish vaqtidan kelib chiqqan holda belgilanadi”;

birinchi va ikkinchi xatboshilar tegishli ravishda ikkinchi hamda uchinchi xatboshilar deb hisoblansin;

v) 27-bandning to‘rtinchi xatboshi quyidagi tahrirda bayon qilinsin:

“Muvofiqlik sertifikatini rasmiylashtirish va berish muddati sertifikatlashtirish organidan ushbu Nizomda nazarda tutilgan barcha zarur hujjatlar olingan vaqtdan boshlab uch ish kunidan oshmasligi kerak.”;

g) Nizomga ilovada:

Mahsulotlarni sertifikatlashtirish tartiboti sxemasidagi “muvofiqlik sertifikati”, “Muddat: 10 kungacha” va “Sertifikatlashtirish tartibotining umumiy muddati 10 kundan 30 kungachani tashkil etadi” so‘zlari tegishli ravishda “muvofiqlik sertifikatini rasmiylashtirish va berish”, “Muddat: 3 ish kunigacha”, va “Sertifikatlashtirish tartibotining umumiy muddati ushbu turdagi mahsulotni texnik tartibga solish sohasidagi normativ hujjatlar bilan belgilanadigan uslublarga muvofiq sinovlardan o‘tkazishning umumiy davom etish vaqtidan kelib chiqqan holda belgilanadi” so‘zlari bilan almashtirilsin.

Izohlarning 6-bandidagi “15 ish kunidan” so‘zlari “3 ish kunidan” so‘zlari bilan almashtirilsin.

4. Vazirlar Mahkamasining 2005-yil 9-avgustdagi 189-son qarori (O‘zbekiston Respublikasi QT, 2005-y., 8-son, 40-modda) bilan tasdiqlangan O‘zbekiston Respublikasining xo‘jalik yurituvchi subyektlari tomonidan xorijiy mamlakatlardagi ular tashkil etgan savdo uylari, vakolatxonalar, korxonalar orqali, shuningdek O‘zbekiston Respublikasi savdo-sanoat palatasining xorijiy mamlakatlardagi savdo-investitsiya uylari orqali olib chiqilayotgan tovarlarni bojxonada rasmiylashtirish tartibi to‘g‘risidagi nizomning 6-bandida:

a) ikkinchi xatboshidagi “eksportchining o‘zi ishlab chiqargan mahsulotlar” so‘zlari “eksportchining o‘z mahsulotlari” so‘zlari bilan almashtirilsin;

b) uchinchi xatboshi quyidagi tahrirda bayon qilinsin:

“eksportchilarning o‘z mahsulotlari (yangi meva-sabzavot mahsulotlari, uzum va poliz mahsulotlaridan tashqari) ustav jamg‘armasida eksportchining ulushi kamida 51 foizni tashkil qiladigan chet eldagi korxona nomiga eksport qilinganda, ushbu bandning oltinchi xatboshi bundan mustasno”.